Padagos na Maglakaw nin Progresibo sa Aregladong Rutina

¹ Si apostol Pablo nagkaigwa nin espesyal na kapadangatan para sa kongregasyon sa Filipos, na tinabangan niang establisaron. Nagpasalamat sia sa saindang materyal na mga probisyon asin nagtaram manongod sa sainda bilang marahay na halimbawa.​—2 Cor. 8:​1-6.

² An surat ni Pablo sa mga taga-Filipos pinahiro nin hararom na pagkamoot. Nagbabareta an librong Insight, Tomo 2, pahina 631: “Sa bilog na surat pinakokosog nia an kongregasyon sa Filipos na magpadagos sa saindang marahay na dalan​—na naghahanap nin mas dakol na pagmansay asin siertong nangangapot sa Tataramon nin buhay, mas makosog na pagtubod, asin paglaom sa premyong maabot.” Sinda mainit na naghimate, na pinaririgon an bogkos nin pagkamoot sa pag-oltanan ninda asin kan apostol. An mga tataramon ni Pablo igwa nin espesyal na kahulogan para sa sato ngonyan, asin igwa kita nin marahay na dahelan na magtaong atension partikularmente sa saiyang sadol sa Filipos 3:​15-17.

³ Mahalaga an Maygurang na Pag-iisip: Sa Filipos 3:​15, nagsurat si Pablo bilang tawo na may dakol nang taon na kabatidan. Nakiolay sia sainda bilang maygurang na mga Kristiano na may tamang pag-iisip. Sagkod na an saindang pag-iisip nagpapabanaag kan kapakumbabaan asin pagpapahalaga na ipinaheling ni Jesus, mapadagos sindang “daing kasagwean asin daing kasalan, mga aki nin Dios na daing kaninan . . . , na marigon na nangangapot sa tataramon nin buhay.” (Fil. 2:​15, 16) Kun binabasa niato an mga tataramon na iyan, maninigo niatong mamatean na si Pablo nagtataram sa sato. Kun siring odok niatong minamawot na magkaigwa kan parehong pag-iisip ni Jesus, na nagpapaheling nin mapakumbabang pagpapahalaga sa satong mga pribilehiyo. Padagos kitang nakikiolay ki Jehova sa pamibi, na naghahagad nin tabang sa bagay na ini asin sa ibang bagay.​—Fil. 4:​6, 7.

⁴ Siring sa ipinaririsa kan Filipos 3:​16, kita gabos maninigong maghingoa na magprogreso. An terminong “progreso” nangangahulogan na “naghihirong paabante, naggigibo nin pag-oswag.” An mga tawong progresibo “interesado sa bagong mga ideya, diskobremiento, o oportunidad.” Boot ni Pablo na masabotan kan mga taga-Filipos na an Kristianismo nungkang estangkado asin idtong mga naghihingako kaiyan kaipuhan na padagos na humirong paabante. An saindang progresibong espiritu maheheling paagi sa pagigin andam na siyasaton an saindang sadiri, midbidon an saindang mga kaluyahan, asin pag-aaboton an mga oportunidad na gumibo nin orog pa. Ngonyan an organisasyon ni Jehova sa daga padagos na progresibong naghihiro paabante. An kada saro sa sato kaipuhan na dumungan dian, na inaaprobetsaran an gabos na probisyon kaiyan asin biyong nakikikabtang sa gibohon kaiyan.

⁵ An Progreso Naghahagad nin Aregladong Rutina: Nagpadagos si Pablo paagi sa pagdagka sa saiyang mga tugang na ‘padagos na maglakaw nin areglado sa iyo man sanang rutina.’ (Fil. 3:16) An pagigin areglado naghahagad sa sato na ibugtak an mga bagay sa tamang mga lugar kaiyan may koneksion sa kada saro. An mga Kristiano sa Filipos pinagdanay an sadiri sa saindang tamang lugar, na nagdadanay na dayupot sa organisasyon ni Jehova asin sa lambang saro. Pinamamahalaan an saindang buhay kan pagboot nin pagkamoot. (Juan 15:17; Fil. 2:​1, 2) Dinagka sinda ni Pablo na “gumawe sa paagi na angay sa maogmang bareta.” (Fil. 1:27) An pangangaipo para sa pagkaareglado asin marahay na gawe siring kaimportante sa mga Kristiano ngonyan.

⁶ An rutina sarong kinaugalean nang paggibo kan sarong establisadong prosedimiento. Kapakipakinabang an pagkakaigwa nin rutina huli ta dai na kita kaipuhan pang pumondo nin kadikit asin magdesisyon kun ano an masunod na gigibohon​—kita nakaestablisar na nin permanenteng arogan na sinusunod niato paagi sa puwersa nin ugale.

