Pag-olang sa Pagbuwelta nin Maraot na mga Gawe
“NANGGANA AKO! Sa katapustapusi natapos na an pakikilaban!”
Iyan an mga tataramon na nagpapahayag kan pakamate nin kapangganahan na namamatean nin sarong tawo na nakilaban tumang sa bakong marahay na gawe asin napangganahan iyan.
Pero, nakakaaburido nanggad sa tawong iyan an pagbuwelta sa dati! Kanigoan na kasudyaanan na madiskobreng an maraot na gawe, na sa paghona nawara na sagkod lamang, bigla asin mapuwersang nagbuwelta!
Tibaad nakaeksperyensia na kamo nin pagbuwelta sa dating maraot na gawe na mawot na gayo nindong mapangganahan. Kun iyan an kamugtakan, tibaad nagduduwaduwa na kamo sa saindong abilidad na bayaan na nin permanente an bakong marahay na gawe. Asin tibaad dakol an bakong marahay na gawe: sobrang pagkakan, “adiksion” sa mahamis, sobrang pag-inom, bigla na sanang pagbakal, pinagkatodan nang pagkahuri, pagsugal, pagsigarilyo, asin dakol pang ibang gawe.
“Taano ta Nagbuwelta Ako sa Dati Mantang Tapos Na an Pinakamasakit?”
Kun helingon basta napangganahan na nindo an enot na mga tangga sa paghale nin maraot na gawe, an paglikay kaiyan magigin mas pasil. Alagad, an dakol na pagsiyasat nagpapaheling na bakong siring kaini an kamugtakan.
Sa librong Selfwatching, an mga autor na si R. Hodgson asin P. Miller nagpaliwanag: “An pagbuwelta sa dati pinakaposibleng mangyari sa enot na tolong bulan pakatapos kan pagbago. An totoo, an sarong pagsiyasat nagpaheling na an haros 66 porsiento sa parasigarilyo, alkoholiko asin mga adikto sa droga nagbuwelta sa saindang dating gawe sa laog nin 90 aldaw poon kan saindang enot na desisyon na magbago. Alagad, an mga nakadaog sa saindang adiksion sa enot na tolo sagkod anom na bulan may ekselenteng oportunidad na pagdanayon an pagkontrol na iyan.”
Taano an pagbuwelta kan dating maraot na mga gawe ta sarong peligro sa mga bulan—o kun minsan mga taon—pakatapos kan enot na panahon nin paglikay? An sarong rason tibaad an paglataw liwat nin mga pangigipit sa buhay, asin an maraot na mga gawe gikanan nin temporaryong kaginhawahan kan nakaagi. Kaya maski pakatapos nindong makamate na napangganahan na nindo an bakong marahay na gawe, kun magkaigwa kamo nin kasakitan—siring sa pinangyayari nin pagkapierde sa pinansial, mga problema sa salud, dakol na kasudyaanan—mag-ingat sa pagbuwelta sa dati! Kun kamo nalalangkag o mamondo, dai mabigla kun an saindong dating gawe magprobar na bumalik.
An ibang dahelan nin pagbuwelta sa dati puwedeng an sosyal na pangigipit, dai pagkakaoyon sa mga tawo, negatibong mga emosyon, asin an mapasa mga situwasyon na grabe an pagtentar.
Pag-olang sa Pagbuwelta sa Dati
Minsan pakatapos kan enot na panahon nin mapangganang pagtumang sa bakong marahay na gawe, kaipuhan na padagos nindong gamiton an mga paagi na nakatabang saindong iontok an gawe kan enot. An mga paaging ini puwedeng gamiton nin padagos, o sa ibang kaso tibaad igo nang ibalik iyan sa panapanahon, arog sa panahon nin grabeng kamondoan o grabeng pagtentar.
Halimbawa, tibaad nag-ingat kamo nin nasusurat na rekord tanganing maaraman an saindong pag-oswag, siring sa pan-aroaldaw o semanal na rekord sa pagmamaigot nindong mag-ina nin timbang. Ini mahalaga sa pag-ontok sa gawe asin dapat na dai pagpabayaan maski ngani kun sa paghona nindo an peligro tapos na.
