An “Holocaust”—An Nalingawan na mga Biktima
“An mga palakaw kan mga Nazi na pagpara sa bilog na mga rasa nagbunga kan pagkagadan nin mga Hentil na Polaco na arog kadakol kan mga Judiong Polaco, sa siring ginigibo sindang kapwa biktima sa ‘Nalingawan na Holocaust.’”—“The Forgotten Holocaust,” ni Richard C. Lukas
HOLOCAUST—ano an boot sabihon kaiyan? Sono sa pirang diksionaryo, idto an paggadan kan mga Nazi sa pagpara kan rasa kan mga Judio sa Europa kaidtong Guerra Mundial II. Ini madaling makatao kan impresyon na mga Judio sana an nagsakit asin nagadan sa kamot kan mga Nazi. Pero, ikinatatao daw an hustisya asin katotoohan sa pag-aplikar sana kan “Holocaust” sa Judiong mga biktima kan pagsakop na Nazi?
An parasurat na si Richard Lukas nagsasabi: “An terminong ‘Holocaust’ nagsusuherir sa kadaklan na tawo kan kalamidad na inagihan kan mga Judio sa irarom kan mga Aleman kaidtong Guerra Mundial II. Sa sikolohikong punto-de-vista, masasabotan kun taano ta gusto kan mga Judio ngonyan na an termino esklusibong mangahulogan kan eksperyensia nin mga Judio . . . Pero, sa dai pagbale kan iba sa ‘Holocaust,’ an makatatakot na mga inagihan kan mga Polaco, ibang Eslavo, asin Gitano sa kamot kan mga Nazi parateng dai minamangno, kun dai ngani linilingawan.”
Sinabi man ni Lukas: “Para sa sainda [an mga historyador], an ‘Holocaust’ sa mga Judio sana, kaya kakadikit o mayo sinda nin nasabi manongod sa nuwebe milyones na Hentil, kaiba an tres milyones na [Hentil na] Polaco, na nagadan man sa pinakagrabeng kalamidad na naheling kan kinaban.”
An Makosog na Pagmawot ni Hitler nin Lugar na Maiistaran
Kan sakyadahon kan mga hukbo ni Hitler an Polandia kan Setyembre 1939, sinda pinagbotan na otobon an palakaw ni Hitler na pagkua nin Lebensraum, lugar na maiistaran, para sa nasyon na Aleman. Arog kan sabi ni Richard Lukas: “Para sa mga Nazi, an mga Polaco Untermenschen (hababa-sa-tawo) na nag-iistar sa daga na kaiba sa Lebensraum (lugar na maiistaran) na minamawot nin makuri kan superyor na rasang Aleman.” Kaya, inautorisaran ni Hitler an saiyang mga hukbo na gadanon “na daing pagbasol o pagkaherak an gabos na lalaki, babae, asin aki na Polaco an disendensia o tataramon. Sa paagi sanang ini niato makukua an lugar na maiistaran na kaipuhan niato.”
Pinonan kan Setyembre 1939 an daing herak na kasakitan para sa mga Polaco. Si Hitler nagsabi: “An guerra sarong guerra nin pagpara.” An kampon ni Hitler na si Heinrich Himmler nagsabi: “An gabos na Polaco mapapara sa kinaban. . . . Kaipuhan na ibilang kan dakulang nasyon na Aleman na sarong mayor na trabaho an paglaglag sa gabos na Polaco.” Kaya, an “Holocaust” bako sanang para sa mga Judiong Polaco; idto para sa “gabos na Polaco.”
“An kadahasan ginamit sa gabos na nasyon na nasakopan. . . . Pero sa Polandia an gabos nag-agi sa siring na panriringis, asin an lagduan na mga paggadan basado sa prinsipyo nin pagkakasala nin gabos mas parate nanggad, huli ta an lambang Polaco, ano man an edad, sekso, o salud, miembro nin sarong kondenadong nasyon—kondenado kan mga parapalakaw sa partido asin gobyernong Nazi,” sabi ni Catherine Leach, paratradusir kan librong Polaco na Values and Violence in Auschwitz. Sinabi nia na ibinibilang ni Himmler an mga Polaco na mas hababang rasa na dapat na oriponon.
“Dawa pakalihis kan pagsuko kan Polandia [Setyembre 28, 1939], padagos na isinaboot kan Wehrmacht [hukbong Aleman] an sadol ni Hitler kan Agusto 22, 1939, kan autorisaran niang gadanon ‘na daing pagbasol o pagkaherak an gabos na lalaki, babae, asin aki na Polaco an disendensia o tataramon.’” Paano namotibar an hukbong Aleman asin an SS sa siring kadaing herak na pangadan? Paagi sa pagigin sagom sa katokdoan manongod sa pagigin superyor kan rasang Aryano asin pagigin menus kan gabos na iba. Kaya, arog kan sabi ni Lukas sa The Forgotten Holocaust: “An teoriyang Nazi nin imperyo kolonyal sa Polandia basado sa pagdehar nin pagkatawo sa mga Polaco na, sumunod sa mga Judio, iyo an pinakaikinaoongis ni Hitler.”
