Tinokdoan Kami kan Samong mga Magurang na Kamotan an Dios

ISINAYSAY NI ELIZABETH TRACY

An armadong mga lalaki, na amay kan aldaw na idto nangenot sa sarong pagsururog tumang sa samo, pinuersa si Nanay asin Tatay na lumuwas sa kotse. Kami kan tugang kong babae, na nawalat sa likod na tukawan, nag-iisip kun maheheling mi pa giraray an samong mga magurang. Ano an pinonan kan makatatakot na eksperyensiang ini harani sa Selma, Alabama, E.U.A., kan 1941? Asin ano an koneksion dian kan mga tokdo na inako mi sa samong mga magurang?

AN Tatay ko, si Dewey Fountain, pinadakula nin sarong paryente sa sarong kaomahan sa Texas pagkagadan kan saiyang mga magurang kan sia omboy pa. Kan huri nagtrabaho sia sa minahan nin krudo. Kan 1922, kan sia 23 anyos, naagom nia si Winnie, sarong magayon na daragang taga Texas, asin nagpoon na magplanong establisaron an buhay asin magpamilya.

Nagtogdok sia nin harong sa makahoy na lugar sa sirangan na Texas harani sa sadit na banwaan nin Garrison. Duman nagtanom sia nin laen-laen na pananom, kabale an gapas asin mais. Nag-ataman man sia nin gabos na klaseng hayop na pan-oma. Pag-abot nin panahon, namundag kaming mga aki—si Dewey junior kan Mayo 1924, si Edwena kan Disyembre 1925, asin ako kan Hunyo 1929.

Pakanood kan Katotoohan sa Biblia

Paghona ni Nanay asin Tatay nasasabotan ninda an Biblia, ta miembro sinda kan Church of Christ. Alagad kan 1932, iwinalat ni G. W. Cook an mga librong Deliverance asin Government, na ipinublikar kan Watch Tower Society, sa tugang ni Tatay na si Monroe Fountain. Sa pagkagalaga na ihiras sa mga magurang ko an saiyang nanonodan, si Monroe parateng nagduduman sa oras nin pamahaw, nagbabasa nin artikulo sa An Torrengbantayan, dangan “dai tinutuyong” nawawalat an mga magasin. Pagkatapos, binabasa iyan ni Nanay asin Tatay.

Sarong Domingong aga inagda ni Tiyo Monroe si Tatay sa harong nin sarong kataed para sa sarong pag-adal sa Biblia. Sinierto nia sa saiya na masisimbag ni Mr. Cook an gabos niang hapot hale sa Biblia. Pagpuli ni Tatay hale sa pag-adal, ogmahon na sinabi nia sa pamilya: “Nasimbag an gabos kong hapot dangan may nakua pa akong mga impormasyon! Paghona ko aram ko na gabos, alagad kan ponan ni Mr. Cook na ipaliwanag an manongod sa impierno, kalag, katuyohan nin Dios may labot sa daga, asin kun paano iyan pangyayarihon kan Kahadean nin Dios, nagpoon akong makamate na an totoo mayo akong aram manongod sa Biblia!”

An samong harong garo sentro nin pagtiripontipon. An mga paryente asin katood nagduduruman asin nagsosongko, naggigibo nin dulse asin guti, patin nagkakaranta mantang nagpipiano si Nanay. An mga okasyon na ini luway-luway na nagin pag-orolay dapit sa mga tema sa Biblia. Maski ngani kaming mga aki dai nakasasabot kan gabos na pinag-oolayan, an makosog na pagkamoot kan mga magurang mi sa Dios asin sa Biblia risang-risang marhay kaya balang saro sa samo na mga aki nakapatalubo nin kaparehong pagkamoot sa Dios asin sa saiyang Tataramon.

Ipinagamit man kan ibang mga pamilya an saindang harong para sa semanal na orolay sa Biblia, na parateng nakasentro sa sarong tema sa pinakabagong magasin na An Torrengbantayan. Kan an mga pamilya sa kataraed na banwaan nin Appleby asin Nacogdoches mag-imbitar na duman sa sainda magtiripon, nagsurusuan kami sa samong Model A Ford asin nagbiahe paduman, maoran man o mainit.