Tibaad nagkaigwa man kamo nin paagi sa pagpakonsuelo sa saindong sadiri sa kada mapangganang natumang nindo an gawe na pinagmamaigotan nindong madaog. An medyo liniwat na paagi sa pagpakonsuelo tibaad makatabang sa pag-olang kan pagbuwelta sa dati. O sa pag-ontok sa gawe, hinagad daw nindo an tabang nin sarong katood? Togotan an sarong ini na tabangan kamong magdanay na libre sa saindong nakaaging maraot na gawe.
Ano pa an ibang paagi na makatatabang saindong tumangon an pagbuwelta sa dati, nangorogna sa mga panahon nin pangigipit?
Pagtumang Paagi sa Pagsalihid
Si Dr. R. Stuart, sikolohikal na direktor kan Weight Watchers International, Inc., nagrekomendar kan minasunod para sa mga nagmamaigot na mag-ina nin timbang: “Pagdanayon na sibot an saindong isip sa dakol na kawiliwiling gibohon. An mga proyekto sa trabahong-kamot epektibo, siring man an mga aling-alingan. Kun posible, magkaigwa na nin mga suplay asin nakaandam nang lugar na paggigibohan, tanganing magibo nindo an saindong aktibidad sa panahon na kaipuhan.” Tibaad an siring na paagi makatabang saindo.
Iyo, salidahan an saindong dating maraot na gawe nin marahay na gibohon. Girumdomon, an gaweng iyan posibleng nagtao saindo nin dikit na kaginhawahan kan magkaigwa kamo nin tension, kaya pilion an mga pansalihid na magigin epektibo sa iyo man sanang katuyohan. Puwede kamong magbasa, mag-ehersisyo, magpatogtog nin musikal na instrumento, magpinta, o dumalaw sa mga katood. Magpoon na ngonyan na ilista an potensial na pansalihid na mga aktibidad. Itampok an dinesisyonan nindong sunudon. Gibohon an bagong mga aktibidad na ini nin paorootro siring kan ginibo nindo sa dati nindong gawe. Ini mas magpapadali sa paggibo kaiyan kun magkaigwa kamo nin tension. An totoo, an pansalihid na mga aktibidad na ini aktuwal na magigin mga gawe—marahay na mga gawe!
An Kahalagahan nin Pagtumang sa Pagkadisganar
Mantang an pagtentar na magbuwelta sa maraot na mga gawe tibaad nangorognang makosog kun kamo nasa pangigipit, puwede daw nindong liwaton an ibang kamugtakan sa saindong buhay tanganing mainaan an pangigipit? Maski kun an ibang problema dai malilikayan, puwede nindong manodan na pogolon an saindong emosyon tanganing dai makamateng nalulunosan nin pagkadisganar.
An puwersa nin pagkadisganar parateng pinasasadit. An sabi kan talinhaga sa Biblia: “An espiritu nin tawo makatatagal sa saiyang helang [sa salud]; alagad an espiritung nagmomondo, siisay an makatatagal kaiyan?” (Talinhaga 18:14) Totoo nanggad! Parateng bakong an problema kundi an resultang pagkadisganar an nagpapaluya sa sato.
Saro pang talinhaga sa Biblia an nagsasabing arog kaini: “Ika daw nanluya an boot sa aldaw nin kasakitan? An saimong kosog magigin kadikit.” (Talinhaga 24:10) An dai mapogolan na negatibong emosyon magpapaluya sa saindo. Iyan magpapangyari saindo na madaling maholog sa pagbuwelta sa dati, tibaad maggipit saindo na magbuwelta sa maraot na gawe para sa kaginhawahan. Kun siring, kanigoan kahalagang tumangon an pagkadisganar!
Alagad ano kun, sa ibong nin saindong pagmamaigot, nanonompongan pa man giraray nindong nagpopoon kamong bumuwelta sa dati?
