Makinabang sa Teokratikong Pagpapasakop

MAHALAGANG marhay na magpasakop sa Diyos na Jehova, an Soberano kan Uniberso, tanganing magin organisado kita sa paggibo kan kabutan niya. Minimidbid ta an pagkapayo kan saiyang Aki sa Kristiyanong kongregasyon asin sinusunod ta man an prinsipyo nin pagkapayo sa iba pang aspekto kan satong buhay. An gabos nakikinabang sa areglong iyan nin teokratikong pagpapasakop.

² An prinsipyo nin pagpapasakop sa itinalagang awtoridad inot na itinukdo sa mga tawo sa hardin nin Eden. Yaon iyan sa mga pagbuot nin Diyos sa Genesis 1:28 asin 2:16, 17. An mga hayop linalang para magin sakop nin mga tawo, asin si Adan asin Eva man dapat na magpasakop sa kabutan saka awtoridad nin Diyos. An pagsunod sa awtoridad na ini magbubunga nin katuninungan asin pagigin areglado. Pag-abot nin panahon, an prinsipyo nin pagkapayo idinuon sa 1 Corinto 11:3. Nagsurat si apostol Pablo: “Buot kong maaraman nindo na an payo kan lambang lalaki iyo an Cristo; siring man, an payo kan babayi iyo an lalaki; asin an payo kan Cristo iyo an Diyos.” Ipinapahiling kan areglong iyan, na an gabos, apuwera ki Jehova, dapat na magpasakop sa pagkapayo.

³ Dai minimidbid o sinusunod kan kadaklan ngunyan an prinsipyo nin pagkapayo. Taano? An problema nagpuon sa Eden kan an inot niyatong mga magurang tuyong dai nagpasakop sa pagkapayo nin Diyos bilang Soberano. (Gen. 3:4, 5) Pero imbes na magkaigwa nin urog na libertad, nagin sakop sinda nin sarong maraot na espiritung linalang, si Satanas na Diyablo. Huli sa inot na pagrebeldeng iyan, an mga tawo nagin suway sa Diyos. (Col. 1:21) Bilang resulta, an mayoriya kan mga tawo sa ngunyan nasa kapangyarihan pa man giraray kan saro na maraot.—1 Juan 5:19.

⁴ Huling nanudan ta an katotoohan sa Tataramon nin Diyos asin isinasabuhay iyan, nakahali na kita sa impluwensiya ni Satanas. Bilang nagdusay asin bawtisadong mga Saksi, minimidbid ta si Jehova bilang Soberano kan satong buhay. Minauyon kita ki Hading David, na minidbid si Jehova bilang “pamayo kan gabos.” (1 Cron. 29:11) Iyo, mapakumbaba tang ipinapahayag: “Aramon nindo na Diyos si Jehova. Siya an naggibo sa sato, asin sadiri niya kita. Kita an saiyang banwaan asin an mga karnero sa saiyang pasabsaban.” (Sal. 100:3) Minimidbid niyato na si Jehova makapangyarihan asin na maninigo kitang lubos na magpasakop sa saiya, huling siya an naglalang kan gabos na bagay. (Kap. 4:11) Bilang mga ministro kan tunay na Diyos, inaarog ta si Jesu-Cristo, na nagpahiling nin perpektong halimbawa nin pagpapasakop sa Diyos.

⁵ Ano an nanudan ni Jesus sa mga bagay na tinios niya kan yaon siya digdi sa daga? An Hebreo 5:8 minasimbag: “Minsan ngani aki siya nin Diyos, nanudan niya an pagsunod paagi sa mga kasakitan na inagihan niya.” Iyo, padagos siyang maimbod na nagpasakop sa saiyang Ama sa langit, dawa kan napapaatubang siya sa kasakitan. Saka dai siya naggibo nin maski sarong bagay sa sadiri niyang kabutan. Dai siya nagtaram nin sadiri niyang ideya asin dai man niya minawot na magkaigwa nin sadiring kamurawayan. (Juan 5:19, 30; 6:38; 7:16-18) Sa panahon kan saiyang ministeryo, naugma siyang marhay sa paggibo kan kabutan kan saiyang Ama, dawa ngani nagin dahilan iyan nin pagkontra asin pagpersegir sa saiya. (Juan 15:20) Nagpasakop si Jesus sa Diyos. “Nagpakumbaba siya” dawa sagkod sa “kagadanan sa hariging pasakitan.” An saiyang lubos na pagpapasakop ki Jehova igwa nin dakul na marahayon na resulta—daing katapusan na kaligtasan para sa katawuhan, halangkaw na posisyon para sa saiya, asin kamurawayan para sa saiyang Ama.—Fil. 2:5-11; Heb. 5:9.

