Kaogmahan Paagi sa Mahalagang Relasyon

“AN BUHAY na ayam mas marahay ki sa gadan na leon.” (Eclesiastes 9:4) Sa nagkapirang tataramon na iyan, isinabi ni Hadeng Salomon kan suanoy an pundamental na katotoohan na an buhay mas mahalaga ki sa ano pa man na materyal na rogaring o ano pa man na ambisyosong pasohan na tibaad pinaglalaoman niatong maabot. Kun mayo nin buhay, dai kita makikinabang sa arin pa man sa mga bagay na ini. Iyo, an buhay kaipuhan sa satong paghanap nin kaogmahan.

Sarong Bagay na “Orog Karahay ki sa Buhay”

Alagad minsan pa gurano kahalaga kan buhay, igwa nin saro pang bagay na orog pa karahay. ‘Mapupuwede daw iyan?’ tibaad isipon nindo. ‘Ano pa an puwedeng magin mas mahalaga ki sa buhay mismo?’

Si Hadeng David kan suanoy na Israel nagtao sato kan simbag. Sa pakikipag-olay sa Kaglalang, si Jehova Dios, sia nagsabi na may hararom na pag-apresyar: “Huli ta an saimong mamomoton na pagkaherak orog karahay ki sa buhay, pag-oomawon ka kan sakuya mismong mga ngabil.” (Salmo 63:3) An odok sa pusong mga tataramon ni David nagpapaheling na an mag-ako kan mamomoton na pagkaherak nin Dios, na basado sa pagkaigwa nin marahay na relasyon sa saiya, mas mahalaga pa ki sa buhay mismo. Taano daw?

Kun Ano an Nagpapangyari sa Buhay

Ipamugtak niato na kamo tinawan nin regalo, bagay na gustong-gusto nindo. Siyempre kamo ogmahon na akoon an regalo asin tibaad makamate nin labi-labing kaogmahan sa paggamit kaiyan. Alagad tunay na kamo magigin daing utang na boot kun an saindong isip dai lumihis sa regalo pasiring sa kagtao. Bako daw na an personal na relasyon nindo asin kan kagtao an dahelan kan regalo? Kun mayo an relasyon na iyan, dai kutana nin regalo asin nin kaogmahan huli kaiyan.

Totoo man iyan sa buhay. Dawa pa iyan mahalaga, kaipuhan na isaisip niato kun saen naghale an satong buhay asin kun paano iyan sinususteniran. Tunay na dai niato linalang an satong sadiri, ni kaya man niatong susteniran iyan na siblag sa gabos na makangangalas na probisyon na ginibo ni Jehova sa daga. (Salmo 100:3; Gibo 14:17) An mismong bagay na kita may buhay, asin sierto na naoogma kita dian minsan paano, sarong kapahayagan kan mamomoton na pagkaherak kan Dakulang Kaglalang, si Jehova Dios. Dai daw niato nasasabotan kun taano ta bilog na pusong sinaboot ni Hadeng David na an “mamomoton na pagkaherak [nin Dios] orog karahay ki sa buhay”?

Igwa nin saro pang dahelan kun taano ta an pagkaigwa nin inooyonan na relasyon sa Kaglalang mas mahalaga ki sa pagkaigwa nin buhay mismo—an satong ngapit depende dian. Helingon niato kun taano.

Dai daw kamo maoyon na an buhay temporaryo asin pano nin daing kasegurohan? An saro tibaad magmahigos sa laog nin dakol na taon tanganing maabot an sarong materyalistikong pasohan na ibinibilang niang mahalaga. Pero, dai mahaloy hinahabon saiya kan kagadanan an gabos na naabot nia. Iyan parehong-pareho sa isinabi kan madonong na si Hadeng Salomon: “Ano an nakukua nin tawo para sa gabos niang pagpapagal asin para sa paghihingoa kan saiyang puso na ipinaghihigos nia sa sirong kan aldaw? Huli ta sa gabos niang aldaw an saiyang trabaho nangangahulogan nin mga kakologan asin pagkauyam, siring man sa banggi an saiyang puso dai nanggad naghihingalo. Ini man mayo nin kamanungdanan.”—Eclesiastes 2:22, 23; ikomparar an 2:3-11.

Sa ibong kaini, katuyohan kan satong mamomoton na Kaglalang na an gabos na namomoot asin nagkukuyog sa saiya makalda sa pagkasudya asin pagkabigo na namamatean niato ngonyan. Pinakokosog ni Jehova an satong boot paagi sa makangangalas na panugang ini: “Dai sinda magtotogdok asin iba an mag-oontok; dai sinda matanom asin iba an makakan. Huli ta magigin siring sa mga aldaw nin kahoy an mga aldaw nin sakuyang banwaan; asin an ginibo kan saindang mga kamot gabos na gagamiton kan sakuyang mga pinili.”—Isaias 65:22.

Bako daw na an kapahayagan na ini kan mamomoton na pagkaherak nin Dios orog karahay ki sa satong presenteng limitado asin daing kasegurohan na buhay? An mag-ako sa saiyang mamomoton na pagkaherak, iyo, an mabuhay sa Bagong Areglong iyan asin magkamit nin buhay na pano nin katuyohan asin kahulogan tunay na sarong kapakipakinabang na pasohan. Tanganing maotob an maogmang paglaom na iyan, an saro kaipuhan na magkamit kan pag-oyon ni Jehova ngonyan asin mapagdanay an dayupot na relasyon sa saiya asin sa saiyang banwaan.

