Tabangan an mga Tinutukduan sa Bibliya na Manindugan sa Katotoohan

1-2. (a) Taano ta may mga tinutukduan sa Bibliya na nag-aalangan na manindugan sa katotoohan? (b) Ano an pag-uulayan ta sa artikulong ini?

NAG-ALANGAN ka daw kaidto na magin Saksi ni Jehova? Siguro natakot ka na tibaad maanggot saimo an mga katrabaho, amigo, o mga kapamilya mo. O tibaad namatian mong nungka mong maaabot an mga pamantayan kan Diyos. Kun iyo, masasabutan mo an mga tinutukduan sa Bibliya na garo baga nag-aalangan na manindugan sa katotoohan.

² Aram ni Jesus na an siring na mga pagmati puwedeng madali sanang makaulang sa saro na umuswag sa espirituwal. (Mat. 13:20-22) Pero dai siya nagpundo sa pagtabang sa mga nag-alangan kaidto na magsunod sa saiya. Imbes, ipinahiling niya sa saiyang mga disipulo kun paano tatabangan an siring na mga indibidwal na (1) maaraman an mga nakakaulang sa sainda na umuswag, (2) urog na mamutan si Jehova, (3) i-adjust an saindang mga priyoridad, asin (4) makayanan an mga pagkontra. Paano ta maiaaplikar an mga sinabi ni Jesus sa saiyang mga disipulo mantang ginagamit ta an librong Mabuhay nin Maugma Sagkod Pa Man! para tabangan an sarong tinutukduan sa Bibliya na manindugan sa katotoohan?

TABANGAN AN TINUTUKDUAN NA MAARAMAN AN MGA NAKAKAULANG SA SAIYA NA UMUSWAG

3. Ano an tibaad nakaulang ki Nicodemo na magin saro sa mga disipulo ni Jesus?

³ Si Nicodemo sarong prominenteng tagapamahala kan mga Judio, asin may nakaulang kaidto sa saiya na magin disipulo ni Jesus. Mga anom na bulan pa sana pagkatapos na punan ni Jesus an saiyang ministeryo, narealisar ni Nicodemo na si Jesus an representante nin Diyos. (Juan 3:1, 2) Dawa arog kaiyan, pasekretong nakipaghilingan si Nicodemo ki Jesus huli sa “takot sa mga Judio.” (Juan 7:13; 12:42) Tibaad inisip niyang kadakul kan mawawara sa saiya pag nagin disipulo siya ni Jesus.a

4. Paano tinabangan ni Jesus si Nicodemo na masabutan kun ano an inaasahan nin Diyos sa saiya?

⁴ Pamilyar si Nicodemo sa Katugunan, pero kaipuhan niya nin tabang para masabutan kun ano an inaasahan sa saiya ni Jehova. Paano siya tinabangan ni Jesus? Nagtao si Jesus nin panahon na makaibanan siya; nakipaghilingan pa ngani siya ki Nicodemo nin banggi. Asin malinaw na sinabi ni Jesus ki Nicodemo kun ano an kaipuhan niyang gibuhon para magin disipulo: pagsulsulan an saiyang mga kasalan, magpabawtismo sa tubig, asin magtubod sa Aki nin Diyos.—Juan 3:5, 14-21.

5. Paano ta matatabangan an sarong tinutukduan sa Bibliya na maaraman kun ano an nakakaulang sa saiya na umuswag?

⁵ Dawa kun nasasabutan nang marhay nin sarong tinutukduan sa Bibliya an Kasuratan, tibaad kaipuhan niya nin tabang na maaraman kun ano an nakakaulang sa saiya na umuswag. An sekular na trabaho o an pagkontra nin mga kapamilya tibaad makaulang sa saiya na mag-abot nin espirituwal na mga pasuhan. Kaya magtao nin panahon na makaibanan an saimong tinutukduan. Puwede mo siyang imbitaran na magkape-kape o maglakaw-lakaw. Sa arog kaiyan na pagkakataon, tibaad matabangan mo siyang mag-istorya manungod sa buhay niya saka sa saiyang mga problema. Dagkahon an tinutukduan mo na gumibo nin kinakaipuhan na mga pagbabago, bako para mapaugma ka, kundi para ipahiling an pagkamuot niya ki Jehova.

