Teolohiya Liberasyon, an Biblia, Asin Kamo

“An gabos na kasuratan ipinasabong nin Dios asin may pakinabang na magagamit sa pagtotokdo, sa pagpahimutik sa sala, sa paggiya sa buhay nin mga tawo asin pagtotokdo sa sainda na magin banal.”—2 Timoteo 3:16.a

NANINIWALA daw kamo dian? Arin an mas importante sa saindo: An paglilingkod sa Dios sa paagi na boot nia na kamo maglingkod sa saiya o an paglilingkod sa saiya sa paagi na pinaghohona nindong pinakamarahay? ‘Siyempre,’ masabi kamo, ‘an solamenteng paagi iyo an paagi nin Dios!’ Talaga daw na sa paghona nindo an paagi nin Dios iyo an pinakamarahay? Kun iyo, kun siring maoyon kamo sa kapahayagan sa itaas na isinabi ni apostol Pablo.

Iyo, an Dios nagtaram, asin mababasa nindo an saiyang Tataramon. Inaagda mi kamong siyasaton an teolohiya liberasyon sa punto-de-vista kan Biblia. Basado daw sa Biblia an teolohiya liberasyon?

“Bako Kamong Kabtang kan Kinaban”

Sarong beses sinabihan ni Jesus an saiyang mga disipulo: “Bako kamong kabtang kan kinaban.” Kan banggi man sanang idto, an banggi bago sia magadan, sia nagsabi sa pamimibi sa saiyang Ama: “Itinao ko an saimong tataramon sa sainda, asin ikinaongis sinda kan kinaban, huli ta sinda bakong kabtang kan kinaban kun paanong ako bakong kabtang kan kinaban.” Dangan, haros kasunod tolos, inotro nia: “Bako sindang kabtang kan kinaban kun paanong ako bakong kabtang kan kinaban.”—Juan 15:19; 17:14, 16.

An kadaklan na relihiyon nin Kakristianohan dai naghihingoa na magin siblag sa kinaban. Tibaad nabasa na nindo iyan sa mga peryodiko. Saen man kamo humeling—sa mga Amerika, Asia, Europa, o Aprika—parareho an estorya. An klero nin haros gabos na relihiyon nasa langtad nin politika. Pero an pakikilabot ninda sa politika kan kinaban saro sana sa mga dai pakaoyon sa Tataramon nin Dios.

Makatanosan daw an Kadahasan?

An mga teologo sa liberasyon nagsasabi na an kadahasan makatanosan kun iyan ginagamit sa pagtabang sa mga pobre. Minsan an Batikano opisyal na nagsasabi ngonyan na an kadahasan makatanosan bilang “ultimong paagi.” Si Papa Juan Paulo II, sa sarong surat sa gabos na obispo sa Brazil, nagsabi na “an Teolohiya Liberasyon bako sanang napapanahon kundi kapakipakinabang man asin kaipuhan para sa Latin America.” Iyo daw ini an sinasabi kan Biblia?

Kan nasa daga, si Jesu-Cristo dai nakilabot sa sosyal na mga mobimiento kan kinaban. Al kontraryo, kan si apostol Pedro gumamit nin “minasbad” tanganing ipagdepensa an Aki nin Dios, sinaway sia ni Jesus sa pagsabi: “Sarungan an saimong minasbad, huli ta an gabos na minabingat kan minasbad magagadan sa minasbad.”—Mateo 26:52.

Alagad kumusta man an mga pakikilaban nin Israel? Sono sa Biblia, an Israel dai nag-agi sa pakikilaban bago sinda iligtas sa Egipto. (Exodo 13:17, 18) Pag-abot kan panahon, pinagbotan sinda nin Dios. Minsan siring, estriktong pinagbotan ni Jehova an Israel na an sasakopon sana ninda iyo an daga na ipinanuga nia sa saindang mga apoon.—Genesis 17:7, 8; Deuteronomio 2:5, 9, 19.

Mantang an mga Kristiano dai nakikilaban sa pisikal tumang sa dugo asin laman, sinda nakikilaban pa man giraray, sa espirituwal na pakikilaban. Arog kan malinaw na sinabi ni apostol Pablo: “Bakong tumang sa mga kaiwal na tawo na kita kaipuhan na makilaban, kundi tumang sa . . . espirituwal na hukbo nin karatan sa kalangitan.”—Efeso 6:12.

Kaya paano ipinangangatanosan kan klero nin Kakristianohan an kadahasan ngonyan?

Nasa Ikatolong Lugar an Tataramon nin Dios!

An teologo sa liberasyon na si Gustavo Gutiérrez nagsabi sa Magmata! na an sarong katokdoan, arog kan teolohiya liberasyon, gikan sa ‘pakamansay asin pag-ako dian kan Kristianong komunidad.’ Iyo, an opinyon nin kadaklan asin kadonongan nin tawo ipinaoorog sa Tataramon nin Dios. Oyon daw kamo digdi?