An Interes sa Kadikit na Panahon Kontra sa Pakinabang sa Halawig na Panahon

Huli sa mga punto na nasa enotan, tunay na sarong kakulangan nin pagtanaw sa ngapit asin kamangmangan na kita ubuson an satong panahon sa paghanap sa sadiring interes, iyan man kabantugan, kayamanan, karera, akademikong naabot, personal na pagkakontento, o ano pa man na ibinibilang na mahalaga sa palakaw na ini nin mga bagay. Minsan ngani an mga pasohan na ini tibaad bako man na sala sa saindang sadiri, an paghanap sa arin man sa mga iyan bilang an pinakamahalagang bagay tibaad magin dahelan na mapabayaan niato an satong mga paninimbagan sa satong Kaglalang. Sa katapustapusi, tibaad mawara sa sato an saiyang pag-oyon asin dai kita magkamit kan “tunay na buhay.”—1 Timoteo 6:19; Lucas 9:24.

An paggibo nin siring puwedeng ibaing sa sarong aki na nagpondo sa pag-eskuwela asin nagtrabaho bilang bakong ekspertong trabahador tangani sanang may makuang paragastos. Tibaad paghona nia sia nakatalingkas na sa mga limitasyon nin pag-eskuwela asin masiram na an saiyang buhay. Alagad bako daw na isinasakripisyo nia an saiyang kapakanan sa halawig na panahon huli sa daing kasegurohan na interes sa kadikit na panahon? Kaya kabaing kaiyan, bako daw na an saro kulang nin pagtanaw sa ngapit kun pinababayaan nia an saiyang relasyon sa Kaglalang huli ta sia sibot-sibot sa paghanap sa sarong personal na pasohan?

Minsan pa kita gurano kasibot, parate na nahihimo niatong makakua nin oras asin kosog na gibohon an mga bagay na talagang ibinibilang niatong importante, bako daw? Kaya, paagi sa sangkap na pagkasabot sa naturalesa nin tawo, halipot pero malinaw na idinoon ni Jesus: “Huli ta kun saen an saindong kayamanan, dian man an saindong puso.”—Mateo 6:21.

Kaya sa anong “kayamanan” nindo ibinugtak an saindong puso? An kilyab asin dekorasyon kan kinaban tibaad garo baga magayonon. Alagad hapota an saindong sadiri: Gurano kahaloy an pinaghohonang mga pakinabang hale sa siring na mga bagay? Iyan daw nagtatao nin tunay na kaogmahan o nin temporaryo sanang kaalingan, na garo droga, na nagwawalat nin maraot o makolog pa nganing resulta?

Gumibo nin Madonong na Pagpili

Igwa nin mahalagang leksion na manonodan sa mga tawo kan aldaw ni Lot. “Sinda nagkakarakan, sinda nag-iirinom, sinda nagbabarakal, sinda nagpapabakal, sinda nagtatanom, sinda nagtotorogdok,” sabi ni Jesus. Sa ibang pananaram, sibot sinda na hinahanap an ibinibilang nindang mahalaga, na dai iniintindi an kabotan nin Dios. An resulta? “Kan aldaw na si Lot luminuwas sa Sodoma uminoran nin kalayo asin asupre hale sa langit asin linaglag sinda gabos.” Dangan, para sa kapakinabangan niato, idinugang ni Jesus: “Siring man an mangyayari sa aldaw na iyan na ihahayag an Aki nin tawo.”—Lucas 17:28-30.

Ipinaririsa kan gabos na tanda na an “aldaw na iyan” yaon na. Huli sa pagmakolog sa satong daing sagkod na kapakanan, si Jehova Dios nagtatao nin paorootrong pag-apod paagi sa saiyang Tataramon asin sa saiyang organisadong banwaan sa gabos na nasyon. An imbitasyon iyo na talikdan an paslong mga gibo asin makipag-uli sa saiya. Tunay na magigin kamangmangan para sa sato na pabayaan na an satong personal na intereses makaubos kan gabos niatong panahon asin kosog, kaya dai na kita nakakakuyog sa mamomoton na pag-apod na ini. Imbes, arog kan pagkasabi ni apostol Pablo, maninigo na midbidon niato an kasibotan kan mga panahon: “Uya! Ngonyan na an panahon nin pag-ako. Uya! Ngonyan na an aldaw nin kaligtasan.”—2 Corinto 5:20; 6:2.

Makakabilang daw kamo sa binendisyonan kan maogmang paglaom na makaligtas sa katapusan kan presenteng maraot na palakaw nin mga bagay pasiring sa matanos an Bagong Areglo na ipinanuga nin Dios? Iyan depende sa kun ano an ibinibilang nindong pinakamahalaga sa saindong buhay ngonyan asin kun ano an gigibohon nindo manongod sa pagkakamit nin inooyonan na relasyon sa Dios. Kamo an mapili!

[Mga Ritrato sa pahina 5]

Kun kamo nagpapasalamat sa kagtao . . .

. . . ano man an kadarudakulaing kagtao, si Jehova Dios?