Pag-aatubang kan Maogmang Bareta—Mapuso, Pero Mataktika
1 Kan si Pedro asin Juan pagbotan na pumondo sa paghuhulit, sinda nagsimbag: “Alagad kun para sa samo, dai kami puwedeng mag-ontok sa pagtaram dapit sa mga bagay na samong naheling asin nadangog.” (Gibo 4:20) Ano an nagpangyari sainda na magtaram na may siring na kapusoan? Sinda ‘nagngayongayo’ asin “napano kan banal na espiritu asin nagtaram kan tataramon nin Dios na may kapusoan.” (Gibo 4:31) Tunay na kita man magigin mapusong maghulit kun aarogon niato an saindang halimbawa.
2 Alagad paano kita makapagtataram na may kapusoan asin kadungan kaiyan magin mataktika? An sarong pakahulogan nin diksionaryo sa pagkamataktika iyo ‘an makosog na pakamate kun ano an gigibohon o sasabihon tanganing malikayan an ikaanggot.” An pag-establisar nin napagkakaoyonan na punto makatatabang sato na magin mataktika. An pag-adal kun paano makikipangatanosan sa mga tawo magpapangyari man sato na magin mataktika. Ano pang mas marahay na instrumento an magagamit niato kisa Reasoning From the Scriptures na makatatabang sato na magin mapuso asin mataktika man.
PAGIGIN TIMBANG
3 An pagpapadanay na timbang kan pagigin mapuso asin mataktika mahalaga sa paghuhulit. Halimbawa, paano niato maaatubang an naghahapot na, ‘Bako daw totoo na may karahayan an gabos na relihiyon?’ An direkta pero mataktikang simbag makukua sa pahina 323 kan librong Reasoning. Siring man, kun may maghapot kun taano kita ta paorootrong nagsosongko sa mga tawong bako man na Saksi ni Jehova asin may sadiring relihiyon, makatatao kita nin mapuso pero mataktikang simbag na sinasabi sa pahina 206 kan librong Reasoning.
MGA HALIMBAWA
4 Si Pedro nagsabi na kita maninigong magin ‘perming andam na sumimbag sa lambang naghahagad nin rason para sa satong paglaom.’ Dangan idinugang nia na maninigong ‘gibohon iyan sa mahoyong boot asin hararom na paggalang.’ (1 Ped. 3:15) Iyo, namidbid ni Pedro an pangangaipo na magin mapuso pero mataktika man. An kapangganahan nin mga parahayag na nag-aarog sa paaging ini ibinabareta sa mga publikasyon kan Sosyedad.—w86 4/1 pp. 6-7; w86 8/1 pp. 21, 24; yb87 pp. 53-4.
5 An pananarig ki Jehova sa pamibi, arog kan itinatampok nin dakol na halimbawa, magpapangyari sato na akoon an tabang kan banal na espiritu, sa siring pinakokosog kita na magtaram na may kapusoan asin pagkamataktika.—Gibo 5:29.