Talaga daw na Nakakapaoyon sa Dios an Saindong Relihiyon?
‘AN DIOS bakong nin karibarawan kundi nin katoninongan.’ (1 Corinto 14:33) Sigurado, kun siring, an kadakol na mga relihiyon na igwa kan mga nagkakatumang na mga doktrina dai magkakamit kan pag-oyon nin Dios. Kaya, igwa sana nin sarong relihiyon na nakakaabot kan saiyang mga kahagadan para sa tunay na pagsamba. Paano niato manonompongan an relihiyon na iyan na tunay na nakakapaoyon sa Dios?
Daing duwa-duwa, namamatean nin kadaklan na an siring na paghanap magigin siring sa paghanap nin sarong dagom sa tambak nin dagami. An pagsirni kaiyan magigin sarong dakulang trabaho! Alagad igwa nin mas simpleng paagi—an paggamit nin sarong makosog na magnet. Madukot dian an dagom na asero asin malalaen iyan sa dagami. Siring man, an Biblia puwedeng gamiton bilang magnet tanganing laenon an katotoohan sa sala. Alagad paano iyan ginigibo kan Biblia? Paagi sa pagpaliwanag kan maaakong pagsamba sa punto-de-vista nin Dios.
Si apostol Pablo nagsurat: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, andam nanggad para sa lambang marahay na gibo.” (2 Timoteo 3:16, 17) An tamang kaaraman sa Biblia kaipuhan kun satuyang lilikayan an siod nin pagtawad sa relihiyosong debosyon sa puntong pasil o nakakaoyon sato.
Bilang kadagdagan, si Cristo Jesus, an Aki nin Dios, nagsabi: “An Dios espiritu, asin idtong nagsasamba saiya kaipuhan na magsamba saiya sa espiritu asin sa katotoohan.” (Juan 4:24) Paano kita “makakapagsamba sa espiritu asin sa katotoohan”? Paagi sa pagsonod sa makatotoohan na mga giya na itinao nin Dios, paagi sa saiyang pagpasabong, sa saiyang Tataramon, an Banal na Biblia.
Tunay na mga Parasamba Nagpapaheling nin Pagkamoot
Sa ano kita ginigiyahan kan Tataramon nin Dios na laoman an tunay na pagsamba? Igwa kita nin pinakamadaleng giya sa tolong tataramon: “An Dios pagkamoot.” (1 Juan 4:16) Kun siring, an pagsamba na nakakapaoyon sa Dios kaipuhan na magin basado sa tunay na pagkamoot.
Sa praktikal na sentido, ano an boot sabihon kaiyan? An relihiyon na nakakapaoyon sa Dios dai makakapagtokdo o makakatogot nin pagkaongis sa kapuwa tawo. An simpleng pagboot kan Biblia iyo, “Mamotan mo an saimong kataed nin siring sa saimo man sana.” (Mateo 22:39) Nangangahulogan iyan nin pagsiblag sa mga pagkaorongisan kaining kinaban, pagpalaenlaen, asin iriwal. Iyan nangangahulogan nin dai na pag-adal sa pakipag-iwal asin paghanap nin katoninongan.—Isaias 2:2-4.
Sa pag-ilustrar: Maiimahinar daw niato an sarong “Prenses” na apostol Pablo dudomanan an sarong “Aleman” na apostol Pedro tanganing gadanon huli sana ta an saindang mga nasyon nagdeklara nin ralaban? Pero, durante kan ikaduwang guerra mundial kadaklan sa mga relihiyon biyong naimbuwelto sa mga paghihingoa sa guerra kan saindang mga nasyon na sinda mismo nagsuplay nin mga kapelyan para sa armada! Siring man, an mga “Kristiano” na mga klero sa ambas parte namimibi sa parehong Dios para sa kapangganahan. Alagad nababanga daw an Dios? Puwede daw siang guyodon sa sinasabi ni Propesor Albert Einstein na “poon sa pagkaniaki na helang” nin nasyonalismo, “an tipdas nin katawohan”? Siyempre dai! Kaya an mga parasamba na tunay na nakakapaoyon sa Dios kaipuhan magdanay na neutral asin nagsasagibo nin tunay na pagkamoot. (Juan 13:34, 35; 17:16) Sinda ‘dai nakikilaban sono sa laman.’—Ikomparar an 2 Corinto 10:3, 4.
