Bareta kan mga Parabalangibog kan Kahadean
“An Saimong Banwaan Gikan sa Boot na Magpepresentar kan Saindang Sadiri”
AN MAKAPANGYARIHAN na kapitan kan hukbo nin Siria na si Naaman igwa nin lepra. Kun dai bobolongon, an nakaririmarimang helang na ini puedeng magresulta sa makanos na itsura asin kagadanan. Ano an gigibohon ni Naaman? Kabilang sa kairiba sa harong ni Naaman an sarong aking babae, na “bihag hale sa Israel.” Sia mapusong nagtaram asin ipinamidbid si propeta Eliseo bilang an saro na puedeng magpaomay ki Naaman.—2 Hade 5:1-3.
Huli sa mapusong paninindogan kaini, hinanap ni Naaman si Eliseo asin sia naomayan. Apuera kaini, si Naaman nagin parasamba ni Jehova! An eksperyensiang ini, na irinekord sa Biblia, nangyari kan ikasampulong siglo B.C.E. (2 Hade 5:4-15) Ngonyan, dakol na hoben an nagpapaheling nin kaparehong kapusoan kun nagtataram para sa intereses kan Kahadean. Pinatutunayan ini kan minasunod na eksperyensia hale sa Mozambique.
An sais anyos na si Nuno sarong dai pa bautisadong parahayag kan maogmang bareta. Dawa bago sia nagin dai pa bautisadong parahayag, tinitipon ni Nuno an mga aki sa saiyang pagtaraed, namimibi, asin tinotokdoan sinda sa Biblia, na ginagamit an librong My Book of Bible Stories.
Si Nuno parateng nagmamata nin amay kun Sabadong aga asin pinagigirumdom an saiyang pamilya: “Maluwas kita ngonyan sa ministeryo sa langtad.” An saiyang kaigotan sa ministeryo naheheling sa iba pang mga paagi. Mantang kaiba an saiyang mga magurang sa ministeryo sa tinampo sa Maputo, sa parate si Nuno solong nagdodolok sa mga tawo. Sa saro kan okasyon na iyan, sarong negosyante an nagdolok sa saiya asin naghapot: “Taano ta ipinababakal mo an mga magasin na ini?” Si Nuno nagsabi: “Dai ko man po ipinababakal an mga magasin, alagad nag-aako po ako nin mga kontribusyon tanganing tabangan na masustentohan an paghuhulit.” An negosyante nagsimbag: “Maski dai ako interesado, hanga ako sa saimong ugale asin abilidad. Gusto kong magtao nin kontribusyon sa gibohon na ini.”
Sa saro pang okasyon, rinani ni Nuno an sarong lalaki sa tinampo asin inalokan ini kan librong True Peace and Security—How Can You Find It? An lalaki naghapot: “Bakong nag-eeskuela ka dian sa eskuelahan na iyan?” “Iyo po,” an simbag ni Nuno, “nag-eeskuela po ako sa eskuelahan na iyan, alagad ngonyan na aldaw ipinepresentar ko an sarong importanteng mensahe gikan sa librong ini. Ipinaheheling po kaiyan na puede kamong mabuhay sa bagong kinaban na pangyayarihon nin Dios, siring sa ipinaheheling kan retrato sa librong ini.” Dai aram ni Nuno na an lalaking nakaolay nia sarong maestro sa saiyang eskuelahan. Bako sanang inako kan maestro an libro kundi ini regular na man ngonyan na nagreresibi kan mga magasin na Torrengbantayan asin Awake! hale ki Nuno.
Kun hinahapot si Nuno kun taano ta gusto niang makikabtang sa paghuhulit, sia nagsasabi: “Gusto kong makipag-olay sa mga tawo asin tokdoan sinda manongod ki Jehova asin sa saiyang Aki, si Jesu-Cristo.” Dagdag pa nia: “Asin kun an mga tawo habong magdangog, mayong rason na maanggot.”
Sa bilog na kinaban, rinibong hoben na siring ki Nuno an ‘gikan sa boot na nagpepresentar kan saindang sadiri’ tanganing magtokdo asin maghulit manongod sa Kahadean nin Dios. (Salmo 110:3) Alagad ini dai nagkakanorongod sana. An mga magurang na tinotokdoan an saindang mga aki manongod ki Jehova poon sa pagkaomboy, nagpapaheling nin marahay na halimbawa sa ministeryo, asin may kaigotan na hinahanap an pan-Kahadean na intereses babalosan nin igo.