Epektibong Sadol

AN KAMAGURANGAN na Kristiano dapat na ‘makapagsadol paagi sa katokdoan na ikararahay.’ (Tito 1:9) Kun beses ini kaipuhan na gibohon mantang napapaatubang sa masakiton na mga kamugtakan. Importante na maghatol kaoyon kan mga susundan sono sa Kasuratan. Huli kaini, dapat na himateon nin kamagurangan an hatol na: “Padagos kang magmaigot . . . sa pagsadol.” (1 Tim. 4:13) Minsan ngani an pagtokar niato digdi sa pangenot para sa kamagurangan o sa mga naghihingoang maabot an pribilehiong ini, may beses na dapat na sadolon nin mga magurang an saindang mga aki o kaipuhan na sadolon nin mga namamayo sa pag-adal sa Biblia an saindang mga inaadalan sa Biblia. Sa siring na mga kaso, aplikado man an kaagid na mga susundan.

Mga Situwasyon na Nagkakaipo Kaiyan. Tanganing madeterminaran kun noarin kaipuhan an sadol, makatatabang na siyasaton an mga situwasyon na nasusurat sa Biblia na dian may itinaong sadol. Sinadol ni apostol Pedro an kamagurangan na tawan nin atension an saindang paninimbagan bilang mga pastor kan aripompon nin Dios. (1 Ped. 5:1, 2) Hinatolan ni Pablo si Tito na sadolon an mga barobata na “magin marahay an kaisipan.” (Tito 2:6) Sinadol ni Pablo an mga kapwa Kristiano na “magtaram na may pagkaoroyon” asin likayan an mga naghihingoang magpabulag sa mga tugang. (1 Cor. 1:10; Roma 16:17; Fil. 4:2) Minsan ngani tinawan ni Pablo nin komendasyon an mga miembro kan kongregasyon sa Tesalonica huli sa marahay na mga ginigibo ninda, sinadol nia sinda na mas lubos pang iaplikar an instruksion na inako ninda. (1 Tes. 4:1, 10) Nakimaherak si Pedro sa mga kapwa Kristiano na “padagos na lumikay sa mga mawot nin laman.” (1 Ped. 2:11) Sinadol ni Judas an saiyang mga tugang na “makipaglaban nin maigot para sa pagtubod” huli sa impluwensia nin mga marompot na napadadara sa malaswang gawe-gawe. (Jud. 3, 4) An mga Kristiano sa pankagabsan sinadol na magpasaradolsadol tangani na mayo nin mapatagas kan mapandayang kapangyarihan nin kasalan. (Heb. 3:13) Sinadol ni Pedro an mga Judio na dai pa minatubod ki Cristo: “Paligtas kamo hale sa bikong kapag-arakian na ini.”​—Gibo 2:40.

Anong mga kualidad an kaipuhan tangani na mapuersang makapakiolay sa siring na mga situwasyon? Paano daw magigibo kan nagsasadol na magin kaipuhan na marhay an saiyang pakiolay na dai man nagigin paradaogdaog o maringis?

“Basado sa Pagkamoot.” Kun an sadol niato dai itinatao “basado sa pagkamoot,” iyan tibaad magin garo baga masyadong matatsar. (Filem. 9) Totoo, kun kaipuhan an paghiro tolos, maninigong marisa sa pagtaram kan nagpapahayag an pagkaapurado kan situwasyon. An maluway na pagtaram tibaad garo baga naghahagad nin dispensasyon. Kadungan kaiyan, an pakiolay maninigong odok asin may empatiya. An mamomoton na pakiolay mas posible na makamotibar sa mga nagdadangog. Kan nagtataram para sa saiya man sana asin sa saiyang kairiba, sinabi ni Pablo sa mga taga Tesalonica: “Aram na gayo nindo kun paano, arog kan ginigibo nin ama sa saiyang mga aki, kami padagos na nagsadol sa lambang saro sa saindo.” (1 Tes. 2:11) An Kristianong mga paraataman na idto nakimaherak sa mga tugang na may pagkamoot. Logod na an mga tataramon nindo gumikan sa tunay na pagmakolog sa mga naghihinanyog sa saindo.

Magin mataktika. Dai parayoon an boot kan mga hinihingoa nindong pahiroon. Kadungan kaiyan, dai magpogol na isabi sa mga nagdadangog sa saindo an “gabos na hatol nin Dios.” (Gibo 20:27) An mga may apresasyon dai magsesentir o mababawasan an pagkamoot sa saindo huli ta maboot nindo sindang sinadol na gibohon an tama.​—Sal. 141:5.

