Sarong Masakit na Problema Para sa Sinserong mga Katoliko

Kan 1984 an Batikano nagpaluwas nin instruksion na kinokondenar an teolohiya liberasyon, asin si Leonardo Boff, an saro sa “pinakakontrobersial” na teologong Katoliko, sinentensiahan sa sarong taon na “dai paggirong sa pagpenitensia”—padusa na itinao kan iglesya na nagprohibir sa saiya na magpublikar o magpainterbio o ilakop sa ano man na paagi an saiyang pinagdududahan na teolohiya.

Alagad kan 1986, sarong bulan bago matapos an ‘taon nin dai paggirong,’ si Boff tinawan nin amnestiya. Ilinuwas an Instrucción Sobre Libertad Cristiana y Liberación (Instruksion Manongod sa Kristianong Libertad Asin Liberasyon), na nagsasabi na “biyong makatanosan na an mga nagtitios nin pan-aapi gikan sa mga nagkakapot nin kayamanan o politikal na kapangyarihan humiro na ginagamit an mga paaging puwede sa moral . . . ” An “armadong pakikilaban” inaprobaran bilang “ultimong paagi.” Itinatanos daw kan iglesya an saiyang sadiri?

Dai sono sa autor kan bagong instruksion, si Joseph Cardinal Ratzinger, prefecto kan Sacred Congregation for the Doctrine of the Faith kan Batikano. “An enot na instruksion dai nawawaran nin halaga,” sabi nia. “An ikaduwang dokumento kasugpon.” Alagad an iba, arog baga kan prensa, inaapod an ikaduwang instruksion na “bagong paninindogan sa ‘teolohiya liberasyon.’” Taano ta may pagkakalaen?

An maingat na pagkasabi kan bagong instruksion puwedeng interpretaron sa laen-laen na paagi. Halimbawa, sinasabi kaiyan na “bakong trabaho kan mga pastor kan iglesya na direktang makilabot sa politikal na pagpatindog asin pag-organisar sa sosyal na buhay.” Arog kan mapagmansay na komento kan magasin na Newsweek: “An siring na pananaram nagtatao nin dakol na lugar na dian an tusong mga prelado . . . makapagmamaniobra.”

An sarong bareta nagsasabi na ‘haros gabos sa iglesya may makukuang maooyonan nia.’ An sarong liberasyonista na arog ni Gutiérrez makapagsasabi na ngonyan na “an teolohiya liberasyon sarong tanda kan mga panahon sa Latin America, asin iyan an pagmidbid dian kan iglesya,” mantang an konserbatibong Katoliko makapag-oogma na an saiyang iglesya sagkod ngonyan “makosog na tinutumang an Marxistang kolektionismo huli sa pagnigar sa libertad nin tawo.” Minsan siring, an laen-laen na ideya nin teolohiya liberasyon katumang kan tradisyon nin iglesya asin padagos na pinaglalabanlaban an mga Romano Katoliko.

Alagad, si apostol Pablo nagsasadol sa tunay na mga Kristiano: “Husayon nindo an saindong mga dai pagkasinabotan, asin imbes na dai kamo magkaoroyon, . . . magkasararo kamo . . . sa saindong pagtubod asin gibo.” “Magkasararo kamo sa saindong mga pagtubod . . . na may saro sanang katuyohan asin saro sanang kaisipan.” (1 Corinto 1:10; Filipos 2:2)a Ano an pagtubod nindo? An mga Romano Katoliko daw ‘sararo sa saindang mga pagtubod’?

[Nota sa Ibaba]