Paghiro Sono sa Saindang Nanodan

Madaling naheling kan mga magurang mi an pangangaipo na humiro. Hinagad kan pagkamoot sa Dios na an nanonodan ihiras sa iba. (Gibo 20:35) Alagad sarong angat an lakdang na ini na pagpahayag sa publiko kan pagtubod nin saro, nangorogna ta an mga magurang mi natural na masosopgon, hababa an boot na mga tawo. Pero, minotibar sinda kan pagkamoot sa Dios, asin ini man nakatabang sa sainda na tokdoan kami na magkaigwa nin hararom na pagtitiwala ki Jehova. Siring kaini an pagkasabi kaiyan ni Tatay: “Si Jehova naggigibo nin mga parahulit gikan sa mga paraguno nin gisantes!” Kan 1933, sinimbolisaran ni Nanay asin Tatay an saindang pagdusay ki Jehova paagi sa bautismo sa tubig sa sarong pasiraan harani sa Henderson, Texas.

Sa kapinonan nin 1935, sinuratan ni Tatay an Watch Tower Society asin may nagkapirang ihinapot mapadapit sa Kristianong paglaom na buhay na daing katapusan. (Juan 14:2; 2 Timoteo 2:11, 12; Kapahayagan 14:1, 3; 20:6) Nakaresibi sia nin simbag hale mismo ki Joseph F. Rutherford, an presidente kaidto kan Sosyedad. Imbes na simbagon an saiyang mga hapot, inimbitaran ni Tugang na Rutherford si Tatay na umatender sa kombension kan Mga Saksi ni Jehova sa Washington, D.C., kan Mayo.

‘Imposible!’ an inisip ni Tatay. ‘Kita mga paraoma na may 26 ektaryang daga na natatanoman nin mga gugulayon. Iyan gabos kaipuhan na anihon asin darahon sa sadan sa panahon na iyan.’ Minsan siring, dai nahaloy pakatapos kaiyan, may nag-abot na baha asin inanod an mga sarahotan nia—an mga pananom, kudal, asin tulay. Kaya uminiba kami sa ibang mga Saksi sa sarong arkiladong auto para sa mga eskuela na naghatod samo nin 1,600 kilometros paamihanan-sirangan pasiring sa kombension.

Sa kombension napukaw an boot ni Tatay asin Nanay sa paghinanyog sa malinaw na paliwanag kun siisay an “dakulang kaburunyogan” na maliligtas sa “dakulang kahorasaan.” (Kapahayagan 7:9, 14, King James Version) Sa bilog nindang buhay, minotibar si Nanay asin Tatay kan paglaom na buhay na daing sagkod sa paraisong daga, asin pinarigon ninda an boot niamong mga aki na ‘mangapot nin marigon sa tunay na buhay,’ na para sa samo nangahulogan kan buhay na daing katapusan sa daga na itinatao ni Jehova. (1 Timoteo 6:19; Salmo 37:29; Kapahayagan 21:3, 4) Minsan ngani singko anyos pa sana ako, talagang naggayagaya ako na makaibanan an sakong pamilya sa maogmang okasyon na ini.

Pakapuli hale sa kombension, itinanom giraray kan pamilya an mga pananom, asin kan huri idto an pinakaabundang ani mi kasuarin pa man. Ini siertong nakakombensir ki Nanay asin Tatay na an bilog na pagtitiwala ki Jehova nungkang dai babalosan. Naglaog sinda sa sarong espesyal na porma nin paghuhulit na dian balang saro sa sainda uminoyon na gumamit nin 52 na oras kada bulan sa ministeryo. Dangan, kan dumatong an sunod na panahon nin pagtanom, ipinabakal ninda an gabos! Si Tatay nagpagibo nin 6 por 2.4 metros na harong na de rueda tanganing pag-istaran niamong lima, asin nagbakal sia nin bagong duwa an pinto na Ford sedan na maguyod kaiyan. Iyan man an ginibo ni Tiyo Monroe, asin buminalyo man sia sa harong na de rueda kaiba an saiyang pamilya.

Pagtokdo sa Samo kan Katotoohan

Si Tatay asin Nanay nagpoon na magpayunir, an apod sa bilog na panahon na ministeryo, kan Oktubre 1936. Bilang pamilya, pinonan ming maghulit sa mga distrito sa sirangan na Texas na bihirang mapaabotan kan mensahe kan Kahadean. Sa laog nin haros sangtaon, pabarobalyo kami nin lugar, alagad sa kabilogan, talagang nagustohan mi an buhay na ini. Si Nanay asin Tatay tinokdoan kami paagi sa saindang tataramon asin halimbawa na magin arog kan enot na mga Kristiano na itinao an saindang panahon asin kosog tanganing ipaabot sa iba an katotoohan sa Biblia.

