Nakapaoogma daw sa Dios an Gabos na Relihion?
Sa paghona daw nindo nakapaoogma sa Dios an gabos na relihion? Posible na an arin man na porma nin pagsamba na aram nindo nag-eenkaminar nin marahay na gawe, kisuerra sa limitadong paagi. Alagad igo na daw iyan tanganing makapaogma sa Dios?
AN IBA nagsasabi, ‘Magin ka sanang sinsero sa saimong pagsamba, asin maoogma na an Dios. May karahayan sa gabos na relihion.’ Halimbawa, an Pagtubod nin Bahai inako an punto-de-vistang ini sagkod sa punto na iiba sa mga paniniwala kaiyan an siyam na pangenot na relihion sa kinaban. An grupo relihiosong ini naniniwala na ini gabos gikan sa Dios asin mga kabtang kan sarong katotoohan. Paano ini puedeng magin siring?
Dugang pa, kamo may dahelan na mag-isip-isip kun paano makapaoogma sa Dios an sarong relihion kun pinagbobotan kaiyan an mga miembro kaiyan na magbugtak nin gas na patama sa nerbios sa pampublikong mga lugar, na may posibilidad na makagadan nin dakol na tawo. Iyan an sahot tumang sa sarong grupo relihioso sa Hapon. O naoogma daw an Dios sa sarong relihion na pinapaghuhugot an mga miembro kaiyan? Kaidtong pirang taon na an nakaagi, iyan an nangyari sa mga parasunod kan namomoon sa relihion na si Jim Jones.
Sa pagsalingoy sa mas naenot na mga panahon, marahay na ihapot niato, Makapaoogma daw sa Dios an mga relihion kun sinda nagsusutsut nin guerra, arog kan nangyari sa Treinta Anyos na Guerra, na pinaglabanan poon 1618 sagkod 1648? Sono sa The Universal History of the World, an relihiosong ralaban na idto sa pag-oltanan nin mga Katoliko asin Protestante “saro sa pinakateribleng guerra sa kasaysayan nin Europa.”
An relihiosong mga Krusada poon kan ika-11 sagkod ika-13 siglo nagbunga man nin makatatakot na pagpabolos nin dugo. Halimbawa, kan enot na Krusada, an Kristiano daang mga krusado mabangis na ginaradan an mga residenteng Muslim asin Judio sa Jerusalem.
Horophoropa man an nangyari kaidtong Inkisisyon, na nagpoon kan ika-13 siglo asin luminawig nin mga 600 na taon. Rinibo an pinasakitan asin sinolo sagkod na magadan sa pagboot nin mga namomoon sa relihion. Sa saiyang librong Vicars of Christ—The Dark Side of the Papacy, si Peter De Rosa nagsasabi: “Sa ngaran kan papa, [an mga inkisidor] responsable sa pinakamaringis asin haloy na pagsalakay sa pagkadisente nin tawo sa kasaysayan kan rasa [nin tawo].” Mapadapit sa inkisidor na Dominico na si Torquemada nin España, si De Rosa nagsasabi: “Ninombrahan kan 1483, sia maringis na namahala sa laog nin kinse anyos. An mga biktima nia may kabilangan na labing 114,000 na an 10,220 kaiyan sinolo.”
Siempre, an mga relihion nin Kakristianohan bako sanang iyo an nagkasala sa dugo. Sa saiyang librong Pensées, an pilosopong Pranses na si Blaise Pascal nagkomento: “An mga tawo nungka na minagibo nin karatan na lubos asin maogmahon na arog kun ginigibo ninda iyan huli sa relihiosong pagtubod.”
Namimidbid Paagi sa Saindang mga Bunga
Sa punto-de-vista nin Dios, an pagigin maaako nin sarong relihion bakong basado sa saro sanang bagay. Tangani na maako nia an sarong relihion, an mga katokdoan asin aktibidad kaiyan dapat na oyon sa saiyang nasusurat na Tataramon nin katotoohan, an Biblia. (Salmo 119:160; Juan 17:17) An bunga nin pagsamba na aprobado nin Dios dapat na oyon sa mga pamantayan ni Jehova Dios.