Si Carlos D    maimbod na Katoliko na 11 anyos sa sarong seminaryong Katoliko. “Dusay ako sa paglilingkod sa Dios na igwa kan . . . pasohan na magin marahay na padi,” sabi ni Carlos. Pero, sa pag-agi nin mga taon, may nakaribok sa saiya.

‘Kabilang sa ibang mga bagay,’ sabi nia, ‘narealisar ko na an Biblia tinatahoban. An tradisyon kan mga ama kan iglesya iyo an pangenot. Ikaduwa an autoridad kan papa kun sia nagtataram nin ex cathedra, asin ultimo—sa ikatolong lugar—an Biblia.’b

Pagkahale sa Iglesya Katolika, inubos ni Carlos an dakol na taon sa paghanap sa katotoohan sa pirang ibang relihiyon. Dai nakontento, sia nagin ateista sagkod na sia manompongan nin mga Saksi ni Jehova asin nag-ako nin pag-adal sa Biblia. Si Carlos ngonyan saro nang nagdusay na saksi ni Jehova.

Si Maria V—— saro man na aktibong Katolika. “Nagsisimba ako haros aroaldaw,” sabi nia. “Miembro man ako nin grupo na inaapod La Acción Católica de Señoritas [Aksion Katolika Para sa mga Hoben na Babae].” Si Maria nagtokdo nin katesismo sa nagkapirang taon. Ano an itinaong pagtotokdo sa sainda? ‘Kada Sabado an padi kinakaolay kami manongod sa mga pilosopiya ni Plato asin iba pa. An kadaklan sa samo mayo nin nasasabotan. Aram ko na may diperensia. An nanonodan ko dai nagpapanigo sa sakong espirituwal na mga pangangaipo.’ Ano an nakabago sa saiyang buhay?

“An kailusyon ko regular na nagreresibi kan Magmata!, asin ipinapasa nia sako an mga magasin.” Dangan si Maria nagkua kan librong Hale sa Paraisong Nawara Sagkod sa Paraisong Nakamtan-liwat asin pinonan na basahon iyan. “Kaidto ako talagang nagpoon na makasabot sa Biblia—na garo nahale an tahob sa sakong mata.”

Si Maria asin an saiyang kailusyon pareho nagin nagdusay na Saksi ni Jehova dangan nagpakasal. Imbes na magtokdo nin katesismo, si Maria ngonyan nangengenot sa 12 pag-adal sa Biblia kaiba nin iba na interesadong makanood kan katotoohan sa Biblia.

An kaaraman sa Tataramon nin Dios nagtao man nin pakinabang sa dakol na sinsero na an ginikanan pobre sa materyal.

An Pansalida kan Biblia—An Kahadean nin Dios

Sa saro sa pinakabantog na pamibi sa gabos na panahon, idinoon ni Jesu-Cristo an solamenteng malalaoman nin tawo para sa mas marahay na mga kamugtakan sa kinaban. “Ama niamo na nasa langit,” an pakimaherak nia, “an saimo logod na ngaran pakangbanalon, dumatong logod an kahadean mo, gibohon an boot mo, sa daga nin siring sa langit.” (Samo an italiko.)—Mateo 6:9, 10.

Pabor daw kamo sa gobyerno nin Dios, o mas gusto nindo an paghade nin tawo? Ini isyu na dapat na atubangon niato gabos. Huli sa presenteng mga kamugtakan sa kinaban, tibaad mamatean man nindo na kaipuhan niato an laen pa sa nagibo nin tawo. Alagad ta ano an magigibo kan Kahadean nin Dios para sa mga pobre ngonyan?

Si Rafael R    hale sa pobreng pamilya na may siyam na aki. “Nagpondo na ako sa pag-eskuwela pakatapos nin enot na grado tanganing tabangan an sakong pamilya na maghanapbuhay,” an paggirumdom nia. “Pagkaani sa samong baryo, minaduman ako sa kaomahan asin tinitipon an ano man na natada sa anihon tanganing may makakan kami.”

Minsan siring, pag-edad nin 15, si Rafael nagkaigwa nin magastos asin nakararaot na bisyo. Nagpoon siang gastuhon an saiyang kuwarta—an kadikit niang nakukua—sa mga inomon na de alkohol. “Duwang beses,” sabi ni Rafael, “nagigirumdoman ko na nangolog pa ngani ako tanganing makakua nin igong kuwarta na ibabakal nin maiinom pa.”

Pagkatapos, si Rafael nag-agom asin nagkaigwa nin sampulong aking bubuhayon. Pero naggrabe sana an saiyang bisyong pag-inom. Sabi kan agom nia, si Carmen: “Sa materyal, mayong-mayo kami. Pinagmaigotan kong makakua nin kuwarta sa paglalabada tanganing may makakan kami. An samong pamahawan asin pamanggihan parateng sarong tasang tsa asin sarong pidasong tinapay. An pangodtohan kadikit sanang sabaw asin tibaad kadikit na patatas o kalabasa. Mapalad kami na makakakan nin karne sarong beses sa semana kun beses.” Kaya an bisyong pag-inom ni Rafael nakaapektar man sa iba. Pero may paglaom daw para sa pamilyang ini?