⁷ An aregladong teokratikong rutina mga ugale na marahay​—na igwa nin katuyohan sa pagpakosog sa satong sadiri sa espirituwal, pagtabang sa iba, asin paggibo nin orog pa sa paglilingkod ki Jehova. An paggibo kan mga katuyohan na ini naghahagad nin pag-establisar nin sarong rutina sa personal na pag-adal, regular na pag-atender sa mga pagtiripon, asin pakikikabtang sa paghuhulit.

⁸ Mga Kinakaipuhan na Kaibanan sa Aregladong Rutina: An sarong kaipuhan iyo an “tamang kaaraman asin lubos na pagmansay.” (Fil. 1:9) An personal na pag-adal pinarararom an satong pagtubod, pinaririgon an satong pagkamoot sa katotoohan, asin minomotibar kita sa mararahay na gibo. Alagad, may mga nadedepisilan sa pagmantenir nin regular na ugale sa pag-adal. An saro sa itinaong mga dahelan iyo an kakulangan nin oras.

⁹ An pagbasa sa Biblia aroaldaw “kapakipakinabang” sa gabos na paagi. (2 Tim. 3:​16, 17) Paano kita makakahanap nin panahon para sa pag-adal sa Biblia sa satong pan-aroaldaw na rutina? An iba ginigibo iyan paagi sa pagmata nin mga pirang minuto na mas amay kada aga, na an saindang isip alisto. An iba nagbabasa nin pirang minuto bago magtorog. An mga agom na babae na nasa harong puwedeng gumamit nin dikit na oras sa mga hapon bago an iba magpuli hale sa trabaho o sa eskuwelahan. Bilang dagdag sa pagbasa sa Biblia, may mga iiniiba an pagbasa kan librong Proclaimers sa saindang semanal na rutina sa pag-adal.

¹⁰ Kun nag-eestablisar kita nin bagong mga ugale, an mga ini puwedeng kumontra sa satong dating mga ugale. Kan nakaagi tibaad tinogotan niato an bakong mahalagang mga aktibidad na makaubos sa satong panahon. Bakong pasil an paghale sa ugaleng iyan. Mayo nin magmamando sa satong mga ugale sa pag-adal; ni na kita hinahagadan na manimbag sa kun ano an satong ginigibo manongod sa bagay na ini. An satong regular na mga ugale sa pag-adal minadepende sa satong pag-apresyar kan “orog na mahalagang mga bagay” asin kan satong pagigin andam na tuboson “an panahon.”​—Fil. 1:10; Efe. 5:16.

¹¹ Igwa nin mahalagang kabtang an Kristianong mga pagtiripon sa satong espirituwal na progreso, na nagtatao nin instruksion asin pagpapakosog. Kaya, an pag-atender sa mga pagtiripon saro pang mahalagang kabtang nin satong aregladong rutina. Idinoon ni Pablo na iyan bakong diretsong pumili na dinideterminaran paagi sa kagustohan.​—Heb. 10:​24, 25.

¹² Paano niato ikakapaheling an pagigin areglado kun ipinaplano niato an satong semanal na iskedyul? An iba iinaareglo an espisipikong mga oras para sa personal na mga aktibidad dangan hinihingoang isaliot an mga pagtiripon sa arin man na libreng oportunidad, alagad iyan maninigong an kabaliktaran. Maninigong tawan nin pangenot na lugar an satong semanal na mga pagtiripon, na ipinaplano an ibang aktibidad sa mga oras na mayo nin mga pagtiripon.

¹³ Naghahagad nin marahay na pagplano asin pampamilyang kooperasyon an regular na pag-atender sa pagtiripon. Sa mga aldaw sa laog nin semana an kadaklan sa sato igwa nin sibot na iskedyul. Ini nangangahulogan na an pamanggihan kaipuhan na iiskedyul nin amay tanganing an pamilya magkaigwa nin panahon na magkakan, mag-andam, asin mag-abot sa mga pagtiripon bago iyan pumoon. Sa katuyohan na iyan an mga miembro kan pamilya puwedeng makikooperar sa manlaenlaen na paagi.

¹⁴ Kaipuhan na gayo an regular na paglilingkod sa langtad kun boot niatong padagos na maglakaw nin progresibo sa aregladong rutina. Minimidbid niato gabos an satong paninimbagan na ihulit an mensahe kan Kahadean. Iyan an dahelan na kita mga Saksi ni Jehova. (Isa. 43:10) Mantang iyan an pinakaapretadong trabaho na ginigibo ngonyan, dai iyan puwedeng mansayon na insidental sanang kabtang nin satong pan-aroaldaw na rutina. Siring sa sadol ni Pablo: “Danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.”​—Heb. 13:15.

¹⁵ Kun pinaplano niato an satong aktibidad sa kada semana, maninigong magtagama nin espisipikong mga oras para sa paglilingkod sa langtad. Marahay na magmaigot na makihiras sa kada kabtang nin paglilingkod, siring baga sa pagharongharong, paggibo nin mga pagdalaw liwat, asin pagkondukta nin mga pag-adal sa Biblia. Puwede pa ngani niatong patienot na planohon na gumibo nin impormal na pagpatotoo paagi sa pagdara nin literatura asin pagigin alisto sa mga oportunidad na makapoon nin mga pag-orolay. Mantang parate kitang nagluluwas kaiba kan iba, kaipuhan kitang maghapot dapit sa saindang iskedyul tanganing makagibo kita nin mga areglo na magigin kombenyente sa kada saro.

