“Tawan Nindo nin Atension Kun Paano Kamo Naghihinanyog”

AN PAGHINANYOG sarong importanteng bagay sa pakanood. Iyan puede man na makaimpluwensia sa mga oportunidad nin saro na magdanay na buhay. Kan nag-aandam si Jehova na iligtas an saiyang banwaan sa pagkaoripon sa Egipto, tinawan nia nin mga instruksion si Moises, na iyong nagsabi sa kamagurangan na lalaki nin Israel kan dapat nindang gibohon tanganing ikaligtas an saindang panganay sa anghel nin kagadanan. (Ex. 12:21-23) Dangan ipinaabot kan kamagurangan na lalaki an impormasyon na ini sa lambang pamilya. Ini ginibo nin berbal. An banwaan kinaipuhan na maingat na maghinanyog. Kumusta an paghimate ninda? Sinasabi kan Biblia: “An gabos na aki ni Israel guminibo kan arog sa ipinagboot ni Jehova ki Moises asin ki Aaron. Siring nanggad an ginibo ninda.” (Ex. 12:28, 50, 51) Bilang resulta, an Israel nakaeksperyensia nin pagliligtas na nakapupukaw nin may pagkangirhat na paggalang.

Ngonyan, inaandam kita ni Jehova para sa mas dakula pa nganing pagliligtas. Daing duwa-duwa, an itinatao niang pagtotokdo angay na mag-ako kan satong odok na atension. An siring na pagtotokdo itinatao sa mga pagtiripon kan kongregasyon. Lubos daw kamong nakikinabang sa siring na mga pagtiripon? Iyan dependeng marhay sa kun paano kamo naghihinanyog.

Natatandaan daw nindo an tampok na mga kabtang kan pagtotokdong itinatao sa mga pagtiripon? Ugale daw nindo, serosemana, na humanap nin mga paagi na ikaaplikar sa saindong buhay an itinataong pagtotokdo o ipaabot iyan sa iba?

Andamon an Saindong Puso

Tanganing lubos na makinabang sa pagtotokdong itinatao sa Kristianong mga pagtiripon, kaipuhan na andamon niato an satong puso. An importansia kan paggibo kaiyan idinodoon kan nangyari durante kan pagreynar ni Hadeng Josafat kan Juda. Si Josafat pusoan na nanindogan para sa tunay na pagsamba. “Hinale . . . nia sa Juda an haralangkaw na lugar nin pagsamba asin an sagradong mga palo” asin isinugo an mga prinsipe, Levita, asin saserdote na itokdo an Ley ni Jehova sa banwaan sa gabos na siudad nin Juda. Pero, “an haralangkaw na lugar nin pagsamba mismo dai nawara.” (2 Cron. 17:6-9; 20:33) An pagsamba sa falsong mga dios asin an dai autorisadong paagi nin pagsamba ki Jehova na ginigibo sa paganong haralangkaw na lugar nin pagsamba establisado nang marhay kaya an mga iyan dai napoho.

Taano ta dai nagkaigwa nin nagdadanay na impluwensia an pagtotokdong iinareglo ni Josafat? Ipinagpapadagos kan rekord: “An banwaan mismo dai pa inandam an saindang puso para sa Dios kan saindang mga apoon.” Nadangog ninda iyan alagad dai sinda nakahiro oyon dian. Tibaad para sa sainda nakaaabala an pagbiahe pasiring sa templo sa Jerusalem tanganing magdolot nin mga atang. Sa paano man, an puso ninda dai napahiro nin pagtubod.

Tanganing dai ikaanod pabalik sa mga ugale kan kinaban ni Satanas, dapat na andamon niato an satong puso na mag-ako kan pagtotokdo na itinatao ni Jehova ngonyan. Paano? An sarong importanteng paagi iyo an pamibi. Maninigo niatong ipamibi na akoon logod niato na may mapagpasalamat na espiritu an pagtotokdo nin Dios. (Sal. 27:4; 95:2) Ini matabang sa sato na maapresyar an mga paghihingoa kan satong mga tugang na, minsan bakong sangkap, nagpepresentar na gamiton ni Jehova sa pagtotokdo sa saiyang banwaan. Iyan mapahiro sa sato na pasalamatan si Jehova bako sanang sa bagong mga nanonodan niato kundi sa oportunidad man na pakosogon an satong pag-apresyar sa mga nanodan niato kaidto. May pagmawot na lubos na otobon an kabotan nin Dios, kita namimibi: “Tokdoi ako, O Jehova, dapit sa saimong dalan. . . . Gibohang saro an sakong puso na matakot sa saimong ngaran.”—Sal. 86:11.

