Ginibo Ninda an Kabotan ni Jehova
Sarong Sadit na Aking Babae na Nagtaram na May Kapusoan
DURANTE kan ikasampulong siglo B.C.E., bakong marahay an relasyon kan Israel asin Siria. Lakop na marhay an mga pagputok nin iriwal kaya kan matapos an tolong taon na mayo nin kadahasan, iyan isinurat sa kasaysayan.—1 Hade 22:1.
An nangorognang nagtatao nin peligro kan mga panahon na idto iyo an mga grupo nin tulisan na Sirio, na an iba kompuesto nin ginatos na soldados. An mga parapakilaban na ini sinasalakay an asin nananalakat sa mga Israelita, na dakol an kinikidnap asin ginigibong oripon—minsan mga aki.
Sa sarong pagsalakay, “sarong sadit na aking babae” an daing herak na inagaw sa saiyang matatakton sa Dios na pamilya. (2 Hade 5:2) Dinara sa Siria, napiritan siang mamuhay sa tahaw nin mga tibaad kinatatakotan nia asin dai nia midbid—sarong banwaan na nagsasamba sa aldaw, bulan, mga bitoon, kahoy, tinanom, asin minsan gapo. Laen nanggad sinda sa saiyang pamilya asin mga katood, na nagsasamba sa iyo sanang tunay na Dios, si Jehova! Minsan siring, maski sa laen na palibot na ini, an aking babae na ini nagpaheling nin pambihirang kapusoan mapadapit sa pagsamba ki Jehova. Bilang resulta, nabago nia an buhay nin sarong prominenteng opisyal na naglilingkod sa hade nin Siria. Helingon niato kun paano.
An Kapusoan na Magtaram
An sadit na aking babae dai nginaranan sa rekord kan Biblia. Sia nagin babaeng surogoon kan agom ni Naaman, sarong maisog na kapitan nin hukbo na sakop ni Hadeng Ben-hadad II. (2 Hade 5:1) Minsan ngani sia iginagalang na marhay, si Naaman igwa kan makababaldeng helang na lepra.
Posible na an magalang na ugale kan aking babae nakapahiro sa agom ni Naaman na magsabi sa saiya nin mga sekreto. An babae puedeng naghapot sa aking babae, ‘Ano an ginigibo sa mga leproso sa Israel?’ An daragitang Israelitang ini dai nasopog na mapusong magsabi: “Kun an kagurangnan ko sana kutana makaatubang sa propeta na yaon sa Samaria! Sa siring paoomayan nia sia sa saiyang lepra.”—2 Hade 5:3.
An mga tataramon kan aking babaeng ini dai pinalimanlimanan bilang uroimbento sana nin aki. Sa kabaliktaran, iyan irineport ki Hadeng Ben-hadad, na isinugo si Naaman asin iba pa na magbaklay nin 150 kilometros pasiring sa Samaria tanganing hanapon an propetang ini.—2 Hade 5:4, 5.
An Pagpaomay ki Naaman
Si Naaman asin an saiyang mga tawohan nagduman ki Hadeng Joram nin Israel, na may darang surat nin pagpamidbid hale ki Ben-hadad asin bastanteng regalong kuarta. Bakong makangangalas, an nagsasamba sa ogbon nin baka na si Hadeng Joram dai nagpaheling kan pagtubod sa propeta nin Dios na arog kan surogoon na aking babae. Imbes, naghona sia na si Naaman nagdatong sa paghanap nin iriwal. Kan mabaretaan kan propeta nin Dios na si Eliseo an dapit sa pagkahandal ni Joram, sia nagpadara tolos nin mensahe na nakikiolay na si Naaman padumanon kan hade sa saiyang harong.—2 Hade 5:6-8.
Pag-abot ni Naaman sa harong ni Eliseo, an propeta nagsugo nin sarong mensahero na nagsabi sa saiya: “Maghugas ka nin makapito sa Jordan tanganing an saimong laman maulian dian sa saimo; asin magin ka malinig.” (2 Hade 5:9, 10) Naanggot na marhay si Naaman. Naglalaom sa milagroso asin mapagpasikat na pagpaomay, naghapot sia: “Bako daw na an Abana asin an Farpar, an mga salog nin Damasco, orog karahay kisa sa gabos na katubigan nin Israel? Dai daw ako puedeng maghugas sa sainda asin magin malinig?” Si Naaman huminale sa harong ni Eliseo na grabe an kaanggotan. Alagad kan an mga surogoon ni Naaman makipangatanosan sa saiya, naghimate sia sa katapustapusi. Pakatapos na maghugas nin makapito sa Salog nin Jordan, “an saiyang laman naulian arog kan laman nin sarong omboy na lalaki asin sia nagin malinig.”—2 Hade 5:11-14.
Pagbalik ki Eliseo, si Naaman nagsabi: “Uya, ngonyan, aram ko na mayo nin Dios saen man na kabtang kan daga kundi sa Israel.” Si Naaman nanuga na sia “dai na madolot nin tinotong o atang sa siisay pa man na ibang dios kundi ki Jehova.”—2 Hade 5:15-17.
Mga Leksion Para sa Sato
Si Naaman dai kutana napaduman sa propetang si Eliseo kun an sarong barobatang surogoon na babae dai nagtaram na may kapusoan. Ngonyan, siring man kaiyan an ginigibo nin dakol na hoben. Sa eskuelahan, tibaad napalilibotan sinda nin mga estudyante na mayo nin interes sa paglilingkod sa Dios. Minsan siring, sinda nagtataram manongod sa saindang tinutubod. An iba sa sainda nagpoon sa paggibo kaiyan mantang akion pang marhay.
Horophoropa si Alexandra, sarong singko anyos na aking babae na taga-Australia. Pagpoon nia sa pag-eskuela, an saiyang ina guminibo nin pakitagbuan tanganing ipaliwanag sa maestro an mga paniniwala kan Mga Saksi ni Jehova. Alagad nabigla an ina ni Alexandra. “Pamilyar na ako sa nagkapira sa saindong mga paniniwala, siring man sa gigibohon asin dai gigibohon ni Alexandra sa eskuelahan,” an sabi kan maestro. Napangalas an ina ni Alexandra, huling mayo na nin ibang aking Saksi sa eskuelahan. “Inimpormaran kami ni Alexandra,” an paliwanag kan maestro. Iyo, an sadit na aking babae na ini nagkaigwa na nin mataktikang pakipag-olay sa saiyang maestro.
An siring na mga hoben nagtataram na may kapusoan. Sa siring sinda minagawe kaoyon sa Salmo 148:12, 13: “Kamong mga soltero asin kamo man na mga daraga, kamong mga gurang kaibanan nin mga aki. Pag-omawon logod ninda an ngaran ni Jehova, huli ta an saiyang ngaran sana an halangkaw na dai maabot. An saiyang dignidad halangkaw kisa sa daga asin langit.”