LEKSIYON 14

Pagpalataw kan Panginot na mga Punto

Hebreo 8:1

SUMARYO: Tabangan an mga nagdadangog na masundan an saimong pahayag, asin ipahiling nin malinaw an koneksiyon kan lambang panginot na punto sa katuyuhan asin tema kan saimong pahayag.

KUN PAANO GIGIBUHON:

Isipon kun ano an katuyuhan mo. Pag-isipan kun baga an katuyuhan kan saimong pahayag magpaabot nin impormasyon, magkumbinsir, o magmotibar sa mga nagdadangog, dangan bilugon iyan kauyon kan katuyuhan na iyan. Siguraduhon na an gabos na panginot na punto makakatabang na magibo an katuyuhan kan saimong pahayag.

Haputon an sadiri: ‘Anong mga hapot o pagkontra an tibaad maisip kan mga magdadangog dapit sa tema? Ano pang mga hapot o pagkontra an sunod na ibabangon ninda?’ Areglaron an mga punto uyon sa pagkasunod-sunod na iyan para masundan ka ninda asin masabutan ninda an impormasyon saka akuon.
Palatawon an tema kan saimong pahayag. Sa bilog na pahayag, pirming balikan an saimong tema paagi sa pag-utro kan importanteng mga tataramon diyan o paggamit nin mga tataramon na may kaparehong kahulugan.
Gibuhon na malinaw asin simple an panginot na mga punto. Pilion an panginot na mga punto na konektado sa tema asin maitutukdo mo nin epektibo sa itinalaan na oras. Dai pakadakulon an panginot na punto, malinaw na sambiton an kada saro, magpundo nin dikit pagkatapos kan kada punto, asin dai magbalyo nin bigla sa sunod na panginot na punto.

Puwede mong sambiton sa saimong introduksiyon an panginot na mga punto tanganing masubaybayan iyan kan mga nagdadangog o sambiton giraray an mga iyan sa saimong kongklusyon tanganing matandaan ninda iyan.