Paggibo nin Outline

KUN naasignaran na magpahayag, dakol an mapagal na isinusurat iyan, poon sa introduksion sagkod sa konklusyon. Bago matapos an pahayag, tibaad balakid nang rapdrap an nagibo. Tibaad dakol na oras an kaipuhan kan prosesong ini.

Arog daw kaiyan an pag-andam nindo kan saindong mga pahayag? Gusto daw nindong makanood nin mas pasil na paagi? Kun makakanood kamong gumibo nin outline, dai na nindo kaipuhan na isurat an gabos. Matao ini sa saindo nin mas dakol na panahon sa pagpraktis kan pagpahayag. An mga pag-atubang nindo bako sanang magigin mas pasil na ipahayag kundi mas interesanteng hinanyogon asin mas nakamomotibar sa mga nagdadangog sa saindo.

Siempre, para sa mga pampublikong pahayag sa kongregasyon, may itinataong pinakasimple sanang outline. Minsan siring, bakong arog kaiyan sa kadaklan na ibang pahayag. Tibaad an itao sana sa saindo sarong tema o pinakatema. O tibaad hagadon sa saindo na trataron an espesipikong materyales na imprentado. Kun beses tibaad tawan sana kamo nin pirang instruksion. Para sa gabos na siring na asignasyon, kaipuhan na gibohon nindo an sadiri nindong outline.

An sampol sa pahina 41 matao sa saindo nin ideya kun paano mapagsusunodsunod an halipot na outline. Mangnoha na an kada prinsipal na punto minapoon sa pagirilid sa wala asin nasusurat sa darakulang letra. Sa irarom kan kada prinsipal na punto nalilista an mga ideya na nagsusuportar dian. An dugang pang mga punto na gagamiton sa paglinaw sa mga ideyang iyan nalilista sa irarom kaiyan asin binugtakan nin indension na pirang espasyo hale sa pagirilid sa wala. Maingat na eksaminon an outline na ini. Mangnoha na an duwang prinsipal na punto direktang konektado sa pinakatema. Obserbaran man na an sekondaryong mga punto bako sanang interesanteng mga bagay. Imbes, an kada saro nagsusuportar sa prinsipal na punto na napapairaroman kaiyan.

Kun naggigibo kamo nin outline, tibaad an itsura kaiyan bakong eksaktong kapareho kan sampol. Alagad kun nasasabotan nindo an kalabot na mga prinsipyo, ini matabang sa saindo na organisaron an saindong materyales asin gumibo nin marahay na pahayag sa tama sanang lawig nin panahon. Paano an gigibohon nindo?

Analisaron, Pilion, Asin Organisaron

Kaipuhan nindo nin pinakatema. An pinakatema nindo bako sanang pankagabsan na tema arog kan puedeng irepresentar nin saro sanang termino. Iyan an prinsipal na ideya na gusto nindong ipahayag, asin ipinaririsa kaiyan kun sa anong anggulo nindo pinaplanong tokaron an saindong tema. Kun may itinaong pinakatema, maingat na analisaron an kada prinsipal na termino. Kun bibilogon nindo an itinaong pinakatema basado sa napublikar na materyales, adalan an materyales na iyan na nasa isip an pinakatema. Kun tinawan sana kamo nin tema, kun siring nasa saindo na an pagpili nin pinakatema. Minsan siring, bago iyan gibohon, tibaad maheling nindo na nakatatabang na magsiyasat. Paagi sa pagpapadanay sa saindong isip na bukas, parate na kamo makakakua nin bagong mga ideya.

Mantang ginigibo nindo an mga tanggang ini, pirmeng ihapot sa sadiri: ‘Taano ta importante sa mga magdadangog sa sako an materyales na ini? Ano an obheto ko?’ Maninigo na iyan bako sanang matratar an materyales o makatao nin kawiliwiling pahayag kundi makagibo nin bagay na kapakipakinabang sa mga magdadangog sa saindo. Kun depinido na an obheto nindo, isurat iyan. Padagos na ipagirumdom iyan sa saindong sadiri mantang kamo nag-aandam.

Pakatapos na madeterminaran nindo kun ano an saindong obheto asin pakapili nin pinakatema na kabagay kaiyan (o pakaanalisara kun paano an pinakatema na itinao sa saindo tama sa obhetong iyan), makapagsisiyasat kamo na mas konsentrado. Humanap nin materyales na may partikular na halaga sa mga magdadangog sa saindo. Dai makontento sa malibog na mga deklarasyon, kundi humanap nin espesipikong mga punto na malaman asin talagang nakatatabang. Magin realistiko sa kun gurano an ginigibo nindong pagsiyasat. Sa kadaklan madali sanang sumobra an materyales nindo sa magagamit nindo, kaya kaipuhan na magin kamong mapamili.

