Sarong Parasugal na Kinaban
AN MGA slot machine parateng inaapod na saro an kamot na mga bandido. Pero bakong siring sa tunay na mga bandido, dai kaiyan pinupuwersang kuanon an kuwarta nin siisay man; an mga tawo naglilinya siring sa karnero tanganing kuwartahan ninda.
May mga 420,000 na siring na makina sa Republika Pederal nin Alemania, na sibot na gayong nagkukua nin mga $900,000,000 sa mga Aleman kada taon. Limang milyon katawo duman an sarong oras kada semana na naghoholog nin kuwarta sa mga makina; 80,000 katawo an labing limang oras kada semana dian.
An España may 750,000 na slot machine ngonyan. An pagsugal ginibong legal duman kan 1977. Kan 1988, an mga Español naggagasto na nin $25,000,000,000 kada taon sa gabos na klase nin sugal. Ibinaretang 200,000 na Español an dai makontrol na mga parasugal. An mga Italiano nagsugal nin mga $12,000,000,000 kan 1989—o mga $210 kada tawo, kabilang an mga aki. Sa sarong semana sana kan amay na kabtang nin 1990, an mga Italiano naggasto nin $70 milyones sa pagpusta sa karawat na soccer.
An mga parasugal sa Estados Unidos naggagasto nin labing $200,000,000,000 kada taon sa legal na mga porma sana nin pagsugal! An presidente nin dakol na casino duman naghambog kasuarin sana: “An pagsugal an pinakamarikas mag-oswag na industriya sa nasyon na ini, kapareho kadakula kan taonan na presupuwesto [sa militar kan E.U.].” Saiyang iinatribuwir an pagkamoot kan mga Amerikano sa pagsugal sa iyo man sanang “pilosopikal na pagmawot” asin pagigin andam na magsapeligro na nagpahiro sa mga nagdiskobre asin kolonisador kaidtong nakaagi kan nasyon. Pero an pangarap nin parasugal sa tolos-tolos na kayamanan nalalaen nanggad sa mga taon nin pagpaganot asin pagpagal na ginibo kan mga nagdiskobre asin nangenot na mga tawo sa saindang mga pagprobar.
An sosyologong si Vicki Abt nagsabi: “An mga loteriya nag-aaprobetsar sa ideya na an mga balos bakong konektado sa saindong mga paghihingoa.” An siring na kaisipan puwedeng makadanyar nin labi-labi sa kuwalidad nin buhay. An pagkakautang, pagtios, naraot na mga gawe sa trabaho, laglag na pamilya—an mga ini an makamomondong bunga nin pagsugal. Para sa minilyon, na an nagdadakol na kabtang kaiyan mga tin-edyer, an pagsugal nagigin dai makontrol na pangangaipo. Sierto nanggad, tama an Biblia sa sinasabi kaiyan na “an pagkamoot sa pirak gamot nin gabos na klase nin karatan.”—1 Timoteo 6:10.