Diosnon na Pagpapasakop—Taano Asin Niisay?
“Aram kong marhay, O Jehova, na bakong sadiri nin tawo an saiyang dalan. Mayo sa tawong naglalakaw an kakayahan na giyahan an saiyang lakad.”—JEREMIAS 10:23.
1. Anong mga klase nin independensia an pinahalagahan nin dakol?
SARO sa pinakabantog na dokumento nin tawo an Deklarasyon nin Independensia, na paagi kaiyan an 13 kolonyang Britano sa Amerika del Norte kaidtong ika-18 siglo nagdeklarar kan saindang independensia sa saindang inang nasyon, an Britania. Gusto ninda nin katalingkasan, asin konektado an independensia sa pamomogol nin ibang nasyon asin an katalingkasan. Puwedeng magin dakulang bentaha an politikal asin ekonomikong independensia. Kasuarin pa sana an nagkapirang kadagaan sa Sirangan na Europa nagkaigwa nin politikal na independensia. Minsan siring, kaipuhan na admitiron na sa kadagaan na iyan an siring na independensia nagdara nin dakol na magagabat na problema.
2, 3. (a) Anong klaseng independensia an bakong marahay? (b) Paano an bagay na ini mapuwersang liniwanag kan enot?
2 Minsan ngani marahayon an laen-laen na klase nin independensia, igwa nin sarong klase nin independensia na bakong marahay. Ano iyan? An independensia sa Kaggibo sa tawo, si Jehova Dios. Iyan bakong bendisyon kundi sumpa. Taano? Huli ta an tawo nungka na ginibo tanganing humiro nin independiente sa saiyang Kaggibo, arog kan tamang-tamang ipinaheheling kan mga tataramon ni propeta Jeremias na kinotar sa itaas. Sa ibang pagtaram, an tawo talagang ginibo na magpasakop sa saiyang Kaggibo. An pagpasakop sa satong Kaglalang nangangahulogan nin pagigin makinuyog sa saiya.
3 An bagay na iyan mapuwersang liniwanag sa enot na tawong mag-agom kan pagboot ni Jehova sa sainda na nasusurat sa Genesis 2:16, 17: “Hale sa gabos na kahoy sa tatamnan puwede kang magkakan sagkod na ika mabasog. Alagad kun dapit sa kahoy nin pakamidbid kan marahay asin maraot dai ka magkakan kaiyan, huli ta sa aldaw na kumakan ka kaiyan ika siertong magagadan.” An pagsayumang pumasakop sa saiyang Kaggibo nagdara ki Adan asin sa gabos niang aki nin kasalan, kasakitan, asin kagadanan.—Genesis 3:19; Roma 5:12.
4, 5. (a) Ano an ibinunga kan pagsayuma nin mga tawo na pumasakop sa Dios? (b) Anong moral na ley an dai madudulagan?
4 An pagsayuma nin mga tawo na pumasakop sa Dios bakong madonong saka sala sa moral. Sa kinaban iyan nagbunga nin lakop na katampalasanan, krimen, kadahasan, asin seksuwal na inmoralidad kaiba an mga bunga kaiyan na mga helang na ikinaoolakit sa pagdodorog. Apuwera kaiyan, bako daw na an damat ngonyan na krimen nin mga hobenes sa kadaklan huli sa pagsayuma kan mga hobenes na pumasakop ki Jehova, saka sa saindang mga magurang asin sa mga ley kan nasyon? An espiritung ini nin independensia maririsa sa palaen asin baglang paggubing nin dakol asin sa usmak na pananaram na ginagamit ninda.
5 Alagad ta mayo nin makadudulag sa dai maliliwat na moral na ley kan Kaglalang: “Dai kamo madayaan: An Dios dai maoolog-olog. Huli ta an ano man na itinatanom nin tawo, iyan man sana an saiyang aanihon; huli ta an nagtatanom sa laman mag-aani man nin pagkatunaw sa laman.”—Galacia 6:7, 8.
6, 7. Ano an pinakacausa kan pagsayumang pumasakop, na maheheling sa anong mga halimbawa?