An Tunay na Pagsamba Nagmumuraway kan Ngaran nin Dios
Si apostol Pablo nagtokdo sa saro pang tanda nin relihiyon na tunay na nakakapaoyon sa Dios kan sia magsabi na minsan ngani dakol an mga inaapod na mga Dios asin mga kagurangnan, sa tunay na mga parasamba igwa sana nin “sarong Dios an Ama.” (1 Corinto 8:5, 6) Sierto, kun siring, an nakakapaoyon sa Dios aram asin ginagamit an saiyang ngaran.
An Biblia, sa orihinal na mga tataramon kaiyan, espisipikong sinasambit an ngaran nin Dios nin labing 7,000 beses. Halimbawa, sa Salmo 83:18 mababasa: “Tanganing an mga tawo makaaram na ika, na an ngaran iyo si Jehova, ika sana an Kaharohalangkawe sa bilog na daga.” Kun siring taano an mga parasunod kan kadakol na mga relihiyon ta nagsasaramba sa sarong daing ngaran na Dios? Asin taano ta hinale ninda an saiyang ngaran sa saindang mga salin nin Biblia? Siertong iyan bako an paagi na makakapaoyon sa Dios, huli ta si Jesus namibi: “Pakangbanalon logod an saimong ngaran.”—Mateo 6:9.
An Relihiyon na Nakakapaoyon sa Dios
Igwa daw nin pankinaban na relihiyosong grupo na nakakaotob kan duwang pangenot na kahagadan nin tunay na pagsamba na satuya pa sanang pinag-olayan? Igwa daw nin relihiyon na tunay na nagsasagibo kan pagkamoot na itinokdo ni Cristo? Asin talaga daw na an mga parasambang iyan nagmumuraway sa Dios asin iginagalang an saiyang ngaran sa ikabeinteng siglong ini?
Probado na nin katunayan na an mga Saksi ni Jehova nagdadanay sa saindang neutralidad kun dapit sa mga ralaban nin mga nasyon. Huli sa mga rason na ini, sinda nagsapo sa mga kampo de konsentrasyon asin sa mga karsel. Imbes na ikompromiso an saindang mga basado sa Bibliang mga prinsipyo, pinili ninda an dalan pasiring sa pagkamartir na inagihan kan enot na mga Kristiano. Huli sa saindang pagkamoot sa Dios asin sa kapuwa tawo pinahiro sinda na manindogan nin siring. An siring na pagkamoot sarong tanda nin tunay na pagsamba na nakakapaoyon sa Dios.
Dakol an nakarisa kan marahay na rekord kan mga Saksi ni Jehova sa bagay na ini. Halimbawa, pirang taon pa sana an nakaagi an sarong publikador nin diaryo sa America del Sur nagsabi na an mga Saksi “minasayuma huli sa dahelan nin konsensia na maglingkod sa puwersa armada.” Sia nagpadagos: ‘Maski sa pagkaniaki, an mga Saksi ni Jehova nakakaisi na sa pag-abot nin edad na desiotso sinda mag-aagi nin halawig na peryodo sa karsel huli kan saindang neutralidad. Inako ninda an penalidad bilang kabtang kan saindang relihiyosong pagtubod. Sinda maboot asin matoninong.’
Ano naman an saro pang kahagadan nin relihiyon na nakakapaoyon sa Dios? Totoo, siisay an nag-oonra sa banal na ngaran, na Jehova? Malinaw na an mga Saksi ni Jehova sana an nagsasagibo kaini sa bilog na kinaban paagi sa saindang paghuhulit asin kan saindang gawe.—Roma 10:13-15.
