An Hinahagad Sato nin Diosnon na Pagpapasakop
“Kaya pumasakop kamo sa Dios.”—SANTIAGO 4:7.
1. Ano an masasabi manongod sa klase nin Dios na satong sinasamba?
KANIGOAN kamakangangalas na Dios si Jehova! Daing kaagid, daing kapantay, daing kapareho, nasosolo sa kadakol na paagi! Sia an Kaharohalangkawe, an Unibersal na Soberano na nagkakapot kan gabos na tunay na autoridad. Sia gikan sa daing katapusan sagkod sa daing katapusan asin mamurawayon na gayo kaya mayo nin tawong makaheheling saiya asin magdanay na buhay. (Exodo 33:20; Roma 16:26) Sia dai marorop an kapangyarihan asin kadonongan, biyong sangkap sa hustisya, asin an personipikasyon nin pagkamoot. Sia an satong Kaglalang, an satong Hokom, an satong Paraboot, asin an satong Hade. Gikan sa saiya an gabos na marahay na balaog asin gabos na sangkap na regalo.—Salmo 100:3; Isaias 33:22; Santiago 1:17.
2. Anong mga bagay an kalabot sa diosnon na pagpapasakop?
2 Huli sa gabos na bagay na ini, daing duwa-duwa na kita obligadong pumasakop sa saiya. Alagad ta ano an kalabot kaini para sa sato? Nagkapirang bagay. Mantang dai niato personal na naheheling si Jehova Dios, an pagpapasakop sa saiya nangangahulogan nin pagkuyog sa tingog nin sarong natokdoan na konsensia, pagkooperar sa daganon na organisasyon nin Dios, pagmidbid sa sekular na mga autoridad, asin paggalang sa prinsipyo nin pagkapayo sa laog kan pamilya.
Pagkaigwa nin Marahay na Konsensia
3. Tanganing mapagdanay an marahay na konsensia, kita kaipuhan na kumuyog sa anong klaseng mga pangangalad?
3 Tanganing mapagdanay an marahay na konsensia, kaipuhan na kita kumuyog sa mga dai puwedeng ipaotob—an boot sabihon, mga ley asin prinsipyo na dai kayang ipaotob nin mga tawo. Halimbawa, an ikasampulong pagboot sa Sampulong Togon, na nagboboot tumang sa pagkaara, dai puwedeng ipaotob nin mga autoridad nin tawo. Kulibat palan, ini nagpapatotoo sa banal na ginikanan kan Sampulong Togon, ta mayo nin grupo nin mga paraboot na tawo na magibo nin ley na dai kayang ipaotob paagi sa mga penalidad kun lalapason. Paagi sa pagboot na ini, itinao ni Jehova Dios sa kada Israelita an paninimbagan na magbantay sa sadiri—kun boot niang magkaigwa nin marahay na konsensia. (Exodo 20:17) Kaagid kaiyan, kabilang sa mga gibo kan laman na makaoolang sa saro sa pagmana kan Kahadean nin Dios an “pag-imon” asin “mga pagkauri”—mga reaksion na dai kayang tawan nin penalidad nin mga hokom na tawo. (Galacia 5:19-21) Alagad tanganing mapagdanay an marahay na konsensia, kaipuhan na likayan niato an mga ini.
4. Tanganing mapagdanay an marahay na konsensia, kita kaipuhan na mamuhay sono sa anong mga prinsipyo sa Biblia?
4 Iyo, kaipuhan na kita mamuhay sono sa mga prinsipyo kan Biblia. An mga prinsipyong iyan masusuma sa duwang togon na isinabi ni Jesu-Cristo bilang simbag sa hapot kun baga arin an kadarudakulaing togon sa pagboot ni Moises. “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip. . . . Kamotan mo an saimong kataed nin siring sa saimo man sana.” (Mateo 22:36-40) Ipinag-iilustrar kan mga tataramon ni Jesus na nasusurat sa Mateo 7:12 an kalabot sa ikaduwa sa mga togon na ini: “Kaya an gabos na boot nindong gibohon sa saindo nin mga tawo, gibohon man nindo sa sainda; sa katotoohan, iyo ini an boot sabihon kan Pagboot asin kan Mga Propeta.”