6 Ano an pinakacausa kan gabos na pagsayumang ini na pumasakop? Sa simpleng pagtaram, iyan an kapasloan asin kapalangkawan. Iyan an dahelan na si Eva, an enot na babae, nagpabayang dayaon kan halas asin nagkakan kan ipinangangalad na bunga. Kun sia hababa an boot asin mapakumbaba, an sugot na magin arog nin Dios—na nagsasadiring magdesisyon kun ano an marahay asin maraot—dai kutana nakaakit sa saiya. Asin kun sia bakong paslo, dai nia kutana minawot an bagay na prangkang ipinangalad kan saiyang Kaggibo, si Jehova Dios.—Genesis 2:16, 17.
7 Dai nahaloy pagkatapos na magkasala si Adan asin Eva, an kapalangkawan asin kapasloan nagpangyari ki Cain na gadanon an tugang niang si Abel. An kapasloan nangpangyari man sa nagkapirang anghel na gumawe nin independiente, na binayaan an dati nindang kamugtakan asin nagmateryalisar tanganing magkamit nin sensuwal na mga kasiraman. An kapalangkawan asin kapasloan nagmotibar ki Nimrod asin iyo man an ugale nin kadaklan na namomoon sa kinaban poon kan saiyang kapanahonan.—Genesis 3:6, 7; 4:6-8; 1 Juan 3:12; Judas 6.
Kun Taano ta Utang Niato ki Jehova Dios an Pagpapasakop
8-11. Ano an apat na makokosog na dahelan sa satong diosnon na pagpapasakop?
8 Taano ta utang niato sa satong Kaggibo, si Jehova Dios, an pagpapasakop? Enot sa gabos huli ta sia an Unibersal na Soberano. An gabos na autoridad tama sanang yaon sa saiya. Sia an satong Hokom, Paraboot, asin Hade. (Isaias 33:22) Tama an isinurat manongod sa saiya: “An gabos na bagay huba asin bukas sa mga mata kaidtong satong paninimbagan.”—Hebreo 4:13.
9 Dugang pa, mantang makakamhan sa gabos an satong Kaggibo, mayo nin mapangganang makatutumang sa saiya; mayo nin makaiignoro sa saiyang obligasyon na pumasakop sa Saiya. Dai mahahaloy, an mga nagsasayuma lalaglagon kapareho ni Faraon kan suanoy asin ni Satanas na Diablo sa itinalaan na panahon nin Dios.—Salmo 136:1, 11-15; Kapahayagan 11:17; 20:10, 14.
10 An pagpapasakop obligasyon kan gabos na intelihenteng linalang ta sinda nabubuhay sa katuyohan na maglingkod sa saindang Kaggibo. An Kapahayagan 4:11 nagsasabi: “Angay ka, Jehova, na samong Dios, na mag-ako kan kamurawayan asin dangog patin kapangyarihan, huli ta linalang mo an gabos na bagay, asin huli sa saimong kabotan an mga iyan naglataw asin nalalang.” Sia an Dakulang Paragibo nin Koron, asin sia naggigibo nin mga lalagan na tawo tanganing makaotob sa saiyang katuyohan.—Isaias 29:16; 64:8.
11 Dai niato paglingawan an bagay na an Kaggibo sa sato madonong sa gabos, kaya aram nia kun ano an pinakamarahay sa sato. (Roma 11:33) An saiyang mga ley ‘para sa satong ikararahay.’ (Deuteronomio 10:12, 13) Orog sa gabos, “an Dios pagkamoot,” kaya an gusto nia sana an pinakamarahay para sa sato. Kadakol kan makokosog na dahelan niato na pumasakop sa satong Kaggibo, si Jehova Dios!—1 Juan 4:8.
Si Jesu-Cristo, an Sangkap na Arogan nin Diosnon na Pagpapasakop
12, 13. (a) Paano nagpaheling nin diosnon na pagpapasakop si Jesu-Cristo? (b) Anong mga tataramon ni Jesus an nagpapaheling kan saiyang mapagpasakop na kaisipan?
12 Daing duda, an bugtong na Aki ni Jehova, si Jesu-Cristo, nagtatao sato kan sangkap na halimbawa nin diosnon na pagpapasakop. Ini idinodoon ni apostol Pablo sa Filipos 2:6-8: “[Si Jesus], minsan ngani sia kabaing nin Dios, dai nag-isip na man-agaw, an boot sabihon, na sia makapantay sa Dios. Dai, kundi sia nagpakangdaing halaga asin buminaing sa sarong oripon asin nagin kaagid nin mga tawo. Orog pa kaiyan, kan makua nia an saiyang sadiri na kabaing nin tawo, sia [orog pang] nagpakumbaba asin nagin makinuyog sagkod sa kagadanan, iyo, kagadanan sa hariging pasakitan.” Kan yaon digdi sa daga, paorootrong isinabi ni Jesus na mayo sia nin ginigibo sa sadiri niang kagustohan; dai sia guminawe nin independiente, kundi perming nagpasakop sa saiyang langitnon na Ama.
