Paggamit nin Outline

DAKOL an ninenerbios sa pag-isip-isip na magtaram gikan sa sarong outline. Mas tiwasay sinda kun an gabos na sasabihon ninda nakasurat o tinuom.

Pero, sa totoong buhay, kita gabos nagtataram aroaldaw na mayo nin manuskrito. Ginigibo niato iyan sa pakikipag-olay sa mga kapamilya asin katood. Ginigibo niato iyan kun kita nakikikabtang sa ministeryo sa langtad. Asin ginigibo niato iyan kun nagdodolot nin odok sa pusong mga pamibi, baga man sa pribado o sa ngaran nin sarong grupo.

Kun kamo nagpapahayag, mahalaga daw kun baga manuskrito o outline an ginagamit nindo? Minsan ngani an pagbasa sa preparadong manuskrito makatatabang na maseguro an pagkaeksakto asin an paggamit nin piling pagkasabi, may mga limitasyon iyan sa pakataros sa puso. Kun labi sa pirang sentence an binabasa nindo, parate na kamo magkakaigwa nin rikas asin regular na dalagan nin punto sa pagtaram na iba sa naluwas na sanang estilo nindo sa pakikipag-olay. Kun an saindong atension mas nakasentro sa saindong mga nota kisa sa mga nagdadangog sa saindo, dakol an tibaad dai maghinanyog nin arog kaatento kun sa paniniwala ninda talagang sinda an nasa isip nindo asin iinaangay nindo an saindong materyales sa saindang kamugtakan. Para sa pahayag na talagang nakamomotibar, ekstemporanyong pahayag an pinakamarahay.

An Teokratikong Paadalan sa Pagmiministro sa intension na tabangan kita sa buhay sa aroaldaw. Kun nakakanompong kita nin mga katood, dai kita minahulbot nin kapidasong papel asin binabasa sa sainda an mga nasa isip niato tangani na maseguro an pinakamarahay na pagkasabi. Sa paglilingkod sa langtad, dai kita nagdadara nin babasahon na manuskrito, sa takot na tibaad may malingawan kitang mga punto na gusto niatong ipaabot sa mga tawo. Kun nagdedemonstrar sa paadalan kun paano maghuhulit sa irarom nin siring na mga kamugtakan, ensayohon an pagtaram sa paagi na pinakanatural na mapupuede. Paagi sa marahay na pag-andam, maheheling nindo na an outline, baga man nasa isip o nasusurat, parateng igo nang magpagirumdom sa saindo kan prinsipal na mga ideya na gusto nindong tokaron. Alagad paano daw kamo magkakaigwa kan kompiansa na kaipuhan tangani na makagamit kamo kaiyan?

Organisaron an mga Nasa Isip Nindo. Tanganing makagamit nin outline kun nagtataram, kaipuhan na organisaron nindo an mga nasa isip nindo. Dai ini nangangahulogan nin pagpili kan mga tataramon na plano nindong gamiton. Iyan nangangahulogan sana na isipon nguna bago kamo magtaram.

Sa buhay sa aroaldaw, an tawong pusokpusokan tibaad mabigla sa pagtaram nin mga bagay na sa huri mamawoton nia na dai nia kutana sinabi. An saro man tibaad medyo daing direksion an pagtaram, na pabarobalyo nin ideya. An duwang tendensiang ini maaatubang nin epektibo paagi sa pagpondo nguna tanganing makagibo nin simpleng outline sa isip bago pumoon na magtaram. Enot ipiho sa isip an saindong obheto, sumunod pilion an mga tangga na kaipuhan nindong gibohon tangani na magibo iyan, dangan pumoon na magtaram.