6. Paano mo matatabangan an sarong tinutukduan na magkaigwa kan kusog nin buot na manindugan sa katotoohan? (1 Corinto 16:13)

⁶ Pag an sarong tinutukduan sa Bibliya kumbinsido na tatabangan siya ni Jehova na mamuhay kauyon kan mga pamantayan sa Bibliya, magkakaigwa siya kan kusog nin buot na iaplikar an mga nanunudan niya. (Basahon an 1 Corinto 16:13.) An saimong papel nakakaagid kan sa sarong titser. Kan nag-eeskuwela ka pa, anong klaseng titser an pinakagusto mo? Siguro su titser na nagtabang saimo na magkaigwa ka nin kumpiyansa sa saimong mga kakayahan. Sa kaagid na paagi, an sarong marahay na paratukdo sa Bibliya dai sana nagtutukdo kan gusto nin Diyos na gibuhon ta kundi inaasigurar niya man an saiyang tinutukduan na, sa tabang ni Jehova, magigibo niya an kinakaipuhan na mga pagbabago sa saiyang buhay. Paano mo magigibo iyan?

TABANGAN AN TINUTUKDUAN NA UROG NA MAMUTAN SI JEHOVA

7. Paano tinabangan ni Jesus an mga nagdadangog sa saiya na kumusog an saindang pagkamuot ki Jehova?

⁷ Aram ni Jesus na an pagkamuot sa Diyos makakamotibar sa saiyang mga disipulo na iaplikar an mga nanudan ninda. Parati siyang nagtutukdo nin mga bagay na makakatabang sa saiyang mga disipulo na kumusog an pagkamuot ninda sa saindang Ama sa langit. Halimbawa, ikinumparar niya si Jehova sa sarong ama na nagtatao nin marahay na mga bagay sa saiyang mga aki. (Mat. 7:9-11) An nagkapira sa mga nagdadangog ki Jesus tibaad mayo nin arog kaiyan kamapagpadangat na ama. Imahinara an namatian ninda kan iistorya ni Jesus an ilustrasyon manungod sa sarong mahihirakon na ama na inako giraray an saiyang nagbalik na aking lalaki na nagkaigwa nin maraot na pamumuhay. Paagi kaiyan, nahiling ninda na nagmamalasakit na marhay si Jehova sa saiyang mga aki digdi sa daga.—Luc. 15:20-24.

8. Paano mo matatabangan an sarong tinutukduan sa Bibliya na urog na kamutan si Jehova?

⁸ Matatabangan mo man an sarong tinutukduan sa Bibliya na urog na kamutan si Jehova paagi sa pagduon kan mga kuwalidad nin Diyos pag nagtutukdo ka. Sa kada sesyon nin pag-adal, tabangan siyang mahiling sa mga nanunudan niya na namumutan kita ni Jehova. Pag pinag-uulayan an manungod sa pantubos, iduon kun paano iyan aplikado sa saiya. (Roma 5:8; 1 Juan 4:10) An sarong tinutukduan posibleng marhay na mapahirong kamutan si Jehova pag hinuhurop-hurop niya an pagkamuot sa saiya ni Jehova.—Gal. 2:20.

9. Ano an nakatabang ki Michael na baguhon an saiyang pamumuhay?

⁹ Pag-isipan an halimbawa ni Michael na taga Indonesia. Pinadakula siya sa katotoohan pero dai siya nabawtismuhan. Kan siya 18 anyos, nag-abroad siya tanganing magtrabaho bilang drayber nin trak. Pag-abot nin panahon nagbalik siya sa Indonesia para mag-agom pero nag-abroad giraray siya. Kan panahon na iyan na nasa abroad siya, nagpuon na mag-adal nin Bibliya an saiyang agom saka aking babayi asin nag-uswag an mga ini. Pagkagadan kan saiyang ina, nagdesisyon si Michael na magpuli para atamanon an saiyang ama asin nag-uyon siyang mag-adal nin Bibliya. Kan pigtutukar na an seksiyon na “Aramon Pa” sa leksiyon 27 kan librong Mabuhay nin Maugma Sagkod Pa Man!, napahirong marhay si Michael. Mantang hinuhurop-hurop niya kun ano an siguradong namatian ni Jehova kan mahiling Niyang nagsasakit an Saiyang Aki, napaluha siya. Nakamati siya nin dakulang pasasalamat sa pantubos asin napahiro siya kaiyan na baguhon an saiyang pamumuhay asin magpabawtismo.

