Hirak Man sa Henerasyon na Habong Maghimati

Halangkaw an paggalang ni Jesus ki Juan Bautista, pero ano an paghiling ki Juan kan kadaklan? “An henerasyon na ini,” an sabi ni Jesus, ‘garo mga aking nagtuturukaw sa mga saudan asin nagkukururahaw sa saindang mga kakawat, na nagsasabi: “Tinugtugan mi kamo kan plawta, pero dai kamo nagbarayle; nagtarangis kami, pero dai nindo pigturubtob an saindong mga daghan sa kamunduan.”’—Mateo 11:16, 17.

Ano an buot sabihon ni Jesus? Nagpaliwanag siya: “Nag-abot si Juan na dai nagkakakan asin dai nag-iinom, alagad an sabi kan mga tawo, ‘Igwa siya nin demonyo.’ An Aki nin tawo nag-abot na nagkakakan asin nag-iinom, alagad an sabi kan mga tawo, ‘Hilinga! Sarong tawong pasluon asin makiarak, amigo nin mga parasingil nin buhis asin mga parakasala.’” (Mateo 11:18, 19) Sa sarong lado, si Juan namuhay nin simple bilang Nazareo, na dai ngani nag-iinom nin arak, pero sinasabi kan henerasyon na ini na igwa siya nin demonyo. (Bilang 6:2, 3; Lucas 1:15) Sa ibong na lado, si Jesus namuhay nin arog kan ibang tawo. Nagkakakan siya asin nag-iinom nin tama sana, pero sinasahutan siya na nagpapangana. Garo baga imposibleng mapauyunan an mga tawo.

Iinagid ni Jesus an henerasyon na ini sa mga aking nagtuturukaw sa mga saudan na nagsayumang magbarayle kan an ibang aki nagtugtog nin plawta o magmurundo kan an ibang aki nagtarangis. “Minsan siring,” an sabi niya, “an kadunungan napapatunayan na matanos paagi sa mga gibo kaiyan.” (Mateo 11:16, 19) Iyo, an “mga gibo”—an ebidensiyang ipinahiling ni Juan saka ni Jesus—nagpapatunay na bakong totoo an mga akusasyon sa sainda.

Pagkatapos iladawan ni Jesus na an henerasyon na ini habong maghimati, espesipiko niyang tinuyaw an mga siyudad nin Corazin, Betsaida, asin Capernaum, kun sain siya naggibo nin mga milagro. Sinabi ni Jesus na kun ginibo niya an mga milagrong iyan sa Tiro saka Sidon, na mga siyudad sa Fenicia, nagsurulsol kutana an mga iyan. Sinambit man niya an Capernaum, na nagin sentro kan gibuhon niya sa laog nin nagkapirang panahon. Dawa duman, an kadaklan dai naghimati. Sinabi ni Jesus dapit sa siyudad na iyan: “Sa Aldaw nin Paghukom, mas kahihirakan pa an Sodoma kisa saimo.”—Mateo 11:24.

Dangan inumaw ni Jesus an saiyang Ama, na nagtago kan mahahalagang espirituwal na katotoohan “sa mga madunong saka may inadalan” pero ihinayag an mga bagay na ini sa mga mapakumbaba, na arog sa mga aki. (Mateo 11:25) Magayunon an imbitasyon niya sa mga arog ninda: “Madya kamo sa sako, kamo gabos na nagpapagal saka nagagabatan, asin papaginhawahon ko kamo. Pasanon nindo an sakuyang sakal asin makanuod kamo sa sako, huli ta ako may mahuyong buot saka may mapakumbabang puso, asin magiginhawahan kamo. Huli ta an sakuyang sakal komportable, asin an sakuyang pasan magian.”—Mateo 11:28-30.

Paano si Jesus nag-alok nin kaginhawahan? Pinagabatan kan mga lider nin relihiyon an mga tawo paagi sa mga tradisyon, siring kan sobra kaistriktong mga susundon sa Sabbath. Pero pinaginhawa sinda ni Jesus paagi sa pagtutukdo kan katotoohan manungod sa Diyos, na daing digta kan mga tradisyon na iyan. Paagi sa itinukdo niya, naaraman kan mga inaapi huli sa pagdominar kan mga awtoridad sa gobyerno kun paano sinda magiginhawahan, siring man an mga napapagabatan nin konsiyensiya huli sa kasalan. Iyo, ihinayag sa sainda ni Jesus kun paano mapapatawad an mga kasalan ninda asin kun paano sinda makikipagkatuninungan sa Diyos.

An gabos na nag-aako kan komportableng sakal ni Jesus puwedeng idusay an sadiri sa Diyos asin maglingkod sa saiya bilang an satong mapagmalasakit asin mahihirakon na Ama sa langit. Dai nin kaibang magabat na pasan sa paggibo kaiyan, huling an mga kahagadan nin Diyos dai nanggad nakakapagabat.—1 Juan 5:3.