Kun Paano Nakikikooperar an mga Miembro kan Pamilya Para sa Lubos na Pakikikabtang—Sa Pampamilyang Pag-adal
1 An katotoohan nagdadagdag nin tunay na kahulogan asin katuyohan kan buhay pampamilya, alagad an kapangganahan sa paglilingkod ki Jehova dai automatikong nangyayari. Kaipuhan an panahon asin paghihingoa tangani na makatogdok nin pamilya na makosog sa espirituwal. Kaipuhan na marhay na an mga miembro kan pamilya magtarabangan nanggad sa aktibidad na ini. An enot na artikulong ini sa tolong kabtang na serye makonsentrar sa kun paano an mga pamilya puedeng magkooperar sa pagpatalubo nin marahay na ugale sa pag-adal.
2 Paagi sa Pagbasa kan Biblia Aroaldaw: An Talinhaga 24:5 nagsasabi na “an tawong may kaaraman nagpapakosog sa kapangyarihan.” An kaaraman na nakukua sa regular na pagbasa kan Tataramon nin Dios nagtatao sa saro kan panlaog na kosog na kaipuhan tangani na malabanan an mga pagsalakay ni Satanas sa saiyang espirituwalidad. (Sal. 1:1, 2) Iriba daw nindong binabasa an Biblia aroaldaw bilang sarong pamilya? Itinatao kan Iskedyul sa Teokratikong Paadalan sa Pagmiministro an “Suplementong Iskedyul sa Babasahon sa Biblia” para sa kada semana kan taon. An pagsubaybay dian nagkakaipo sana nin dies minutos sa panahon kan pamilya kada aldaw. Pumili nin kombenyenteng panahon, siring baga sa pamahaw, pakapamanggi, o bago magtorog, tangani na basahon an Biblia asin pag-olayan an teksto kan aldaw sa Pagsiyasat sa Kasuratan Aroaldaw. Gibohon ining kabtang kan aroaldaw na pinagkatodan kan saindong pamilya.
3 Paagi sa Iribang Pag-adal Kada Semana: An pampamilyang pag-adal sa Biblia maninigo na magin tampok na kabtang sa semana nin sarong pamilya. An kada miembro dapat na suportaran iyan paagi sa galagang pagpartisipar sa pag-adal. Bobooton kan payo nin pamilya na konsideraron an mga pangangaipo kan pamilya kun nagpipili kan materyal na pag-aadalan asin kan aldaw, oras, asin lawig kan pag-adal. Tawan nin prioridad an pampamilyang pag-adal sa iskedyul kan semana. Dai pagtogotan na makaolang an mga bagay na bakong gayong mahalaga.—Fil. 1:10, 11.
4 An sarong ama na parateng nakareresibi nin mga apod manongod sa negosyo sa saiyang harong pinuputol an koneksion kan telepono durante kan pampamilyang pag-adal. Kun minaduman sa harong an mga kliente, iniimbitaran sindang umiba sa pag-adal o maghalat sagkod na matapos iyan. Determinado an ama na mayo nin makaoolang sa pampamilyang pag-adal. Hararom an nagin epekto kaini sa saiyang mga aki, asin kun manongod sa saiyang negosyo, iyan nag-asenso.
5 Kanigoan kanakaoogma kun nakikikooperar an mga miembro kan pamilya sa espirituwal na mga aktibidad! An pagigin fiel sa satong mga paghihingoa na lubos na makikabtang sa pampamilyang pag-adal sa Biblia magbubunga nin bendisyon ni Jehova.—Sal. 1:3.