Tunay na Katiwasayan—Ngonyan Asin Sagkod Lamang
MAYONG duda na kaya ni Jehova Dios na magtao nin katiwasayan sa saiyang banwaan. Sia “an Makakamhan sa gabos na Saro.” (Salmo 68:14) An saiyang unikong ngaran nangangahulogan “Saiyang Pinapangyayari.” Ipinamimidbid sia kaini bilang an solamenteng Saro sa uniberso na kayang pangganahan an ano man na kaolangan tanganing maotob an saiyang mga panuga asin mahaman an saiyang kabotan. An Dios mismo nagsasabi: “Magigin siring man an sakong tataramon na magluwas sa sakong ngoso. Dai iyan mabalik sako na daing laog, kundi gigibohon nanggad kaiyan an sakong boot, asin iyan siertong magigin mapanggana sa sakuyang sinobolan kaiyan.”—Isaias 55:11.
An Dios nagtatao nin katiwasayan sa mga nagtitiwala sa saiya. Iginagarantiya ini kan saiyang Tataramon. “An ngaran ni Jehova makosog na torre,” sabi kan madonong na si Hadeng Salomon sa irarom kan pasabong nin Dios. “Dian minadalagan an matanos asin tinatawan nin proteksion.” Sia nagsabi pa: “An nagtitiwala ki Jehova iingatan.”—Talinhaga 18:10; 29:25.
Katiwasayan Para sa mga Lingkod nin Dios
Si Jehova perming nagtatao nin katiwasayan sa mga nananarig sa saiya. Halimbawa, si propeta Jeremias nagkamit kan proteksion nin Dios. Kan salikopan kan mga hukbo nin Babilonya an apostatang Jerusalem, an mga tawo kinaipuhan na ‘magkakan nin tinapay na tinimbang asin may hadit na pag-iingat.’ (Ezequiel 4:16) Nagin kritikal na marhay an situwasyon kaya may mga babae na linauya asin kinakan an sadiri nindang mga aki. (Lamentacion 2:20; 4:10) Minsan ngani nabibilanggo kaidto si Jeremias huli sa saiyang daing takot na paghuhulit, sineguro ni Jehova na “tinatawan sia nin sarong bilog na tinapay aroaldaw hale sa lansangan kan mga paragibong-tinapay, sagkod na naubos an gabos na tinapay sa siudad.”—Jeremias 37:21.
Kan an Jerusalem bumagsak sa mga Babilonyo, si Jeremias dai ginadan ni dinara man na bilanggo sa Babilonya. Imbes, “tinawan sia kan [Babilonyong] kapitan kan bantay nin rasyon na pagkakan asin nin regalo patin pinahale sia.”—Jeremias 40:5.
Pakalihis nin mga siglo sinierto ni Jesu-Cristo sa mga lingkod nin Dios: “Dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’ Huli ta an gabos na ini iyo an mga bagay na hinahanap na gayo kan mga nasyon. Huli ta an saindong langitnon na Ama nakaaaram na kaipuhan nindo an gabos na bagay na ini. Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.”—Mateo 6:31-33.
Ini daw nangangahulogan na an mga lingkod ni Jehova magkakamit nin proteksion nin Dios sa gabos na kalamidad sa presenteng aldaw? Dai, bako iyan an kahulogan kaiyan. An mga fiel bakong protektado sa kapahamakan. An tunay na mga Kristiano naghehelang, pinaglalamag, nagigin mga biktima nin krimen, nagagadan sa mga aksidente, asin nagsasakit sa iba pang mga paagi.
Minsan ngani si Jehova dai pa nagtatao nin lubos na katiwasayan tumang sa kapahamakan, ipinaheheling nin mga bareta na talagang ginagamit nia an saiyang kapangyarihan sa pagtao nin probisyon sa saiyang mga lingkod asin pagprotehir sa sainda. Naiingatan man an mga Kristiano sa dakol na problema huli ta iinaaplikar ninda sa saindang buhay an mga prinsipyo sa Biblia. (Talinhaga 22:3) Dugang pa, nakakamtan ninda an katiwasayan sa lakop sa kinaban na kasararoan nin mamomoton na espirituwal na mga tugang na lalaki asin babae, na nagtatarabangan sa mga panahon nin pangangaipo. (Juan 13:34, 35; Roma 8:28) Halimbawa, huli sa desesperadong kamugtakan kan saindang mga tugang sa binabaranga nin guerrang Rwanda, an mga Saksi ni Jehova sa Europa listong nagdonar asin nagpadara sa sainda nin 65 toneladas na gubing saka $1,600,000 an kantidad na bolong, pagkakan, asin iba pang suplay.—Ikomparar an Gibo 11:28, 29.
