LEKSION 36

Pagkabilog kan Pinakatema

ARAM nin mga eksperyensiadong magpahayag an halaga nin pagkaigwa nin pinakatema. Kun sinda nag-aandam nin pahayag, tinatabangan sinda kan pinakatema na isentro an atension sa mas espesipikong impormasyon asin mahorophorop iyan nin mas hararom. An resulta iyo na imbes na basta sana maunabihan an dakol na punto, nabibilog ninda an saindang materyales sa paagi na mas kapakipakinabang para sa mga nagdadangog sa sainda. Kun an kada saro sa prinsipal na mga punto direktamenteng ikinokonektar sa pinakatema asin nakatatabang na mabilog iyan, natatabangan man an mga nagdadangog na magirumdoman an mga puntong iyan asin masabotan an kahulogan kaiyan.

Minsan ngani masasabi na an saindong pinakatema iyo an tema kan saindong pahayag, maheheling nindo na marahay an kualidad kan saindong mga pahayag kun an magigin aktitud nindo iyo na an saindong pinakatema iyo an partikular na punto de vista na dian nindo binibilog an saindong tema. An Kahadean, Biblia, asin pagkabuhay liwat pankagabsan na mga tema. Laen-laen na pinakatema an mabibilog sa mga temang ini. Uya an nagkapirang halimbawa: “An Kahadean, Sarong Tunay na Gobyerno,” “An Daga Gigibohon na Paraiso kan Kahadean nin Dios,” “An Biblia Ipinasabong nin Dios,” “An Biblia Praktikal na Giya Para sa Satong Aldaw,” “An Pagkabuhay Liwat Nagtatao nin Paglaom sa mga Nagmomondo,” asin “An Paglaom sa Pagkabuhay Liwat Nakatatabang sa Sato na Magdanay na Marigon Kun Napapaatubang sa Paglamag.” An gabos na pinakatemang ini nagkakaipong bilogon sa biyong magkakalaen na direksion.

Kabagay kan nangingibabaw na pinakatema kan Biblia, tinawan nin pagdodoon kan paghuhulit ni Jesu-Cristo durante kan saiyang ministeryo digdi sa daga an pinakatemang: “An kahadean kan kalangitan harani na.” (Mat. 4:17) Paano binilog an pinakatemang iyan? Labing 110 na beses sa apat na Ebanghelyo, sinasambit an Kahadean na iyan. Alagad dai sana paorootrong ginamit ni Jesus an terminong “kahadean.” Paagi sa saiyang itinokdo sagkod sa mga milagrong ginibo nia, lininaw ni Jesus na sia, an saro na yaon, iyo an Aki nin Dios, an Mesiyas, an tatawan ni Jehova kan Kahadean. Ipinaliwanag man ni Jesus na paagi sa saiya binubuksan an dalan na an iba makapakikabtang sa Kahadean na iyan. Sinabi nia kun ano an mga kualidad na dapat na ipaheling kan mga tatawan kan pribilehiong iyan. Paagi sa saiyang mga katokdoan asin sa makapangyarihan na mga gibo nia, lininaw nia kun ano an magigin kahulogan kan Kahadean nin Dios sa buhay nin mga tawo asin sinabi na an pagpaluwas nia nin mga demonyo paagi sa espiritu nin Dios patunay na ‘talagang nag-abot na an kahadean nin Dios’ sa mga nagdadangog sa saiya. (Luc. 11:20) May labot sa Kahadean na iyan na isinugo ni Jesus an mga parasunod nia na magpatotoo.—Mat. 10:7; 24:14.

Paggamit nin Angay na Pinakatema. Dai hinahagad sa saindo na bilogon an sarong pinakatema sa sokol na arog kan ginigibo kan Biblia, alagad importante pa man giraray an pagkaigwa nin angay na pinakatema.

Kun kamo an mapili kan pinakatema, pensaron nguna an obheto kan saindong pag-atubang. Dangan mantang pinipili nindo an prinsipal na mga punto na iyo an magigin outline nindo, seguradohon na an mga ini talagang nagsusuportar sa pinili nindong pinakatema.

Kun iinasignar an pinakatema, maingat na analisaron an ipinaririsa kaiyan kun dapit sa kun paano dapat na bilogon an saindong materyales. Tibaad kaipuhan an paghihingoa tanganing maapresyar an halaga asin potensial kan pinakatemang iyan. Kun kamo an mapili nin materyales na gagamiton sa pagbilog kan iinasignar na pinakatema, maingat na pumili tangani na danay na ikadoon an pinakatema. Sa ibong na lado, kun may itinaong materyales, kaipuhan pa man giraray na analisaron nindo kun paano iyan gagamiton kaoyon kan pinakatema. Kaipuhan na estudyaran man nindo kun taano ta importante an materyales sa mga magdadangog sa saindo asin kun ano an maninigong magin obheto nindo sa pagpahayag kaiyan. Matabang ini sa saindo na madeterminaran kun ano an dapat na idoon sa saindong pagpahayag.

