Mataktika Pero Marigon

AN PAGKAMATAKTIKA iyo an abilidad na trataron an ibang tawo na dai nakakakolog nin boot na dai man kuta kaipuhan. Kalabot dian an pakaaram kun paano asin noarin sasabihon an mga bagay. Dai kaini ipinapakahulogan an pagkompromiso kan tama o pagbiribid sa mga bagay. An pagkamataktika dai maninigong ipagkamalo sa takot sa tawo.​—Tal. 29:25.

An mga bunga kan espiritu iyo an pinakamarahay na pundasyon sa pagigin mataktika. Sa siring, an tawo na minomotibar nin pagkamoot habong iritaron an iba; gusto niang tabangan sinda. An saro na maboot asin mahoyo maboot sa paggibo nia sa mga bagay. An tawong toninong naghahanap nin mga paagi na magkaigwa nin marahay na relasyon sa iba. Dawa kun nakauuyam an ugale nin mga tawo, an tawong matinios nagdadanay na kalmado.​—Gal. 5:22, 23.

Minsan siring, paano man an pag-atubang kan mensahe kan Biblia, may mga tawo na ikakakolog iyan nin boot. Huling maraot an kamugtakan kan puso kan mayoriya sa mga Judio kan enot na siglo, para sa sainda si Jesu-Cristo nagin “sarong gapong singkogan asin gapong dasmagan.” (1 Ped. 2:7, 8) Mapadapit sa gibohon niang pagbalangibog kan Kahadean, sinabi ni Jesus: “Ako napadigdi sa pagsolo nin kalayo sa daga.” (Luc. 12:49) Asin an mensahe kan Kahadean ni Jehova, na kaiba an pangangaipo na midbidon nin mga tawo an soberaniya kan saindang Kaglalang, nagpapadagos na mainit na isyu na inaatubang nin katawohan. Dakol an nakokolgan an boot sa mensahe na madali nang haleon kan Kahadean nin Dios an presenteng maraot na sistema nin mga bagay. Pero, bilang pagkuyog sa Dios, nagpapadagos kitang maghulit. Minsan siring, mantang ginigibo iyan ginigirumdom niato an hatol kan Biblia: “Kun mahihimo, sagkod na iyan nasa saindo, makipagkatoninongan sa gabos na tawo.”​—Roma 12:18.

Mataktika Kun Nagpapatotoo. Kadakol kan kamugtakan na dian kinakaolay niato an iba manongod sa satong pagtubod. Siempre, ginigibo niato iyan kun nasa ministeryo sa langtad, alagad naghahanap man kita nin angay na mga oportunidad kun kaiba niato an mga paryente, katrabaho, asin kaeskuela. Sa gabos na situwasyon na ini, kaipuhan an pagkamataktika.

Kun iinaatubang niato an mensahe kan Kahadean sa paagi na an pagmate nin iba sinesermonan niato sinda, tibaad ikaanggot ninda iyan. Kun dai sinda naghagad nin tabang asin tibaad dai man nakakamate na kaipuhan ninda iyan, tibaad makolgan an boot ninda sa ano man na pagparisa na sinda kaipuhan na itanos. Paano daw niato malilikayan an pagtao kan salang impresyon? Makatatabang an pakanood kan teknika nin makikatood na pakikipag-olay.

Hingoahon na ponan an orolay paagi sa pagtokar sa sarong tema na interesante para sa kaolay nindo. Kun sia paryente, katrabaho, o kaeskuela, tibaad aram na nindo kun ano an interesante para sa saiya. Dawa kun ngonyan pa sana nindo nakamidbid an tawo, puede nindong tokaron an nadangog nindo sa bareta o nabasa sa diaryo. An siring na mga tema parateng iyo an nasa isip nin dakol. Kun kamo naghaharongharong, magin mapagmasid. An mga dekorasyon sa harong, kawatan sa palibot, relihiosong mga bagay, asin istiker sa bamper nin kotseng nakaparada puedeng magtao nin dagdag pang mga nagpaparisa kun ano an pinagkakainteresan kan kagharong. Kun lumuwas an kagharong, maghinanyog mantang sia nagtataram. An saiyang sasabihon magsalang kompirmaron o ikorehir an konklusyon nindo manongod sa saiyang pinagkakainteresan asin punto de vista asin matao nin dagdag na mga nagpaparisa kun ano an kaipuhan nindong konsideraron tangani na makapagpatotoo.

Mantang nagpapadagos an orolay, ipaabot an mga punto hale sa Biblia asin mga babasahon basado sa Biblia na may koneksion sa tema. Alagad dai pagsolohon an pagtaram. (Ecl. 3:7) Ilabot sa orolay an saindong kagharong kun gusto niang makikabtang. Magin interesado sa saiyang mga punto de vista asin opinyon. Tibaad magtao an mga ini kan giyang kaipuhan nindo tangani na magin mataktika.

