Ano an Kaaabtan kan Planetang Daga?

SA NAKAAAGI pa sanang mga taon an dakol na mapaghorophorop na mga tawo nakaabot sa makatatakot na konklusyon manongod sa ngapit. Sinda naghohona na an planetang Daga tibaad maraot bilang erokan nin katawohan. An sarong dahelan na ini an saindang paghona iyo an peligro nin nuklear na pagkatunaw.

Madaling masabotan kun taano ta igwa nin siring na kahaditan. An darakulang kapangyarihan sa kinaban armado nin manampulong ribo nin nuklear na mga armas sagkod na sobra-sobra na an panlaglag ninda, asin ikinatatakot na maabot an aldaw na iyan gagamiton. An namomoon sa sarong dakulang nasyon nagsabi na an Guerra Mundial III dai malilikayan baga man gamiton o dai an nuklear na mga armas.

An iba naghohona na dawa kun mayo nin nuklear na pagkatunaw, an ngapit kan daga namemeligro huli sa panglobong polusyon asin sobrang populasyon. An tolong-taon na pagsiyasat nin mga opisyales sa gobyerno kan E.U. nagkonklusyon: “An presenteng mga pangyayari gigibohon an kinaban sa taon 2,000 na mas surusuan, mas maati, mas bakong segurado an ekolohiya, asin mas madaling mabiktima nin panriribok kisa ngonyan.”

An pagsiyasat na iyan ginibo mga pirang taon na an nakaagi. Poon kaidto, an dalagan nin mga bagay pasiring sa direksion na sinasabi kaiyan.

Sa bagay na ini, an sarong sientistang Australiano nagsabi: “An atmospera kan daga nagigin sobra an ati asin kun mayo kita nin gigibohon sa masunod na dekada, tibaad huri na.” Asin an The Bulletin kan Sydney, Australia, nagkomento: “An nagpuputok na populasyon kan kinaban nagtatao nin senyal sa mas grabe pang problema sa maabot para sa dati nang surusuan na mga lugar.”

Huli sa mga katunayan na ini, an sarong opisyal kan gobyerno sa Australia nagsabi: “Ipinakikiolay ko saindo na girumdomon an sarong pundamental na hapot: igwa pa daw nin kinaban na matatada para sa saindo o sa saindong mga aki pakalihis nin 20 anyos, o an daga daw magigin tutong, daing datang globo na mamondong naglilibot sa espasyo?” An autor na si Jonathan Schell nagpatanid man na kun daing solusyon na makukua, an mangyayari iyo na “sagkod noarin pa man dai na otro malataw sa daga an tawo, asin mayo nin siisay man na makagigirumdom na sinda naglataw dian.”

Dai mapagdududahan na yaon an gabos na bagay na makakokontribuwir sa mamondong ngapit kun magpadagos an presenteng mga pangyayari. Kun an daga dai matutong sa sarong guerra nuklear, segurado na iyan paorog nang paorog na magigin surusuan asin maati, na mauubos nang orog an natural na mga kayamanan kaiyan. An bilang nin nagtitios na mga tawo malabi pang gayo sa dati nang makamomondong kabilangan ninda. An krimen asin kadahasan segurado man na madakol nin labi pa sa dati nang makatatakot na katunayan.

Siisay an Nagdedeterminar sa Ngapit?

Kun totoo na an mga tawo sana an may paninimbagan sa saindang kaaabtan, tunay na makamomondo an mga paglaom. Alagad an dai nakokonsiderar nin kadaklan na tawo iyo ini: An mga tawo bakong iyo an madeterminar sa kaaabtan kan planetang Daga! An kaaabtan kaiyan nadeterminaran na—asin bakong nin mga tawo! Pero kun bakong nin mga tawo, niisay?

Bueno, siisay an naglalang sa daga bilang erokan nin tawo? An totoong simbag yaon sa Biblia, an ipinasabong nin Dios na giya sa katawohan. Iyan nagtataram manongod sa “tunay na Dios, si Jehova,” bilang “an Kaglalang kan kalangitan asin an Dakulang Saro na nagbibiklad sa sainda; an Saro na nagbibiklad sa daga asin sa mga bunga kaiyan, an Saro na nagtatao nin hinangos sa mga tawong nageerok dian.”—Isaias 42:5; 2 Timoteo 3:16, 17.

Ipinaheheling daw kan Biblia na si Jehova Dios igwa nin sadiring katuyohan para sa dagang ini asin sa mga tawong nasa ibabaw kaiyan? Iyo nanggad. An totoo, an pinakatema kan bilog na Biblia manongod sa bagay na an Dios igwa nin katuyohan para sa planetang Daga asin na ootobon nia an saiyang katuyohan na daing pagkasudya. Dai kaiba sa katuyohan na iyan an pagpabaya na iyan magin radyoaktibong abo o atian asin magin surusuan, tangani na iyan maraot.

Imbes, may mangyayaring dakulang pagkaliwat sa presenteng dalagan nin mga pangyayari na pag-ati asin pagsobra nin tawo sa daga patin posibleng pagpara nin katawohan sa sadiri paagi sa guerra nuklear. An malinaw an pagkasabing katuyohan nin Dios iyo na “laglagon idtong mga naglalaglag kan daga.” (Kapahayagan 11:18) Kadungan kaiyan, ipinaheheling kan Tataramon nin Dios na an paghade hahaleon sa mga tawo asin ibubugtak sa maninigong mamugtakan kaiyan, sa kamot kan Kaglalang.—Daniel 2:44.

Nasa sato an garantiya nin Dios na an makamomondong pangyayari na biyong pagkalaglag o pagkaraot noarin man dai mangyayari sa satong daga. Paagi ki propeta Isaias, sinisierto nin Dios na sia “dai linalang [an daga] na daing laog, kundi ginibo iyan na magin lugar na iistaran.”—Isaias 45:18, The New English Bible.

Sarong Marahay na Kaaabtan

Salamat sana ta an Banal na Biblia nagtatao sato nin marahayon na paglaom para sa ngapit. Tunay na an tawo mabubuhay sa daga 20, 30, asin dai mabilang na mga taon poon ngonyan. An planetang Daga noarin man dai magigin “tutong, daing datang globo,” arog kan ipinatanid kan opisyal na Australiano. Asin masasarigan niato an mga panuga kan Kaglalang sa daga na an satong planeta asin an pamilya nin tawo makaliligtas huli ta bakong an tawo kundi an Makakamhan sa gabos na Kaglalang iyo an may pinakadakulang kapangyarihan.

Kaya minsan ngani an dakol na tawo sa ika-20 siglo natatakot sa pagkapara paagi sa sadiri nindang kamot o sa paglaglag sa daga huli sa polusyon asin sobrang populasyon, dai sinda totogotan na gibohon iyan. “Kadakol kan plano sa puso nin tawo, alagad an hatol ni Jehova iyo an magdadanay,” sinisierto sato kan Tataramon mismo nin Dios.—Talinhaga 19:21; helingon man an Isaias 46:10; 55:11.

Alagad kun totoo na an daga dai nakatalagang malaglag o maraot, ano an kahulogan kan termino na nasa laen-laen na bersion kan Biblia, sa Mateo 24:3, “an katapusan kan kinaban”? Ano an kinaban na sinasabing matatapos? Noarin iyan mangyayari? May mga makaliligtas daw? Inaagda mi kamo na basahon an minasunod na artikulo para sa simbag sa nagsisiyasat na mga hapot na ini.