Minsan ngani itinotogot ni Jehova na mangyari an mga pagbalo sa tunay na mga Kristiano, yaon sa sainda an garantiya na itatao nia sa sainda an kosog, tabang, asin kadonongan na makatagal. Sa pagsurat sa mga kapagtubod, si apostol Pablo nagsabi: “Mayong sugot [pagbalo] na uminabot sa saindo kundi idto sanang komun sa mga tawo. Alagad fiel an Dios, asin dai nia itotogot na kamo masugotan [mabalo] nin labi sa saindong makakaya, kundi kaibahan kan sugot [pagbalo] matao man sia nin luluwasan tanganing iyan matagalan nindo.”—1 Corinto 10:13; The Emphatic Diaglott.
An Ginigibo nin Dios Para sa Saiyang Banwaan
Ngonyan, minilyon na tawo an nawiwiling gumibo kan kabotan nin Dios. Dai sinda pinipirit na maglingkod sa Dios; iyan ginigibo ninda huli ta sinda nakamimidbid asin namomoot sa saiya. Huli man ta namomotan ni Jehova an saiyang maimbod na mga lingkod, katuyohan nia na gibohon an daga na magin paraiso na dian an makinuyog na katawohan magkakamit nin katoninongan, marahay na salud, asin katiwasayan sagkod lamang.—Lucas 23:43.
Gigibohon ini nin Dios paagi sa sarong langitnon na gobyerno, na an saiyang nombradong Hade, si Jesu-Cristo, an Namamahala dian. (Daniel 7:13, 14) Inaapod kan Biblia an gobyernong ini na “kahadean nin Dios” asin “an kahadean kan kalangitan.” (1 Corinto 15:50; Mateo 13:44) Sasalidahan kan Kahadean nin Dios an gabos na gobyerno nin tawo. Imbes na kadakol kan gobyerno sa daga, magkakaigwa nin saro na sanang gobyerno. Iyan mamamahala sa katanosan sa bilog na daga.—Salmo 72:7, 8; Daniel 2:44.
Ipinaaabot ni Jehova sa gabos an pangagda na mamuhay na sakop kan Kahadean. An sarong paagi na ginigibo nia ini iyo an mahiwas na pagwaras kan Biblia, an librong nagpapaliwanag kun ano an gigibohon kan Kahadean para sa katawohan. An Biblia iyo an librong pinakamahiwas an sirkulasyon sa kinaban, asin makukua na iyan ngonyan, bilog man o kabtang sana, sa labing 2,000 na lenguahe.
Mamomoton na tinatabangan ni Jehova Dios an mga tawo na masabotan an itinotokdo kan Biblia manongod sa Kahadean. Ginigibo nia ini paagi sa pagtotokdo sa asin pagsugo nin mga tawo na ipaliwanag an Kasuratan sa iba. Labing limang milyon na Saksi ni Jehova an nagbabalangibog ngonyan kan maogmang bareta kan Kahadean nin Dios sa labing 230 kadagaan.
Tunay na Katiwasayan Para sa Gabos?
An gabos daw maako kan pangagda na magin sakop kan Kahadean nin Dios paagi sa pamumuhay oyon sa saiyang matanos na mga pamantayan? Bako, huli ta dakol an mayo nin interes na gibohon an kabotan nin Dios. Hinahaboan ninda an mga paghihingoa na tabangan sindang bakleon an saindang buhay. An totoo, ipinaheheling ninda na sinda kapareho kan mga sinabi ni Jesus: “Tuminagas na an puso kan mga tawong ini, asin sa saindang mga talinga sinda nagdangog na daing pagkuyog, asin pinirong ninda an saindang mga mata; tanganing dai ninda noarin man maheling kan saindang mga mata asin madangog kan saindang mga talinga asin masabotan iyan kan saindang mga puso patin magbakle, asin paomayan . . . sinda” nin Dios.—Mateo 13:15.
Paano magkakaigwa nin tunay na katiwasayan sa daga sa tahaw kan mga habong mamuhay kaoyon sa matanos na mga dalan nin Dios? Dai puede. An mga tawong daing Dios isinasapeligro an katiwasayan kan mga gustong maglingkod ki Jehova.
Dai pinipirit nin Dios an mga tawo na magbago, alagad dai man nia pababayaan sagkod lamang an karatan. Minsan ngani pasensiosong padagos na isinusugo ni Jehova an saiyang mga Saksi na magtokdo sa mga tawo manongod sa saiyang mga dalan asin katuyohan, dai nang gayo maghahaloy na iyan padagos niang gigibohon. Ihinula ni Jesu-Cristo: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:14.
