Pagdiskobre sa Tunay Nindong Pagkatawo

KUN kamo nananalming, ano an naheheling nindo? An saindong pisikal na itsura. Pero sinasabi daw kaiyan kun ano an tunay nindong pagkatawo? Sinasabi daw kaiyan kun ano an pagheling sa saindo nin iba bilang sarong persona? Talaga daw na midbid nindo kun siisay kamo? Aram daw nindo kun paano naestablisar kan primero an saindong personal na gawe-gawe? Iyo, paano kamo nabilog, bilang sarong personalidad?

Kun maontok kamo tanganing analisaron an gabos na elemento na buminilog sa saindong personalidad, tibaad marisa nindo na dakol na impluwensia an ipinirit sa saindo—magsalang nin ibang tawo o nin ibang bagay. Kan enot na mga taon nin satong pagdakula, an kadaklan sa sato haros mayong pakiaram sa pag-establisar kan satong mga ugale asin gawe-gawe. Kaya siyasaton niato an pira sa nakabibilog nin personalidad na mga impluwensiang ini na ipinirit sa saindo—na an iba haloy pa bago kamo nagkaoportunidad na may gibohon manongod sa saindong sadiring gawe-gawe.

May Dakulang Kabtang an Henetika

Gurano an epekto sa saindo nin henetika? An planong DNA, na yaon sa mga cromosoma na nagdadara kan mga ugaleng minamana, igwa nin mga deskripsion asin de kodigong mga instruksion para sa pagtalubo nin kada tawo. Kaya gurano sa saindong indibiduwal na gawe-gawe an naimpluwensiahan nin henetika? Minalataw na masakit pang patunayan an ano man na depinidong koneksion sa pag-oltanan nin mga genes asin nin personalidad. Pero, may mga paagi na garo baga may importansia. Halimbawa, an pira sa saindong minanang ugale talagang may epekto tolos sa saindong gawe-gawe. Kaya, an iba nakakamana nin pormal na disposisyon, mantang an iba man natural na mas makiamigo.

An sarong bados puwedeng tawan nin pakinabang o danyos an dai pa namumundag na aki nia paagi sa saiya mismong mga hiro, iniisip, asin saboot. Guranong katoninongan o pagkainit an ipinamate sa saindo kan kamo nasa matris pa kan saindong ina? Gurano an nanodan nindo sa tono kan boses kan saindong mga magurang, sa musikang pinagdadangog ninda? Gurano an epekto sa saindo kan kinakan kan saindong ina? Kun halimbawa sia nag-inom nin arak o nagdroga, gurano an epekto kaiyan sa saiya? Kan kamo mamundag, an kadaklan sa saindong mga hilig establisado na asin tibaad masakit nang bagohon.

Kumusta Man an Pagkakan, mga Nakararaot sa Lawas, Palibot?

Mantang kamo nagdadakula, an pirang sustansia sa saindong pagkakan tibaad may epekto sa saindong hiro. An mga panhamis, artipisyal na pankolor, asin pampreserba—gabos puwedeng magtao nin dai naheheling na impluwensia sa hiro. An sobra an pagkaaktibo, nadugangan na tension, pagkaaranggoton, kolog sa nerbiyos, asin sobra asin dai mapogolan na mga hiro pira sana sa mga resulta. An polusyon hale sa mga tambutso nin sakayan, mga aso hale sa mga pabrika, asin iba pang ilo sa palibot nakaiimpluwensia man sa hiro. O, sa personal, tibaad igwa nin bagay na nakararaot na gayo sa saindong lawas pero tibaad dai man nakadadanyar sa mga nasa palibot nindo.

Apuwera sa mga impluwensiang ini, an hiro kan saindong mga magurang, an mga gusto asin habo ninda saka an saindang mga daing binabasaran na pagkaanggot na nagimatan na nindo, nagkaigwa nin epekto sa saindo asin nakaimpluwensia sa saindong personalidad. An resulta iyo na an dakol nindong ugale asin an saindong pankagabsan na punto-de-vista sa buhay kapareho kan sainda. May tendensia kamong ikaanggot an mga bagay na ikinaaanggot ninda. May tendensia kamong itogot an mga bagay na itinotogot ninda. Asin bihira nindong marisa na inaarog nindo an saindang hiro sagkod na may magsabi saindo na an hiro-hiro nindo kapareho kan saindong ama o kan saindong ina. Apektado man kamo kan saindang pinansial asin sosyal na kamugtakan, siring man kan mga pagtaraed asin eskuwelahan nindo. An saindong mga katood asin kairiba nagkaigwa man nin dakulang impluwensia sa saindo. Tibaad apektado kamo nin grabeng aksidente (sa saindo o sa dayupot na katood), nin lokal na kalamidad, o minsan nakariribok na mga pangyayari sa kinaban. O tibaad an sarong makamomondong pangyayari, arog baga nin diborsio o grabeng helang, nagwalat nin lugad sa saindong personalidad.

Kun hohorophoropon, may masasabi daw kamong siring na impluwensia?

Ano an Kabtang nin Relihiyon?

Sa teoriya, an relihiyon maninigong makatabang saindo na magin mas marahay na tawo, na pinararahay an saindong moral na gawe-gawe, prinsipyo, asin gibo-gibo sa aroaldaw. Pira sa saindong mga pamantayan asin gawe-gawe an apektado nin relihiyon? Minsan ngani an relihiyon maninigong makaolang sa iresponsable, kriminal na gawe-gawe, an dakol apektado kan saindang asosasyon sa relihiyon sa laen man na paagi. Sinda nakakarisa nin grabeng pagsaginsagin asin pagdodoon sa materyal imbes na sa espirituwal na mga pamantayan sa mga iglesya asin bilang resulta minapait an saindang boot. Tibaad rayoan pa ngani ninda an relihiyon, na nawawaran na nin espirituwalidad asin paglaom.

Tibaad may maisip pa kamong ibang panluwas na impluwensia na nakagigiya sa gawe-gawe. Horophoropon sa laog nin pirang minuto an arin man sa mga bagay na tibaad nakaapektar sa saindo sagkod ngonyan. Ikalilista daw nindo an nagkapira? Bakong pasil na magin realistiko asin maghorophorop sa paaging ini, pero iyan kapakipakinabang asin tibaad makatabang saindo. Taano man?

Bueno, kun masasabi nindo an sarong impluwensia o dahelan nin negatibong tendensia sa saindong gawe-gawe, kun iyan ikatotokdo nindo nin espisipiko, mas makokontrol nindo iyan, tibaad mabago pa ngani. Kun makokontrol nindo, o mahahale pa ngani, an sarong maraot na impluwensia, puwede kamong magin ibang tawo, na mas positibo an gawe-gawe sa iba.

Siyempre, angat iyan. Alagad huli ta an kadakol na impluwensia sa saindong gawe-gawe ipinirit sa saindo nin ibang tawo o nin mga kamugtakan na mayo man sa kontrol nindo, taano ta dai gibohon an inisyatiba asin kamo mismo an gumibo nin paagi manongod sa saindong kamugtakan? Kun iyan nangangahulogan nin pag-oswag, taano ta dai bagohon an saindong pagkatawo?

[Ritrato sa pahina 1]

An mga hiro asin saboot nin sarong bados puwedeng makaapektar sa saiyang dai pa namumundag na aki