TABANGAN AN TINUTUKDUAN NA I-ADJUST AN SAIYANG MGA PRIYORIDAD

10. Paano tinabangan ni Jesus an saiyang inot na mga disipulo na i-adjust an saindang mga priyoridad? (Lucas 5:5-11) (Hilingon man an ritrato.)

¹⁰ Narealisar tulos kan inot na mga disipulo na si Jesus an ipinanugang Mesiyas, pero kinaipuhan ninda nin tabang tanganing magin priyoridad ninda an ministeryo. Haloy-haloy nang mga disipulo kaidto si Pedro asin Andres kan imbitaran sinda ni Jesus na magin saiyang bilog na panahon na mga parasunod. (Mat. 4:18, 19) Mga parasira sinda, arog ni Santiago asin Juan, asin mauswag an negosyo nindang paninira. (Mar. 1:16-20) Kan “binayaan [ni Pedro asin Andres] an saindang mga hikot,” posibleng marhay na sinigurado man nindang masusustentuhan pa man giraray ninda an saindang pamilya mantang naglilingkod sinda bilang mga parasunod ni Jesus. Ano an nakapahiro sa sainda na i-adjust an saindang mga priyoridad? Sinasabi sa sato kan salaysay sa Lucas na naggibo si Jesus nin sarong milagro na nakapakusog kan pagtitiwala ninda sa kakayahan ni Jehova na itao an saindang mga pangangaipo.—Basahon an Lucas 5:5-11.

11. Paano ta magagamit an satong mga eksperyensiya para pakusugon an pagtubod nin sarong tinutukduan?

¹¹ Bakong arog ni Jesus, dai ta kayang gumibo nin mga milagro pero puwede kitang maghiras nin mga eksperyensiya kun paano tinatabangan ni Jehova an mga indibidwal na iniinot Siya sa saindang buhay. Halimbawa, nagigirumduman mo daw kun paano ka tinabangan ni Jehova kan magpuon ka nang mag-atender sa mga pagtiripon? Tibaad kinaipuhan mong makipag-ulay sa saimong employer kun taano ta dai ka na puwedeng mag-overtime kun makakaulang iyan sa pag-atender mo sa mga pagtiripon. Mantang iniistorya mo sa saimong tinutukduan an mga eksperyensiya mo, ipaliwanag kun paano napapakusog an saimong pagtubod pag nahihiling mong tinatabangan ka ni Jehova sa desisyon mong ipriyoridad an pagsamba sa saiya.

12. (a) Taano ta dapat kitang mag-imbitar nin manlain-lain na parahayag na umiba sa pagkondukta nin pag-adal sa Bibliya? (b) Paano mo puwedeng gamiton an mga video tanganing magin epektibo an pagtutukdo mo sa saimong Bible study? Magtao nin halimbawa.

¹² Makikinabang man an tinutukduan mo sa mga eksperyensiya kan iba pang mga Kristiyano na nag-adjust man kan saindang mga priyoridad. Kaya mag-imbitar nin manlain-lain na tugang na umiba sa pag-Bible study nindo. Ipaistorya sa sainda kun paano ninda nanudan an katotoohan asin kun ano an ginibo ninda tanganing magin priyoridad sa saindang buhay an paglilingkod ki Jehova. Dugang pa, magtao nin panahon na magkaibanan nindong hilingon kan saimong tinutukduan an mga video sa seksiyon na “Aramon Pa” o “Hilingon Man” kan librong Mabuhay nin Maugma Sagkod Pa Man! Halimbawa, pag yaon na kamo sa leksiyon 37, puwede mong iduon an mga prinsipyo sa videong Dai Kami Papabayaan ni Jehova.

TABANGAN AN TINUTUKDUAN NA MAKAYANAN AN MGA PAGKONTRA

13. Paano inandam ni Jesus an saiyang mga disipulo na makayanan an mga pagkontra?

¹³ Pauruutrong sinabi ni Jesus sa saiyang mga parasunod na mapapaatubang sinda sa mga pagkontra kan iba, maski kan mga kapamilya ninda. (Mat. 5:11; 10:22, 36) Kan madali nang matapos an ministeryo ni Jesus, pinatanidan niya an saiyang mga disipulo na puwede sindang mapaatubang sa kagadanan. (Mat. 24:9; Juan 15:20; 16:2) Dinagka niya sinda na magin maingat pag nasa ministeryo. Halimbawa, sinabi niya na dai makiargumento sa mga nagkokontra asin magin maingat tanganing padagos sindang makapaghulit.

