Katolisismo sa Ikatolong Kinaban—Gurano daw Karigon?

Kan kabareta kan Magmata! sa Mejico

“AN GABOS na Kristiano disipulo nin sarong politikal na preso na inasesinar sa krus.” ‘Si Papa Juan Paulo II iyo an pinakapolitikal na papa na naheling niato!’ “Imposibleng otobon an satong pagtubod na siblag sa politika.” Ini pira sana sa dakol na kontrobersial na mga kapahayagan nin mga teologong Katoliko sa sarong miting na ginibo sa Siudad nin Mejico kan Disyembre 1986.

Sa miting man sanang idto, igwa nin mga presente na dai oyon sa mga espiker. An iba nagpoon na magkurahaw sa pagdepensa sa Iglesya Katolika, mantang an iba nagsuportar sa bisitang mga teologo. An iba man dai makagirong—na nariribong sa kadaihan nin pagkasararo. Sa pagsaliot sa kariribokan na ini, an pading taga-South Africa na si Bonganjalo Goba nagkurahaw: “Mga tugang, garo kita nagkakaigwa nin ralaban nin Katoliko tumang sa Katoliko!”

Taano daw ta nangyari an siring? Ano an pinag-iiriwalan?

An Isyu

An temang pinag-oorolayan iyo an teolohiya liberasyon—pakikilaban, na suportado nin mga padi asin teologo sa bilog na kinaban, tanganing kaldahon an mga pobre asin inaapi sa mga nasyon sa Ikatolong Kinaban sa “sosyoekonomikong mga mekanismo na nagbubunga nin kayamanan paagi sa pagsakripisyo kan mga pobre.”

Minsan ngani inaapod iyan nin iba na radikal o rebolusyonaryo, an iba inaapod iyan na ‘bagong kapahayagan kan Iglesya Katolika Romana.’ Sa ikaduwang Latin American Bishops’ Conference, sa Medellín, Colombia (1968), idineklarar na an pagsakit kan mga tawo sa mga nasyon sa Ikatolong Kinaban gikan sa “estruktural na kasalan” asin na, tanganing makasunod ki Cristo, an iglesya dapat na gumibo nin “mas marahay na aksion para sa mga pobre.” Alagad ano daw an kalabot digdi?

An taga-Brazil na pading Katoliko na si Leonardo Boff nagpatanid, siring sa ibinareta nin sarong diaryo sa Siudad nin Mejico, na “kun dai makamtan an dai nababangang sosyedad, an ibang paagi kadahasan” asin na iyan “makatanosan kun nalalapas an pundamental na mga diretso.” Iyo, si Boff, kaiba an iba pang mga parasuportar sa teolohiya liberasyon sa gabos na nasyon sa Ikatolong Kinaban, nagtutubod na an terorismo, mga rebolusyon, asin guerra tibaad kaipuhan tanganing makalda an mga pobre sa saindang “kasakitan.”

Alagad, siring sa ibinabareta kan magasin na Newsweek, “an teolohiya liberasyon may mapuwersang abilidad na pagralabanlabanon an mga Romano Katoliko.” Ini risa sa miting na ginibo sa Siudad nin Mejico. Alagad ano an paniniwala nindo? An teolohiya liberasyon daw an solusyon? Asin baga man kamo sinserong Katoliko o iba an relihiyon, paano daw kamo makikinabang sa pakaaram sa mga nangyayari sa Iglesya Katolika sa Ikatolong Kinaban?