Epektibong Paggamit nin Bisual na mga Pantabang

TAANO ta dapat gumamit nin bisual na mga pantabang sa saindong pagtotokdo? Huli ta sa paggibo kaiyan puedeng magin mas epektibo an saindong pagtotokdo. Si Jehova Dios asin si Jesu-Cristo naggamit nin bisual na mga pantabang, asin makakanood kita sa sainda. Kun an bisual na mga pantabang ikinokombinar sa itinataram, an impormasyon inaako paagi sa duwang sentido. Ini tibaad makatabang na makua an atension kan mga nagdadangog sa saindo asin mapakosog an itinaong impresyon. Paano daw nindo ikaiiba an bisual na mga pantabang sa mga pag-atubang nindo kan maogmang bareta? Paano nindo masisierto na epektibo an paggamit nindo kaiyan?

Kun Paano Naggamit nin Bisual na mga Pantabang an Pinakadakulang mga Paratokdo. Si Jehova naggamit nin dai malilingawan na bisual na mga pantabang sa pagtokdo nin mahahalagang marhay na leksion. Sarong banggi dinara nia sa luwas si Abraham asin sinabi: “Tingag, tabi, sa kalangitan asin bilanga an mga bitoon, kun mabibilang mo sinda. . . . Magigin siring an saimong banhi.” (Gen. 15:5) Dawa ngani sa punto de vista nin tawo garo baga imposible an ipinanuga, si Abraham napahirong marhay asin tuminubod ki Jehova. Sa saro pang okasyon, isinugo ni Jehova si Jeremias sa harong nin paragibo nin koron asin pinalaog sia sa gibohan nin koron tanganing helingon an pagporma kan paragibo sa dalipay. Abaa kadai malilingawan na leksion sa autoridad kan Kaglalang sa mga tawo! (Jer. 18:1-6) Asin paano malilingawan ni Jonas an leksion sa pagkaherak na itinokdo sa saiya ni Jehova paagi sa barantiong? (Jon. 4:6-11) Sinabihan pa ngani ni Jehova an saiyang mga propeta na iakto an makahulang mga mensahe mantang ginagamit an nagkapirang angay na bagay. (1 Ha. 11:29-32; Jer. 27:1-8; Ezeq. 4:1-17) An mismong tabernakulo asin mga kabtang kan templo mga representasyon na nakatatabang sa sato na masabotan an langitnon na mga katunayan. (Heb. 9:9, 23, 24) Naggamit man an Dios nin dakol na bisyon sa pagpaabot nin importanteng impormasyon.​—Ezeq. 1:4-28; 8:2-18; Gibo 10:9-16; 16:9, 10; Kap. 1:1.

Paano si Jesus naggamit nin bisual na mga pantabang? Kan pagdadakopon sia kan mga Fariseo asin mga parasunod sa partido ni Herodes sa saiyang pagtaram, naghagad si Jesus nin denario asin inapod nia an atension sa retrato ni Cesar sa sinsilyo. Dangan iineksplikar nia na an mga bagay ni Cesar maninigong itao ki Cesar alagad an mga bagay nin Dios maninigong itao sa Dios. (Mat. 22:19-21) Tanganing itokdo an leksion sa pagtao nin onra sa Dios paagi kan gabos niatong rogaring, itinokdo ni Jesus an dukhang balo sa templo na an kontribusyon​​—duwang saradit na sinsilyo⁠—​bilog niang pagbuhay. (Luc. 21:1-4) Sa saro pang okasyon ginamit nia an sarong aki bilang halimbawa nin pagigin mapakumbaba, daing ambisyon. (Mat. 18:2-6) Personal man niang ipinaheling an kahulogan nin kapakumbabaan paagi sa paghanaw sa bitis kan saiyang mga disipulo.​—Juan 13:14.

Mga Paagi nin Paggamit nin Bisual na mga Pantabang. Bakong arog ni Jehova, dai kita puedeng makikomunikar paagi sa mga bisyon. Pero, kadakol kan nakapupukaw nin isip na retrato sa mga publikasyon kan Mga Saksi ni Jehova. Gamiton iyan sa pagtabang sa mga interesado na maimahinar an daganon na Paraiso, na ipinanuga sa Tataramon nin Dios. Sa sarong pag-adal sa Biblia, puede nindong darahon an atension kan inaadalan sa sarong retrato na konektado sa pinag-aadalan nindo asin hagadon sa saiya na sabihon sa saindo kun ano an naheheling nia. Mahalagang mangnohon na kan tawan nin nagkapirang bisyon si propeta Amos, naghapot si Jehova: “Ano an naheheling mo, Amos?” (Amos 7:7, 8; 8:1, 2) Puede kamong maghapot nin kaagid na mga hapot mantang dinadara nindo an atension nin mga tawo sa mga retrato na ginibo bilang bisual na mga pantabang sa pagtotokdo.

Kun isusurat nindo an mga pagkuenta o magamit kamo nin tsart na nagpapaheling nin sunod-sunod na pangyayaring makahulogan, ini makatatabang sa mga tawo na mas madaling masabotan an mga hula na arog kan “pitong panahon” sa Daniel 4:16 asin “pitong polong semana” sa Daniel 9:24. An siring na bisual na mga pantabang minalataw sa nagkapirang publikasyon na pinag-aadalan niato.

