An Pamayo kan Hukbo Asin an Aking Babayi

Naparayo sa harong ninda an sarong aking babaying Israelita kan darahon siya sa Siria kan hukbo kan mga Siriano. Nagi siyang suruguon kan agom ni Naaman na pamayo kan hukbo. Si Jehova an sinasamba kan aking ini dawa ngani ibang diyos an sinasamba kan mga tawong nakapalibot saiya.

May grabeng hilang sa kublit si Naaman, saka pirmi siyang nakakamati nin kulog. Gusto siyang tabangan kan aking babayi. Sinabi niya sa agom ni Naaman: ‘May bistado po akong propeta ni Jehova sa Israel na makakaparahay sa agom mo. Siya po si Eliseo.’

Inistorya ki Naaman kan agom niya an sinabi kan aking babayi. Handa siyang gibuhon an gabos, kaya nagduman siya sa Israel sa harong ni Eliseo. Nag-aasa si Naaman na espesyal an magigin pagtrato saiya ni Eliseo. Pero dai siya hinampang kaini, imbes, sinugo ni Eliseo an lingkod niya para sabaton si Naaman asin sabihan: ‘Magkarigos ka duman sa Salog nin Jordan nin pitong beses para marahay ka.’

Nauyam nanggad si Naaman. Nagsabi siya: ‘Paghuna ko, maapod sa Diyos niya an propetang ini, tapos magibo mismo nin milagro sa atubangan ko para paumayan ako. Pero, pinapaduman niya ako sa salog na ini sa Israel. Mas marahay an mga salog mi sa Siria. Taano ta bako na lang duman?’ Angguton si Naaman kaya naghali ini sa harong ni Eliseo.

Tinabangan si Naaman kan mga suruguon niya na makapag-isip-isip. Sinabi ninda saiya: ‘Bakong gigibuhon mo an gabos para marahay? Pasilon man sana po an ipinapagibo saimo kan propetang ini. Taano ta dai mo na lang po iyan gibuhon?’ Nagdangog sainda si Naaman. Nagduman siya sa Salog nin Jordan asin nagladop nin pitong beses. Pakatapos kan ikapitong beses, naghawas si Naaman sa tubig na biyo nang rahay. Ugmahon siya kaya nagbalik siya ki Eliseo para magpasalamat. Nagsabi si Naaman: ‘Aram ko na ngunyan na si Jehova an tunay na Diyos.’ Ano daw an namatian kan aking babaying Israelita kan magbalik si Naaman na naumayan na?