Mga Payo nin Pamilya—Papagdanayon an Marahay na Espirituwal na Kaugalean
1 Sa ibong nin pamumuhay sa dakol na dekada sa tahaw kan idolatriya asin karatan kan Babilonya, si Daniel namidbid huli sa paglilingkod ki Jehova “nin danay.” (Dan. 6:16, 20) Paano nia pinagdanay an saiyang espirituwalidad? Ipinaririsa kan Biblia na sia igwa nin aregladong kaugalean sa paggibo kan mga aktibidad na konektado sa tunay na pagsamba. Halimbawa, kaugalean na niang mamibi nin tolong beses sa sarong aldaw sa saiyang kuarto sa bubongan. (Dan. 6:10) Daing duda na sia igwa man nin establisadong kaugalean para sa iba pang espirituwal na mga aktibidad, arog kan pagbasa kan Ley. Sa siring, kan napapaatubang sa pagbalo na nagsasapeligro kan buhay, nagin marigon si Daniel sa saiyang debosyon ki Jehova, asin sia milagrosong ilinigtas.—Dan. 6:4-22.
2 Siring man ngonyan, dapat kitang maghingoa na “danay na magpuka sa bilog na panahon.” (Efe. 6:18) An kinaban na kinabubuhayan niato “namumugtak sa kapangyarihan kan maraot.” (1 Juan 5:19) An pagtumang o mga pagbalo puedeng lumataw nin bigla asin baloon an satong pagtubod. Durante kan dakulang kahorasaan, an mga lingkod nin Dios magigin punteriya nin todo-todong pagsalakay ni Gog nin Magog, na dian garo baga mayong dudulagan. Ini magkakaipo nin lubos na pagtitiwala ki Jehova.—Ezeq. 38:14-16.
3 “An sarong mahalagang marhay na bagay iyo na gibohon na dalan nin pamumuhay an epektibong pampamilyang pagbasa sa Biblia, pag-adal, asin pag-orolay.” Iyan an sinabi kan introduksion sa drama kan 1998 pandistritong kombension na may temang “Mga Pamilya—Gibohon an Aroaldaw na Pagbasa sa Biblia na Saindong Dalan nin Pamumuhay!” Iyan nagpadagos: “Kun kinukuyog nin mga pamilya an siring na programa nin regular asin sa paagi na ginigibong buhay an Biblia, an kaugalean na ini na nagpapaheling nin interes sa Biblia puedeng magkaigwa nin dakulaon na epekto sa pamilya. Dinadagdagan kaiyan an satong kaaraman. Pinakokosog kaiyan an satong pagtubod. Asin nagtatao iyan sa sato nin mga modelo—an fiel nanggad na mga lalaki asin babae kan suanoy na mga panahon—na puedeng makamotibar sa sato, na pinahihiro kita na suportaran an katotoohan.” Mantang pinag-oolayan niato an manlaenlaen na aspekto nin marahay na espirituwal na kaugalean, an mga payo nin pamilya maninigong humanap nin saro o duwang paagi na mapaoswag an programa sa espirituwal kan saindang pamilya.
4 Estudyaran an Tataramon nin Dios Aroaldaw: “Kun an Kahadean nin Dios dai nang kalaban na namamahala asin ginigibo na an saiyang kabotan digdi sa daga kun paano sa langit, mayo nin maisog na mga tawo—minsan ngani hayop—na ‘magibo nin maraot o manraraot.’ (Isa. 11:9; Mat. 6:9, 10)” An mga tataramon na iyan nagluwas sa Pagsiyasat sa Kasuratan Aroaldaw—2001 sa mga komento sa teksto para sa Setyembre 11. Kanigoan kanakararanga kan pagirumdom na ini! Bilang payo nin pamilya, ugale daw nindo sa aroaldaw na pag-olayan an teksto sa Biblia asin mga komento kaiba an saindong pamilya? Ini kapakipakinabang na marhay. Kun bakong praktikal na magkairibanan sa aga, tibaad puede nindong gibohon iyan sa huring kabtang kan aldaw. An sarong ama nagsabi: “An pamanggihan an angay na panahon para sa samo na pag-olayan an aroaldaw na teksto sa Biblia.”