Sa saiyang Sermon sa Bukid, ipinarisa ni Jesu-Cristo na magkakaigwa nin mga propeta na putik na naghihingako na nagrerepresentar sa Dios. Si Jesus nagsabi: “Magmaan kamo sa mga falsong propeta na minadolok sa saindo sa gubing nin karnero, alagad sa laog sinda maringis na mga lobo. Paagi sa saindang mga bunga mamimidbid nindo sinda. Noarin man an mga tawo dai minaguno nin ubas sa mga tonok o nin mga higos sa mga binit, bako daw? Siring man an gabos na kahoy na marahay nagbubunga nin marahay, alagad an gabos na kahoy na raot nagbubunga nin daing data; an marahay na kahoy dai makakapamunga nin daing data, ni makakapamunga man nin marahay an raot na kahoy. An lambang kahoy na dai nagbubunga nin marahay pinuputol asin iinaapon sa kalayo. Tunay, kun siring, paagi sa saindang mga bunga mamimidbid nindo an mga tawong iyan.” (Mateo 7:15-20) Ipinaheheling kan mga tataramon na ini na kita kaipuhan na magin alisto sa espirituwal na paagi. Tibaad pinaghohona niato na an sarong namomoon sa relihion o grupo relihioso maaako nin Dios asin ni Cristo, alagad ta puede kitang masala.
Pangangaipong Mag-ingat
Minsan an sarong relihion naghihingako na inooyonan nin Dios asin an mga ministro kaiyan nagbabasa nin mga teksto sa Biblia, iyan dai nangangahulogan na iyan porma nin pagsamba na nakapaoogma sa Dios. Tibaad naggigibo pa ngani nin kahangahangang mga bagay an mga namomoon dian na minapalataw na an Dios naghihiro paagi sa sainda. Minsan siring, puedeng falso pa man giraray an relihion, na dai nagpapaluwas nin mga bunga na maaako nin Dios. An nagmamahikang mga saserdoteng Egipcio kan kaaldawan ni Moises nakagibo nin kahangahangang mga bagay, alagad tunay na mayo sa sainda an pag-oyon nin Dios.—Exodo 7:8-22.
Ngonyan arog kaidtong nakaagi, an dakol na relihion nagpapalakop nin mga ideya asin pilosopiya nin tawo imbes na magsusog sa sinasabi nin Dios na iyo an katotoohan. Kun siring, nangorognang angay an patanid kan Biblia: “Mag-ingat kamo: tibaad may saro na bumihag sa saindo paagi sa pilosopiya asin basang na daya sono sa tradisyon nin mga tawo, sono sa enot na mga katokdoan kan kinaban asin bakong sono ki Cristo.”—Colosas 2:8.
Pakataram manongod sa marahay asin raot na bunga, si Jesus nagsabi: “Bakong gabos na nagsasabi sa sako, ‘Kagurangnan, Kagurangnan,’ makalalaog sa kahadean kan kalangitan, kundi idtong naggigibo kan kabotan kan sakong Ama na nasa kalangitan. Balakid an masarabi sa sako sa aldaw na iyan, ‘Kagurangnan, Kagurangnan, bakong kami naghula sa ngaran mo, asin nagpaluwas nin mga demonyo sa ngaran mo, patin naggibo nin dakol na ngangalasan sa ngaran mo?’ Alagad ta sasabihan ko sinda: Dai ko kamo noarin man namidbid! Humarayo kamo sa sako, kamong mga paragibo nin katampalasanan.”—Mateo 7:21-23.
Siyasaton an Bunga
Malinaw, kun siring, mahalagang marhay na helingon an bunga nin sarong relihion bago magkonklusyon na iyan maaako nin Dios. Halimbawa, kalabot daw sa politika an relihion? Kun siring mangnoha an mga tataramon na ini, na nasusurat sa Santiago 4:4: “An siisay man . . . na boot na magin katood kan kinaban ginigibo an saiyang sadiri na kaiwal nin Dios.” Dugang pa, si Jesus nagsabi manongod sa saiyang tunay na mga parasunod: “Sinda bakong kabtang kan kinaban, kun paanong ako bakong kabtang kan kinaban.” (Juan 17:16) An relihion na marahay sa mga mata nin Dios dai kalabot sa politika kan kinaban na ini, na “namumugtak sa kapangyarihan kan maraot,” an dai naheheling na espiritung linalang na si Satanas na Diablo. (1 Juan 5:19) Imbes, an relihion na inooyonan nin Dios maimbod na nagrerekomendar kan saiyang Kahadean sa pangengenot ni Jesu-Cristo asin nagpapahayag kan maogmang bareta mapadapit sa langitnon na gobyernong iyan.—Marcos 13:10.