13 Mababasa niato sa Juan 5:19, 30: “Si Jesus nagpadagos na magsabi sa sainda: ‘Sa katotoohan sinasabi ko sa saindo, An Aki dai makagigibo nin ano man sa saiyang sadiring boot, kundi an saiya sanang naheheling na ginigibo kan Ama. Huli ta ano man an mga ginigibo kan Sarong iyan, an mga ini man an ginigibo kan Aki sa kaparehong paagi. Dai ako makagigibo ni sarong bagay sa sadiri kong boot; sono sa sakong nadangog, ako naghohokom; asin an paghokom na sakuyang ginigibo matanos, huli ta pinagmamaigotan kong maotob, bakong an sadiri kong kabotan, kundi an kabotan nia na nagsugo sa sako.’” Siring man, paorootro siang namibi kan banggi na sia pinasaloiban: “Bakong an boot ko, kundi an boot mo.”—Mateo 26:39, 42, 44; helingon man an Juan 7:28; 8:28, 42.
Suanoy na mga Halimbawa nin Diosnon na Pagpapasakop
14. Sa anong mga paagi si Noe nagpaheling nin diosnon na pagpapasakop?
14 Kabilang sa enot na mga halimbawang tawo sa diosnon na pagpapasakop si Noe. Ipinaheling nia an saiyang pagpapasakop sa tolong paagi. Enot, paagi sa pagigin tawong matanos, daing kanawayan sa kaibanan kan saiyang mga katemporanyo, naglalakaw kaiba kan tunay na Dios. (Genesis 6:9) Ikaduwa, paagi sa pagtogdok kan dahong. “Ginibo [nia] an sono sa gabos na ipinagboot sa saiya nin Dios. Siring nanggad kaiyan an saiyang ginibo.” (Genesis 6:22) Ikatolo, paagi sa pagpahayag kan patanid manongod sa nagdadangadang na Baha bilang “parahulit nin katanosan.”—2 Pedro 2:5.
15, 16. (a) Anong marahay na halimbawa an itinao ni Abraham sa diosnon na pagpapasakop? (b) Paano si Sara nagpaheling nin pagpapasakop?
15 Si Abraham saro pang pambihirang halimbawa nin diosnon na pagpapasakop. Ipinaheling nia an pagpapasakop paagi sa pagkuyog sa pagboot nin Dios na: “Humale ka sa saimong banwaan.” (Genesis 12:1) Idto nangahulogan nin pagbaya sa saiyang komportableng kamugtakan sa Ur (na bako man na sadit sanang siudad, arog kan ipinaririsa nin mga nadiskobre sa arkeolohiya) tanganing maglibotlibot bilang parabaklay sa ibang daga sa laog nin sanggatos na taon. Si Abraham partikularmenteng nagpaheling nin diosnon na pagpapasakop paagi sa pakapasar sa dakulang pagbalo nin pagigin andam na idolot an saiyang aking si Isaac.—Genesis 22:1-12.
16 An agom ni Abraham na si Sara nagtatao sato nin saro pang marahay na halimbawa nin diosnon na pagpapasakop. An paglibotlibot sa ibang daga siertong nagtao nin dakol na kadepisilan, alagad ta dai kitang mababasang pagreklamo nia. Nagtao sia nin marahay na halimbawa nin diosnon na pagpapasakop sa duwang pangyayari na ipinamidbid sia ni Abraham bilang tugang nia sa atubangan nin paganong mga namomoon. Sa duwang okasyon nagkooperar si Sara, dawa ngani madali na siang magin miembro kan saindang mga harem bilang resulta. Nagpapatunay sa saiyang diosnon na pagpapasakop an pag-apod nia sa agom niang si Abraham na “sakong kagurangnan” sa laog kan saiyang boot, na ipinaheheling na idto an tunay na nasa puso nia.—Genesis 12:11-20; 18:12; 20:2-18; 1 Pedro 3:6.