Ano an magigin kahulogan kan “katapusan” para sa mga habo sa mga pamantayan nin Dios? Iyan mangangahulogan kan pagsilot asin paglaglag sa sainda. An Biblia nagtataram manongod sa pagtao nin ‘pamalos sa mga dai nakamimidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus. An mga ini mismo magtitios kan silot nin daing katapusan na pagkalaglag.’—2 Tesalonica 1:6-9.
Sa Katapustapusi—Tunay na Katiwasayan Sagkod Lamang!
Pakalaglaga sa mga habo sa mga dalan nin katoninongan ni Jehova, poponan kan Kahadean nin Dios an mamuraway na panahon nin katiwasayan para sa kapakinabangan kan mga matanos sa daga. (Salmo 37:10, 11) Magigin kabaliktaran nanggad an bagong kinaban na iyan sa kinaban na nabubuhayan niato ngonyan!—2 Pedro 3:13.
Mawawara na an makuring kakulangan nin kakanon asin an gutom. An gabos magigin bastante an pagkakan. Sinasabi kan Biblia na ‘an gabos na banwaan magkakaigwa nin bangkete nin matatabang putahe.’ (Isaias 25:6) Dai magkukulang an kakanon, huli ta “magkakaigwa nin kadakoldakol na tipasi sa ibabaw kan daga; magkakaigwa nin abundansia sa alitoktok kan kabukidan.”—Salmo 72:16.
An mga tawo dai na mag-iistar sa mga payag-payag asin lugar nin mga barong-barong. Sa pagsakop kan Kahadean nin Dios, an gabos magkakaigwa nin magayon na harong, asin kakakanon ninda an bunga kan saindang sadiring daga. An Biblia nanunuga: “Sinda siertong magtotogdok nin mga harong asin mag-oontok sinda dian; asin siertong magtatanom sinda nin mga ubasan asin kakakanon ninda an bunga kaiyan.”—Isaias 65:21.
Imbes na lakop na kadaihan nin trabaho, magkakaigwa nin mabungang trabaho, asin an mga tawo makaheheling nin marahay na mga resulta kaiyan. An Tataramon nin Dios nagsasabi: “An ginibo kan saindang mga kamot lubos na gagamiton kan sakuyang mga pinili. Dai sinda magpapagal na mayong kapakanan.”—Isaias 65:22, 23.
Sa pamamahala kan Kahadean, an mga tawo dai magsasakit asin magagadan sa helang. Sinisierto sa sato kan Tataramon nin Dios: “Mayo nin nag-eerok na masabi: ‘Naghehelang ako.’”—Isaias 33:24.
Sa daganon na Paraiso na madali nang magin totoo, an pagsakit asin kolog, kamondoan asin kagadanan, hahaleon na. Iyo, pati an kagadanan! An mga tawo mabubuhay sagkod lamang sa Paraiso! Sinasabi sa sato kan Biblia na an Dios ‘papahidon an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.’—Kapahayagan 21:4.
Sa irarom kan pamamahala ni Jesu-Cristo, an “Prinsipe nin Katoninongan,” an buhay sa ibabaw nin daga sa katapustapusi magigin tunay na tiwasay. An totoo, magkakaigwa nin lakop sa kinaban na katiwasayan sakop kan matanos, mamomoton na pamamahala kan sarong gobyerno—an Kahadean nin Dios.—Isaias 9:6, 7; Kapahayagan 7:9, 17.
[Blurb sa pahina 4]
“An katiwasayan nin tawo nagpaparisa nin pagtubod sa ngapit, . . . [pagtubod sa] sarig kan politikal asin ekonomikong situwasyon.”—Sarong babae na nag-iistar sa Asia
[Blurb sa pahina 5]
“An nakahahale sa saimong katiwasayan orog sa gabos iyo an kadahasan asin delingkuensia.”—Sarong lalaki na nag-iistar sa Amerika del Sur
[Blurb sa pahina 6]
“Bako akong tiwasay durante kan . . . pagsalakay. Kun may guerra an sarong nasyon, paano matitiwasay an mga tawo?”—Sarong eskuela sa primarya sa Tahaw na Sirangan
[Blurb sa pahina 7]
“Matitiwasay ako kun aram ko na puede akong maglakaw sa tinampo kun banggi na dai ako malulugos.”—Sarong babaeng eskuela sa Aprika