Kaming mga aki espesyalmenteng naghanga sa samong ina huli sa mga pagsasakripisyo nia paagi sa pagbaya sa saiyang harong. Pero may sarong bagay na habo niang butasan, asin iyan an saiyang makinang pantahi. Marahay man idto. Paagi sa saiyang abilidad bilang modista, napagdanay nia na pirmeng magayon an sulog mi. Kada kombension, igwa kami nin isusulog na magayon na bagong mga bado.

Nagigirumdoman ko pang marhay kan si Herman G. Henschel nagduman sa lugar mi kaiba an saiyang pamilya na may darang trak na igwang laudespiker kan Watch Tower Society. Ipinaparada ninda an trak sa sarong matawong lugar, magpapatanog nin sarong halipot na diskurso na nakaplaka, dangan personal na sinosongko an mga tawo tanganing tumao nin dugang na impormasyon. Gustong-gustong kaibanan ni Dewey junior an aking lalaki ni Herman na si Milton, na kaidto mga 15 anyos. Ngonyan si Milton iyo an presidente kan Watch Tower Society.

Durante kan kombension kan 1937 sa Columbus, Ohio, si Edwena binautismohan, saka si Nanay asin Tatay inalok kan pribilehio na paglilingkod bilang espesyal payunir. Kan panahon na idto, kalabot sa gibohon na iyan an kisuerra 200 na oras kada bulan sa paghuhulit. Mantang ginigirumdom ko iyan, narerealisar ko kun gurano an marahay na halimbawa ni Nanay nakatabang sa sako sa pagsuportar sa sakong agom sa saiyang Kristianong mga asignasyon.

Kun si Tatay nakapopoon nin pag-adal sa Biblia sa sarong pamilya, iiniiba nia kaming mga aki tanganing tumao nin positibong halimbawa para sa saindang mga aki. Pinapahanap asin pinababasa nia kami nin mga teksto sa Biblia asin pinasisimbag an nagkapirang pundamental na hapot. Bilang resulta, an dakol sa mga aking idto na tinokdoan mi naglilingkod nin fiel ki Jehova sagkod ngonyan. Tunay nanggad, sarong marigon na pundasyon an ikinabugtak man tanganing padagos ming kamotan an Dios.

Mantang nagdadakula si Dewey junior, nadepisilan sia sa piot na mga kuartong idto kaiba an duwang ngohod na tugang na babae. Kaya kan 1940 nagdesisyon siang humale asin lumaog sa ministeryong pagpapayunir kaiba an saro pang Saksi. Pag-abot nin panahon, naagom nia si Audrey Barron. Sa siring, si Audrey tinokdoan man nin dakol na bagay kan samong mga magurang, asin namotan niang marhay si Nanay asin Tatay. Kan mabilanggo si Dewey junior kan 1944 dahelan sa saiyang Kristianong neutralidad, si Audrey uminiba nguna sa samo sa samong piot na harong na de rueda.

Sa dakulang kombension sa St. Louis, Missouri, kan 1941, si Tugang na Rutherford direktang nagpahayag sa mga aki na an edad 5 sagkod 18, na nakatukaw sa sarong espesyal na parte sa enotan. Kami ni Edwena naghinanyog sa saiyang kalmado, malinaw na boses; sia arog sa sarong mamomoton na ama na nagtotokdo sa saiyang sadiring mga aki sa harong. Inenkaminar nia an mga magurang: “Ngonyan tinipon ni Cristo Jesus an saiyang katipan na banwaan sa atubangan nia, asin sa pinakamapuersang paagi sinasabihan nia sinda na tokdoan an saindang mga aki sa dalan nin katanosan.” Idinagdag nia: “Papirmehon nindo sinda sa harong asin tokdoan sinda kan katotoohan!” Nakaoogma, ginibo iyan kan samong mga magurang!

Sa kombension na idto, inako mi an bagong pulyeto na Jehovah’s Servants Defended, na nagrepaso kan mga kaso sa korte na ginana kan Mga Saksi ni Jehova, kabale an mga kaso sa Korte Suprema kan Estados Unidos. Inadalan iyan ni Tatay kaiba kami bilang pamilya. Mayo kaming aram na kami inaandam na para sa nangyari pakalihis nin pirang semana sa Selma, Alabama.

