Magin Marahay na Parahinanyog
1 Nagkakaipo nin disiplina tangani na maghinanyog nin atento. Iyan nagkakaipo man nin pagmawot sa kabtang kan naghihinanyog na makanood asin makinabang sa nadadangog. Huli kaini, idinoon ni Jesus an pangangaipo na ‘magtao nin atension kun paano kamo naghihinanyog.’—Luc. 8:18.
2 Ini nangorognang minaaplikar kun kita nag-aatender sa mga pagtiripon kan kongregasyon, asamblea, asin kombension. Ini mga okasyon na dapat kitang maingat na maghinanyog. (Heb. 2:1) Uya an nagkapirang punto na makatatabang sa saindo na magin marahay na parahinanyog sa Kristianong mga pagtiripon na ini.
◼ Apresyaron an kahalagahan kan mga pagtiripon. Iyan an mayor na paagi na kita ‘tinotokdoan ni Jehova’ paagi sa “fiel na mayordomo.”—Isa. 54:13; Luc. 12:42.
◼ Mag-andam nin patienot. Repasohon an materyal na totokaron, asin seguradohon na darahon an saindong Biblia asin personal na kopya kan publikasyon na pinag-aadalan.
◼ Durante kan mga pagtiripon, gumibo nin espesyal na paghihingoa na magkonsentrar. Maninigong likayan an pakikipag-olay sa mga kataed nindo siring man an pagmasid sa ginigibo kan ibang naghihinanyog. Pagmaigotan na dai madisturbo paagi sa pag-isip manongod sa kun ano an gigibohon nindo pagkatapos kan pagtiripon o dapit sa iba pang personal na mga bagay.
◼ Analisaron an iinaatubang. Hapota an sadiri nindo: ‘Paano ini minaaplikar sa sako? Noarin ko iyan iaaplikar?’
◼ Gumibo nin haralipot na nota kan prinsipal na mga punto asin teksto. Tatabangan kamo kaini na ipokus an saindong kaisipan sa tinotokar asin nakakokontribwir sa paggirumdom nindo kan mayor na mga punto na magagamit sa huri.
3 Tokdoan an mga Aki Nindo na Maghinanyog: An mga aki nangangaipo nin espirituwal na pagtotokdo. (Deut. 31:12) Kan suanoy na mga panahon an “gabos na may igo nang isip tanganing magdangog” sa tahaw kan banwaan nin Dios kaipuhan na magin atento mantang binabasa sa sainda an Ley. (Neh. 8:1-3) Kun an mga magurang lubos na atento sa mga pagtiripon asin nagtatao nin maingat na atension, posibleng gibohon man iyan kan saindang mga aki. Bakong madonong na magdara nin mga kawatan o coloring book tangani na mapagdanay na nalilibang an mga aki. An dai kinakaipuhan na pagduman sa kasilyasan nakaoolang man sa saindang paghinanyog. Huling “an kakablasan nagagakot sa puso nin aki,” maninigong odok na hingoahon nin mga magurang na siertohon na an saindang mga aki tumukaw na toninong asin maghinanyog sa mga pagtiripon.—Tal. 22:15.
4 Paagi sa pagigin marahay na mga parahinanyog, pinatutunayan niato na kita talagang madonong asin boot na ‘maglaog sa isip nin dagdag na tokdo.’—Tal. 1:5.