Maaako daw nin Dios an sarong relihion kun iyan nagrerekomendar nin pakisuway sibil? Risang marhay an simbag kun hinihinanyog niato an hatol ni apostol Pablo: “Padagos na ipagirumdom sa sainda na magpasakop asin magkuyog sa mga gobyerno asin autoridad bilang mga namamahala, na magin andam para sa gabos na marahay na gibo.” (Tito 3:1) Siempre, ipinaheling ni Jesus na an saiyang mga parasunod dapat na ‘itao ki Cesar an mga bagay na ki Cesar, alagad sa Dios an mga bagay na sa Dios.’—Marcos 12:17.
Halimbawa an sarong relihion nag-eenkaminar nin pagpartisipar sa mga guerra kan mga nasyon. An Enot na Pedro 3:11 nagsasadol sa sato na ‘gumibo nin marahay’ asin ‘hanapon an katoninongan asin gibohon iyan.’ Paano makapaoogma sa Dios an sarong relihion kun an mga miembro kaiyan andam na gadanon an saindang mga kapwa parasamba sa ibang nasyon kun may guerra? An mga miembro kan relihion na inooyonan nin Dios nagpapabanaag kan saiyang pangenot na kualidad—an pagkamoot. Asin si Jesus nagsabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) An pagkamoot na iyan mayong koneksion sa madahas na pagkaongis na pinakokosog sa mga guerra kan mga nasyon.
An tunay na relihion binabakle an mga tawong gustong makiguerra na magin mga mamomoton sa katoninongan. Ini ihinula sa mga tataramon na ini: “Dadaragopdopon ninda an saindang mga minasbad na magin tarom nin arado asin an saindang mga budyak na magin mga sanggot. An nasyon dai mabingat nin minasbad tumang sa nasyon, ni mag-aadal pa man sinda sa pakilaban.” (Isaias 2:4) Imbes na magluwa nin mga tataramon nin pagkaongis, an mga naggigibo nin tunay na pagsamba kinukuyog an pagboot: “Kamotan mo an saimong kataed nin siring sa saimo man sana.”—Mateo 22:39.
An mga naggigibo kan tunay na relihion naghihingoa na mamuhay sono sa halangkaw na mga pamantayan ni Jehova Dios, na nagsasayumang arogon an inmoral na mga estilo nin pamumuhay. An Tataramon nin Dios nagsasabi: “Ano! Dai kamo nakaaaram na an mga bakong matanos dai magmamana kan kahadean nin Dios? Dai kamo palagalag. Bakong mga parapakisaro, ni mga parasamba sa idolo, ni mga parasambay, ni mga binabae, ni mga lalaki na minadorog sa kapwa lalaki, ni mga parahabon, ni mga paslo, ni mga paraburat, ni mga paramuda, ni mga parakikil an magmamana kan kahadean nin Dios. Alagad ta arog kaiyan kaidto an nagkapira sa saindo. Alagad kamo nahugasan na, alagad kamo sinantipikar na, alagad kamo ipinahayag nang matanos sa ngaran kan satong Kagurangnan na si Jesu-Cristo asin sa espiritu kan satong Dios.”—1 Corinto 6:9-11.
Panahon nin Dai Mapagdududahan na Paghiro
Mahalagang marhay na mamidbid an kalaenan kan falsong pagsamba asin kan tunay na relihion. Sa libro kan Biblia na Kapahayagan, an pankinaban na imperyo nin falsong relihion inaapod na “Dakulang Babilonya,” sarong simbolikong patotot “na sa saiya nakikisaro an mga hade kan daga.” Sia may kasalan sa dugo asin may kapot na kopang bulawan na “pano nin makababaldeng mga bagay asin kan marompot na mga bagay kan saiyang pakikisaro.” (Kapahayagan 17:1-6) Mayo nin ano man manongod sa saiya na maaako nin Dios.
Ini panahon para sa dai mapagdududahan na paghiro. Sa sinserong mga tawo na yaon pa sa Dakulang Babilonya, ini an pangapodan kan satong mamomoton na Kaglalang: “Lumuwas kamo sa saiya, banwaan ko, kun habo nindong makikabtang sa saiyang mga kasalan, asin kun habo nindong mag-ako nin kabtang kan saiyang mga damat.”—Kapahayagan 18:4.