5 Kun igwa na kamo nin marahay na kaugalean para sa pag-orolay kan aroaldaw na teksto bilang pamilya, dapat kamong komendaran. Tibaad puede kamong makinabang nin orog pa digdi paagi sa pagbasa kadungan kaiyan nin sarong kabtang kan Biblia. Ginigibong ugale kan nagkapira na basahon an bilog na kapitulo na pinagkuanan kan teksto kan aldaw. An iba naggigibo nin sunod-sunod na pagbasa, na progresibong ginigibo iyan sa sarong piniling libro kan Biblia. An aroaldaw na pagbasa sa Biblia makakatabang sa saindong pamilya na kultibaron an nakararahay na takot na mapaanggot si Jehova asin pararomon an saindang pagmawot na gibohon an saiyang kabotan.—Deut. 17:18-20.
6 An programa nin pagbasa sa Biblia asin pag-orolay sa aroaldaw na teksto kan saindong pamilya magigin orog pa nganing kapakipakinabang kun magamit kamo nin nagkapirang minuto sa pag-orolay kan praktikal na halaga kan impormasyon. An librong pinag-aadalan na Paadalan sa Pagmiministro, pahina 60, itinatao an suhestion na ini: “Puede kamong pumili nin pirang bersikulo sa babasahon sa Biblia para sa semanang iyan, ipakipag-olay an kahulogan kaiyan, dangan maghapot nin mga arog kaini: ‘Paano ini nagtatao nin giya sa sato? Paano niato magagamit an mga bersikulong ini sa ministeryo? Ano an ihinahayag kaiyan manongod ki Jehova asin sa saiyang paagi nin paggibo sa mga bagay, asin paano kaiyan napakokosog an satong pag-apresyar sa saiya?’ ” An siring na espirituwal na pag-orolay makakatabang sa gabos sa saindong pamilya na “padagos na saboton kun ano an kabotan ni Jehova.”—Efe. 5:17.
7 Pampamilyang Pag-adal: An pirmeng pamamayo nin pampamilyang pag-adal serosemana sarong marahay na paagi para sa mga payo nin pamilya na ipaheling sa saindang mga aki na pinakamahalaga an espirituwal na mga bagay. Nagigirumdoman nin sarong soltero: “Kun beses pagal nang marhay si Tatay hale sa trabaho kaya haros dai na nia ikamuklat an saiyang mga mata, alagad sa ibong kaiyan ginigibo pa man giraray an pag-adal, asin ini nakatabang samo na masabotan an pagigin seryoso kaiyan.” Makakokontribwir man an mga aki sa kapangganahan kan areglong iyan. An sarong pamilya na may siyam na aki regular na nagbabangon nin alas singko tangani na gibohon an saindang pampamilyang pag-adal huli ta mayo nang ibang panahon na puede iyan.
8 Tangani na magin epektibo an pampamilyang pag-adal, an payo nin pamilya dapat na ‘pirmeng atenderan an saiyang pagtotokdo.’ (1 Tim. 4:16) An librong pinag-aadalan na Paadalan sa Pagmiministro, pahina 32, nagsasabi: “Masasabi nanggad na an epektibong pampamilyang pag-adal minapoon sa pag-adal sa mismong pamilya nindo. Kumusta an espirituwal na pag-oswag kan mga miembro kan saindong pamilya? . . . Kun kamo nasa ministeryo sa langtad kaiba an saindong mga aki, komportable daw sindang ipamidbid an saindang sadiri bilang mga Saksi ni Jehova sa atubangan kan saindang mga kaedad? Ikinaoogma daw ninda an saindong programa nin pampamilyang pagbasa kan Biblia asin pag-adal? Talaga daw na ginigibo nindang dalan nin pamumuhay an dalan ni Jehova? Ihahayag nin maingat na pagmasid kun ano an kaipuhan na gibohon nindo, bilang payo nin pamilya, tangani na establisaron asin pakosogon an espirituwal na mga kualidad sa kada miembro nin pamilya.”
9 Mga Pagtiripon kan Kongregasyon: An pag-andam para sa asin pag-atender sa mga pagtiripon kan kongregasyon maninigo na importanteng kabtang kan semanal na kaugalean nindo. (Heb. 10:24, 25) Kun beses, tibaad mahihimo nindong mag-andam para sa nagkapira kan mga pagtiripon bilang pamilya. Imbes na maghalat sagkod sa ultimo ora, puede daw nindong iareglo na mag-andam nin haloy pang marhay? An aregladong kaugalean sa bagay na ini paooswagon an kualidad kan saindong pag-andam sagkod an mga pakinabang na nakakamtan nindo sa mga pagtiripon.—Tal. 21:5.
