Kun Taano an Tunay na Pagsamba ta Nag-aako kan Bendisyon nin Dios
“Omawa nindo si Jah, banwaan! An kaligtasan asin an kamurawayan patin an kapangyarihan sadiri nin satong Dios, huli ta an saiyang mga paghokom totoo asin matanos.”—KAPAHAYAGAN 19:1, 2.
1. Paano malalaglag an Dakulang Babilonya?
AN “Dakulang Babilonya” buminagsak na sa pagheling nin Dios asin napaaatubang na ngonyan sa pagkapara. An hula sa Biblia nagpapaheling na an pambilog na kinaban na relihiosong patotot na ini sa dai na mahahaloy magagadan sa kamot kan saiyang politikal na mga sambay; an saiyang katapusan magigin bigla asin marikas. An kapahayagan ni Jesus ki Juan igwa kan makahulang mga tataramon na ini: “An sarong makosog na anghel kuminua nin sarong gapo na siring sa dakulang gilingan asin iinapon iyan sa dagat, na nagsasabi: ‘Siring kaiyan karikas iaapon an Babilonya na dakulang siudad, asin dai na sia noarin man makukua giraray.’”—Kapahayagan 18:2, 21.
2. Ano an magigin reaksion kan mga lingkod ni Jehova sa kalaglagan kan Babilonya?
2 An kalaglagan kan Dakulang Babilonya pagtatangisan kan nagkapirang elemento kan kinaban ni Satanas alagad seguradong bakong kan mga lingkod nin Dios, langitnon o daganon. An saindang magayagayang kurahaw sa Dios magigin: “Omawa nindo si Jah, banwaan! An kaligtasan asin an kamurawayan patin an kapangyarihan sadiri nin satong Dios, huli ta an saiyang mga paghokom totoo asin matanos. Huli ta hinokoman na nia an dakulang patotot na nanraot sa daga paagi sa saiyang pakikisaro, asin siningil na nia an dugo kan saiyang mga oripon sa saiyang kamot.”—Kapahayagan 18:9, 10; 19:1, 2.
Anong Bunga an Kaipuhan na Paluwason kan Tunay na Relihion?
3. Anong mga hapot an nangangaipo nin simbag?
3 Mantang hahaleon sa daga an falsong relihion, anong klase nin pagsamba an matatada? Paano niato maaaraman ngonyan kun arin na relihiosong grupo an makaliligtas sa kalaglagan kan pankinaban na imperyo nin falsong relihion ni Satanas? Ano an matanos na bunga na kaipuhan na paluwason kan grupong ini? Igwa nin kisuerra sampulong pagbabasaran sa paghusgar tanganing mamidbid an tunay na pagsamba ki Jehova.—Malaquias 3:18; Mateo 13:43.
4. Ano an enot na kahagadan para sa tunay na pagsamba, asin paano si Jesus nagtao kan halimbawa sa bagay na ini?
4 Enot sa gabos, an tunay na mga Kristiano kaipuhan na suportaran an soberaniya na para dian si Jesus nagadan—an soberaniya kan saiyang Ama. Dai itinao ni Jesus an saiyang buhay para sa arin man na politikal, rasyal, etniko, o sosyal na katuyohan. Ipinaorog nia an Kahadean kan saiyang Ama sa gabos na politikal o rebolusyonaryong ambisyon kan mga Judio. Sinimbag nia an alok ni Satanas na kinabanon na kapangyarihan sa mga tataramon na: “Humale ka, Satanas! Huli ta nasusurat, ‘Ika sumamba ki Jehova na saimong Dios, asin sa saiya ka sana magtao nin banal na paglilingkod.’” Aram nia sa Hebreong Kasuratan na si Jehova an tunay na Soberano sa bilog na daga. Arin na relihiosong grupo an malinaw na nagsusuportar sa pamamahala ni Jehova imbes na sa politikal na mga sistema kan kinaban na ini?—Mateo 4:10; Salmo 83:18.
5. (a) Paano maninigong mansayon nin tunay na mga parasamba an ngaran nin Dios? (b) Ano an nagpapaheling na an Mga Saksi ni Jehova talagang nagtatao nin onra sa ngaran na iyan?