5. Paano niato mapagdadanay an marahay na relasyon ki Jehova Dios?
5 Kaipuhan na gibohon niato an aram niatong tama asin dai paggibohon an aram niatong sala, baga man iyan naririsa nin iba o dai. Ini totoo dawa kun garo baga nakalilibre kita magsalang sa dai paggibo kan maninigo niatong gibohon o sa paggibo kan dai niato maninigong gibohon. Iyan nangangahulogan nin pagpapadanay sa marahay na relasyon sa satong langitnon na Ama, na ginigirumdom an patanid na ipinahayag ni apostol Pablo sa Hebreo 4:13: “Mayo nin linalang na bakong hayag sa saiyang pagheling, kundi an gabos na bagay huba asin bukas sa mga mata kaidtong satong paninimbagan.” An pagpapadagos sa paggibo kan tama makatatabang sato na malabanan an tusong mga pakana kan Diablo, tumangon an mga impluwensia kan kinaban, asin kontrahon an minanang tendensia sa kapasloan.—Ikomparar an Efeso 6:11.
Pagpapasakop sa Organisasyon nin Dios
6. Anong mga pinakapaagihan sa pagkomunikar an ginamit ni Jehova kaidtong mga panahon bago-Kristiano?
6 Dai kita tinawan ni Jehova Dios kan diretso na magdesisyon bilang indibiduwal kun paano niato iaaplikar an mga prinsipyo kan Biblia sa satong buhay. Poon sa kapinonan kan kasaysayan nin tawo, ginamit nin Dios an mga tawo bilang pinakapaagihan sa pagkomunikar. Kaya, si Adan an representante nin Dios ki Eva. Itinao ki Adan an pagboot manongod sa ipinangangalad na bunga bago lalangon si Eva, kaya seguradong sinabihan ni Adan si Eva kan kabotan nin Dios para sa saiya. (Genesis 2:16-23) Si Noe iyo an propeta nin Dios sa saiyang pamilya asin sa kinaban bago kan baha. (Genesis 6:13; 2 Pedro 2:5) Si Abraham an representante nin Dios sa saiyang pamilya. (Genesis 18:19) An propeta asin pinakapaagihan nin Dios sa pagkomunikar sa nasyon nin Israel iyo si Moises. (Exodo 3:15, 16; 19:3, 7) Pakalihis nia, sagkod ki Juan na Bautisador, dakol na propeta, saserdote, asin hade an ginamit nin Dios na magkomunikar kan saiyang kabotan sa saiyang banwaan.
7, 8. (a) Kan dumatong an Mesiyas, sairisay an ginamit bilang mga representante nin Dios? (b) Ano an hinahagad nin diosnon na pagpapasakop sa mga Saksi ni Jehova ngonyan?
7 Kan dumatong an Mesiyas, si Jesu-Cristo, ginamit sia nin Dios asin an saiyang kadayupot na mga apostol saka disipulo na maglingkod bilang Saiyang mga representante. Sa huri, an linahidan na maimbod na mga parasunod ni Jesu-Cristo maglilingkod na “maimbod asin madonong na oripon” sa pagkomunikar sa banwaan ni Jehova kun paano iaaplikar an mga prinsipyo kan Biblia sa saindang buhay. An diosnon na pagpapasakop nangahulogan nin pagmidbid sa instrumentong ginagamit ni Jehova Dios.—Mateo 24:45-47; Efeso 4:11-14.
8 Ipinaheheling nin mga katunayan na ngonyan “an maimbod asin madonong na oripon” asosyado sa mga Saksi ni Jehova asin irinirepresentar kan Namamahalang Grupo kan mga Saksing ini. An grupo man na iyan nagnonombra nin mga paraataman na may laen-laen na katongdan—arog baga nin mga magurang asin nagbibiyaheng mga representante—tanganing iyo an magdirehir sa lokal na gibohon. An diosnon na pagpapasakop nag-oobligar sa kada nagdusay na Saksi na pumasakop sa mga paraataman na ini kaoyon sa Hebreo 13:17: “Magin kamong makinuyog duman sa mga nangengenot dian sa tahaw nindo asin magin mapagpasakop, huli ta sinda nagbabantay sa saindong kalag bilang an mga maninimbag; tanganing ini magibo nindang may kaogmahan asin bakong sa kamondoan, huli ta ini makararaot sa saindo.”
Pag-ako sa Disiplina
9. An diosnon na pagpapasakop sa parate nangangahulogan nin ano?
9 An diosnon na pagpapasakop sa parate nangangahulogan nin pag-ako nin disiplina gikan sa mga naglilingkod bilang paraataman. Kun dai niato perming tinatawan kan kinakaipuhan na disiplina an satong sadiri, tibaad kita kaipuhan na hatolan asin disiplinahon kan mga may kabatidan asin autoridad na gumibo kaiyan, arog baga kan mga magurang sa satong kongregasyon. Dalan nin kadonongan an pag-ako sa siring na disiplina.—Talinhaga 12:15; 19:20.