14. Paano ta matatabangan an sarong tinutukduan na magin andam sa pagkontra? (2 Timoteo 3:12)

¹⁴ Matatabangan ta an sarong tinutukduan na magin andam sa pagkontra paagi sa pagpaliwanag sa saiya kan mga posibleng sabihon sa saiya kan mga katrabaho, amigo, asin mga kapamilya niya. (Basahon an 2 Timoteo 3:12.) Tibaad kantiyawan siya kan mga katrabaho niya dahil sa bago niyang paagi nin pamumuhay. Tibaad kritikaron man kan iba, pati na kan dayupot niyang mga kapamilya, an saiyang mga tinutubod na basado sa Bibliya. Kun ipapakipag-ulay ta tulos sa satong mga tinutukduan kun paano aatubangon an mga pagkontra, magigin mas andam sinda pag mangyari na iyan.

15. Ano an makakatabang sa sarong tinutukduan sa Bibliya na makayanan an pagkontra nin mga kapamilya?

¹⁵ Kun an saimong tinutukduan kinokontra kan saiyang mga kapamilya, dagkahon siyang pag-isipan an posibleng dahilan. Tibaad paghuna kaya ninda nadaya siya, o tibaad may pagpalain-lain lang sinda sa mga Saksi ni Jehova. Maski an nagkapirang kapamilya ni Jesus nagin negatibo an reaksiyon sa ginigibo niya. (Mar. 3:21; Juan 7:5) Tukduan an saimong Bible study na magdanay na mapasensiya asin mataktika sa iba, pati na sa saiyang mga kapamilya.

16. Paano ta matatabangan an sarong tinutukduan sa Bibliya na ihiras an saiyang mga paniniwala sa mataktikang paagi?

¹⁶ Dawa kun nagpapahiling nin interes an mga kapamilya kan sarong tinutukduan, mas marahay na dai niya ipaliwanag an gabos nin sararuan. Ta kun iyo, tibaad mag-alangan na lugod sindang makipag-ulay sa sunod dahil sa kadakul na impormasyon. Kaya dagkahon an saimong tinutukduan na ihiras an saiyang mga paniniwala sa paaging gugustuhon kan kaulay niya na makipag-ulay pa sa sunod. (Col. 4:6) Puwede niyang dagkahon an saiyang mga kapamilya na buksan an jw.org. Makakatabang ini sa sainda na makanuod nin urog pa manungod sa mga Saksi ni Jehova sa oras asin rikas na gusto ninda.

17. Paano mo sasanayon an sarong tinutukduan kun paano sisimbagon an salang mga paghuna na tibaad igwa an iba manungod sa Mga Saksi ni Jehova? (Hilingon man an ritrato.)

¹⁷ Puwede mong gamiton an serye sa jw.org na “Parating mga Ihinahapot” para tabangan an saimong tinutukduan na mag-andam nin simpleng mga simbag sa mga posibleng ihapot kan saiyang mga kapamilya o mga katrabaho. (2 Tim. 2:24, 25) Sa katapusan kan kada leksiyon, repasuhon an seksiyon na “May mga Nagsasabi” sa librong Mabuhay nin Maugma Sagkod Pa Man! Dagkahon an saimong tinutukduan na magpraktis nin mga simbag gamit an sadiri niyang mga tataramon. Dai mag-alangan na tawan siya nin mga suhestiyon kun paano niya pa mapapagayon an saiyang simbag. An arog kaiyan na mga pagpraktis makakatabang na maidepensa niya nin may kumpiyansa an saiyang pagtubod.