Sa saindong pampamilyang pag-adal sa Biblia, an orolay manongod sa mga bagay na arog kan tabernakulo, templo sa Jerusalem, asin templo sa bisyon ni Ezequiel magigin mas pasil na masabotan kun magamit kamo nin retrato o diagrama. An mga ini makukua sa Insight on the Scriptures, apendise kan New World Translation of the Holy Scriptures​—With References, asin laen-laen na isyu kan An Torrengbantayan.

Kun binabasa an Biblia kaiba kan saindong pamilya, gamiton nin tama an mga mapa. Susogon an pagbaklay ni Abraham hale sa Ur pasiring sa Haran asin pababa sa Betel. Usisaon an inagihan kan Israel mantang an nasyon pahale sa Egipto asin nagbabaklay pasiring sa Dagang Panuga. Hanapon an lugar na itinao sa lambang tribo nin Israel bilang pamana. Masdan an hiwas kan sakop ni Salomon. Sundan an inagihan ni Elias sa pagdulag nia hale sa Jezreel sagkod sa kaawagan na lihis pa sa Beer-seba pakatapos na sia humaon ni Jezabel. (1 Ha. 18:46⁠–​19:4) Hanapon an mga siudad asin banwaan na pinaghulitan ni Jesus. Sundan an mga biahe ni Pablo, na isinasaysay sa librong Mga Gibo.

Kapakipakinabang an bisual na mga pantabang kun itinotokdo sa mga inaadalan sa Biblia an mga pagpunsionar kan kongregasyon. Puedeng ipaheling nindo sa inaadalan nindo an sarong programa asin ieksplikar an klase nin impormasyon na tinotokar niato sa mga asamblea asin kombension. Dakol an naghanga sa personal na pagpasyar sa Kingdom Hall o pagpasyar sa sangang opisina kan Mga Saksi ni Jehova. Ini puedeng magin epektibong paagi na mahale an salang mga paghona manongod sa satong gibohon asin sa katuyohan kaiyan. Kun may ipinapasyar sa Kingdom Hall, isabi kun paano iyan napapalaen sa ibang lugar nin pagsamba. Tawan nin pagdodoon an simple sanang disenyo na nakatatabang sa pakanood. Itokdo an mga kabtang na espesyalmenteng dinisenyo para sa satong pampublikong ministeryo​​—mga lugar sa pagdistribwir nin literatura, mga mapa kan teritoryo, asin mga kahon sa kontribusyon (bakong platong pangolekta).

Kun may mga videong ginibo sa pagdirehir kan Namamahalang Grupo, gamiton an mga ini sa pagparigon kan pagkompiar sa Biblia, sa pagtokdo sa mga inaadalan kan aktibidad kan Mga Saksi ni Jehova, asin sa pag-enkaminar sa mga nagdadalan na mamuhay kaoyon kan mga prinsipyo sa Biblia.

Paggamit nin Bisual na mga Pantabang Para sa Mas Darakulang Grupo. Kun marahay an pagkaandam asin matibay an pagkaatubang, an bisual na mga pantabang puedeng magin epektibong mga pantabang sa pagtotokdo para sa mas darakulang grupo. An siring na bisual na mga pantabang itinatao kan grupong fiel asin may diskresion na oripon sa laen-laen na porma.

An materyales na aadalan sa An Torrengbantayan parateng may bisual na mga pantabang sa pormang retrato o drowing na magagamit kan namamayo sa pag-adal sa pagdoon nin importanteng mga punto. Totoo man ini sa mga publikasyon na ginagamit sa Pag-adal sa Libro kan Kongregasyon.

An nagkapirang outline sa pampublikong pahayag tibaad garo baga angay na gamitan nin bisual na mga pantabang sa pag-ilustrar nin mga punto. Minsan siring, parate na mas dakula an pakinabang sa pagsentro kan atension sa kun ano an yaon sa Biblia, na nasa kamot kan kadaklan na nagdadangog. Kun may beses na kaipuhan an sarong retrato o halipot na outline kan prinsipal na mga punto tangani na ikapahayag an saro o nagkapirang prinsipal na punto nin sarong pahayag, helingon antes pa tangani na maseguro na malinaw na naheheling (o nababasa) an bisual na pantabang sa likod kan tiriponan. An siring na mga paagi maninigo na tama sana an paggamit.

An obheto niato sa paggamit nin bisual na mga pantabang kun nagtataram asin nagtotokdo bakong manlibang. Kun ginagamit an may dignidad na bisual na pantabang, iyan maninigong tumao nin bisual na pandagdag nin puersa sa mga ideya na maninigo sa espesyal na pagdodoon. An siring na mga pantabang nagigin kapakipakinabang kun iyan nakatatabang na linawon an itinataram, na ginigibo iyan na mas pasil na masabotan, o kun iyan nagtatao nin marigon na ebidensia sa pagigin balido kan sinasabi. Kun tama an pagkagamit, tibaad makatao nin hararomon na impresyon an angay na bisual na pantabang kaya an bisual na pantabang sagkod an puntong itinotokdo nagigirumdoman nin dakol na taon.

An abilidad na makadangog asin an pakaheling pareho may mahalagang kabtang sa pakanood. Girumdoma kun paano ginamit kan pinakadakulang mga Paratokdo an mga sentidong ini, asin pagmaigotan na arogon sinda sa mga paghihingoa nindo na mapahiro an iba.