Parate na kapakipakinabang na ponan an sadol nin espesipiko, sinserong komendasyon. Isipon an marahay na mga bagay na ginigibo kan saindong mga tugang​​—mga bagay na seguradong ikinaoogmang marhay ni Jehova: an pagtubod na nahahayag sa saindang gibohon, an pagkamoot na nagpapahiro sa sainda na maghingoa, asin an saindang pakatagal sa ibong nin mapagbalong mga situwasyon. (1 Tes. 1:2-8; 2 Tes. 1:3-5) Makatatabang ini na mamatean kan saindong mga tugang na sinda inaapresyar asin nasasabotan, asin huli kaiyan magigin mapaghimate an isip ninda para sa masunod na pakiolay.

“Sa Bilog na Pakatios.” An sadol maninigong itao “sa bilog na pakatios.” (2 Tim. 4:2) Ano an kalabot digdi? Kaiba sa pakatios an mapasensiang pagtagal sa sala o pagprobokar. An sarong matinios pinapagdadanay an paglaom na iaaplikar kan mga naghihinanyog sa saiya an saiyang sinasabi. An pagsadol na may arog kaining espiritu maolang na isipon kan mga naghihinanyog sa saindo na ipinamumugtak nindo an pinakamaraot manongod sa sainda. An pagkompiar nindo na gusto kan saindong mga tugang na lalaki asin babae na maglingkod ki Jehova sa pinakamakakaya ninda makapupukaw sa kamawotan ninda na gibohon an tama.​—Heb. 6:9.

“Paagi sa Katokdoan na Ikararahay.” Paano an sarong magurang sa kongregasyon ‘makakapagsadol paagi sa katokdoan na ikararahay’? Paagi sa ‘marigon na pangangapot sa fiel na tataramon kun dapit sa saiyang teknika sa pagtotokdo.’ (Tito 1:9) Imbes na ipahayag an personal nindong opinyon, pabayaan na an Tataramon nin Dios an magtao nin puersa sa pakiolay nindo. Pabayaan na an Biblia an tumabang sa saindo na mamansayan an kaipuhan na sabihon. Sarosaroon an mga pakinabang sa pag-aplikar kan sinasabi kan Biblia manongod sa pinag-oolayan. Magin malinaw sa isip an mga resulta​​—ngonyan sagkod sa ngapit⁠—​kan dai pagkuyog sa Tataramon nin Dios, asin gamiton ini sa pagkombensir sa mga nagdadangog sa saindo na kaipuhan na gumibo kan tamang aksion.

Seguradohon na ieksplikar nin malinaw sa mga nagdadangog sa saindo kun ano an maninigong gibohon ninda asin kun paano ninda iyan maninigong gibohon. Linawon na an pagrason nindo marigon na nakabasar sa Kasuratan. Kun an Kasuratan may itinataong libertad sa ano man na desisyon na dapat gibohon, sabihon kun gurano an libertad na iyan. Dangan, sa konklusyon nindo, gumibo nin pangultimong pakiolay na mapakosog sa determinasyon kan mga naghihinanyog sa saindo na humiro.

May “Katalingkasan nin Pagtaram.” Tangani na epektibong masadol an iba, an saro dapat na may “katalingkasan nin pagtaram sa pagtubod.” (1 Tim. 3:13) Ano an nagpapangyari sa saro na talingkas na makataram? An bagay na an itinatao niang “arogan nin marahay na mga gibo” kaoyon kan isinasadol niang gibohon kan saiyang mga tugang. (Tito 2:6, 7; 1 Ped. 5:3) Kun siring kaini, marerealisar kan mga sinasadol na humiro na an nagsasadol sa sainda dai nag-aasa na gibohon ninda an dai nia ginigibo mismo. Maheheling ninda na maaarog ninda an saiyang pagtubod kun paanong hinihingoa niang arogon si Cristo.​—1 Cor. 11:1; Fil. 3:17.

An sadol na basado sa Tataramon nin Dios asin itinataong may pagkamoot dakulang karahayan an magigibo. An mga tinawan kan paninimbagan na magtao nin siring na sadol maninigo na magmaigot na gibohon iyan nin toltol.​—Roma 12:8.