5 An ikaduwang kahagadan iyo na an tunay na pagsamba kaipuhan na pakangdakulaon asin pakabanalon an ngaran nin Dios. An Makakamhan sa gabos ipinamidbid an saiyang ngaran na Jehova (na trinadusir na Yahweh sa nagkapirang bersion kan Biblia), sa saiyang banwaan na Israel, asin iyan ginamit nin rinibong beses sa Hebreong Kasuratan. Dawa antes pa kaiyan, si Adan, si Eva, asin iba pa nakaaram na kan ngaran na iyan, minsan ngani dai ninda iyan perming irinespeto. (Genesis 4:1; 9:26; 22:14; Exodo 6:2) Mantang an mga paratradusir nin Kakristianohan asin Kajudiohan sa parate hinahale an ngaran nin Dios sa saindang mga Biblia, an Mga Saksi ni Jehova tinawan an ngaran na iyan kan angay sanang posisyon asin paggalang sa New World Translation of the Holy Scriptures. Tinatawan ninda nin onra an ngaran na iyan, kun paanong iyan ginibo kan enot na mga Kristiano. Si Santiago nagpatotoo: “Si Simeon nagsaysay nin lubos kun paanong an Dios sa enot na pangyayari nagtao kan saiyang atension sa mga nasyon tanganing kumua hale sa sainda nin sarong banwaan para sa saiyang ngaran. Asin digdi minaoyon an mga tataramon kan Mga Propeta, . . . ‘tanganing an mga natatada sa mga tawo odok sa boot na hanapon si Jehova, kaiba kan mga tawo kan gabos na nasyon, mga tawo na inaapod sa sakong ngaran, sabi ni Jehova, na iyo an naggigibo kan mga bagay na ini.’”—Gibo 15:14-17; Amos 9:11, 12.
6. (a) Ano an ikatolong kahagadan para sa tunay na pagsamba? (b) Paano idinoon ni Jesus asin ni Daniel an pamamahala kan Kahadean? (Lucas 17:20, 21)
6 An ikatolong kahagadan para sa tunay na pagsamba iyo na maninigong ilangkaw kaiyan an Kahadean nin Dios bilang an solamenteng lehitimo asin maaser na solusyon sa mga problema nin katawohan manongod sa pamamahala. Si Jesus malinaw na nagtokdo sa saiyang mga parasunod na ipamibi na dumatong an Kahadean na iyan, na an pamamahala nin Dios sumakop sa daga. Si Daniel pinasabngan na humula manongod sa huring mga aldaw: “An Dios nin kalangitan mapatindog nin sarong kahadean na dai noarin man malalaglag. . . . Iyan an maronot asin matapos kan gabos na ining [kinabanon, politikal na] kahadean, asin iyan magdadanay sagkod lamang.” Siisay an nagpaheling paagi sa saindang aksion sa ika-20 siglong ini na sinda nagtatao nin dai nababangang pagsuportar sa Kahadean na iyan—an mga relihion daw kan Dakulang Babilonya o an Mga Saksi ni Jehova?—Daniel 2:44; Mateo 6:10; 24:14.
7. Paano minamansay kan tunay na mga parasamba an Biblia?
7 An ikaapat na kahagadan para sa pag-oyon nin Dios iyo na an tunay na mga lingkod nin Dios maninigong pangaptan an Biblia bilang ipinasabong na Tataramon nin Dios. Kun siring sinda dai mabibiktima kan mas halangkaw na gradong pagkritika, na naghihingoang ibaba an Biblia sa pagigin saro sanang surat nin tawo na yaon an gabos na pagkukulang na siempre kaiba kaini. An Mga Saksi ni Jehova nagtutubod na an Biblia ipinasabong na Tataramon nin Dios, siring sa isinurat ni Pablo ki Timoteo: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, andam nanggad para sa lambang marahay na gibo.”a Kun siring, inaako kan Mga Saksi ni Jehova an Biblia bilang saindang giya, saindang manwal para sa pan-aroaldaw na pamumuhay, asin saindang burabod nin paglaom para sa ngapit.—2 Timoteo 3:16, 17.
An Relihion na May Pagkamoot, Bakong Pagkaongis
8. Ano an ikalimang kahagadan para sa tunay na pagsamba?
8 Paano ipinaheling ni Jesus an kalaenan kan saiyang tunay na mga parasunod? An saiyang simbag dinadara kita sa mahalagang ikalimang nagpapamidbid na tanda kan tunay na pagsamba. Si Jesus nagsabi: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:34, 35) Paano ipinaheling ni Jesus an saiyang pagkamoot? Paagi sa pagtao kan saiyang buhay bilang pantubos na atang. (Mateo 20:28; Juan 3:16) Taano an tunay na pagkamoot ta mahalagang kualidad para sa tunay na mga Kristiano? Si Juan nagpaliwanag: “Mga namomotan, padagos kitang magkaminorootmootan, huli ta an pagkamoot gikan sa Dios . . . An dai namomoot dai nakakamidbid sa Dios, huli ta an Dios pagkamoot.”—1 Juan 4:7, 8.
