Mga Kostumbre o mga Prinsipyo sa Biblia—Arin an Nasusunod sa Saindong Buhay?
AN Hapones na nagsongko sa saro pang nasyon sa Asia dai makapaniwala. An nag-iistimar saiya, sa paggamit sa sadiri niang chopsticks, pigduklit an karne sa bandehado, puminili nin magayon na pidaso, dangan ibinugtak iyan sa mangko nin maloto kan bisita! Sa Hapon, ini ibibilang na maraot na ugale. Mayo nin magamit kan sadiri niang chopsticks sa pagkua nin pagkakan sa bandehado apuwera sana kun an chopsticks sinuwi nguna tanganing an poro na ihinuhungit dai makaduot sa kakanon. Pero an totoo boot sana kan nag-iistimar saiya na tawan sia nin onra, bakong paanggoton sia. An bagay na dai puwede sa Hapon sarong paagi nin paggalang sa nasyon na ini!
Laen-laen nanggad an kostumbre! Daing kamanungdanan nanggad an dakol na kostumbre! Asin siisay an makapagsasabi kun arin an pinakamarahay? Pero, an ibang kostumbre basado sa superstisyon o falsong katokdoan. Para sa mga an konsensia tinokdoan kan Biblia, an siring na mga kostumbre malinaw na dapat na likayan. Ano an makatatabang sa saro na boot na makapaogma sa Dios na makadesisyon kun arin na mga kostumbre an masusunod asin sagkod saen? An pagkuyog sa mga prinsipyo sa Biblia, huli ta inaako nin Kristiano an Biblia bilang saiyang pamantayan minsan pa sia saen nag-iistar.
Pag-aplikar sa mga Prinsipyo sa Biblia
Bastante na an pruweba na an Tataramon nin Dios may makosog na puwersa na magpahiro sa puso nin sarong mapakumbabang tawo asin orog na ioyon an saiyang buhay sa dalan nin Dios. Si apostol Pablo nagsabi na an mga Kristiano sa Tesalonica inako an Tataramon nin Dios “siring sa iyo man nanggad, siring sa tataramon nin Dios, na naggigibo man saindo na nagtuturubod.” (1 Tesalonica 2:13) Mapuwersa nanggad an Tataramon na iyan kaya, arog kan sabi kan 1 Corinto 6:9-11, pinahiro kaiyan an dakol sa suanoy na Corinto, na bantog sa kadaihan kaiyan nin pagpopogol, na talikdan an dati nindang gawe na paghabon, pakikisaro, pagbuburat, asin homoseksuwalidad. Nagkakaepekto man daw sa saindo an Tataramon nin Dios? An mga prinsipyo daw kaiyan an nasusunod sa saindong buhay sa pinakalubos, na nagpapangyari saindo na mamansayan kun ano an gigibohon kun napapaatubang sa lokal na mga kostumbre?
Kun beses risang gayo na an sarong kostumbre direktang tumang sa mga prinsipyo sa Biblia. Sa siring na mga kaso an saro na nakaaaram sa mga pamantayan ni Jehova asin nagmamawot na makapaogma sa saiya malikay sa siring na mga kostumbre. Halimbawa, an kostumbre tibaad pagtotong nin insenso sa lobong tanganing mapatoninong an nagadan o an saiyang “naghaleng kalag” o tawan sia nin marahay na paghatod asin paogmahon an saiyang “kalag.” O tibaad an mga modelo nin harong, TV, kotse, asin iba pa, sinosolo sa katuyohan na sia maogma sa lugar nin mga espiritu. Minsan siring, an Kristiano na nagtutubod sa sinasabi kan Biblia na an mga gadan “mayo man lamang nin pakaaram” nakaaaram na an siring na mga gibo basado sa falsong mga paniniwala asin sa siring linilikayan iyan.—Eclesiastes 9:5, 10; Salmo 146:4.
Minsan siring, kun an kostumbre dai direktang naglalapas sa mga prinsipyo sa Biblia kundi ginigibo sanang mas depisil an lubos na paglilingkod ki Jehova Dios, mas depisil na manindogan asin ipaheling na an mga prinsipyo sa Biblia an nasusunod sa saindong buhay. An dakulang pagpahalaga sa inadalan asin materyal na pag-asenso, an pagpasakop sa mga magurang sagkod na nabubuhay, asin an pagpili kan mga magurang nin maaagom kabilang sa lakop na mga kostumbre na puwedeng makaapektar sa relasyon nin saro ki Jehova. Paano an mga prinsipyo sa Biblia ikaaaplikar sa mga situwasyon na arog kaini?
[Ritrato sa pahina 3]
Pagsolo nin mga modelo sa sarong paglobong