10. Ano an obligasyon kan mga nagtatao nin disiplina?
10 Siyempre, an kamagurangan na nagdidisiplina dapat na magin mismo mga halimbawa nin diosnon na pagpapasakop. Paano? Sono sa Galacia 6:1, bako sana na sinda maninigo na may marahay na paagi sa paghatol kundi maninigo man na magin arogan. “Mga tugang, minsan kun an sarong tawo may nagibong kasalan bago nia iyan maaraman, kamo na igwang espirituwal na mga kuwalipikasyon pagmaigotan nindo na ibangon an tawong iyan sa espiritu nin kahoyoan, mantang binabantayan man nindo an saindong sadiri, ta tibaad kamo masugotan man.” Sa ibang pagtaram, an hatol kan magurang dapat na oyon sa saiyang halimbawa. Iyan oyon sa hatol na itinao sa 2 Timoteo 2:24, 25 asin sa Tito 1:9. Iyo, an mga nagtatao nin pagsagwe o pagtatanos kaipuhan na magmaan nanggad na nungkang magin maisog. Sinda maninigong magin perming mahoyo, maboot, pero marigon sa pagsuportar sa mga prinsipyo na yaon sa Tataramon nin Dios. Sinda maninigong magin mga parahinanyog na daing kinakampihan, na nakagiginhawa sa mga napapagal asin nagagabatan.—Ikomparar an Mateo 11:28-30.
Pagpapasakop sa Haralangkaw na Kapangyarihan
11. Ano an hinahagad sa mga Kristiano sa saindang relasyon sa haralangkaw na kapangyarihan?
11 An diosnon na pagpapasakop nag-oobligar man sato na kuyogon an haralangkaw na kapangyarihan. Hinahatolan kita sa Roma 13:1: “An lambang kalag magpasakop sa haralangkaw na kapangyarihan, huli ta mayo nin kapangyarihan na dai itinogot nin Dios; an nagdadanay na mga kapangyarihan nagtitirindog sa saindang relatibong mga kamugtakan na itinogot nin Dios.” Kabilang nin iba pang bagay, inoobligar kita kan mga tataramon na ini na kumuyog sa mga ley sa trapiko asin magin maimbod kun dapit sa pagbubuhis asin pagbabayad, arog kan sinasabi ni apostol Pablo sa Roma 13:7.
12. Sa anong sentido na limitado an satong pagpapasakop ki Cesar?
12 Alagad malinaw na limitado an gabos na pagpasakop na iyan ki Cesar. Kaipuhan na permi niatong girumdomon an prinsipyong isinabi ni Jesu-Cristo, na nasusurat sa Mateo 22:21: “Kaya itao ki Cesar an mga bagay na ki Cesar, alagad sa Dios an mga bagay na sa Dios.” An nota sa ibaba para sa Roma 13:1 sa Oxford NIV [New International Version] Scofield Study Bible nagkokomento: “Ini dai nangangahulogan na dapat niang kuyogon an mga regulasyon na inmoral o anti-Kristiano. Sa siring na mga kaso obligasyon niang kumuyog sa Dios imbes na sa mga tawo (Gibo 5:29; ikomparar an Daniel 3:16-18; sumunod an 6:10).”
Diosnon na Pagpapasakop sa Laog kan Pamilya
13. Ano an hinahagad nin diosnon na pagpapasakop sa laog kan pamilya sa mga miembro kaiyan?
13 Sa laog kan pamilya, an agom na lalaki asin ama naglilingkod bilang payo. Ini nag-oobligar na kuyogon nin mga agom na babae an hatol na itinao sa Efeso 5:22, 23: “Magpasakop an mga agom na babae sa saindang agom nin siring sa Kagurangnan, huli ta an lalaki iyo an payo kan saiyang agom kun paanong si Cristo iyo man an payo kan kongregasyon.”a Kun dapit sa mga aki, bako sinda an naggigibo kan sadiri nindang mga reglamento kundi utang ninda an diosnon na pagpapasakop kapwa sa saindang ama asin ina, siring sa ipinaliliwanag ni Pablo sa Efeso 6:1-3: “Mga aki, magin makinuyog sa saindong mga magurang na nasa Kagurangnan, huli ta ini matanos: ‘Tawan mo nin onra an saimong ama asin an saimong ina’; na iyo an enot na pagboot na may panuga: ‘Tanganing iyan magdolot nin karahayan sa saimo asin ika magdanay nin haloy sa daga.’”