Isentro an Saindong Atension

Kadakol kan balakid sa atento niatong paghinanyog. An satong isip tibaad pano nin mga kahaditan. Tibaad madisturbo kita nin ribok asin paghiro kan mga nagdadangog o sa luwas kan tiriponan. Tibaad huli sa pisikal na dai pagkapamugtak madepisilan kitang magkonsentrar. An mga may saradit pang aki parateng naririsa na banga an saindang atension. Ano daw an makatatabang sa sato na papagdanayon na nakasentro sa programa an satong atension?

An mga mata nakaiimpluwensiang marhay kun saen niato isinesentro an satong atension. Gamiton an saindong mga mata na makatabang sa saindo na magkonsentrar paagi sa pagtorohok kaiyan sa nagpapahayag. Kun sia sumitar nin teksto sa Biblia—dawa pamilyar—hanapon iyan, asin sundan an pagbasa nia kaiyan. Paglabanan an sugot na salingoyon an lambang ribok o hiro. Kun an isip nindo pinapano kan saindong mga mata nin impormasyon na nakadidisturbo, dakol kamong malilipasan sa iinaatubang sa plataporma.

Kun huli sa ano man na “nakariribok na mga kaisipan” nadedepisilan kamong magkonsentrar sa programa, arangon ki Jehova an pagkakalmado nin isip asin puso na kaipuhan tanganing makatao nin atension. (Sal. 94:19; Fil. 4:6, 7) Orootrohon iyan kun kaipuhan. (Mat. 7:7, 8) An mga pagtiripon kan kongregasyon probisyon ni Jehova. Makapagkokompiar kamo na gusto nia na kamo makinabang dian.—1 Juan 5:14, 15.

Paghinanyog sa mga Pahayag

Posibleng marhay na may nagigirumdoman kamong paboritong mga punto na nadangog nindo sa mga pahayag. Minsan siring, an paghinanyog sa sarong pahayag bako sanang pagkolekta nin pambihirang mga punto an kalabot. An sarong pahayag garo pagbiahe. Dawa tibaad may maheheling sa dalan na interesanteng mga bagay, an mayor na bagay iyo an padudumanan, an obheto. Tibaad hinihingoa kan nagpapahayag na giyahan an mga nagdadangog pasiring sa sarong konklusyon o pahiroon sinda na gumibo nin sarong aksion.

Estudyare an diskurso ni Josue sa nasyon nin Israel, na nasusurat sa Josue 24:1-15. An obheto nia pahiroon an banwaan na marigon na manindogan para sa tunay na pagsamba paagi sa biyong pagsiblag sa idolatriya kan mga nasyon sa palibot. Taano ta importanteng marhay idto? An pagigin lakop nin falsong pagsamba seryosong peligro sa marahay na kamugtakan kan nasyon sa atubangan ni Jehova. Suminimbag an banwaan sa pakiolay ni Josue sa pagsabi: “Mayo man lamang sa samong paghonahona na bayaan si Jehova tanganing maglingkod sa ibang mga dios. . . . Maglilingkod kami ki Jehova.” Asin iyan ginibo nanggad ninda!—Jos. 24:16, 18, 31.

Mantang kamo naghihinanyog sa sarong pahayag, hingoahon na mamansayan an obheto kaiyan. Estudyaran kun paano an mga punto na pinalalataw kan nagpapahayag nakakokontribwir na maabot an obhetong iyan. Ihapot sa sadiri kun ano an hinahagad sa saindong gibohon kan impormasyon.

Paghinanyog Durante nin Orolay

An Pag-adal sa Torrengbantayan, Pag-adal sa Libro kan Kongregasyon, asin mga kabtang kan Pagtiripon sa Paglilingkod ginigibong hapot-simbagan na orolay sa inimprentang materyales na basado sa Biblia.