¹⁶ An satong rutina sa paghuhulit maninigong papagdanayon sa ibong kan pagkaindiperente sa teritoryo. Aram niato patienot pa na pipira sana an maghihimate. (Mat. 13:15; 24:9) Iinasignar si Ezequiel na maghulit sa mga tawo na ‘rebelde, sutil an lalauogon, asin matagas an puso.’ Nanuga si Jehova na tatabangan si Ezequiel paagi sa paggibo sa saiyang “angog na siring nanggad katagas sa saindang angog,” na an boot sabihon, “siring sa brilyante, na mas matagas pa sa gapong kiskisan.” (Ezeq. 2:​3, 4; 3:​7-9) Kun siring an regular na rutina sa paglilingkod naghahagad nin pagmamaigot.

¹⁷ Mararahay na Halimbawa na Dapat Arogon: An kadaklan sa sato mas marahay sa paglilingkod sa langtad kun igwang nangengenot. Si Pablo asin an saiyang kairiba nagtao nin marahay na halimbawa, asin dinagka nia an iba na arogon sia.​—Fil. 3:17.

¹⁸ Ngonyan man, igwa kita nin dakol na marahay na halimbawa. Sa Hebreo 13:​7, nandagka si Pablo: “Girumdoma nindo idtong mga nangengenot saindo, . . . asin mantang pinaghohorophorop nindo an saindang gawe aroga nindo an saindang pagtubod.” Siyempre, si Cristo an satong Arogan, pero puwede niatong arogon an pagtubod kan mga nangengenot. Siring ki Pablo, an mga magurang kaipuhan na magin marahay na mga halimbawa sa iba. An kada saro maninigong magkaigwa nin aregladong rutina sa pag-enot kan intereses kan Kahadean. Maski igwa nin sekular asin pampamilyang mga obligasyon, maninigong magkaigwa an mga magurang nin establisadong marhay na mga ugale sa personal na pag-adal, pag-atender sa mga pagtiripon, asin pangengenot sa paglilingkod sa langtad. Kun an mga magurang ‘nangangataman sa saindang sadiring harong sa marahay na paagi,’ an gabos sa kongregasyon mapakokosog na padagos na maggibo sa aregladong rutina.​—1 Tim. 3:4, 5.

¹⁹ Mga Pasohan Para sa Bagong Taon nin Paglilingkod: An kapinonan kan bagong taon nin paglilingkod angay na panahon na horophoropon an satong personal na rutina. Ano daw an ipinaheheling sa repaso nin satong aktibidad kan nakaaging taon? Napaoswag daw niato an satong grado nin aktibidad? Puwedeng nagin mas marahay kita sa satong personal na pag-adal. Puwedeng mas regular kitang nakaatender nin mga pagtiripon o puwedeng nadugangan an satong paglilingkod sa langtad paagi sa pagpalista bilang auxiliary payunir. Tibaad naggibo kita nin espisipikong mga gibo nin Kristianong kabootan sa kapakanan nin iba sa satong kongregasyon o pamilya. Kun iyo, igwa kita nin dahelan na maggayagaya na kita naglakaw sa paagi na nakakapaogma sa Dios, asin igwa kita nin marahay na dahelan na “padagos na gumibo kaiyan nin lubos pa.”​—1 Tes. 4:1.

²⁰ Kumusta man daw kun an satong rutina garo baga nagin paliwatliwat o paminsanminsan? Paano kita naaapektaran sa espirituwal? An sato daw na progreso naolang huli sa nagkapirang rason? Nagpopoon an pag-oswag paagi sa paghagad nin tabang ki Jehova. (Fil. 4:​6, 13) Ipakipag-olay an saindong mga pangangaipo sa iba pa sa saindong pamilya, na hinahagad an saindang tabang sa pagliwat kan saindong rutina. Kun igwa kamo nin mga problema, humagad nin tabang sa mga magurang. Kun magibo kita nin odok na paghihingoa asin maghihimate sa paggiya ni Jehova, makakasierto kita na malilikayan niato na “magin inaktibo o daing bunga.”​—2 Ped. 1:5-8.

²¹ An paglakaw sa aregladong rutina minagiya sa mga bendisyon na ginigibong sulit an saindong mga paghihingoa. Mantang determinado kamong maglakaw nin progresibo sa aregladong rutina, “dai kamo maghinugak sa saindong gibohon. Magin malaad sa espiritu. Maglingkod ki Jehova.” (Roma 12:11)​—Para sa orog na detalyadong paliwanag sa temang ini, helingon an Torrengbantayan na Disyembre 1, 1985, pahina 18-23 (w85-E 5/1 p. 13-17).