9. Sairisay an nagpaheling nin tunay na pagkamoot, asin paano?
9 Siisay sa satong panahon an nagpaheling kan klaseng ini nin pagkamoot, dawa sa atubangan nin rasyal, nasyonal, o etnikong pagkaongis? Siisay an nakapasar sa pinakagrabeng pagbalo, sagkod sa kagadanan pa ngani, tanganing an saindang pagkamoot manggana? Puede ta daw na sabihon na iyan an mga padi asin madreng Katoliko na nag-admitir na may paninimbagan man sa paglaglag sa sarong rasa na nangyari sa Rwanda kan 1994? Iyan daw an mga Ortodokso sa Serbia o an mga Katoliko sa Croatia na nakikabtang sa “paglinig etniko” asin iba pang bakong sa Kristianong mga gibo sa guerra sibil na iyan sa Balkanes? O iyan daw an Katoliko o Protestanteng klero na nagpagrabe sa daing binabasaran na pagkaanggot asin pagkaongis sa Amihanan na Irlandia sa nag-aging pirang dekada? Segurado na an Mga Saksi ni Jehova dai ikaaakusar nin pagpartisipar sa arin man na mga iriwal na iyan. Sinda nagsakit sa mga bilanggoan asin kampo de konsentrasyon, sagkod pa ngani sa kagadanan, imbes na magtraydor sa saindang Kristianong pagkamoot.—Juan 15:17.
10. Taano an tunay na mga Kristiano ta nagdadanay na neutral?
10 An ikaanom na kahagadan para sa pagsambang inaako nin Dios iyo an neutralidad manongod sa politikal na mga aktibidad kan kinaban na ini. Taano an mga Kristiano ta maninigong magdanay na neutral sa politika? Sinda Pablo, Santiago, asin Juan nagtatao sa sato nin solidong dahelan para sa paninindogan na iyan. Si apostol Pablo nagsurat na si Satanas iyo an “dios kan palakaw na ini nin mga bagay,” na nambubuta sa isip kan mga dai nagtutubod sa gabos na paaging posible, kabale na an nakababangang politika. An disipulong si Santiago nagsabi na “an pakikikatood sa kinaban pakikiiwal sa Dios,” asin si apostol Juan nagsabi na “an bilog na kinaban namumugtak sa kapangyarihan kan maraot.” Kun siring, an sarong tunay na Kristiano dai puedeng ikompromiso an saiyang debosyon sa Dios paagi sa pagigin kalabot sa maraot na kinaban nin politika asin kapangyarihan ni Satanas.—2 Corinto 4:4; Santiago 4:4; 1 Juan 5:19.
11. (a) Paano minamansay kan mga Kristiano an guerra? (b) Ano an Makakasuratan na basihan para sa paninindogan na ini? (2 Corinto 10:3-5)
11 Huli sa duwang sinusundan na kahagadan, an ikapito nagigin lataw, arin na baga, na an tunay na Kristianong mga parasamba dai maninigong makikabtang sa mga guerra. Mantang an tunay na relihion sarong pambilog na kinaban na asosasyon nin magturugang na basado sa pagkamoot, kun siring mayong makababanga o makararaot sa “bilog na kasararoan nin . . . mga tugang sa kinaban.” Si Jesus nagtokdo nin pagkamoot, bakong nin pagkaongis; nin katoninongan, bakong nin guerra. (1 Pedro 5:9; Mateo 26:51, 52) An iyo man sanang “maraot,” si Satanas, na uminagyat ki Cain na gadanon si Abel nagpapadagos na magtanom nin pagkaongis sa tahaw nin katawohan asin mandagka nin mga iriwal asin pagpabolos nin dugo huli sa politikal, relihioso, asin etnikong pagkabaranga. An tunay na mga Kristiano ‘dai na nag-aadal sa pakilaban,’ dawa ano pa an magin kabayadan. Sa piguratibong paagi, sainda nang ‘dinaragopdop an saindang mga minasbad na magin tarom nin arado asin an saindang mga budyak na magin mga sanggot.’ Sinda nagpapaluwas kan matoninong na bunga kan espiritu nin Dios.—1 Juan 3:10-12; Isaias 2:2-4; Galacia 5:22, 23.
Binebendisyonan nin Dios an Kadalisayan nin Paggawe Asin mga Katokdoan
12. (a) Ano an ikawalong kahagadan, alagad anong relihiosong pagkabaranga an puede nindong sitaron? (b) Paano itinampok ni Pablo an ikawalong kahagadan na ini?
