“An mga Saksi ni Jehova Hale sa USSR—Mas Maogmang mga Aldaw an Nasa Enotan”
IYAN an pangenot na bareta sa Ingles na peryodikong The Warsaw Voice kan Agosto 19, 1990, na ipinublikar sa Polandia. An kagsurat, si Anna Dubrawska, nagkomento sa “Malinig na Tataramon” na Kombension nin mga Saksi ni Jehova sa Warsaw kan Agosto 1990. Ininterbio nia an mga Saksi hale sa Unyon Sobyet, na an iba 15 anyos sa mga bilanggoan asin kampo nin pagtrabaho huli sa saindang relihiyosong pagtubod. Pero ngonyan idinodoon ninda an positibong mga pagkaliwat sa saindang nasyon.
Si Grigor Goryachek, sarong trabahador sa konstruksion hale sa Crimea na pinadakula bilang Saksi, nadistiyero nin 15 taon sa Siberia. Sia nagsabi: “Linalaoman mi ngonyan na umabot an mas marahay na mga panahon.” An saro pang Saksi, si Anton Pohanich, nagsabi: “Yaon na an mas marahay na mga panahon. Nadadara ko na ngonyan nin libre an samong mensahe sa harong-harong, mantang kan nakaagi ini dai puwede.”
Kinotar ni Dubrawska si Igor Cherny, 17-anyos na Saksi hale sa Caucasus: “Sa laog nin 70 taon an mga tawo, nangorogna an mga hobenes, maigoton na irinayo sa Dios kaya ngonyan siring man sinda kaigot na boot na bumalik sa Saiya, o kisuerra makadangog manongod sa Saiya bilang kapinonan.”
An publikasyon na Polaco na Dziennik Wieczorny (Diaryo sa Banggi) nagbareta, sa irarom kan titulong Radość braci (Kagayagayahan kan mga Tugang), na an sarong empleyado kan istadyum na Zawisza sa siudad nin Bydgoszcz nagsabi: “Nawiwili ako sa malinig na tataramon na ginagamit asin marahay na ugaleng ipinaheheling kan mga hobenes.”
Sa pagsurat sa diaryong Polaco na Trybuna sa temang Głosiciele Królestwa (Mga Parahayag kan Kahadean), si Zofia Uszynska nagsabi manongod sa kombension: “Sa laog nin 30 minutos sampulong beses akong inopresiran nin meryenda asin kape. Limang beses na may gustong itao sako an saiyang tukawan. Sa laog nin apat na sunod-sunod na aldaw an labing 30,000 katawo sa Istadyum nin Dziesieciolecia sa Warsaw nagpartisipar sa sarong [relihiyosong] kapiyestahan. Mga babae na madali nang mangaki, mga pamilyang may saradit na aki, mga gurang asin hoben. An pinakahoben na nabautismohan 11 anyos, an pinakagurang haros 80.”
An artikulo nagpadagos: “Nagkapirang ribong Ruso [an totoo labing 16,000] an nag-atender sa miting ngonyan na taon. Kan sarong taon 6,000. An mga opisyales na Ruso sa linderos pinaagi an gabos na awto na dai na kaipuhan na maghalat sa pagrekisa sa mga linya na an laba dakol na kilometro. An mga delegado hale sa bilog na Unyon Sobyet nag-arabot: hale sa Vladivostok, Khabarovsk, Vorkuta. An iba mga apat o limang aldaw sa tren.”
An iyo man sanang diaryo kinotar si Ivan M. Grevniak sa pagsabi: “Naheling ko an inhustisya sa ginibo kan mga papa asin padi, asin hinanap ko an pagkasadiosan.” An tala nagpapadagos: “Narisa nia an pagkakaoyon kan mga tataramon asin gibo sa gawe kan mga Saksi ni Jehova.” Dangan idinugang ni Ivan: “Nagpapasalamat ako sa Dios na itinogot nia sako na manodan an katotoohan.”
An Trybuna nagbabareta na si Ivan saro sa kamagurangan sa sarong kongregasyon sa Lvov, na duman “may 13 kongregasyon asin labing 2,000 na relihiyosong mga nagtutubod. . . . ‘Sa gabos na grupong relihiyoso sa gabos na lugar nangingibabaw an espiritu nin nasyonalismo. Minsan siring, iyan mayo sa samong mga karelihiyon,’ sabi ni Grevniak.”
An pagkasararong ini ipinaheling sa kombension kan mga Saksi ni Jehova sa Warsaw na duman an programa dungan na iinatubang sa Polaco asin Ruso sa magkalaen na kabtang kan istadyum. Mayo nanggad nin nasyonalistikong pag-iiwal.
Hinangaan man ni Sofia Uszynska an organisasyon na kinaipuhan sa pagtao nin dadagusan, pagpakakan, asin pag-ataman pa ngani sa medikal sa labing 35,000 na nag-atender sa kombension. Sia nagkonklusyon: “Noarin man dai pa ako nagpartisipar sa siring karahay, makikatood na pampublikong katiriponan.”
An diaryong Polaco na Sztandar Młodych (Estandarte nin Hobenes) nagkomento sa trabahong ginibo tanganing an istadyum magin angay na umako nin kadakol na bisita: “Bilang serbisyo sosyal . . . an mga parasunod ni Jehova hinirahay an mga bangko, rinemodel an mga agihan asin kasilyas, hinawanan an doot sa tahaw. Nagkontribuwir sinda sa gagastuson kan kombension hale sa sainda mismong bulsa. An mga Saksi ni Jehova nag-andam nin mga 22,000 na pribadong dadagusan para sa mga bisita, inasikaso an mga makakaserahan kan mga siudadanong Sobyet, asin may sadiring medikal na pangataman.”
Tunay na an mga Saksi ni Jehova nakakaeksperyensia na nin “mas maogmang mga aldaw” sa Europa Oriental asin namimibi na an sainda logod na bagong legal na kamugtakan sa mga nasyon na arog kan Romania, Hungaria, asin Polandia makaabot man sa madali sa Czechoslovakia, Albania, Bulgaria, asin Unyon Sobyet.—2 Tesalonica 3:1; 1 Timoteo 2:1, 2.
[Mga ritrato sa pahina 23]
An mga Saksing Sobyet sa “Malinig na Tataramon” na Kombension sa Warsaw, pati an mga kandidato sa bautismo (sa itaas asin sa sadit na retratong nasa laog), espiker na Ruso, programa, asin mga delegadong Sobyet sa atubangan kan saindang mga awto