Nagtindog nin Dakulang Tore an mga Tawo

LUMINIHIS an dakul na taon. An mga aki ni Noe nagkaigwa nin kadakul na aki. An mga ini nagdarakula saka nagkaigwa man nin mga aki. Dai nahaloy dakulon nang tawo sa daga.

An saro sainda iyo an makuapo sa tuhod ni Noe na si Nimrod. Siya sarong maraot na paraayam na guminadan nin mga hayop asin tawo. Ginibo man niyang hadi an sadiri niya. Dai nagustuhan nin Diyos si Nimrod.

Kaidto, saro sana an tataramon kan gabos na tawo. Gusto ni Nimrod na tiripunon sinda ’nganing pamahalaan niya. Aram mo kun anong ginibo niya? Sinabihan niya an mga tawo na maggibo nin siyudad na may dakulang tore. Hilinga sinda sa ritrato, pighuhurma ninda an dalipay ’nganing magin mga ladrilyo.

Dai ini nagustuhan ni Jehova. An gusto niya mag-istar an mga tawo sa manlain-lain na parte kan daga. Pero sinabi kan mga tawo: ‘Mus! Maggibo kita nin siyudad na may halangkawon na tore, tapos paabuton ta sa langit an tuktok. Masikat kita!’ Gusto kan mga tawo na sinda an hangaan imbes na an Diyos.

Kaya inulang nin Diyos su paggibo ninda kan tore. Aram mo kun pa’no? Bigla niyang pinataram an mga tawo nin manlain-lain na lengguwahe, imbes na saro sana. Dai na magkasinarabutan an mga nagtatrabaho. Kaya, an siyudad ninda inapod na Babel, o Babilonya, buot sabihon “Karibarawan.”

Dahil kaini, naghali an mga tawo sa Babel. Su mga grupo nin tawong parareho an tataramon nag-iribanan pasiring sa iba-ibang parte kan daga.