Nag-aandam daw kamo para sa paglilingkod sa langtad? Tawan nin panahon bako sanang an pagpakarhay kan saindong bag kundi an pag-organisar man kan mga nasa isip nindo. Kun desisyon nindo na gamiton an saro sa isinusuherir na mga pag-atubang sa An Satong Ministeryo sa Kahadean, basahon iyan nin pirang beses tangani na magin malinaw sa isip an prinsipal na mga ideya. Isabi an pinakapunto kaiyan sa saro o duwang haralipot na sentence. Iangay an pagkasabi kaiyan sa sadiri nindong personalidad asin sa mga kamugtakan sa saindong teritoryo. Maheheling nindo na nakatatabang an pagkaigwa nin nasa isip na outline. Ano an puedeng iiba dian? (1) Bilang introduksion, puede nindong sambiton an sarong bagay na ikinapupurisaw nin dakol sa saindong komunidad. Agdahon na magkomento an kaolay nindo. (2) Magkaigwa nin espesipikong nasa isip na ikasasabi nindo manongod sa temang iyan, kaiba an saro o duwang teksto na nagpapaheling kan ipinanuga nin Dios na gibohon tanganing makatao nin kaginhawahan. Kun magkakaoportunidad, idoon na ini gigibohon ni Jehova paagi sa saiyang Kahadean, an saiyang langitnon na gobyerno. (3) Enkaminaron an tawo na aksionan an saindong napag-olayan. Puede kamong mag-alok nin babasahon asin/o pag-adal sa Biblia asin gumibo nin depinidong areglo na ipadagos an orolay.

An solamenteng outline na kaipuhan gayod nindo sa siring na pag-atubang nasa isip sana. Kun gusto nindong may helingon na nasusurat na outline bago an enot nindong pinto, an yaon gayod sa outline pira sanang tataramon na gagamiton para sa saindong introduksion, notasyon nin saro o duwang teksto, asin halipot na nota kan gusto nindong iiba sa saindong konklusyon. Huli sa pag-andam asin paggamit nin siring na outline dai kita nagtitiwatiwa, na tinatabangan kita na makatao nin malinaw na mensahe na pasil na magirumdoman.

Kun parateng minalataw sa saindong teritoryo an sarong hapot o pagkontra, tibaad maheling nindo na makatatabang na magsiyasat sa bagay na iyan. Parate na an kaipuhan sana nindo duwa o tolong pundamental na punto kaiba an mga teksto na nagtatao nin basehan para dian. An “Mga Topiko sa Biblia na Mapag-oolayan” o an mas maitom an letra na mga subtema sa Reasoning From the Scriptures tibaad makatao kan eksaktong outline na kaipuhan nindo. Tibaad may makua man kamong angay na kotasyon sa ibang reperensia na gusto nindong iiba. Gumibo nin halipot na nasusurat na outline, iiba an seroks kan kotasyon, asin sarayon ini kaiba kan mga gamit nindo sa paglilingkod sa langtad. Kun tokaron kan kagharong an hapot o pagkontra, ipaaram sa saiya na pinasasalamatan nindo an oportunidad na makatao nin rason sa saindong tinutubod. (1 Ped. 3:15) Gamiton an outline bilang basehan kan saindong simbag.

Kun irerepresentar nindo sa pamibi an saindong pamilya, an sarong grupo nin pag-adal sa libro, o an kongregasyon, kapakipakinabang man na organisaron an mga nasa isip nindo. Segun sa Lucas 11:2-4, tinawan ni Jesus nin simpleng outline para sa makahulogan na pamibi an saiyang mga disipulo. Kan idedikar an templo sa Jerusalem, si Salomon namibi nin halawig. Malinaw na inisip-isip nia an temang iyan antes pa. Isinentro nia an atension enot ki Jehova asin sa Saiyang panuga ki David; sumunod sa templo; dangan, saro-saro, sa espesipikong mga situwasyon asin grupo nin mga tawo. (1 Ha. 8:22-53) Puede kitang makinabang sa mga halimbawang ini.

Papagdanayon na Simple an Saindong Outline sa Pahayag. An outline daw nindo para gamiton sa pagdiskurso? Gurano an maninigong iiba dian?