Kun boot nindong gumibo nin relihion na nakapaoogma sa Dios, taano ta dai midbidon nin orog an Mga Saksi ni Jehova? Ilinista sa kaibang tsart an nagkapira sa saindang mga tinutubod, kaiba an Makakasuratan na mga dahelan para kaini. Helinga an saindong Biblia tanganing aramon kun baga an mga tinutubod kan mga Saksi kaoyon kan Tataramon nin Dios. Magsiyasat tanganing maaraman kun baga an saindang relihion nagpapaluwas kan bunga na lalaoman nindo sa tunay na pagsamba. Kun maaraman nindong iyo, nadiskobre na nindo an relihion na nakapaoogma sa Dios.
[Kahon sa pahina 5]
AN TINUTUBOD KAN MGA SAKSI NI JEHOVA
TINUTUBOD BASEHAN SA BIBLIA
An ngaran nin Dios Jehova Exodo 6:3; Salmo 83:18
An Biblia Tataramon nin Dios Juan 17:17; 2 Timoteo 3:16,17
Si Jesu-Cristo Aki nin Dios Mateo 3:16, 17; Juan 14:28
An katawohan dai nag-ebolusyon Genesis 1:27;2:7
kundi linalang
An kagadanan nin tawo huli sa pagkakasala Roma 5:12
kan enot na tawo
An kalag dai na nag-eeksister pagkagadan Eclesiastes 9:5, 10; Ezequiel 18:4
An impierno iyo an pankagabsan na lolobngan nin katawohan Job 14:13; Kapahayagan 20:13, King James Version
Pagkabuhay liwat an paglaom Juan 5:28, 29; 11:25; Gibo 24:15
para sa mga gadan
Itinao ni Cristo an saiyang daganon Mateo 20:28; 1 Pedro 2:24; na buhay bilang an pantubos para sa 1 Juan 2:1, 2
makinuyog na mga tawo
An mga pamibi dapat na ipanongod Mateo 6:9; Juan 14:6, 13, 14
sana ki Jehova paagi ki Cristo
An mga ley sa Biblia manongod sa moralidad 1 Corinto 6:9, 10
dapat na kuyogon
An mga imahen dapat na dai gamiton Exodo 20:4-6; 1 Corinto 10:14
sa pagsamba
Dapat na likayan an espiritismo Deuteronomio 18:10-12; Galacia 5:19-21
An dugo dai dapat na ilaog sa Genesis 9:3, 4; Gibo 15:28, 29
hawak nin saro
An tunay na mga parasunod ni Jesus Juan 15:19; 17:16; Santiago 1:27; 4:4
danay na siblag sa kinaban
An mga Kristiano saksi, Isaias 43:10-12;
na naghahayag kan maogmang bareta Mateo 24:14; 28:19, 20
An bautismo paagi sa biyong pagbuntog sa tubig Marcos 1:9, 10; Juan 3:22;
nagsisimbolo nin pagdusay sa Dios Gibo 19:4, 5
An relihiosong mga titulo Job 32:21, 22; Mateo 23:8-12
bakong sono sa Kasuratan
Kita nabubuhay sa Daniel 12:4; Mateo 24:3-14;
“panahon kan katapusan” 2 Timoteo 3:1-5
An presensia ni Cristo dai naheheling Mateo 24:3; Juan 14:19; 1 Pedro 3:18
Si Satanas an dai naheheling Juan 12:31; 1 Juan 5:19
na namamahala sa kinaban na ini
Lalaglagon nin Dios ining maraot Daniel 2:44;
na palakaw nin mga bagay Kapahayagan 16:14, 16; 18:1-8
An Kahadean nin Dios sa Isaias 9:6, 7; Daniel 7:13,14;
pangengenot ni Cristo Mateo 6:10
mamamahala sa daga sa katanosan
“Sadangoton na aripompon” mamamahala Lucas 12:32;
sa langit kaiba ni Cristo Kapahayagan 14:1-4; 20:4
An iba na inooyonan nin Dios Lucas 23:43; Juan 3:16;
mag-aako nin buhay na daing sagkod Kapahayagan 21:1-4
sa sarong paraisong daga
[Retrato sa pahina 4]
Rinibo an ginadan kaidtong panahon nin Inkisisyon
[Retrato sa pahina 6]
An mga Krusada nagbunga nin makatatakot na pagpabolos nin dugo
[Retrato sa pahina 7]
An tunay na relihion namimidbid paagi sa marahay na bunga kaiyan
[Pasasalamat para sa pinagkuanan kan retrato sa pahina 2]
Cover: Garo Nalbandian