MGA ASPEKTO NIN TEOKRATIKONG PAGPAPASAKOP

⁶ Pag nagpapasakop kita sa Diyos paagi sa paggibo kan saiyang kabutan, nalilikayan ta an dakul na kahaditan asin pagkadisganar na naeeksperyensiyahan kan mga habong magpasakop sa soberaniya ni Jehova. An satong kaiwal, an Diyablo, padagos na naghihinguwang biktimahon kita. Pero makakaligtas kita sa maraot na iyan kun maninindugan kita laban sa saiya saka kun magpapakumbaba kita sa atubangan ni Jehova asin gikan sa buot na magpapasakop sa saiya.—Mat. 6:10, 13; 1 Ped. 5:6-9.

⁷ Sa laog kan Kristiyanong kongregasyon, minimidbid ta an pagkapayo ni Cristo asin an awtoridad na itinao niya sa “maimbod asin mapagmansay na uripon.” May epekto ini sa satong paggawi asin pagtrato sa lambang saro. An pagpapasakop sa Diyos sa laog kan kongregasyon mapahiro sato na magin masinunod sa Tataramon nin Diyos sa gabos na aspekto kan satong pagsamba. Kaiba diyan an satong ministeryo, pag-atender saka pagpartisipar sa mga pagtiripon, pagtrato sa mga elder, asin pakikikooperar sa mga areglo kan organisasyon.—Mat. 24:45-47; 28:19, 20; Heb. 10:24, 25; 13:7, 17.

⁸ An satong pagpapasakop sa Diyos nakakatabang na magin matuninong, matiwasay, asin areglado an Kristiyanong kongregasyon. An marahayon na mga kuwalidad ni Jehova inaarog kan mga nagpapasakop sa saiya. (1 Cor. 14:33, 40) Huli sa mga naeksperyensiyahan ta mismo sa organisasyon ni Jehova, igwa kita kan sabuot na kapareho kan ki Hading David. Pagkatapos na maobserbaran an pagkakaiba kan mga lingkod ni Jehova asin kan mga maraot, maugmahon na nasabi ni David: “Maugma an banwaan na an Diyos iyo si Jehova!”—Sal. 144:15.

⁹ Sa mga mag-agom asin sa laog kan pamilya, “an payo kan babayi iyo an lalaki.” An mga lalaki man dapat na magpasakop ki Cristo, asin an payo ni Cristo iyo an Diyos. (1 Cor. 11:3) An agom na babayi dapat na magpasakop sa saiyang agom, asin an mga aki dapat man na magpasakop sa saindang mga magurang. (Efe. 5:22-24; 6:1) Matuninong an pag-iribanan kan pamilya pag sinusunod kan lambang miyembro an prinsipyo nin pagkapayo.

¹⁰ Dapat na gamiton kan agom na lalaki an saiyang pagkapayo sa mamumuton na paagi bilang pag-arog ki Cristo. (Efe. 5:25-29) Kun bako siyang pabaya sa saiyang pagkapayo asin dai niya iyan inaabuso, mauugma an saiyang agom asin mga aki na magpasakop sa saiya. An papel man kan agom na babayi magin katuwang, o kakomplemento. (Gen. 2:18) Pag mapasensiya niyang sinusuportaran asin iginagalang an saiyang agom, lalo siyang papadangaton kaini asin makakatao siya nin kaumawan sa Diyos. (1 Ped. 3:1-4) Pag sinusunod kan mga agom na lalaki asin babayi an sadol kan Bibliya manungod sa pagkapayo, nagigin halimbawa sinda sa saindang mga aki sa pagpahiling nin pagpapasakop sa Diyos.

¹¹ An satong pagpapasakop sa Diyos may epekto man sa paghiling ta sa “haralangkaw na awtoridad,” na “nag-ookupar kan saindang manlain-lain na posisyon na inasignar nin Diyos.” (Roma 13:1-7) Bilang mga siyudadano na masinunod sa ley, an mga Kristiyano nagbabayad nin buhis, na itinatao “ki Cesar an mga bagay na ki Cesar, alagad sa Diyos an mga bagay na sa Diyos.” (Mat. 22:21) Saka sa paghuhulit ta sa satong teritoryo, sinusunod ta an aplikableng mga ley manungod sa pag-iingat sa gabos na klase nin impormasyon (data protection law). Pag nagpapasakop asin nagsusunod kita sa itinalagang mga awtoridad sa ano man na hinahagad ninda na bako man kontra sa matanos na pagbuot ni Jehova, lubos tang nagagamit sa paghuhulit an satong panahon asin kusog.—Mar. 13:10; Gibo 5:29.

¹² An teokratikong pagpapasakop may epekto sa gabos na aspekto nin buhay. Paagi sa mga mata nin pagtubod, nahihiling ta an pag-abot kan aldaw na an gabos na tawo magigin sakop ni Jehova Diyos. (1 Cor. 15:27, 28) Dakulang bendisyon nanggad an makakamtan kan mga maugmang nagmimidbid sa soberaniya ni Jehova asin padagos na nagpapasakop sa saiya sagkod sa panahon na daing sagkod!