17. Taano ta masasabi na si Isaac nagpaheling nin diosnon na pagpapasakop?
17 Dai niato lingawan an halimbawa nin diosnon na pagpapasakop na itinao kan aki ni Abraham na si Isaac. Ipinaririsa nin Judiong tradisyon na si Isaac mga 25 anyos na kan pagbotan ni Jehova an saiyang ama, si Abraham, na idolot sia bilang atang. Kun ginusto ni Isaac, pasil nia kutanang nalabanan an saiyang ama, na sanggatos na taon an kagurangan sa saiya. Alagad ta dai. Minsan ngani naghapot si Isaac dapit sa kadaihan nin hayop na iaatang, sia mahoyong kuminuyog sa pagbugtak sa saiya kan saiyang ama sa ibabaw kan altar dangan paggapos sa saiyang mga kamot asin bitis tanganing malikayan o makontrol an ano man na dai mapogolan na reaksion na tibaad mangyari kun ginamit an daga.—Genesis 22:7-9.
18. Paano si Moises nagpaheling nin arogan na diosnon na pagpapasakop?
18 Pakalihis nin mga taon, si Moises nagtao nin marahay na halimbawa para sa sato sa diosnon na pagpapasakop. Iyan tunay na ipinaririsa kan paglaladawan sa saiya bilang “iyo an pinakamahoyo sa gabos na tawo na yaon sa ibabaw kan daga.” (Bilang 12:3) An saiyang makinuyog na pag-otob sa mga pagboot ni Jehova sa laog nin 40 taon sa kapatagan, dawa ngani an pinangangatamanan nia rebeldeng banwaan na duwa o tolong milyon an kabilangan, orog pang nagpapatotoo sa saiyang diosnon na pagpapasakop. Kaya sinasabi kan tala na “ginibo ni Moises an sono sa gabos na ipinagboot sa saiya ni Jehova. Iyan nanggad an ginibo nia.”—Exodo 40:16.
19. Paagi sa anong mga tataramon na ipinaheling ni Job an saiyang pagpapasakop ki Jehova?
19 Si Job saro pang lataw na tawo na nagtao sato nin marahayon na halimbawa sa diosnon na pagpapasakop. Pakatogoti ni Jehova ki Satanas na paraon an gabos na rogaring ni Job, gadanon an saiyang mga aki, dangan pasakitan sia nin “nakagagadan na pigsa poon sa dapan kan saiyang bitis sagkod sa alimpoporo kan saiyang payo,” an agom ni Job nagsabi sa saiya: “Nangangapot ka pa giraray sa saimong integridad? Sumpaa an Dios asin magadan ka!” Minsan siring, ipinaheling ni Job an saiyang diosnon na pagpapasakop paagi sa pagsabi sa saiya: “Ika nagtataram siring sa pagtaram nin saro sa mga babaeng lolong. Aakoon sana daw niato an marahay hale sa tunay na Dios asin dai man aakoon an maraot?” (Job 2:7-10) Nagpapaheling man kan kaparehong kaisipan an saiyang mga tataramon na nasusurat sa Job 13:15: “Dawa kun ako gadanon nia, bako daw na ako maghahalat?” Minsan ngani, sa katotoohan, si Job nagmamakolog na gayo sa sadiri niang pagpapakangmatanos, dai niato paglingawan na sa katapustapusi si Jehova nagsabi sa saro sa mga pararanga daa saiya: “An sakuyang kaanggotan naglaad tumang sa saimo asin sa duwa mong kairiba, huli ta kamo dai nagtaram kan katotoohan manonongod sa sako arog kan sakuyang lingkod na si Job.” Daing duwa-duwa na si Job nagtatao sato nin marahay na halimbawa sa diosnon na pagpapasakop.—Job 42:7.