Temporaryong Pagkadaog Tumang sa Lubos na Pagbuwelta sa Dati
Gurano kadaling isipon: ‘Nasudya ako, kaya marahay pang sumuko na ako.’ Tumangon an disposisyon na iyan kan isip. Likayan na an temporaryong pagkadaog, o maski ngani nagkapirang pagkadaog magpangyari nin pagkapierde nindo.
Konsideraron an ilustrasyon na ini: Kun nagsasakat kamo sa hagyan asin nadalinas kamo paibaba nin saro o duwang tangga huli ta kamo nasingkog, mangangatanosan daw kamong, ‘Malusad na sana ako sa poon kan hagyan asin mapoon ako liwat’? Siyempre dai! Taano kun siring ta iaaplikar nindo an falsong pangangatanosan na ini sa pagtumang sa maraot na gawe?
An mga kamatean nin pagkakulpable parateng kasunod nin pagkadaog. Puwede kamong magkaigwa kan mga kamatean na ini nin labi-labi paagi sa pagkonklusyon na bako kamong marahay, na maluya kamo asin bakong angay sa ano man na marahay. Dai nindo pagtogotan an saindong sadiri na magkaigwa nin siring na labi-labing pagkakulpable. Iniinaan kaiyan an saindong kosog na kaipuhan nindo tanganing ipadagos an pakikilaban. Asin girumdomon ini: An pinakadakulang tawo na naglakaw sa dagang ini, si Jesu-Cristo, napadigdi tanganing tubuson an mga parakasala, bakong sangkap na mga tawo. Kaya mayo sa satong makagigibo nin mga bagay sa sangkap na paagi sa panahon na ini.
An saro pang puntong dapat konsideraron iyo na an pagkakulpable tibaad sarong kombenyenteng paagi na matogot sato na paorootrong gibohon an iyo man sanang bagay. Sa saiyang librong You Can’t Afford the Luxury of a Negative Thought, si P. McWilliams asin si J. Roger nagpaliwanag kan posibleng ibubungang ini: “An pagkakulpable . . . nagtotogot sato na gibohon iyan liwat. Kun ‘nabayadan na an halaga’ kan satong ‘krimen,’ libre na kitang gibohon iyan liwat sagkod na andam kitang magbayad kan halaga. An halaga? Orog pang pagkakulpable.”
Dai nindo pagtogotan an temporaryong pagkadaog na magin lubos na pagbuwelta sa dati. Isaisip na sa katapusan, an pagkadaog sa gawe an mahalaga, bakong kun kamo baga nakagibo nin nagkapirang pagbuwelta sa dati.
Sa bagay na ini madonong na magdesisyon nin patienot kun anong paagi an gagamiton nindo kun manompongan nindong nagbubuwelta kamo sa saindong dating gawe. An siring na pantabang na plano magsasangkap saindo na tumangon an pagbuwelta sa dati sa pinakaamay na panahon.
Posible—Asin Bawi Man Iyan!
Kaya, an pagtumang sa maraot na gawe orog pa sa pagtagal sa enot na panahon nin makolog na pagpondo dian. Kalabot dian an pagigin mapanggana sa mga kasudyaanan na dai nagbubuwelta sa dating maraot na gawe nin permanente.
Masakit? Iyo, pero posible nanggad. An paaging nakatabang saindo na iontok an gawe kan enot, kun ipapadagos, matabang na maolang o mapangganahan an pagbuwelta sa dati. An pinakadakulang pakinabang? An paggalang sa sadiri—sarong napakarahay na balos mismo. Asin posible man na orog kamong igagalang kan mga nakakamidbid saindo.
[Ritrato sa pahina 13
An pagkadalinas na paibaba nin nagkapirang tangga dai naghahagad na magpoon kamo liwat sa kapinonan
[Ritrato sa pahina 14]
An peligro na magbuwelta sa dati naiinaan paagi sa pagdadanay na sibot sa kawiliwiling mga aktibidad