An paghinanyog durante nin orolay, sa nagkapirang bagay, garo pakikipag-olay. Tanganing lubos na makinabang, maingat na maghinanyog. Masdan kun pasaen an orolay. Tawan nin atension kun paano idinodoon kan namamayo an pinakatema asin an prinsipal na mga punto. Simbagon sa saindong isip an mga hapot nia. Maghinanyog mantang ipinaliliwanag asin iinaaplikar nin iba an materyales. An pagheling sa impormasyon sa punto de vista nin iba tibaad magpangyari sa saindo na helingon sa bagong anggulo an sarong pamilyar na tema. Magkontribwir sa pagrinibayan nin punto de vista paagi sa pagtao kan sadiri nindong mga kapahayagan nin pagtubod.—Roma 1:12.

An pag-adal sa iinasignar na materyales antes pa matabang sa saindo na malubos an atension sa orolay asin masundan an mga komento nin iba. Kun an saindong mga kamugtakan nagpapagin depisil na siroton na adalan an materyales, minsan paano gumamit nin pirang minuto na magkaigwa nin pankagabsan na pananaw sa impormasyon bago an pagtiripon. An paggibo kaini magpapangyari sa saindo na mas makinabang sa orolay.

Paghinanyog sa mga Asamblea Asin Kombension

Sa mga asamblea asin kombension, posibleng marhay na mas dakol an disturbo kisa sa mga pagtiripon kan kongregasyon. Huli kaini puedeng magin mas depisil an paghinanyog. Ano daw an makatatabang sa sato?

An sarong importanteng bagay pagkaigwa nin igong pahingalo sa banggi. Bago pumoon an programa sa kada aldaw, itanom na marhay sa isip an pinakatema. Helingon an titulo kan kada pahayag, asin probaran na antisiparon kun ano an iaatubang. Gamiton na marhay an saindong Biblia. Naririsa nin dakol na an pagkua nin haralipot na nota kan prinsipal na mga punto nakatatabang sa sainda na papagdanayon na nakasentro sa programa an saindang isip. Isurat an itinotokdo na pinaplano nindong iaplikar sa saindong sadiring buhay asin ministeryo. Pag-olayan an pirang punto mantang kamo nagbibiahe pasiring asin hale sa lugar kan asamblea kada aldaw. Ini makatatabang sa saindo na matandaan an impormasyon.

Pagpatood sa mga Aki na Maghinanyog

Matatabangan nin Kristianong mga magurang an saindang mga aki—dawa an mga omboy—na magin ‘madonong para sa kaligtasan’ paagi sa pagdara sa sainda sa mga pagtiripon kan kongregasyon, asamblea, asin kombension. (2 Tim. 3:15) Mantang nagkakalaenlaen an mga aki sa ugale asin lawig nin oras na makakokonsentrar, kaipuhan an pakamansay tanganing matabangan sindang makanood na atentong maghinanyog. Tibaad makatabang sa saindo an minasunod na mga suhestion.

Sa harong, mag-areglo nin mga oras na an saindong saradit pang aki matukaw nin toninong asin mabasa o maheling kan mga retrato sa satong Kristianong mga publikasyon. Sa mga pagtiripon, likayan an paggamit nin mga kawatan na pan-aling sa mga aki. Kun paano kaidto sa suanoy na Israel, ngonyan man an mga aki yaon “tanganing sinda maghinanyog asin tanganing sinda makanood.” (Deut. 31:12) Kun praktikal, may mga magurang na tinatawan nin personal na kopya kan mga publikasyon na pinag-aadalan dawa an sadayon pang mga aki. Mantang medyo nagdadakula na an mga aki, tabangan sinda na mag-andam na makikabtang sa mga programa na naghahagad nin partisipasyon kan mga nagdadangog.

Ihinahayag kan Kasuratan an haraning koneksion kan paghinanyog ki Jehova asin kan pagkuyog sa saiya. Maheheling ini sa mga tataramon ni Moises sa nasyon nin Israel: “Ibinugtak ko an buhay asin kagadanan sa atubangan mo, an bendisyon asin an maldisyon; asin dapat na pilion mo an buhay . . . paagi sa pagkamoot ki Jehova na saimong Dios, paagi sa paghinanyog sa saiyang tingog asin paagi sa pagdadanay sa saiya.” (Deut. 30:19, 20) Ngonyan, an paghinanyog sa pagtotokdo na itinatao ni Jehova asin an makinuyog na pag-aplikar kaiyan sa satong buhay kaipuhan sa pagkamit kan pag-oyon nin Dios asin kan bendisyon na buhay na daing katapusan. Kun siring, mahalagang marhay na himateon niato an konseho ni Jesus: “Tawan nindo nin atension kun paano kamo naghihinanyog”!—Luc. 8:18.