20. Sa anong mga paagi na si David nagpaheling nin diosnon na pagpapasakop?
20 Sa pagsambit sa saro na sanang halimbawa sa Hebreong Kasuratan, yaon si David. Kan si David paghanapon ni Hadeng Saul na garo hayop, si David nagkaigwa nin duwang oportunidad na tapuson an mga problema nia paagi sa paggadan ki Saul. Alagad ta si David inolang kan saiyang diosnon na pagpapasakop na gibohon iyan. An saiyang mga tataramon nasusurat sa 1 Samuel 24:6: “Imposible para sa sako, sa punto-de-vista ni Jehova, na gibohon ko an bagay na ini sa sakuyang kagurangnan, an linahidan ni Jehova, paagi sa pagbiyaw kan sakuyang kamot tumang sa saiya, ta sia an linahidan ni Jehova.” (Helingon man an 1 Samuel 26:9-11.) Ipinaheling man nia an saiyang diosnon na pagpapasakop paagi sa pag-ako sa pagsagwe kun sia nakagiginibo nin sala o nagkakasala.—2 Samuel 12:13; 24:17; 1 Cronica 15:13.
An Halimbawa ni Pablo sa Pagpapasakop
21-23. Sa anong laen-laen na pangyayari na si apostol Pablo nagpaheling nin diosnon na pagpapasakop?
21 Sa Kristianong Griegong Kasuratan, pambihirang halimbawa nin diosnon na pagpapasakop si apostol Pablo. Inarog nia digdi an saiyang Kagurangnan, si Jesu-Cristo, arog kan ginibo nia sa gabos na iba pang kabtang kan saiyang ministeryo bilang apostol. (1 Corinto 11:1) Minsan sia ginamit ni Jehova Dios sa mas makapangyarihan na paagi kisa siisay man sa ibang apostol, nungka na si Pablo naghiro nin independiente. Sinasabi sato ni Lucas na kan lumataw an isyu kun baga kaipuhan na paturi an nakombertir na mga Hentil, “iinareglo ninda [kan mga tugang sa Antioquia] na si Pablo asin si Bernabe patin an nagkapira sa sainda paduman sa mga apostol asin kamagurangan na lalaki sa Jerusalem manongod sa pasuruhay na ini.”—Gibo 15:2.
22 Kun dapit sa pagmimisyonero ni Pablo, sinasabi sato sa Galacia 2:9: “Kan maaraman ninda an dai na kutana maninigong kabootan na itinao sa sako, si Santiago asin Cefas patin Juan, an mga ibinibilang na harigi, nag-oyon na ako asin si Bernabe mag-iba, na kami maninigong magduman sa mga nasyon, alagad sinda sa mga tinuri.” Imbes na humiro nin independiente, si Pablo naghagad nin giya.
23 Kaagid kaiyan, kaidtong huring pagduman ni Pablo sa Jerusalem, inako nia an hatol kan kamagurangan duman mapadapit sa pagduman sa templo asin pagsunod sa Pagboot tanganing maheling nin gabos na sia bakong apostata kun dapit sa Pagboot ni Moises. Mantang garo baga nagkaigwa nin kapahapahamak na katapusan an paggibo nia kaiyan ta may nagsururog sa saiya, sala daw an pagpasakop nia sa kamagurangan na idto? Bako man, arog kan ipinaheheling kan mababasa niato sa Gibo 23:11: “Kan suminunod na banggi an Kagurangnan tuminindog sa kataed nia asin nagsabi: ‘Magmapuso ka! Huli ta kun paanong ika nagtao nin lubos na patotoo sa mga bagay manongod sa sako sa Jerusalem, ika kaipuhan man na magpatotoo sa Roma.’”
24. Ano pang dugang na mga bagay sa pagpapasakop an pag-oolayan sa minasunod na artikulo?
24 Tunay na an Kasuratan nagtatao sato nin makokosog na dahelan na kita magpasakop asin nin pambihirang mga halimbawa kan mga nagpaheling nin siring na pagpapasakop. Sa minasunod na artikulo, pag-oolayan niato an laen-laen na bagay na dian kita makapagpapasakop ki Jehova Dios, an mga pantabang sa satong pagigin siring, asin an mga balos na ibinubunga.
Ano an Isisimbag Nindo?
◻ Anong klaseng independensia an bakong marahay?
◻ Ano an pinakacausa sa pagsayumang magpasakop?
◻ Sa anong mga dahelan na utang niato ki Jehova an pagpapasakop?
◻ Anong marahay na mga halimbawa nin diosnon na pagpapasakop an itinatao kan Kasuratan?
[Ritrato sa pahina 10]
Si Nimrod, an enot na namomoon pakalihis kan baha na nagrebelde sa diosnon na pagpapasakop
[Ritrato sa pahina 13]
Si Noe, daing kanawayan na halimbawa nin diosnon na pagpapasakop.—Genesis 6:14, 22