10 An kalidad asin pagigin daing liwat-liwat karakteristiko nin epektibong espirituwal na kaugalean. Paano kun an mga kamugtakan nagpapadepisil sa saindo na mag-andam para sa gabos na pagtiripon? An librong pinag-aadalan na Paadalan sa Pagmiministro, pahina 31, arog kaini an suhestion: “Likayan an natatagong mga peligro nin naghihidaling pagbasa kan materyales tangani sanang matapos iyan o, mas grabe pa, dai na logod pag-adal sa arin man dian ta dai nindo kayang adalan an gabos. Imbes, aramon kun gurano an kaya nindong adalan, asin gibohon iyan nin toltol. Gibohon iyan kada semana. Pag-abot nin panahon, hingoahon na dagdagan tanganing ikaiba an ibang pagtiripon.”
11 Kun an mga pamilya amay na nag-aabot sa mga pagtiripon, ini nakakatabang sainda na magkaigwa nin tamang kaisipan na omawon si Jehova asin makinabang sa instruksion na itinatao nia. Ugale daw ini kan saindong pamilya? Iyan nagkakaipo nin marahay na pagplano asin kooperasyon kan gabos sa pamilya. Kun parate nindong nanonompongan na naghihidali an saindong pamilya asin natetension sa mga panahon nin pagtiripon, puede daw na gumibo nin mga pagliliwat sa saindong kaugalean? Igwa daw nin mga bagay na puedeng asikasohon nin patienot? Kun nagagabatan an sarong miembro kan pamilya huli sa dakol na gigibohon, puede daw na tumabang an iba? Maiinaan daw an tension kun an gabos andam nang magduman sa pagtiripon na mas amay nin nagkapirang minuto? An marahay na areglo nakakokontribwir sa espiritu nin katoninongan sa pamilya sagkod sa kongregasyon.—1 Cor. 14:33, 40.
12 Paglilingkod sa Langtad: An pag-establisar nin depinidong mga panahon para sa pakikikabtang sa ministeryo saro pang kabtang nin marahay na espirituwal na kaugalean. Nagigirumdoman nin sarong soltero na an ngaran Jayson: “Sa pamilya ko, an mga Sabadong aga pirmeng idinudusay sa paglilingkod sa langtad. Ini marahay para sako huli ta mientras na pirme akong nagluluwas sa ministeryo, orog man na naheheling ko an marahay na nagigibo kaiyan asin orog na ikinaoogma ko iyan.” Naobserbaran man kan dakol na nagdakula sa mga pamilyang Saksi na an pagkaigwa nin depinidong panahon para sa ministeryo serosemana nakatabang sa sainda na umoswag bilang Kristianong mga ministro.
13 An aregladong kaugalean makakatabang man na magin mas nakagagayagaya asin mas mabunga an panahon na ginagamit kan saindong pamilya sa paglilingkod sa langtad. Paano ini magigibo? An Hulyo 1, 1999 Torrengbantayan, pahina 21, isinusuherir an minasunod: “Ginagamit daw nindo kun minsan an oras sa saindong pampamilyang pag-adal na tabangan an mga miembro kan saindong pamilya na mag-andam para sa paglilingkod sa langtad para sa semanang iyan? Puedeng magin kapakipakinabang na marhay an paggibo kaiyan. (2 Timoteo 2:15) Makatatabang iyan na magin makahulogan asin mabunga an saindang paglilingkod. Kun minsan, puede nindong itagama an bilog na pag-adal para sa siring na pag-andam. Mas parate, puede nindong tokaron an mga aspekto kan ministeryo sa langtad sa mas haralipot na orolay sa katapusan kan pampamilyang pag-adal o sa ibang panahon sa laog kan semana.” Prinobaran na daw ini kan saindong pamilya?
14 Padagos na Umoswag: Sa pag-orolay na ini, nariparo daw nindo an mga kabtang na nagigibo nin toltol kan saindong pamilya? Komendaran sinda, asin hingoahon na umoswag sa mga ini. Kun may naheheling kamong nagkapirang kabtang na kaipuhan na paoswagon, pumili nin saro o duwa na eenoton nindong asikasohon. Kun iyan magin nang kabtang kan saindong espirituwal na kaugalean, paoswagon an saro o duwa pa. Magin positibo asin rasonable. (Fil. 4:4, 5) An pag-establisar nin marahay na espirituwal na kaugalean para sa saindong pamilya nagkakaipo nin tunay na paghihingoa, alagad bawi man na marhay iyan, huli ta inaasegurar kita ni Jehova: “Kun dapit sa saro na nagdadanay sa pihong dalan, ipaheheling ko sa saiya an pagliligtas nin Dios.”—Sal. 50:23.