14. Ano an hinahagad nin diosnon na pagpapasakop sa mga payo nin pamilya?
14 Siyempre, nagigin mas pasil para sa mga agom na babae asin aki na itao an siring na diosnon na pagpapasakop kun an mga agom na lalaki asin ama mismo nagpapaheling nin diosnon na pagpapasakop. Ini ginigibo ninda paagi sa paggamit kan saindang pagkapayo kaoyon sa mga prinsipyo kan Biblia, arog kan yaon sa Efeso 5:28, 29 asin 6:4: “Sa paaging ini an mga agom na lalaki kaipuhan na mamoot sa saindang agom siring sa saindang sadiring hawak. An namomoot sa saiyang agom namomoot sa saiya man sana, huli ta noarin man mayong tawo na naongis sa saiyang sadiring laman; kundi pinakakakan nia asin inaataman iyan, arog kan ginigibo man ni Cristo sa kongregasyon.” “Mga ama, dai nindo pagpaanggoton an saindong mga aki, kundi padagos na padakulaon sinda sa disiplina asin pagtatanos nin isip ni Jehova.”
Mga Pantabang sa Pagpaheling nin Diosnon na Pagpapasakop
15. Anong bunga kan espiritu an makatatabang sato na magpaheling nin diosnon na pagpapasakop?
15 Ano an makatatabang sato na ikapaheling an diosnon na pagpapasakop sa laen-laen na bagay na ini? Enot, yaon an pagkamoot na daing kapasloan—pagkamoot ki Jehova Dios asin sa mga tinawan kan pangangataman sa sato. Sinasabi sato sa 1 Juan 5:3: “Ini iyo an boot sabihon kan pagkamoot sa Dios, na kuyogon niato an saiyang mga kapagbootan; asin an saiyang mga kapagbootan bakong magabat.” Iyan man an puntong liniwanag ni Jesu-Cristo sa Juan 14:15: “Kun kamo namomoot sako, ootobon nindo an sakong mga togon.” Tunay nanggad, an pagkamoot—an pangenot na bunga kan espiritu—makatatabang sato na apresyaron an gabos na ginibo sato ni Jehova asin kun siring makatatabang sato na gumibo nin diosnon na pagpapasakop.—Galacia 5:22.
16. Ano an ikinatatabang nin diosnon na takot sa pagpaheling nin diosnon na pagpapasakop?
16 Ikaduwa, yaon an diosnon na takot. An pagkatakot na mapaanggot si Jehova Dios makatatabang sato ta iyan “nangangahulogan nin pagkaongis sa maraot.” (Talinhaga 8:13) Daing duda, an takot na maanggot si Jehova makapopogol sato na makikompromiso huli sa takot sa tawo. Iyan makatatabang man sato na kuyogon an mga instruksion nin Dios dawa kun anong mga kasakitan an kaipuhan na pangganahan. Dugang pa, iyan maolang sato na padara sa mga sugot o hilig sa paggibo nin sala. Ipinaheheling kan Kasuratan na an takot ki Jehova iyo an nagmotibar ki Abraham na probaran na idolot an saiyang namomotan na aking si Isaac bilang atang, asin takot na mapaanggot si Jehova an nagpangyari ki Jose na mapaglabanan an inmoral na mga alok kan agom ni Potifar.—Genesis 22:12; 39:9.
17. Ano an kabtang nin pagtubod sa satong diosnon na pagpapasakop?
17 An ikatolong pantabang iyo an pagtubod ki Jehova Dios. An pagtubod makatatabang sato na makuyog an hatol na itinao sa Talinhaga 3:5, 6: “Manarig ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia an saimong mga dana.” An pagtubod nangorognang makatatabang sato kun garo baga kita nagsasakit nin bakong makatanosan o an saboot niato kita inaapi huli sa satong rasa o sa satong nasyonalidad o pagkakatumang nin personalidad. An iba tibaad magsaboot man na sinda nalipasan kan sinda dai irekomendar na maglingkod bilang magurang o ministeryal na lingkod. Kun kita may pagtubod, hahalaton niato si Jehova na itanos an mga bagay sa saiyang itinalaan na panahon. Mientras tanto tibaad kaipuhan niatong pataluboon an mapasensiang pakatagal.—Lamentacion 3:26.
18. Ano an ikaapat na pantabang sa satong pagpaheling nin diosnon na pagpapasakop?
18 An ikaapat na pantabang iyo an kapakumbabaan. An tawong mapakumbaba dai nadidepisilan na magpaheling nin diosnon na pagpapasakop ta ‘sa kapakumbabaan nin pag-isip, ibinibilang nia an iba na mas halangkaw kisa saiya.’ An tawong mapakumbaba andam na gumawe bilang “mas hababa.” (Filipos 2:2-4; Lucas 9:48) Alagad an tawong mapalangkaw ikinaaanggot an pagpasakop asin ikinasusurang iyan. May nagsabi na an siring na tawo mas gusto pang ipahamak nin pag-omaw kisa iligtas nin pagtatsar.