12 An Kristianong pagkasararo iyo an ikawalong kahagadan nin tunay na pagsamba. Minsan siring, an nakakapabangang mga relihion nin Kakristianohan dai nakatabang sa katuyohan na ini. Dakol na mayor na denominasyon daa an nagsuruhayan sa manlaenlaen na sekta, asin karibarawan an nagin resulta. Kuanon niatong halimbawa an relihion na Baptista sa Estados Unidos, na nasuhay sa Mga Baptista sa Amihanan (Amerikanong mga Iglesia Baptista sa E.U.A.) asin Mga Baptista sa Timog (Kombension na Baptista sa Timog), siring man sa dinosenang iba pang grupong Baptista na resulta nin mga pagkabaranga. (World Christian Encyclopedia, pahina 714) Dakol na pagkabaranga an nagpoon sa mga pagkakalaen nin doktrina o pamamahala sa iglesia (halimbawa, an Presbiteriano, Episcopaliano, Kongregasyonal). An pagkabaranga kan Kakristianohan nakakapareho kan mga relihion sa luwas kan Kakristianohan—baga man Budismo, Islam, o Hinduismo. Ano an ihinatol ni apostol Pablo sa enot na mga Kristiano? “Ngonyan sinasadol ko kamo, mga tugang, paagi sa ngaran kan satong Kagurangnan na si Jesu-Cristo na kamo gabos maninigong magtaram na may pagkaoroyon, asin na dai magkaigwa nin pagkabaranga dian sa saindo, kundi na kamo dayupot na magkasararo sa saro sanang pag-isip asin sa saro sanang paghonahona.”—1 Corinto 1:10; 2 Corinto 13:11.
13, 14. (a) Ano an boot sabihon kan ‘pagigin banal’? (b) Paano napadadanay na malinig an tunay na pagsamba?
13 Ano an ikasiyam na kahagadan para sa relihion na inooyonan nin Dios? An sarong prinsipyo sa Biblia sinabi sa Levitico 11:45: “Kaipuhan na kamo magpakabanal, huli ta ako banal.” Inotro ni apostol Pedro an kahagadan na ini kan sia sumurat: “Kaoyon sa Banal na Saro na nag-apod sa saindo, magin man kamong mga banal sa gabos nindong gawe.”—1 Pedro 1:15.
14 Ano an ipinaririsa sa pangangaipong ini na magin banal? Na an mga parasamba ki Jehova maninigong magin malinig sa espirituwal asin sa moral. (2 Pedro 3:14) Mayo nin lugar para sa dai nagsosolsol, tuyong mga parakasala, na paagi sa saindang paggawe nagpapaheling nin pagmenus sa pantubos na atang ni Cristo. (Hebreo 6:4-6) Hinahagad ni Jehova na padanayon na malinig asin banal an Kristianong kongregasyon. Paano iyan nahihimo? Sa sarong kabtang paagi sa hudisyal na proseso nin pagtitiwalag sa mga makaaati sa kongregasyon.—1 Corinto 5:9-13.
15, 16. Anong mga pagbabago an ginibo nin dakol na Kristiano sa saindang buhay?
15 Bago nanodan an Kristianong katotoohan, dakol an namuhay sa mapagpangana, hedonistiko, paslong paagi. Alagad an tataramon manongod ki Cristo nakapabago sa sainda, asin sinda pinatawad sa saindang mga kasalan. Mapuersang sinabi ini ni Pablo kan sia nagsurat: “Ano! Dai kamo nakaaaram na an mga bakong matanos dai magmamana kan kahadean nin Dios? Dai kamo madaya. Bakong mga parapakisaro, ni mga parasamba sa idolo, ni mga parasambay, ni mga binabae, ni mga lalaki na minadorog sa kapwa lalaki, ni mga parahabon, ni mga paslo, ni mga paraburat, ni mga paramuda, ni mga parakikil an magmamana kan kahadean nin Dios. Alagad arog kaiyan kaidto an nagkapira saindo. Alagad kamo nahugasan na.”—1 Corinto 6:9-11.
16 Malinaw na inooyonan ni Jehova idtong mga nagsosolsol sa saindang bakong Makakasuratan na paggawe, nagbabakle, asin nagigin tunay na mga parasunod ni Cristo asin kan saiyang mga katokdoan. Tunay na namomotan ninda an saindang mga kataed siring sa saindang sadiri asin ipinaheheling iyan sa dakol na paagi, siring sa pagkadesidido sa sarong ministeryo na nagtatao kan mensahe nin buhay sa gabos na madangog.—2 Timoteo 4:5.
