PAGGIBO NIN MGA DISIPULO
LEKSIYON 10
Determinasyon
Prinsipyo: “Determinado kaming itao sa saindo, bako sana an maugmang bareta nin Diyos kundi pati mismo an samuyang sadiri, huli ta napamahal na nanggad kamo sa samo.”—1 Tes. 2:8.
Kun Ano an Ginibo ni Jesus
1. Hilingon an VIDEO, o basahon an Juan 3:1, 2. Dangan pag-isipan an minasunod na mga hapot:
Ano an posibleng dahilan kaya mas gusto ni Nicodemo na banggi makipag-ulay ki Jesus?—Hilingon an Juan 12:42, 43.
Sa pakikipag-ulay ni Jesus ki Nicodemo nin banggi, paano niya ipinahiling an saiyang determinasyon sa paggibo nin mga disipulo?
Ano an Manunudan Ta ki Jesus?
2. Ipinapahiling tang namumutan ta an mga tawo paagi sa pagigin determinado na tabangan sindang magin mga disipulo.
Arugon si Jesus
3. Magkondukta nin pag-adal sa Bibliya sa oras asin lugar na kumbenyente sa tinutukduan mo. Tibaad mas gusto niya an sarong partikular na aldaw o oras. Mas komportable daw saiya na mag-adal sa pinagtatrabahuhan niya, sa saiyang harong, o sa sarong pampublikong lugar? Sagkod na posible, i-adjust an iskedyul mo tanganing makapag-adal kamo sa oras asin lugar na pinakamarahay para sa saiya.
4. Magin Regular. Kun mayo ka, dai pagkanselaron an pag-adal. Imbes, pag-isipan ini:
Puwede daw kamong mag-adal sa ibang pagkakataon sa semanang iyan?
Puwede daw kamong mag-adal paagi sa telepono o video conference?
Puwede mo daw pakiulayan an sarong parahayag na siya nguna an magkondukta?
5. Mamibi na magkaigwa nin tamang sabuot. Hagadon ki Jehova na tabangan ka na dai magsuko sa tinutukduan mo, dawa pa nasasakitan siyang regular na mag-adal o mag-aplikar kan sadol sa Bibliya. (Fil. 2:13) Posibleng marhay na dakulon nin marahay na mga kuwalidad an tinutukduan mo; mamibi na tabangan kang magpokus sa mga iyan.