Pagsururog sa Selma

Kan aga kan makatatakot na eksperyensiang idto, si Tatay naghatod nin mga kopya nin sarong surat sa serip, sa alkalde, asin sa hepe de pulisiya sa Selma na nagsasabi kan satong diretso sono sa konstitusyon na isagibo an satong ministeryo sa irarom kan proteksion kan ley. Minsan siring, nagdesisyon sinda na palayason kami sa banwaan.

Kan huring kabtang kan hapon, limang armadong lalaki an nag-abot sa samong harong na de rueda asin binihag si Nanay, an tugang kong babae, asin ako. Rinuskay ninda an gabos na nasa laog, na naghahanap nin ano man na bagay na subersibo. Nasa luwas si Tatay, asin pinagbotan ninda sia na itakod an harong na de rueda sa sasakyan, na pirmeng nakatotok sa saiya an saindang pistola. Sa mismong oras na ini, dai ako natakot. Garo baga makangingising marhay ta an mga lalaking ini naghona na kami peligroso kaya kami kan tugang ko nag-agik-ik. Minsan siring, nagseryoso kami kan helingon kami ni Tatay.

Kan kami mahale na, gusto kan mga lalaki na sumakay kami ni Edwena sa saindang sasakyan. Marigon si Tatay. “Dai nindo magigibo iyan sagkod na ako buhay!” an sabi nia. Pakatapos nin pagdiriskusyon an samong pamilya tinogotan na magbiahe na magkairiba, na an armadong mga lalaki nagsusunod sa samo sa saindang sasakyan. Mga 25 kilometros sa luwas kan banwaan, sinenyasan ninda kami na pumondo sa gilid kan tinampo asin irinayo si Nanay asin Tatay. An mga lalaki sarosaralidang naghingoa na kombensiron sinda: “Talikdan na nindo an relihion na iyan. Bumalik kamo sa oma, asin padakulaon nindo nin tama an saindong mga aki!” Hiningoa ni Tatay na makipagrasonan sa sainda alagad daing nangyari.

Sa katapustapusi, an sarong lalaki nagsabi: “Hale na kamo, asin kun mabalik pa kamo sa Distrito nin Dallas, gagadanon mi kamo gabos!”

Nakaginhawa asin iribanan na giraray, padagos kaming nagbiahe nin nagkapirang oras dangan minapondo sa banggi. Nakua mi an numero kan saindang plaka. Tolos-tolos na irineport iyan gabos ni Tatay sa Watch Tower Society, asin pakalihis nin pirang bulan an mga lalaki namidbid asin inarestar.

Pagduman sa Paadalan nin Pagmimisyonero sa Gilead

Si Edwena nakaresibi nin imbitasyon na umatender sa ika-7 klase kan Paadalan sa Biblia kan Watchtower sa Gilead sa South Lansing, Nueva York, kan 1946. Sinabi ni Albert Schroeder, saro sa mga instruktor, an marahay na mga kualidad ni Edwena sa dating kaibaiba nia sa pagpayunir na si Bill Elrod, na kaidto naglilingkod sa Bethel, an pankinaban na opisina prinsipal kan Mga Saksi ni Jehova sa Brooklyn, Nueva York.a Nagkamidbidan si Edwena asin Bill, asin mga sarong taon pakalihis kan saiyang gradwasyon sa Gilead, sinda kinasal. Sa laog nin dakol na taon sinda nagdanay sa bilog na panahon na ministeryo, kabale an paglilingkod na magkaibanan nin limang taon sa Bethel. Dangan sarong aldaw kan 1959, ipinaisi ni Tugang na Schroeder sa ika-34 klase kan Gilead na an saiyang namomotan na katood tatay na nin kambal, lalaki asin babae.

Mantang ako naglilingkod kaibanan an sakong mga magurang sa Meridian, Mississippi, sa huring kabtang nin 1947, kaming tolo nakaresibi nin imbitasyon na umatender sa ika-11 klase kan Gilead. Nasorpresa kami huli ta sono sa mga kahagadan ako hoben pang marhay, asin si Nanay asin Tatay gurang nang marhay. Alagad naggibo nin eksepsion, asin inako mi an dai na kutana maninigong pribilehio na iyan nin mas halangkaw na gradong pagtotokdo sa Biblia.