19. Anong marahay na halimbawa sa kapakumbabaan an itinao nin sarong dating presidente kan Watch Tower Society?
19 An sarong marahay na halimbawa nin kapakumbabaan asin diosnon na pagpapasakop itinao ni Joseph Rutherford, an ikaduwang presidente kan Watch Tower Bible and Tract Society. Kan ipangalad ni Hitler an gibohon kan mga Saksi ni Jehova sa Alemania, an mga tugang duman nagsurat saiya na naghahapot kun ano an maninigo nindang gibohon huli sa pangangalad sa saindang mga pagtiripon asin paghuhulit. Nasambitan nia an bagay na ini sa pamilyang Bethel asin prangkang inadmitir na dai nia aram kun ano an sasabihon nia sa mga tugang na Aleman, nangorogna huli sa kalabot na grabeng mga penalidad. Sinabi nia na kun may nakaaaram kun ano an dapat na sabihon sainda, maoogma siang madangog iyan. Kanigoan kamapakumbabang espiritu!b
Mga Pakinabang sa Pagpaheling nin Diosnon na Pagpapasakop
20. Anong mga bendisyon an ibinubunga kan pagpaheling nin diosnon na pagpapasakop?
20 Marahay na ihapot niato, Ano an mga pakinabang sa pagpaheling nin diosnon na pagpapasakop? Kadakol nanggad. Nalilikayan niato an mga kahaditan asin pagkabigo na minaabot sa mga minagawe nin independiente. Nagkakamit kita nin marahay na relasyon ki Jehova Dios. Nasa sato an pinakamarahay na pakiibaiba sa satong Kristianong mga tugang. Dugang pa, paagi sa paggawe niato nin legal, nalilikayan niato an dai kinakaipuhan na problema sa sekular na mga autoridad. Nagkakamit man kita nin maogmang buhay-pamilya bilang agom na lalaki asin agom na babae, bilang mga magurang asin aki. Dugang pa, paagi sa pagdadanay sa diosnon na pagpapasakop, kita minagawe oyon sa hatol sa Talinhaga 27:11: “Magpakadonong ka, aki ko, asin paogmaha an sakong puso, tanganing makasimbag ako sa mga nagduduhagi sako.”
[Mga Nota sa Ibaba]
a Inomaw nin sarong ministrong payunir an paggalang asin mamomoton na pagsuportar kan agom nia sa sarong solterong payunir. An solterong payunir nag-isip-isip na maninigo kutanang kinomentohan man kan katood nia an iba pang kuwalidad kan agom nia. Alagad ta pakalihis nin mga taon, kan mangagom naman an solterong payunir, narealisar nia kun gurano kahalaga kan mamomoton na pagsuportar kan agom na babae sa kaogmahan nin mag-agom.
b Pakalihis nin dakol na pamibi asin pag-adal sa Tataramon nin Dios, malinaw na naheling ni Joseph Rutherford an maninigong isimbag nia sa mga tugang sa Alemania. Bako sia an dapat na magsabi sainda kun ano an maninigo nindang gibohon o dai gibohon. Yaon sa sainda an Tataramon nin Dios na malinaw na nagsasabi sainda kan maninigo nindang gibohon kun dapit sa pagtiripontipon asin paghuhulit. Kaya an mga tugang na Aleman nagtrabaho sa hilom pero ipinadagos na kuyogon an pagboot ni Jehova na magtiripon asin magpatotoo sa saiyang ngaran asin Kahadean.
Mga Hapot sa Repaso
◻ Siisay na mga tawo an ginamit nin Dios bilang pinakapaagihan sa pagkomunikar, asin ano an utang sa sainda kan saiyang mga lingkod?
◻ Sa anong laen-laen na relasyon aplikado an diosnon na pagpapasakop?
◻ Anong mga kuwalidad an makatatabang sato na ikapaheling an diosnon na pagpapasakop?
◻ An diosnon na pagpapasakop nagbubunga nin anong mga bendisyon?
[Ritrato sa pahina 16]
Ginamit nin Dios an organisasyon kan templo sa Jerusalem tanganing ikomunikar an saiyang kabotan sa saiyang banwaan
[Mga ritrato sa pahina 18]
Mga bagay na dian kita makapaheheling nin diosnon na pagpapasakop