HAPOT 3
Paano Ako Makikipag-ulay sa mga Magurang Ko?
ANO AN GIGIBUHON MO?
Imahinara an eksenang ini: Miyerkules nin hapon. Natapos na kan 17 anyos na si Geoff an mga gibuhon niya sa harong, kaya makakarelaks man giraray siya! Binuksan niya an TV saka tuminukaw nin puwerte sa paborito niyang sofa.
Eksakto man na nasa may pinto na si Papa niya, mainit an payo.
“Geoffrey! Ta’no baya ta nagpapara-TV ka na sana? Dapat baga pigtatabangan mo si Nonoy mo sa assignment niya! Dai ka talaga nagsusunod sa pigsasabi saimo!”
“Mapuon na naman kami,” an ngurob-ngurob ni Geoff, pero nadangog iyan ni Papa niya.
Medyo duminuko si Papa niya parani saiya asin nagsabi: “Anong sabi mo?”
“Mayo man po, Papa,” an sabi ni Geoff sabay hangos nin hararom na nasusuya asin nag-liliod an mata.
Angguton na ngunyan si Papa niya. “Pakarhaya an pagtaram mo!” an makusog na sabi kaini.
Kun ika si Geoff, ano kutana an ginibo mo para malikayan na mangyari an sitwasyon na ini?
MAG-ISIP KA NGUNA!
An pakikipag-ulay mo sa saimong mga magurang garo man sana pagmaneho nin awto. Kun may ulang sa dalan, puwede kang maghanap nin ibang agihan.
HALIMBAWA:
“Nasasakitan akong kaulayon si Papa,” an sabi kan daragitang si Leah. “Kun minsan, dakulon na ako ka’yan sinabi, tapos sasabihon niya, ‘Ha? Ano ‘to Ne . . . may sinasabi ka?’”
MAY TULONG OPSIYON SI LEAH.
Kurahawan si Papa niya.
Kuminurahaw si Leah, “Pa . . . importante ini! Magdangog ka man daw!”
Dai na kakaulayon si Papa niya.
Dai na lang sasabihon ni Leah ki Papa niya an problema niya.
Mahalat siya nin tamang tiyempo para sabihon an problema niya.
Personal niyang kakaulayon si Papa niya, o kaya, masurat siya ki Papa niya manungod sa saiyang problema.
Arin sa mga ini an sasabihon mo ki Leah na gibuhon niya?
PAG-ISIPAN INI: May ibang iniisip an ama ni Leah—kaya dai kaini aram an pig-aagihan niya. Kaya kun pipilion ni Leah an Opsiyon A, tibaad dai man sana kaini maintindihan kun taano ta nagkukurahaw siya. ‘Baad mas lalo pa lugod na dai magdangog si Papa niya, saka kawaran ini nin paggalang asin dai pagtaong onra sa magurang. (Efeso 6:2) Kaya, dai talaga ini makakatabang.
Makakahanap ka nin ibang agihan pag may ulang sa dalan, kaya makakahanap ka man nin paagi para makasundo an mga magurang mo
Maski ngani an Opsiyon B an garo baga pinakamadaling gibuhon, bako ini an pinakamadunong. Taano? Huling para masolusyunan an problema ni Leah, kaipuhan niyang makipag-ulay ki Papa niya—asin dapat aram kaini an mga pig-aagihan niya, para matabangan siya kaini. Pareho iyan dai magigibo pag nagsilensiyo sana si Leah.
Pero, sa Opsiyon C, naghanap pa man giraray si Leah nin paagi para masabi ki Papa niya an saiyang problema. Saka kun pipilion man niyang magsurat ki Papa niya, puwedeng gumian tulos an pagmati niya.
Makakatabang man an paggibo niya nin surat para masabi an talagang nasa buot niya. Pag nabasa ni Papa niya an surat, maaaraman kaini an gusto niyang sabihon, kaya mas masasabutan kaini an sitwasyon niya. An Opsiyon C an talagang makakatabang ki Leah saka ki Papa niya. Kaulayon man ni Leah nin personal si Papa niya o gibuhan nin surat, pareho iyan pagsunod sa hatol kan Bibliya na “pagmaigutan tang gibuhon an mga bagay na nagdadara nin katuninungan.”—Roma 14:19.
May iba pa daw na opsiyon si Leah?
Mag-isip nin iba pang opsiyon asin an posibleng magin resulta kaiyan.
IWASAN NA MASALA AN PAKAINTINDI SAIMO
Tandaan na pag may sinabi kang sarong bagay, tibaad iba man an pakaintindi kan mga magurang mo.
HALIMBAWA:
Hinapot ka kan mga magurang mo kun taano ta garo baga mainit an payo mo. An sabi mo, “Habo ko pong pag-ulayan ‘yan.”
Pero an pakaintindi kan mga magurang mo: “Ano ta sasabihon ko saindo? Mayo akong tiwala saindo. Sa mga barkada ko na sana ako masabi.”
Imahinara na may magabat kang problema asin gusto kang tabangan kan mga magurang mo. Pero sinabi mo: “Dai po kamo maghadit. Kaya ko ini.”
Ano an tibaad magin pakaintindi kan mga magurang mo?
Ano an mas maray kutanang isinimbag mo?