“Negatibong Palakaw Demograpiko”
Sa saiyang introduksion sa librong Commandant of Auschwitz, si Lord Russell na taga-Liverpool nagsabi: “Kaidtong guerra seguro dai mababa sa dose milyones na lalaki, babae, asin aki sa sinakyada asin nasakop na mga teritoryo an ginadan kan mga Aleman. Sa konserbatibong pagkarkulo, an otso milyones sa sainda nagadan sa mga kampo de konsentrasyon. Digdi, dai mababa sa singko milyones an Judio. . . . Alagad, an tunay na kabilangan noarin man dai maaaraman.” Basado sana sa mga kabilangan na ini, kisuerra siete milyones na biktima an bakong Judio.
An saro pang patotoo ki Catherine Leach, na nagsurat: “An Polandia iyo an enot na nasyon na nag-agi sa ‘negatibong palakaw demograpiko’ ni Hitler, na an katuyohan andamon an mahihiwas na teritoryo sa ‘Sirangan’ para sa pag-istar nin mga Aleman, asin an Polandia an nagtios nin pinakadakol na napierdeng buhay sa gabos na nasyon na nasakop—220 kada 1000 habitante. An mga reperensiang Polaco nagsasabi na dai mababa sa 6,028,000 na siudadanong Polaco . . . an nawaran nin buhay.” Digdi, 3,200,000 an Judio. Iyan nangangahulogan na haros 50% kan mga nagadan sa Polandia an bakong Judio.
Dai maninigaran, nagkaigwa nin “Nalingawan Nang Holocaust” kan minilyon na biktimang bakong Judio, na an kadaklan Eslavo. Kabale digdi an minilyon na Ruso na ginadan kan mga Nazi. An mga Rusong idto daing maginibo. Huli sa doktrina sa rasa kan mga Nazi, sinda kondenado na sa kagadanan.
Pero, an mga estadistikang ini dai nakokonsiderar an rinibong bakong Judiong Aleman na nagtios man bilang mga biktima kan “Holocaust” huli sa pagkaigwa kan kosog nin boot na tumangon si Hitler asin an saiyang pilosopiya nin pagkasuperyor sa rasa. Kabilang digdi an rinibong Saksi ni Jehova na nagsayumang tumabang sa militaristikong mga ambisyon ni Hitler. Iyo, lakop sa Alemania asin sa mga nasyon na nasakop nin mga Nazi an rinibong tawo na guminibo nin pagpili na nagdara sa mga kampo de konsentrasyon asin sa kagadanan para sa dakol bilang martir.
Kaya, an mahalagang hapot iyo an, Ano an kalaenan kan mga biktima kan “Holocaust” asin kan mga martir?
[Mapa/Mga ritrato sa pahina 10]
(Para sa aktuwal na format, hilingon an publikasyon)
An nagkapira sa mga kampo de konsentrasyon asin nin pagpoho kan mga Nazi sa Europa. Dugang pa, igwa nin 165 kampo nin puwersahan na pagtrabaho
NORTH SEA
LATVIA
Riga
LITHUANIA
Kaunas
E. PRUSSIA
POLAND
Stutthof
Treblinka
Chelmno
Sobibor
Lublin
Skarżysko-Kamienna
Majdanek
Plaszow
Belzec
Auschwitz
GERMANY
Papenburg
Neuengamme
Belsen
Ravensbrück
Sachsenhausen
Oranienburg
Lichtenberg
Dora-Nordhausen
Torgau
Buchenwald
Gross-Rosen
Ohrdruf
Flossenbürg
Dachau
Landsberg
NETH.
Westerbork
Vught
BELG.
LUX.
FRANCE
Natzweiler-Struthof
SWITZ.
ITALY
AUSTRIA
Mauthausen
Sachsenburg
CZECHOSLOVAKIA
Theresienstadt
[Ritrato]
Si Hitler nagsabi: “An guerra sarong guerra nin pagpara.” Gadanon na “daing pagbasol o pagkaherak an gabos na lalaki, babae, asin aki na Polaco an disendensia o tataramon”
[Credit Line]
Library of Congress
[Picture]
Si Himmler nagsabi: “An gabos na Polaco mapapara sa kinaban”
[Credit Line]
UPI/Bettmann Newsphotos