Bago kamo magtaram, pensaron kun ano an magigin impresyon dian kan kaolay nindo. Inoomaw kan Talinhaga 12:8 an “ngoso na may diskresion.” An ekspresyon sa Hebreo na ginamit digdi konektado sa mga konsepto na arog kan pakarorop asin pagkamaingat. Sa siring, kalabot sa diskresion an pagmamaan sa pagtaram bilang resulta nin lubos na pag-isip-isip sa sarong bagay tangani na makagawe nin madonong. An bersikulo 18 kan iyo man sanang kapitulo kan Talinhaga nagpapatanid tumang sa ‘pagtaram na dai iniisip arog kan mga bono nin espada.’ Puedeng suportaran an katotoohan sa Biblia na dai nakakakolog nin boot.

An pagpaheling sana nin pakamansay sa pagpili nindo nin mga termino tibaad makatabang sa saindo na malikayan an dai man kuta kaipuhan na pagbugtak nin kaolangan. Kun an paggamit kan terminong “Biblia” nagbubugtak nin kaolangan sa isip, puede kamong gumamit nin ekspresyon na arog kan “banal na mga kasuratan” o “libro na ipinupublikar ngonyan sa labing 2,000 na lenguahe.” Kun talagang sasambiton nindo an Biblia, puede nindong hagadon sa tawo an opinyon nia dian dangan konsideraron an saiyang komento sa bilog na pag-oolay pa nindo.

An pagigin mataktika parateng kalabot an pagdeterminar kan tamang panahon na sabihon an mga bagay. (Tal. 25:11) Tibaad dai kamo oyon sa gabos na sinasabi kan kaolay nindo, alagad dai kaipuhan na gibohon na isyu an kada bakong sono sa Kasuratan na opinyon na sinasabi nia. Dai pagprobaran na sararoan sanang sabihon sa kagharong an gabos. Sinabi ni Jesus sa saiyang mga disipulo: “Dakol pa an sasabihon ko sa saindo, alagad ta dai pa nindo iyan kaya ngonyan.”​—Juan 16:12.

Kun posible, sinserong omawon an mga kaolay nindo. Dawa kun parapakidiskutir an kagharong, tibaad mahimo pa giraray nindong omawon sia sa pagkaigwa nin sarong punto de vista. Ginibo ini ni apostol Pablo kan kaolay nia an mga pilosopo sa Areopago duman sa Atenas. An mga pilosopo “may pagkakaturumang na nakipag-olay sa saiya.” Paano daw nia ikakadoon an saiyang punto na dai nakakakolog nin boot? Bago kaini namasdan nia an dakol na altar na ginibo ninda para sa saindang mga dios. Imbes na kondenaron an mga taga Atenas sa saindang idolatrosong pagsamba, sinda mataktika niang inomaw sa saindang makosog na relihiosong mga saboot. Sabi nia: “Naririsa ko na sa gabos na bagay garo kamo orog na natatakot sa mga dios kisa iba.” An pamamaaging ini nagbukas kan dalan na ikaatubang nia an saiyang mensahe may labot sa tunay na Dios. Bilang resulta, may mga tuminubod.​—Gibo 17:18, 22, 34.

Dai magsobra sa reaksion kun may mga pagkontra. Magdanay na kalmado. Ibilang an mga ini na oportunidad na marorop an kaisipan kan tawo. Puede nindo siang pasalamatan sa pagpahayag kan saiyang mga opinyon. Ano kun bigla niang sabihon: “May sadiri na akong relihion”? Puede nindong ihapot sa mataktikang paagi: “Ano po relihioso na kamo poon pa sa pagkaaki?” Dangan, pagkasimbag nia, idugang: “Sa paghona daw nindo magkakasararo pa an katawohan sa sarong relihion?” Tibaad buksan kaini an dalan para sa dugang na orolay.

