An Inosenteng mga Biktima nin Pagmaltrato sa Aki

“MAGKUKUWARENTA anyos na ako,” sabi ni Eilene.a “Asin minsan ngani labi nang 30 anyos an problema ko, iyan dai ko pa man giraray nalilingawan. An kaanggotan, an pakamate nin kasalan, an mga problema mi mag-agom! Pinagmamaigotan nin iba na saboton iyan, pero dai ninda kaya.” An problema ni Eilene? Biktima sia nin seksuwal na pagmaltrato kan aki pa, asin nagin haloyon an mga epekto sa saiya.

Si Eilene tunay na dai nasosolo. Ipinaririsa nin mga surbey na an grabe kadakol na babae—asin lalaki—nagtios nin siring na pagmaltrato.b Kun siring, imbes na pambihira sanang palaen na gawe, an seksuwal na pagmaltrato sa aki lakop, na nakaaapektar sa gabos na sosyal, ekonomiko, relihiyoso, asin rasyal na mga grupo.

Marahay sana ta an mayoriya sa mga lalaki asin babae nungka na iisipon man lamang na maltratohon an sarong aki sa paaging ini. Pero an peligrosong minoriya igwa kan rungaw na inklinasyon na ini. Asin kontra sa imahinasyon nin dakol, pipira sanang mga paramaltrato sa aki an risang abnormal na mga tawo na may tendensiang mangadan na nagtatago sa mga lugar na kawatan. An kadaklan mga tawo na sa luwas garo normal. Pinaninigoan ninda an saindang marigsok na mga horot paagi sa pagpunteriya sa inosente, mapagkompiar, daing pandepensang mga aki—sa parate an sadiri nindang mga aking babae.c Sa publiko, tibaad maboot, mapagpadangat an pagtrato ninda sa mga aki. Sa pribado, pinaaagi ninda an mga aki sa mga pananakot, kadahasan, asin makasosopog, marigsok na mga klase nin seksuwal na pagsalakay.

Totoo, masakit saboton na an siring karigsok na mga bagay puwedeng mangyari sa kadakol na garo baga disenteng mga pamilya. Alagad minsan kan mga panahon kan Biblia, an mga aki ginamit na “para sa madalian na pagpanigo sa . . . sensuwal na horot.” (The International Critical Commentary; ikomparar an Joel 3:3.) Ihinula kan Biblia: “Alagad aramon mo ini, na sa huring mga aldaw maabot an delikadong mga panahon na masakit pakibagayan. Huli ta an mga tawo magigin mamomoton sa sainda man sana . . . dai nin pagkamoot . . . mayong pagpopogol sa sadiri, maringis, mayong pagkamoot sa karahayan.” Kun siring, dai niato maninigong ipagngalas na lakop na nangyayari an pagmaltrato sa aki ngonyan.—2 Timoteo 3:1, 3, 13.

An paglupig sa aki tibaad daing iwalat na pisikal na mga pila. Asin bakong gabos na nasa edad na na nabiktima kaidtong aki pa risang nagsasakit. Alagad arog kan ikinomento nin sarong suanoy na talinhaga: “Minsan nagngingisi an puso tibaad nakokolgan.” (Talinhaga 14:13) Iyo, an dakol na biktima may hararom na emosyonal na mga pila—hilom na mga lugad na nagkakanana sa laog. Alagad, taano ta siring kagrabe an danyos nin paglupig sa aki sa nagkapira? Taano ta dai perming nabobolong an mga lugad kaiyan kan pag-agi sana nin panahon? An kadakulaan kan masakit na problemang ini naghahagad na iyan tawan niato nin atension. Totoo, an iba sa masurunod tibaad bakong maogmang basahon—nangorogna kun kamo nabiktima nin pagmaltrato sa aki. Alagad makasisierto kamo na may paglaom, na kamo maoomayan.