Kun Paano Idodoon an Pinakatema. Tanganing matawan nin tamang pagdodoon an pinakatema, dapat na ibugtak nindo an pundasyon kun pinipili asin inoorganisar an saindong materyales. Kun an gagamiton sana nindo an nagsusuportar sa saindong pinakatema asin kun susunodon nindo an mga prinsipyo na kalabot sa paggibo nin marahay na outline, haros natural na sana na ikadodoon nindo an pinakatema.

An pag-otro makatatabang na madugangan nin puersa an pinakatema. Sa musikang klasiko, an pinakatema melodiya na inoorootro nin igo tangani na iyong magkarakterisar kan enterong komposisyon. An melodiya dai pirmeng minalataw sa iyo man sanang porma. Kun beses saro o duwa sanang frase an minalataw, kun minsan ginagamit an baryasyon kan pinakatema, alagad sa laen-laen na paagi, ekspertong isinasalak nin paorootro kan kompositor an saiyang melodiya sa komposisyon sagkod na makalakop iyan sa bilog na komposisyon. Arog kaiyan an maninigo sa pinakatema nin sarong pahayag. An pag-otro nin mga terminong makahulogan hale sa pinakatema garo an paorootrong melodiya nin sarong komposisyon nin musika. An mga sinonimo kan mga terminong ini o an pinakatema na medyo iba man an pagkasabi nagseserbing baryasyon kan pinakatema. An paggamit nin siring na mga paagi magpapangyari na an pinakatema an prinsipal na ideya na magigirumdoman kan mga magdadangog sa saindo.

An mga prinsipyong ini aplikado bako sanang sa mga pahayag sa plataporma kundi pati sa mga pakikipag-olay sa ministeryo sa langtad. Nagigin mas dai malilingawan an medyo halipot sanang orolay kun may napalataw na pinakatema. An pagtotokdo sa pag-adal sa Biblia mas madaling magigirumdoman kun may pinakatemang ikinadoon. An paghihingoa nindo sa pagpili asin pagbilog nin angay na mga pinakatema dakula an magigibo na madagdagan an pagigin epektibo nindo bilang nagpapahayag asin paratokdo kan Tataramon nin Dios.

SARONG NANGINGIBABAW NA PINAKATEMA SA SARONG DAKULANG KOMPOSISYON

Sa pagsabot sa paggamit nin pinakatema, nakatatabang na adalan kun paano isinalak ni Jehova Dios, minsan naggagamit nin mga parasurat na tawo, an sarong nangingibabaw na pinakatema sa 66 na libro na minakompuesto kan Biblia. An pinakatemang iyan iyo an bindikasyon kan deretso ni Jehova na pamahalaan an katawohan asin an pagkaotob kan mamomoton na katuyohan nia paagi sa saiyang Kahadean.

An pinakatemang ini pinoponan na ihayag sa enot na mga kapitulo nin Genesis, asin pakatapos kaiyan binibilog an mga aspekto kaiyan sa bilog na Biblia. Paorootrong dinadara an atension sa mismong ngaran nin Dios, labing 7,000 na beses. An pagigin lehitimo kan pamamahala ni Jehova nahahayag sa salaysay manongod sa paglalang. Sinasabi an pag-angat sa saiyang pamamahala, kaiba an kapahapahamak na mga epekto nin pakisuway. An daing kabaing na pagkamoot ni Jehova, an saiyang kadonongan, an saiyang hustisya, asin an makakamhan sa gabos na kapangyarihan nia ipinaheheling kan pagtratar nia sa saiyang mga linalang. Ipinaheheling nin dai mabilang na mga halimbawa an mga pakinabang sa pagkuyog sa Dios asin an kalamidad na ibinubunga nin pakisuway. An probisyon ni Jehova paagi ki Jesu-Cristo na paraon an kasalan asin kagadanan ipinaliliwanag asin ipinaheheling. Sinasabi an mga detalye para sa sarong langitnon na gobyerno na malaglag sa maraot na mga espiritu sagkod tawo na habong magrekonoser sa lehitimong pamamahala ni Jehova sa saiyang mga linalang. Linilinaw na hahamanon kan Kahadean an katuyohan ni Jehova na an daga magin paraiso na pano nin mga tawo na namomoot asin nagsasamba sa solamenteng tunay na Dios asin nagkakaminorootmootan.