Kultibaron an Marahay na mga Ugale, Mag-ani nin Nagsosopay na mga Bendisyon
1. Taano ta kapakipakinabang na siyasaton an saindong espirituwal na rutina?
1 Kan enot na kamo magin Kristiano, posibleng marhay na kamo naghingoang marhay na pataluboon an sarong nakakarahay na rutina nin espirituwal na mga aktibidad na kaiba an pag-adal sa Biblia, Kristianong mga pagtiripon, ministeryo sa langtad, asin pamibi. Bilang resulta kan bendisyon ni Jehova sa saindong mga paghihingoa, kamo nagtalubo sa espirituwal. Tibaad ngonyan nagkapira nang taon an nakalihis poon kan kamo nabautismohan. Napagdadanay daw nindo an marahay na ugale sa espirituwal na pinatalubo nindo kan kamo magin Kristiano?
2. Paano kita nakikinabang sa aroaldaw na pagbasa sa Biblia?
2 Siyasaton an Saindong Rutina: Ugale daw nindo na magbasa nin sarong kabtang kan Tataramon nin Dios kada aldaw? Mag-aani nanggad kita nin nagsosopay na mga bendisyon sa paggibo kaiyan! (Jos. 1:8; Sal. 1:2, 3) Sa suanoy na Israel, an lambang hade kaipuhan na basahon an saiyang kopya kan Ley “sa gabos na aldaw kan saiyang buhay.” Na may anong mga pakinabang? Sia makakapatalubo nin mapakumbabang puso asin makakanood na matakot ki Jehova tanganing dai sumuhay sa Saiyang mga togon. (Deut. 17:18-20) Siring man ngonyan, an aroaldaw na pagbasa sa Biblia nakakatabang sa sato na magdanay na daing katuyawan asin inosente sa tahaw kan maraot asin marigsok na kinaban na ini. Tinatabangan man kita kaiyan na biyong masangkapan para sa ministeryo.—Fil. 2:15; 2 Tim. 3:17.
3. Anong mga bendisyon an nakakamtan niato sa regular na pag-atender sa mga pagtiripon?
3 Nagin ugale ni Jesus an pagduman sa sinagoga, kun saen tinotokar an Kasuratan. (Luc. 4:16) Mayong duda na pinarigon sia kaini na atubangon an kasakitan na saiyang titioson. Kita man napapakosog kan espirituwal na pagtotokdo na itinatao sa mga pagtiripon kan kongregasyon asin kan nakakarahay na “pagparinigonan nin boot.” (Roma 1:12) An pagtorotiripon kaiba kan satong mga tugang nakakatabang sa sato na matagalan an mga kadepisilan sa huring mga aldaw na ini. (Heb. 10:24, 25) Ugale pa daw nindo na mag-atender sa gabos na pagtiripon?
4. Paano kita nakikinabang sa pakikikabtang sa paglilingkod sa langtad kada semana?
4 An ipinasabong na rekord nagsasabi sa sato na an mga apostol nakikabtang sa pagpahayag kan maogmang bareta “aroaldaw sa templo asin sa harong-harong.” (Gibo 5:42) Minsan ngani tibaad dai niato mahimong maghulit aroaldaw, puede daw na magin ugale niato na makikabtang sa nagkapirang aspekto kan ministeryo kada semana? Sa paggibo kaiyan, kita seguradong magigin mas maabilidad sa paggamit kan Tataramon nin Dios, asin posibleng marhay na magkakaigwa kita nin nakakaparigon sa boot na mga eksperyensia sa pagpaabot sa iba kan katotoohan sa Biblia.
5. Taano ta mahalagang marhay na mamibi nin regular ki Jehova?
5 Si propeta Daniel mayaman na binendisyonan huli sa paglilingkod ki Jehova “nin danay” sa bilog niang buhay. Kaiba digdi an ugale na regular na pagpamibi ki Jehova. (Dan. 6:10, 16, 20) Kaagid kaiyan, mantang nakikipag-olay kita nin regular ki Jehova paagi sa odok sa pusong pamibi, bebendisyonan nia kita kan saiyang banal na espiritu. (Luc. 11:9-13) Orog pa dian, si Jehova mahiro paagi sa pagrani sa sato, na tinotogotan kitang magkaigwa nin dayupot na relasyon sa saiya. (Sal. 25:14; Sant. 4:8) Kanigoan kadakulang balos! Kun siring, logod na maghingoa kita nin maigot na papagdanayon an marahay na ugale sa espirituwal tanganing mag-ani nin nagsosopay na mga bendisyon gikan ki Jehova.