An Tahaw na Sirangan—Pangyayarihan kan Armagedon?
“SA PAGDALAGAN kan kinaban pasiring sa ultimong oras nin labanan kaiyan, an importanteng siudad na dapat na bantayan bakong an Nueva York, Moscow, Paris, Peking, o Cairo. An siudad na dapat na bantayan iyo an Jerusalem!” Iyan an sabi kan mga teologong si John F. asin John E. Walvoord sa saindang librong Armageddon, Oil and the Middle East Crisis.
Tunay na dakol an may takot na nagmamasid sa Jerusalem asin sa maribok na rehiyon na namumugtakan kaiyan. Sabi kan Times nin Londres, “An Tahaw na Sirangan nagigin mas makatatakot.” May mga natatakot na an paghahampangan nin E.U.-Sobyet duman sa ngapit haros dai malilikayan. Pag-abot kan Enero 1984, an relasyon kan magkaribal na pinakamakapangyarihan na mga nasyon nagin maraoton kaya iinabante kan Bulletin of the Atomic Scientists an bantog na “relo sa katapusan kan kinaban” kaiyan (sarong simbolo kun gurano na karani an kinaban sa nuklear na pagkatunaw) sa tolong minuto bago an matangang banggi. Sabi kan Bulletin: “Kun siring kita nasa panahon na may napapalabot na mahahalagang resulta, nasa pagpopoon nin sarong panahon nin paghampangan, sarong panahon na an direktang puwersa nag-uumang sumalida sa ano pa man na ibang porma nin diskurso sa pag-oltanan kan pinakamakapangyarihan na mga nasyon. Ini makatatakot na ngapit.”
Minsan siring, an nagdadakol na mga parahulit na pundamentalista, teologo, asin mga ebanghelista sa TV inuupakan an mga pangyayaring ini. An naggagrabeng mga tension sa Tahaw na Sirangan nagbunga tanganing garo baga patunayan an saindang nakakakubhan na mga prediksion na an Armagedon madali nang mangyari sa lugar na iyan! Asin paagi sa pagtao kan patanid sa mga libro, lektura, asin mga pasale sa telebisyon, dakol na sindang natipon na mga parasuportar.
Pinag-iiriwalan kan mga komentador na ini an eksaktong pagkasunodsunod nin mga pangyayari. Alagad an sarong tipikong ‘pagkasunodsunod nin pangyayari sa Armagedon’ arog kaini: Sabi ninda, an pagpopoon kan ‘pagbilang para sa katapusan kan kinaban’ iyo an pag-establisar kan Estado nin Israel. Sa siring sinda naghohona na an inaapod na gloria harani na. Sono sa sainda, dai na mahahaloy an tunay na mga Kristiano mawawara sa daga sa panale—ta sinda aagawon pasiring sa langit. Sa panahon kan masunod na pitong taon nin “kahorasaan,” ihinuhula pa ngani kan dakol na ebanghelista na an nasyon nin Israel makokombertir sa Kristianismo. Alagad an kadaklan sa rasa nin tawo pinaghohonang mapapasairarom kan kapangyarihan nin sarong karismatikong diktador (an “Anticristo”) na mangengenot sa sarong koalisyon nin sampulong nasyon. Pati an Israel, sa paghona ninda, makikikampi sa saiya. Alagad an sarong kompederasyon nin mga nasyon na Arabe asin nin iba pa, na pangengenotan kan Rusya, magibo nin sorpresang pagsakyada sa Israel. Milagrosong papopondohon nin Dios an pagsakyadang ini, sabi kan mga pundamentalistang ini. Alagad dai mahaloy masunod an saro pang pagsakyada kan “Anticristo,” na pagpoponan kan todo-todong ralaban sa Tahaw na Sirangan—an Armagedon.
Tibaad ini garo baga totoo para sa nagkapira. Total, an Biblia talagang naghuhula nin pagtiripon nin mga nasyon para sa ralaban sa “Armagedon.” (Kapahayagan 16:14-16, King James Version) Alagad talaga daw na ipinaririsa kan Biblia na an pangyayaring ini mangyayari sa Tahaw na Sirangan? Asin ano an kahulogan kan pangyayarihan kan ralaban na ini?