Taano ta dai orog na aramon an mga Saksi ni Jehova? An maheheling na listahan kan nagkapira kan saindang mga pagtubod, kaiba kan Makakakasuratan na mga rason kaiyan. Paagihon sa simpleng pagbalong ini an porma nin pagsamba kan mga Saksi: Naaabot daw kaiyan an mga pamantayan nin Dios sa katotoohan na ilinagda sa Biblia? Ikinakapaheling daw kaiyan an nagpapatoninong na bunga nin pagkamoot na kaipuhan magin kabtang kan tunay na pagsamba? Iyan daw nag-oonra sa ngaran nin Dios? Kun manompongan nindo na ginigibo ini gabos, madidiskubre nindo an tunay na relihiyon na talagang nakakapaoyon sa Dios.
[Kahon sa pahina 6]
MGA PAGTUBOD NIN MGA SAKSI NI JEHOVA
PAGTUBOD BASIHAN SA BIBLIA
Jehova an ngaran nin Dios Exodo 6:3; Salmo 83:18
An Biblia iyo an Tataramon nin Dios Juan 17:17;
Si Cristo Jesus iyo an Aki nin Dios Mateo 3:16, 17; Juan 14:28
An tawo bakong bunga nin ebulusyon Genesis 1:27; 2:7
kundi linalang ․
An kagadanan nin tawo huli sa kasalan Roma 5:12
ni Adan
An kalag napapara sa kagadanan Parahulit 9:5, 10;
An impiyerno iyo an ordinaryong Job 14:13; Kapahayagan lulubngan nin tawo 20:13, King James Version
An pagkabuhay liwat iyo an paglaom Juan 5:28, 29; 11:25;
nin mga gadan Gibo 24:15
An buhay ni Cristo sa daga iyo an Mateo 20:28; 1 Pedro 2:24; pambalukat sa maimbod na katawohan 1 Juan 2:1, 2
An mga pamibi idolok ki Jehova
sana paagi ki Cristo Mateo 6:9; Juan 14:6, 13, 14
An mga pagboot nin Biblia
sa moral kaipuhan sunodon 1 Corinto 6:9, 10
An mga ladawan dai kaipuhan gamiton
sa pagsamba Exodo 20:4-6; 1 Corinto 10:14
An espiritismo kaipuhan likayan Deuteronomeo 18:10-12; Galacia 5:19-21
An dugo dai dapat ilaog sa hawak
nin saro Genesis 9:3, 4; Gibo 15:28, 29
An Kristiano kaipuhan sumiblag sa Juan 15:19; 17:16; Santiago
kinaban 1:27; 4:4
Kaipuhan magpatotoo an mga Kristiano, Isaias 43:10-12; Mateo 24:14;
nagpapahayag kan “maogmang bareta” 28:19, 20
An bautismo paagi sa biyong pagladop Marcos 1:9, 10; Juan 3:23;
nagsisimbolo nin dedikasyon sa Dios Gibo 19:4, 5
An relihiyosong mga titulo bakong tama Job 32:21, 22; Mateo 23:8-12
Yaon na kita ngonyan “sa panahon Daniel 12:4; Mateo 24:3-14;
nin katapusan” 2 Timoteo 3:1-5
An presensia ni Cristo espirituwal Mateo 24:3; Juan 14:19;
Si Satanas an dai naheheling na Juan 12:31; 1 Juan 5:19
hade kan kinaban
Lalaglagon nin Dios an presenteng Daniel 2:44; Kapahayagan
maraot na sistema nin mga bagay 16:14, 16; 18:1-8
An Kahadean sa irarom ni Cristo iyo Isaias 9:6, 7; Daniel
an magsasakop sa daga sa katanosan 7:13,14; Mateo 6:10
An “sadit na aripompon” magsasakop Lucas 12:32; Kapahayagan
kaiba ni Cristo sa langit 14:1-4; 20:4
An ibang tawo na inoyonan nin Dios Lucas 23:43; Juan 3:16
mag-aako nin daing sagkod na buhay
sa paraiso sa daga
[Mga Retrato sa panid 5]
Paano nindo makukuaan sarong dagom sa tambak nin dagami?
Paano nindo manonompongan an tunay na relihiyon?