Pagmimisyonero Kaiba an Sakong mga Magurang

Nadestino kaming magmisyonero sa Colombia, Amerika del Sur. Minsan siring, kaidto sanang Disyembre 1949, labing sangtaon pakalihis kan samong gradwasyon, na kami nagdatong sa Bogotá sa sarong erokan nin mga misyonero kun saen igwa nin tolo pa na dati nang nag-iistar. Kan primero, haros nagkonklusyon si Tatay na mas pasil na tokdoan an mga tawo nin Ingles kisa sia an mag-adal nin Kastila! Iyo, nagkaigwa nin mga pagbalo, alagad ay abaa kadakula kan mga bendisyon! Mayo pang sanggatos an mga Saksi sa Colombia kan 1949, alagad ngonyan igwa nin labi nanggad sa 100,000!

Pakalihis nin limang taon na paglilingkod sa Bogotá, si Nanay asin Tatay sinugo sa siudad nin Cali. Mientras tanto, kan 1952, kinasal ako ki Robert Tracy, sarong kapwa misyonero sa Colombia.b Nagdanay kami sa Colombia sagkod 1982, na kan panahon na iyan idinestino kami sa Mejico, kun saen kami naglingkod poon kaidto. Pag-abot nin panahon, kan 1968, an mga magurang ko kinaipuhan na bumalik sa Estados Unidos para sa medikal na atension. Pakapagparahay ninda, sinda nagpadagos bilang espesyal payunir harani sa Mobile, Alabama.

Pag-asikaso sa Samong mga Magurang

Mantang nag-aagi an mga taon, si Nanay asin Tatay nagpoon na lumuya asin nangaipo nin orog pang suporta asin atension. Sa pakiolay ninda, sinda idinestino na maglingkod harani ki Edwena asin Bill sa Athens, Alabama. Kan huri naisip kan samong tugang, si Dewey junior, na madonong na an pamilya niamo mag-erok na magkakarani sa South Carolina. Kaya ibinalyo ni Bill an saiyang pamilya sa Greenwood, kaiba si Nanay asin Tatay. An mamomoton na pagliliwat na ini nagpagin posible para sa samo ni Robert na ikapadagos an samong pagmimisyonero sa Colombia, sa pakaaram na an mga magurang mi naaasikasong marhay.

Dangan, kan 1985, inatake si Tatay kaya dai na sia makataram asin makabangon. Nagtiripon kami tanganing magkomperensia bilang pamilya tanganing pag-olayan kun paano pinakamarahay na maaasikaso an samong mga magurang. Napagdesisyonan na si Audrey an pangenot na mag-aasikaso ki Tatay asin na kami ni Robert pinakamarahay na makatatabang paagi sa pagpadara nin surat serosemana na may nakaparirigon sa boot na mga eksperyensia asin paagi sa pagbisita nin parate sagkod sa mapupuede.

Malinaw pa sa isip ko an ultimong pagbisita ko ki Tatay. Talagang dai sia makataram nin sayod, alagad pakasabi mi sa saiya na kami mabalik sa Mejico, minsan paano nakataram sia, na may dakulang paghihingoa asin emosyon, nin sarong tataramon, “Adios!” Paagi kaini aram mi na, sa saiyang puso, sinusuportaran nia an samong desisyon na magpadagos sa samong asignasyon na pagmimisyonero. Sia nagadan kan Hulyo 1987, asin si Nanay nagadan pakaagi nin siyam na bulan.

An sarong surat na naresibi ko hale sa sakong tugang na babaeng balo marahay an pagkasumaryo kan apresasyon kan balang saro sa samo para sa samong mga magurang. “Mahal ko an mayaman na Kristianong pamana sa sako asin nungka ni sarong beses na iisipon ko na kutana nagin mas maogma ako kun pinili kan samong mga magurang na padakulaon kami sa laen na paagi. An saindang halimbawa nin makosog na pagtubod, pagsakripisyo sa sadiri, asin lubos na pagtitiwala ki Jehova nakatabang sa sako na matagalan an mamondong mga panahon sa sakong buhay.” Si Edwena nagkonklusyon: “Pinasasalamatan ko si Jehova sa pagkaigwa nin mga magurang na paagi sa mga tataramon asin halimbawa ipinaheling sa samo an kaogmahan na puedeng mapasamuya kun isesentro mi an samong buhay sa paglilingkod sa satong mamomoton na Dios, si Jehova.”

[Mga Nota sa Ibaba]

[Mga retrato sa pahina 22, 23]

An pamilya Fountain: (wala patoo) si Dewey, Edwena, Winnie, Elizabeth, Dewey junior; sa too: si Elizabeth asin Dewey junior sa may tapaludo kan trak na may laudespiker ni Henschel (1937); sa ibaba, too: si Elizabeth na naghuhulit paagi sa plakard sa edad na 16