Pampamilyang Iskedyul—An Pampamilyang Pag-adal
1 An pinakadakulang regalo na ikakatao nindo bilang Kristianong magurang sa saindong mga aki iyo an pagkamoot nindo ki Jehova. An importanteng kamugtakan na ini puedeng mangyari iyo an ‘kun kamo nagtutukaw sa saindong harong’ para sa semanal na pampamilyang pag-adal sa Biblia. (Deut. 6:5-7) Baga man kamo igwang agom na may pagtubod, nakaistar sa harong na nababanga huli sa relihion, o nagsosolong magurang, matatabangan nindo an mga aki nindo na rumani sa saindo asin ki Jehova paagi sa pagkaigwa nin regular na pampamilyang pag-adal.
2 Pagpoon: An enot na tangga iyo na establisaron an kaugalean na mag-adal bilang pamilya. Kun bako kamong segurado kun noarin gigibohon an pag-adal, taano ta dai ini pag-olayan bilang pamilya? (Tal. 15:22) Kun kamo may saradit na aki, tibaad mas gugustohon nindong magkaigwa nin nagkapirang haralipot na sesyon sa bilog na semana. Determinaran kun ano an pinakaangay para sa saindong kasararo sa harong. Magtalaan nin espesipikong oras para sa pag-adal sa saindong pampamilyang iskedyul, asin magin desididong sunodon iyan.
3 Ano an puede nindong pag-adalan? An nagkapira nag-aandam kan leksion na pag-oolayan sa masunod na Pag-adal sa Libro kan Kongregasyon o Pag-adal sa Torrengbantayan. An iba pinag-oolayan an materyales na ginibo espesyalmente para sa mga hoben. An ama nin sarong saday pang aking lalaki asin babae nagsabi: “An sarong bagay na nagpapangyari na an samong pag-adal magin tampok na kabtang kan semana para sa mga aki iyo na iinaakto niamo an mga eksena sa My Book of Bible Stories. An ibinubungang rarom nin pagkatudok sa isip asin pakasabot mas mahalaga nanggad kisa kun pirang parapo an matapos niamo.”
4 Mag-adal Kada Semana: An pampamilyang pag-adal maninigong gibohon nin regular asin magayagayang antisiparon kan gabos na miembro nin pamilya. Puede man na togotan an nagkapirang pagliliwat sa kamugtakan kun manongod sa aldaw asin oras para sa pag-asikaso sa dai linalaoman na mga situwasyon. Tibaad may mga okasyon man na kaipuhan na liwaton an temang pag-aadalan. Alagad an ano man na kinakaipuhan na pagliliwat maninigo na dai magin dahelan nin halawig na pagkaabala sa establisado nang iskedyul nin pampamilyang pag-adal. Sa sarong pamilya, an aking babae nagkomento: “Kun kaipuhan na liwaton an oras kan samong pag-adal, pirmeng ibinubugtak ni Tatay an bagong oras sa pinto kan repridyeretor tanganing maaraman niamo gabos kun noarin iyan gigibohon.” Kaomaw-omaw nanggad an siring na paghihingoa na papagdanayon an regular na pampamilyang pag-adal! Mantang pinapadakula nindo an mga aki nindo “sa disiplina asin pagtatanos nin isip ni Jehova,” ipinapaheling nindo an saindong pagkamoot sa sainda sagkod sa satong langitnon na Ama.—Efe. 6:4.