An pagkaigwa nin tamang pagmansay sa sadiri makatatabang sa sato na magin mataktika. Marigon kitang kombensido na tama an mga dalan ni Jehova asin totoo an saiyang Tataramon. Nagtataram kitang may kombiksion mapadapit sa mga bagay na ini. Alagad mayo kita nin dahelan na magpakangmatanos. (Ecl. 7:15, 16) Nagpapasalamat kita na naaaraman niato an katotoohan asin nakakamtan an bendisyon ni Jehova, alagad aram na gayo niato na an pagkamit niato kan saiyang pag-oyon bunga kan saiyang dai na kutana maninigong kabootan asin kan pagtubod niato ki Cristo, bakong bunga kan sadiri niatong katanosan. (Efe. 2:8, 9) Rinerekonoser niato an pangangaipo na ‘padagos na baloon kun baga kita nasa pagtubod, padagos na patunayan kun ano man nanggad kita.’ (2 Cor. 13:5) Kaya kun kinakaolay niato an mga tawo manongod sa pangangaipo na kumuyog sa mga kahagadan nin Dios, satuya man na mapakumbabang iinaaplikar an hatol kan Biblia sa satong sadiri. Bako niatong katongdan na hokoman an satong kapwa. “Itinao [ni Jehova] an gabos na paghokom sa Aki,” asin sa atubangan kan saiyang trono nin paghokom na dapat niatong panimbagan an satong ginigibo.​—Juan 5:22; 2 Cor. 5:10.

Sa Pamilya Asin mga Kapwa Kristiano. An paggamit niato nin pagkamataktika maninigo na bako sanang sa ministeryo sa langtad. Mantang an pagkamataktika kapahayagan kan mga bunga kan espiritu nin Dios, maninigo na magpaheling man kita nin pagkamataktika sa harong sa pagtratar sa mga miembro nin pamilya. Pahihiroon kita nin pagkamoot na pagmakolgan an saboot nin iba. An agom ni Reyna Ester dai nagsasamba ki Jehova, alagad nagpaheling sia nin paggalang digdi asin dakulang pakamansay kan iinaatubang digdi an mga bagay na may labot sa mga lingkod ni Jehova. (Ester, kap. 3-8) Sa nagkapirang kaso, tibaad hagadon nin pagigin mataktika sa pagtratar sa bakong Saksi na mga miembro nin pamilya na pabayaan niato na an satong gawe-gawe, imbes na eksplikasyon kan satong mga tinutubod, an magrekomendar sa sainda kan dalan kan katotoohan.​—1 Ped. 3:1, 2.

Siring man, an bagay na midbid niatong marhay an mga miembro kan kongregasyon dai nangangahulogan na puede na kitang magin daing kontrol sa pagtaram o daing kabootan sa sainda. Dai niato maninigong ipangatanosan na huling sinda maygurang, maninigo na mapagpasensiahan ninda iyan. Ni maninigo man na ipanarahotan niato an satong sadiri sa pagsabi: “Bueno, arog ako talaga kaiyan.” Kun marisa niato na nakakakolog kan boot nin iba an paagi niato sa pagtaram, maninigo kitang magin determinado na magbago. An satong “makosog na pagkamoot sa lambang saro” maninigong magpahiro sa sato na “gumibo kita kan marahay . . . sa mga may relasyon sa sato sa pagtubod.”​—1 Ped. 4:8, 15; Gal. 6:10.

Kun Nagpapahayag sa Sarong Grupo nin mga Nagdadangog. An mga nagpapahayag sa plataporma kaipuhan man na magin mataktika. An mga nagdadangog kompuesto nin mga tawo hale sa laen-laen na pinaghalean asin kamugtakan. Nasa laen-laen sindang tangga sa espirituwal na pagtalubo. An iba tibaad primero pa sana an pakaatender sa Kingdom Hall. An iba tibaad nag-aagi sa panahon nin pambihirang tension na dai aram kan nagpapahayag. Ano daw an makatatabang sa nagpapahayag na malikayan na makolgan an boot kan mga nagdadangog sa saiya?

Kaoyon kan hatol ni apostol Pablo ki Tito, gibohon na obheto nindo “na dai magtaram nin nakararaot manongod sa kiisay man, . . . magin rasonable, nagpapaheling nin bilog na kahoyoan sa gabos na tawo.” (Tito 3:2) Likayan an pag-arog sa kinaban sa paggamit kaiyan nin mga termino na nagmemenospresio sa mga tawo na iba an rasa, lenguahe, o nasyonalidad. (Kap. 7:9, 10) Tokaron nin prangka an mga kahagadan ni Jehova, asin ipaheling an kadonongan sa pag-aplikar kan mga ini; alagad likayan an mapanraot na mga komento manongod sa mga dai pa lubos na naglalakaw sa dalan ni Jehova. Imbes, enkaminaron an gabos na mansayan an kabotan nin Dios asin gibohon an nakapaoogma sa saiya. Palumhokon an hatol nin komendasyon na may init asin sinsero. Sa saindong pagtaram asin sa tono kan saindong boses, ipahayag an kapadangatan sa tugang na maninigo na mamatean niato gabos para sa lambang saro.​—1 Tes. 4:1-12; 1 Ped. 3:8.