“Iyo nanggad,” sabi ni Carmen, “minsan ngani kaidto sanang kami magpoon na makipag-adal kan Biblia sa mga Saksi ni Jehova na nagpoon na magbakle an agom ko. Naaraman mi an panuga manongod sa Kahadean—na sa dai na mahahaloy hahaleon ni Jehova sa kinaban an kapobrehan asin pan-aapi. Sa katapustapusi sinimbag an mga pamibi ko sa Dios!” Si Rafael nagpondo sa pag-inom asin nagpoon na enoton an Kahadean nin Dios. An kaaraman sa Biblia nakatabang saiya na isolog an “bagong pagkatawo.” (Efeso 4:22-24) Bilang resulta, sia asin an saiyang pamilya dai na nagsasakit sa makuring kapobrehan. Sabi ni Rafael: “Bako kaming mayaman, asin bako ming sadiri an samong harong, pero igwa kami kan mga pangangaipo sa buhay, asin maogma kami.”

An Kristianong edukasyon nakatatabang man na mapatalubo an natotorog na mga abilidad. Huli sa pagpondo sa pag-eskuwela kan aki pa, si Rafael dai tataong bumasa o sumurat. Minsan siring, paagi sa pag-atender asin pakikikabtang sa Kristianong pagtiripon, bako sana na sia nagin matibay sa mga bagay na ini kundi sia nagpapahayag man sa saiyang kongregasyon patin regular na nangengenot sa pag-adal sa Biblia kaiba an saiyang pamilya. Bako sana iyan.

Si Rafael asin an saiyang pamilya nakadiskobre nin saro pang pakinabang sa pag-enot sa mga intereses kan Kahadean. “Kan an agom ko maghelang huli sa saiyang problema kaidto sa pag-inom,” an paggirumdom ni Carmen, “inako mi an mamomoton na pagsuportar kan kongregasyon.” Anong klaseng pagsuportar? Siring sa paliwanag ni Carmen: “An mga tugang nagtabang samo sa espirituwal saka pinansial.” Iyo, igwa nin mamomoton na pagsuportar kan kongregasyon sa laog kan lakop sa kinaban na asosasyon nin magturugang kan banwaan ni Jehova.

Kaya an Biblia talagang nagtatao nin praktikal na paglaom para sa mga pobre. Sarong beses nagsabi si Jesus: “Ibugtak an saindong puso nin enot sa kahadean [nin Dios], asin sa saiyang katanosan, asin an gabos na ibang bagay na ini [an mga pangangaipo sa buhay] itatao man sa saindo.” (Mateo 6:33) Asin arog kan maheheling sa kaso ni Rafael, igwa nin mas dakol na bentaha kisa materyal sanang mga pakinabang.

Makatatabang man daw saindo an tamang kaaraman sa Biblia?

Kun Paano Kamo Napapalabot

Sarong beses si apostol Pablo nagsadol sa tunay na mga Kristiano kan saiyang kaaldawan: “Siyasata an saindong sadiri tanganing siertohon na kamo nasa pagtubod; baloa an saindong sadiri.” (2 Corinto 13:5) Asin si Jesus, sa pakikipag-olay sa saiyang Ama, nagsabi na “an buhay na daing sagkod iyo ini: an mamidbid ka, na iyo sanang tunay na Dios, asin si Jesu-Cristo na saimong sinugo.”—Juan 17:3.

An saindo daw na pagtubod basado sa pakamidbid sa “iyo sanang tunay na Dios”? Kamo daw kapareho kan mga taga-Berea, na sinasabi kan Biblia na “orog na bukas an isip”? “Madali nindang inako an tataramon; aroaldaw pinag-aadalan ninda an kasuratan tanganing helingon kun baga idto totoo.”—Gibo 17:11.

Kamo daw “bukas an isip” kun manongod sa Tataramon nin Dios? Regular daw nindong inaadalan an Biblia? Ini sana an paagi na “maaraman an kabotan nin Dios asin manodan an marahay, kun ano an boot nin Dios, kun ano an sangkap na gibohon.” (Roma 12:2) Sa Biblia, manonompongan nindo an panuga nin Dios na haleon sa daga bako sanang an kapobrehan, pan-aapi, asin internasyonal na iriwal kundi an ‘luha, kagadanan, pagtangis, asin kamondoan.’ (Kapahayagan 21:4) Ini tunay na magigin totoong liberasyon!

[Mga Nota sa Ibaba]

[Mga ritrato sa pahina 17]

“Dusay ako sa paglilingkod sa Dios na igwa kan . . . pasohan na magin marahay na padi”—Carlos

“Kaidto ako talagang nagpoon na makasabot sa Biblia—na garo nahale an tahob sa sakong mata”—Maria

[Ritrato sa pahina 18]

‘Bako kaming mayaman, pero igwa kami kan mga pangangaipo sa buhay, asin maogma kami’—Rafael