Saro daw na Modernong Torre nin Babel?

AN SUANOY na Torre nin Babel nagin simbolo nin karibarawan asin pagkabaranga. Duman rinibaraw nin Dios, mga 4,000 na taon na an nakaagi, an tataramon kan mga tawo. Taano? Huli sa saindang pagrebelde tumang sa saiya. Isinikwal ninda an pagkuyog sa Dios asin imbes isinentro an saindang buhay sa mga plano nin mga tawong bakong sangkap. Kaya pinagsuruhaysuhay sinda nin Dios.—Genesis 11:1-9.

Laen daw nanggad an nangyari sa Assisi? Nagkasararo daw liwat an mga tawo duman? Talaga daw na an relihiyosong mga namomoon sa labing duwang bilyon katawo nagpalakop sa pankinaban na katoninongan?

May Pagkasararo Daw?

Sa sarong pahayag na itinao mga pira sanang aldaw bago kaini, idinoon kan papa: “An mangyayari sa Assisi tunay na bakong relihiyosong syncretism [pagkasararo].” Idinugang nia: “Dai kami puwedeng mamibi nin iriba, an boot sabihon, mag-iriba sa saro sanang pamibi, pero puwede kaming magin presente mantang namimibi an iba.”

Kaya ipinaheling kan papa na an pamantayan na susundon sa pamimibi para sa katoninongan iyo an pagtiripon tanganing mamibi, bakong mamibi nin iriba. Naobserbaran nin iba na boot niang likayan an pakikikabtang sa saro sanang pamibi. Sa siring dai sia mapagsasahotan nin mga Katoliko na pinagsasaralak an laen-laen na relihiyosong paniniwala.

Ini pinatutunayan kan pahayag kan papa sa pag-ako sa mga namomoon nin relihiyon kan agang idto. Idinoon nia nanggad: “An bagay na kita nagdigdi dai nagpaparisa nin ano man na intension na humanap nin relihiyosong pagkaoroyon sa tahaw niato o makipagnegosyar kan satong pagtubod. Ni nangangahulogan man iyan na an mga relihiyon puwedeng papagkaoyonon sa saro sanang promesa sa sarong daganon na proyekto na makalalabi sa sainda gabos.”

Kun siring, dai nanggad nin gigibohon na paghihingoa na papagkaoyonon an dakol na pagkalaenlaen nin relihiyosong mga katokdoan na ipinagrerepresentar kan mga nagtiripon sa Assisi. Kaya imposible an relihiyosong pagkasararo. Magpapadagos an karibarawan nin ‘relihiyosong mga tataramon.’ Kaya, tunay na ini nakaaagid nanggad sa suanoy na Torre nin Babel.

An relihiyosong pagkabarangang ini maririsa sa mga paniniwala. Halimbawa, an Budhismo dai naniniwala sa pag-eksister nin sarong personal na Dios, na nagtotokdo na an ultimong pasohan nin tawo Nirvana, kamugtakan nin absolutong kapaladan na naaabot paagi sa pagkapara kan sadiri. An mga Hindu naniniwala sa minilyon na dios asin sa daing katapusan na siklo nin mga reenkarnasyon na makadadara sa Nirvana. An mga relihiyon na Katoliko, Ortodokso, asin Protestante naniniwala sa sarong Trinidad. Alagad an mga Muslim naniniwala na igwa nin sarong Dios, si Allah, asin na si Muhammad an saiyang propeta; minsan siring, dai sinda naniniwala na an Dios may aki. An mga Judio nagsasamba sa sarong Dios pero dai inaako si Jesus bilang an Mesiyas. An mga relihiyon na Aprikano naniniwala na an mga tinanom, hayop, asin daing buhay na mga bagay may espiritu. An mga Indian na Amerikano nagsasamba sa mga puwersa nin naturalesa.

Minsan siring, an tunay na katoninongan nagpaparisa nin kisuerra pundamental na pag-iriba, o pagsararo, nin laen-laen na tawo. Alagad ta an mga relihiyon na nagtiripon sa Assisi nagkakabarangang gayo na dai ngani sinda nagkaoroyon sa saro sanang pamibi! Tunay na dai maooyonan nin Dios an gabos na magkakakontrang ideyang ini ta, an isinurat ni apostol Pablo, “an Dios sarong Dios, bakong nin karibarawan, kundi nin katoninongan.”—1 Corinto 14:33.

Naghihinanyog daw an Dios?

Paano an solamenteng tunay na Dios, an Kaglalang sa langit asin daga, makapaghihinanyog na may pabor sa mga pamibi nin mga namomoon sa relihiyon na mayo nin intension na maghingoa para sa tunay na pagkasararo? An mismong ipinasabong na Tataramon nin Dios malinaw na nagsasabi na an mga naggigibo nin tunay na pagsamba “maninigong magtaram na may pagkaoroyon, asin na dai magkaigwa nin pagkabaranga dian sa [sainda], kundi na [sinda] dayupot na magkasararo sa saro sanang pag-isip asin sa saro sanang paghonahona.”—1 Corinto 1:10.

Kun an Dios maghihinanyog sa nagkakabarangang mga relihiyon na ini, kokontrahon nia an saiyang sadiri. Iyan magpaparisa kan saiyang pag-oyon sa bagay na kinokondenar nia—an pagkabaranga. Alagad ta an Dios nin katotoohan dai puwedeng magkasala nin pagkaigwa nin duwang pamantayan. Dai nia kokontrahon an sadiri niang Tataramon, ta an “Dios . . . dai makakapagputik.” (Tito 1:2) Kun siring, dai sia naghihinanyog na may pabor sa mga pamibi nin siring na barangang pagsamba.

Malinaw na ipinaheheling kan Biblia na an inooyonan sana nin Dios pagsamba na kaoyon sa saiyang kabotan. Si Jesus nagsabi: “Bakong an gabos na nagsasabi sako, ‘Kagurangnan, Kagurangnan,’ makalalaog sa kahadean nin kalangitan, kundi idtong naggigibo kan kabotan kan sakong Ama na nasa langit.” Sinabi man nia na an Dios “hinahanap,” an boot sabihon, inooyonan nia asin hinihinanyog sana an mga nagsasamba sa saiya “sa espiritu asin sa katotoohan.” Iyan ginigibo paagi sa pag-otob sa saiyang Tataramon asin pagkuyog sa saiyang mga pagboot. Kaya dai inooyonan nin Dios an relihiyon na dai nag-ootob sa saiyang kabotan, kun paanong dai nia inoyonan an mga nagtogdok sa Torre nin Babel, na dai man nag-ootob kan saiyang kabotan. Isinisikwal nia an siring na mga tawo. Arog kan sabi ni Jesus sa mga ginigibo an sadiri nindang kabotan imbes na an kabotan nin Dios: “Humarayo kamo sa sako, kamong mga paragibo nin katampalasanan.”—Mateo 7:21-23; Juan 4:23, 24.

Kaya, an espirituwal na kamugtakan kan mga relihiyon na nagtiripon sa Assisi kabaliktaran sa hinahagad nin Dios sa mga tunay na parasamba. Imbes na magkasararo sa saro sanang pag-isip asin paghonahona, sinda baranga, arog kan nangyari sa Torre nin Babel.

An bagay na an Dios dai naghihinanyog na may pabor sa mga pamibi kan arog-Babel na mga relihiyon kan kinaban na ini nagigin mas risa kun sisiyasaton niato an patotoo nin kasaysayan. Anong klaseng ladawan an itinatao kan patotoong iyan?

[Ritrato sa pahina 6]

Sarong torreng templo sa Babilonya