Aramon kun ano an prinsipal na mga punto na kaipuhan nindong tokaron tangani na mabilog an saindong pinakatema asin magibo an obheto nindo. Ini an magigin pundamental na estruktura nindo, an saindong pinaka-outline. Pira an maninigong magin prinsipal na punto? Tibaad igo na an duwa para sa halipot na pagtokar, asin parate na supisyente na an lima dawa para sa sarong oras na diskurso. Mientras na mas kadikit an prinsipal na punto, mas posibleng marhay na magigirumdoman iyan kan mga magdadangog sa saindo.

Oras na nasa isip na nindo an saindong pinakatema asin prinsipal na mga punto, organisaron an nasiyasat nindo. Magdesisyon kun ano an direktang konektado sa saindong prinsipal na mga punto. Pumili nin mga detalye na matao nin bagong aspekto sa saindong pag-atubang. Kun minapili kamo nin mga teksto na masuportar sa prinsipal na mga punto, mangnohon an mga ideya na matabang sa saindo na mangatanosan sa mga tekstong iyan sa makahulogan na paagi. Ibugtak an kada ideya sa irarom kan prinsipal na punto na kinabibilangan kaiyan. Kun an nagkapirang impormasyon dai bagay sa arin man sa saindong prinsipal na mga punto, haleon iyan—dawa kun iyan interesanteng marhay—o sarayon iyan tanganing magamit sa ibang okasyon. Papagdanayon sana an pinakamarahay na materyales. Kun hihingoahon nindong trataron an kadakoldakol, kaipuhan kamong magtaram nin marikason asin dai magigin detalyado an saindong pagtratar. Mas marahay na ipaabot an pira sanang punto na may tunay na halaga sa mga nagdadangog asin gibohon iyan nin toltol. Dai magsobra sa oras!

Kun dai pa nindo nagibo, areglaron na sa makatanosan na pagkasunodsunod an saindong materyales. Ginibo ini kan kagsurat kan Ebanghelyo na si Lucas. Huling nakatipon nin kadakoldakol na impormasyon may koneksion sa saiyang tema, isinurat nia iyan “sa makatanosan na pagkasurunodsunod.” (Luc. 1:3) Puede nindong areglaron an saindong materyales segun sa petsa o topiko, puedeng segun sa causa asin epekto o problema asin solusyon, depende sa kun ano an pinakaepektibo tanganing maotob an obheto nindo. Dai maninigong magkaigwa nin pabiglabiglang pagbalyo hale sa sarong ideya pasiring sa iba. An mga nagdadangog sa saindo maninigo na pasil na magiyahan hale sa sarong ideya pasiring sa iba, na mayo nin mga siwang na dai basta-basta natutulayan. An itinataong mga ebidensia maninigo na darahon an mga nagdadangog sa makatanosan na mga konklusyon. Mantang inaareglar nindo an saindong mga punto, isipon kun ano an magigin impresyon kan mga magdadangog sa saindo sa pag-atubang. Madali daw nindang masusundan an direksion kan saindong kaisipan? Mapahihiro daw sindang aksionan an saindang nadadangog, kaoyon kan obheto na nasa isip nindo?

Sumunod, mag-andam nin introduksion na nakapupukaw nin interes sa saindong tema asin nagpapaheling sa mga magdadangog sa saindo na an saindong totokaron talagang mahalaga sa sainda. Tibaad makatabang na isurat an enot nindong mga sasabihon. Ultimo, magplano nin nakamomotibar na konklusyon na kabagay kan saindong obheto.

Kun gigibohon nindo nin amay an saindong outline, magkakapanahon kamong pakarhayon iyan bago nindo itao an pahayag. Tibaad maheling nindong kaipuhan na suportaran an nagkapirang ideya nin pirang estadistika, nin sarong ilustrasyon, o eksperyensia. An paggamit nin sarong pangyayari sa presente o nin sarong bagay na pinagkakainteresan sa lokal tibaad makatabang sa mga magdadangog sa saindo na mas madaling maheling an halaga kan materyales. Mantang rinerepaso nindo an saindong pahayag, tibaad may marisa kamong dagdag pang mga oportunidad na iangay an impormasyon sa mga magdadangog sa saindo. An proseso nin pag-analisar asin pagpakarhay kaipuhan tangani na magibong epektibong pahayag an marahay na materyales.

An nagkapirang nagpapahayag tibaad nagkakaipo nin mas halabang nota kisa iba. Alagad kun inoorganisar nindo an saindong materyales sa irarom nin pira sanang prinsipal na punto, hinahale an dai talaga nagsusuportar sa mga ini, asin ibinubugtak sa makatanosan na pagkasunodsunod an saindong mga ideya, maheheling nindo na sa kadikit na eksperyensia, dai na nindo kaipuhan na isurat an gabos. Kanigoan kaekonomiya sa oras kaiyan! Asin maoswag an kualidad kan saindong mga pahayag. Maririsa na kamo talagang nakikinabang sa saindong edukasyon sa Teokratikong Paadalan sa Pagmiministro.