18. Paano mo madadagka an sarong tinutukduan na ihiras sa ministeryo an saiyang pagtubod? (Mateo 10:27)

¹⁸ Dinagka ni Jesus an saiyang mga disipulo na ibalangibog sa publiko an maugmang bareta. (Basahon an Mateo 10:27.) Kun mapuon tulos an sarong tinutukduan na ihiras sa iba an saiyang pagtubod, mas amay siyang makakanuod na magsarig ki Jehova. Paano mo matatabangan an sarong tinutukduan na magin pasuhan niya iyan? Pag ipinaisi sa kongregasyon na magkakaigwa nin kampanya nin paghuhulit, dagkahon siyang pag-isipan kun paano siya makukuwalipikar bilang parahayag. Ipaliwanag sa saiya kun taano ta napasilan an dakul na magpuon na maghulit durante kan siring na mga kampanya. Puwede man siyang makinabang sa pagsasanay sa pagtaram sa publiko na itinatao sa midweek na mga pagtiripon. Mantang hinihinguwa niyang maabot an pasuhan na ini, makakanuod siyang ipahayag nin may kumbiksiyon an saiyang mga tinutubod.

MAGPAHILING NIN KUMPIYANSA SA TINUTUKDUAN MO

19. Paano si Jesus nagpahiling nin kumpiyansa sa saiyang mga disipulo, asin paano ta siya maaarog?

¹⁹ Bago si Jesus magsakat sa langit, sinabi niya sa saiyang mga disipulo na makakaibanan giraray ninda siya. Dai ninda nasabutan na manungod sa pagsakat ninda sa langit an sinasabi ni Jesus. Pero, nagpokus pa man giraray si Jesus sa saindang kaimbudan, bako sa saindang mga pagduda. (Juan 14:1-5, 8) Aram niya na kaipuhan ninda nin panahon para masabutan an nagkapirang bagay, arog kan langitnon na paglaom. (Juan 16:12) Puwede ta man na ipahiling na may kumpiyansa kita na mawot kan satong tinutukduan na paugmahon si Jehova.

20. Paano ipinahiling kan sarong sister sa Malawi na may kumpiyansa siya sa tinutukduan niya?

²⁰ Padagos kitang naglalaom na gusto kan satong tinutukduan na gibuhon an tama. Pag-isipan an eksperyensiya ni Chifundo na sarong sister sa Malawi. Gamit an librong Mabuhay nin Maugma Sagkod Pa Man!, napunan niya nin pag-adal sa Bibliya an sarong hoben na babaying Katoliko na an pangaran Alinafe. Kan patapos na sinda sa leksiyon 14, hinapot siya ni Chifundo kun ano an masasabi niya sa paggamit nin mga imahen sa pagsamba. Grabe su nagin reaksiyon diyan ni Alinafe. Sinabi kaini: “Personal na desisyon baga ’yan!” Inisip ni Chifundo na tibaad dahil diyan magpundo na sa pag-adal nin Bibliya si Alinafe. Pero mapasensiya niyang ipinadagos an pag-Bible study saiya, na naglalaom na pag-abot nin panahon masasabutan niya an punto. Pakalihis nin pirang bulan, ihinapot saiya ni Chifundo an hapot na nasa leksiyon 34: “Paano ka nakinabang puon kan mag-adal ka nin Bibliya asin mabisto an tunay na Diyos na si Jehova?” Inistorya ni Chifundo an nagin simbag ni Alinafe, “Dakul siyang sinambit na magagayon na punto, an saro diyan iyo na an mga Saksi ni Jehova dai nakikikabtang sa mga gibuhon na kinokondenar kan Bibliya.” Dai nahaloy pagkatapos kaiyan, nagpundo si Alinafe sa paggamit nin mga imahen asin nakuwalipikar para sa bawtismo.

21. Paano ta mapapakusog an pagmawot kan sarong tinutukduan na manindugan para sa katotoohan?

²¹ Dawa ngani si Jehova an “nagpapatalubo kaiyan,” may kabtang kita sa pagtabang sa sarong tinutukduan sa Bibliya na umuswag. (1 Cor. 3:7) Dai ta lang siya tinutukduan na gibuhon kun ano an gusto nin Diyos na gibuhon niya. Tinatabangan ta siyang magkaigwa nin hararom na pagkamuot ki Jehova. Dinadagka ta man siya na ipahiling an saiyang pagkamuot paagi sa pag-adjust sa saiyang mga priyoridad. Asin tinutukduan ta siya kun paano masarig ki Jehova pag may mga kadipisilan. Paagi sa pagpahiling nin kumpiyansa sa saiya, pinapakusog ta an saiyang kumbiksiyon na kaya man niyang mamuhay kauyon kan mga pamantayan ni Jehova asin manindugan para sa katotoohan.