Girumdoma na an katuyohan nin outline tabangan kamong magirumdoman an mga ideya. Tibaad iniisip nindo na kapakipakinabang na isurat an nagkapirang sentence na gagamiton bilang introduksion. Alagad pagkatapos kaiyan, magkonsentrar sa mga ideya, bakong sa mga tataramon. Kun isusurat nindo sa pormang mga sentence an mga ideyang iyan, paboran an haralipot na sentence. An pirang prinsipal na punto na plano nindong ipaliwanag maninigo na magin lataw na marhay sa saindong outline. Magigibo ini paagi sa pagsurat kaiyan sa kapital na mga letra, pagkurit sa irarom kan mga punto, o pagkolor dian. Sa irarom kan kada prinsipal na punto, ilista an mga ideya na gusto nindong gamiton sa pagpaliwanag kaiyan. Sitaron an mga tekstong plano nindong basahon. Parate na pinakamarahay na aktuwal na basahon an Biblia. Isurat sa halipot an mga ilustrasyon na gusto nindong gamiton. Tibaad igwa man kamo nin mahalagang sekular na kotasyon na angay. Gibohon an nota nindo na may igong lawig tangani na may ikaatubang na espesipikong mga detalye. Mas pasil na gamiton an outline kun iyan maayos.

An nagkapira pinakasimple sana an outline na ginagamit. An outline puedeng kompuesto nin pira sanang terminong makahulogan, notasyon nin mga teksto na kokotaron kan nagpapahayag hale sa memorya, asin mga drowing o retrato na nakatatabang sa saiya na magirumdoman an mga ideya. Paagi sa simpleng mga notang ini, ikinaaatubang kan nagpapahayag an saiyang materyales sa lohikong pagkasunodsunod asin sa paaging garo sana nakikipag-olay. Iyan an obheto kan leksion na ini.

Sa pahina 39 sagkod 42 kan librong ini, manonompongan nindo an pagtokar kan “Paggibo nin Outline.” Makatatabang na marhay na basahon an materyales na iyan mantang hinihingoa nindong mapaoswag an leksion na ini, “Paggamit nin Outline.”

Kun Paano Gagamiton an Outline. Minsan siring, an pasohan nindo sa puntong ini bako sanang andamon an diskurso nindo sa pormang outline. Iyan gamiton an outline sa epektibong paagi.

An enot na tangga sa paggamit kan saindong outline pag-andam para sa pagpahayag. Helingon an pinakatema, basahon an kada saro sa prinsipal na mga punto, asin sabihon sa sadiri an koneksion kan kada saro sa prinsipal na mga puntong iyan sa pinakatema. Isurat kun guranong oras an ikatatao sa kada prinsipal na punto. Ngonyan bumalik asin adalan an enot na prinsipal na punto. Repasohon an mga argumento, teksto, ilustrasyon, asin halimbawa na plano nindong gamiton sa pagpaliwanag kan puntong iyan. Balikbalikan nin pirang beses an materyales sagkod na an kabtang na iyan kan saindong pahayag malinaw na sa isip. Gibohon an arog kaiyan sa lambang iba pang prinsipal na punto. Estudyaran kun ano an puede nindong laktawan, kun kaipuhan, tanganing makatapos na nasa oras. Dangan repasohon an bilog na pahayag. Magkonsentrar sa mga ideya, bakong sa mga tataramon. Dai pagtuomon an pahayag.

Sa pagdiskurso nindo, maninigo na mapagdanay nindo an marahay na bisual na kontak sa mga nagdadangog sa saindo. Pakabasaha kan sarong teksto, maninigo na sa parate kaya nindong magrason manongod dian na ginagamit an saindong Biblia alagad dai binabalikan an saindong mga nota. Siring man, kun gumamit kamo nin ilustrasyon, isaysay iyan arog kan pagsaysay nindo sa mga katood imbes na basahon iyan sa saindong mga nota. Mantang kamo nagtataram, dai humeling sa saindong mga nota para sa kada sentence. Magtaram gikan sa puso, asin matataros nindo an puso kan mga naghihinanyog sa saindo.

Kun eksperto na kamo sa teknika nin pagtaram hale sa outline, nakagibo kamo nin importanteng marhay na pag-abante sa pagigin epektibong nagpapahayag sa publiko.