“Bubutasan Kamo kan Katotoohan”
17. Ano an ikasampulong kahagadan para sa tunay na pagsamba? Magtao nin mga halimbawa.
17 Igwa nin ikasampulong kahagadan si Jehova duman sa mga nagsasamba sa saiya sa espiritu asin sa katotoohan—dalisay na katokdoan. (Juan 4:23, 24) Sinabihan ni Jesus an saiyang mga parasunod: “Mamimidbid nindo an katotoohan, asin bubutasan kamo kan katotoohan.” (Juan 8:32) An katotoohan kan Biblia binubutasan kita hale sa mga doktrina na dai nagtatao nin onra sa Dios, siring baga kan inmortalidad nin kalag, naglalaad na impierno, asin purgatoryo. (Eclesiastes 9:5, 6, 10; Ezequiel 18:4, 20) Binubutasan kita kaiyan hale sa Babilonikong misteryo kan “Kabanalbanaleng Trinidad” nin Kakristianohan. (Deuteronomio 4:35; 6:4; 1 Corinto 15:27, 28) An pagkuyog sa katotoohan sa Biblia nagbubunga nin mamomoton, nagmamakolog, maboot, maheherakon na mga tawo. An tunay na Kristianismo nungkang suminuporta sa bengatibo, panatikong mga inkisidor, na siring ki Tomas de Torquemada, o sa maongison na mga parasutsut nin guerra, na siring sa papang mga parasuportar kan mga Krusada. Pero, an Dakulang Babilonya nakapaluwas nin siring kaining bunga sa bilog na kasaysayan, kisuerra poon kan panahon ni Nimrod sagkod ngonyan.—Genesis 10:8, 9.
Sarong Ngaran na Napapalaen
18. (a) Sairisay an nakaootob kan sampulong kahagadan para sa tunay na pagsamba asin paano? (b) Ano an kaipuhan niatong gibohon bilang indibiduwal tanganing magmana kan bendisyon na nasa enotan niato?
18 Siisay ngonyan an talagang nakaootob sa sampulong kahagadan na ini nin tunay na pagsamba? Sairisay an midbid asin rekonosido nin iba huli sa saindang rekord nin integridad asin pagigin matoninong? Sa bilog na globo an Mga Saksi ni Jehova midbid sa saindang pagigin “bakong kabtang kan kinaban.” (Juan 15:19; 17:14, 16; 18:36) An banwaan ni Jehova igwa kan onra na magdara kan saiyang ngaran asin magin saiyang mga Saksi, kun paanong si Jesu-Cristo sarong fiel na saksi sa saiyang Ama. Dara niato an banal na ngaran na iyan, na nakaaaram kan satong paninimbagan na otobon an irinerepresentar kaiyan. Asin, bilang saiyang mga Saksi, kanigoan kamamuraway na paglaom an nasa enotan niato! Iyan an magin kabtang nin sarong makinuyog, nagkakasararong pamilya nin tawo, na nagsasamba sa Unibersal na Soberano sa sarong ibinalik na paraiso digdi sa daga. Tanganing umako nin siring na bendisyon, padagos kitang makiasosyar nin malinaw sa tunay na pagsamba asin darahon an ngaran na Mga Saksi ni Jehova na may pag-orgolyo “huli ta an saiyang mga paghokom totoo asin matanos”!—Kapahayagan 19:2; Isaias 43:10-12; Ezequiel 3:11.
[Nota sa Ibaba]
a An mga traduksion mismo nin Biblia bakong ipinasabong nin Dios. An mga traduksion, huli sa mismong naturalesa kaiyan, tibaad magpaheling nin mga pagkakalaen sa pakasabot kan orihinal na mga lenguahe na ginamit sa pagrekord kan Biblia.
Ano an Saindong Simbag?
◻ Ano an saboot kan mga lingkod ni Jehova sa kalaglagan kan Dakulang Babilonya?
◻ Ano an pangenot na mga kahagadan para sa tunay na pagsamba?
◻ Paano kamo binubutasan kan katotoohan?
◻ Anong espesyal na onra an yaon sa sato bilang Mga Saksi ni Jehova?
[Mga retrato sa pahina 17]
An Mga Saksi ni Jehova naghuhulit asin nagtotokdo kan maogmang bareta kan Kahadean nin Dios
[Retrato sa pahina 18]
An tunay na mga Kristiano perming nagdadanay na neutral kun dapit sa kinabanon na politika asin mga guerra
[Pasasalamat para sa pinagkuanan]
Eroplano: Sa karahayang boot kan Ministry of Defense, Londres