Kurso sa Pagpatalubo nin Abilidad Bilang Nagpapahayag Asin Paratokdo
BAGA man kamo hoben pa o halangkaw na an edad, lalaki o babae, an kursong ini makatatabang sa saindo sa mas epektibong pagpahayag asin sa pagigin mas kualipikado bilang paratokdo kan Tataramon nin Dios.
An mga asignasyon sa mga nakalista sa Teokratikong Paadalan sa Pagmiministro gigibohon kan paraataman sa paadalan. Sa masunod na tolong pahina, maheheling nindo an saindong personal na porma sa pagkonseho. An mga numero na sinusundan kan manlaenlaen na punto katimbang kan mga leksion sa minasunod na mga pahina. Sa mga leksion na iyan makukua nindo an eksplikasyon kun ano an kalabot sa pagpolbos kan mga aspektong ini nin pagpahayag asin pagtotokdo asin kun taano ta importante an lambang saro. Makakakua man kamo nin nakatatabang na instruksion kun paano nindo magigibo an irinerekomendar.
An klasipikasyon depende sa kolor na yaon sa porma sa pagkonseho tanda kun arin na mga punto an aplikado sa mga asignasyon na kalabot an (1) pagbasa sa mga nagdadangog, (2) demonstrasyon na may duwa o mas dakol pang tawo, o (3) pagdiskurso sa kongregasyon. Iaasignar kan paraataman sa paadalan an punto na hihingoahon nindong paoswagon. Mas marahay na saro-saro sana an puntong hingoahon na paoswagon. Makikinabang kamo sa paggibo kan praktis na irinerekomendar sa poro kan asignadong leksion. Kun makatao kamo nin ebidensia na iinaplikar talaga nindo an konseho sa designadong leksion, tatawan na naman kamo nin sarong punto kan parakonseho sa saindo.
Kun an asignasyon sa saindo gigibohon bilang demonstrasyon, mangangaipo kamo nin eksena. May lista nin mga eksena sa pahina 82, alagad dai man kamo linilimitaran sa listang ini. Tibaad irekomendar kan parakonseho nindo na probaran nindo an sarong eksena tangani kamong magkaeksperyensia, o tibaad pabayaan nia kamong pumili.
An pagbasa kan librong ini asin paggibo kan mga praktis dawa dai kamo nag-aandam nin mga asignasyon sa paadalan makakakontribwir nin dakula sa saindong pag-oswag. Tibaad puede nindong taposon an ibang leksion kada mga sarong semana.
Gurano man kamo kahaloy nang nakikikabtang sa paadalan o sa ministeryo sa langtad, puede pa kamong padagos na umoswag. Lubos logod kamong makinabang sa edukasyon na itinatao paagi sa Teokratikong Paadalan sa Pagmiministro.