An mga Anghel—Kan Nakaagi Asin Ngonyan

“Sinda ipinaheheling kun Navidad sa mga dekorasyon na binibitin niato sa Christmas tree, o sa mga Christmas card—may bulaw na buhok na mga manyika na may magagayon na lauog, na nagtotogtog kan arpa o kan organo sa simbahan o may darang mga kandila. Igwa sinda nin punggok na mga pakpak na garo sa siwo pang mga gamgam. Sa sarong tataramon, sinda nakagugulogulo.”—The Sunday Denver Post.

“AN MGA anghel sa kadaklan dai iniintindi sa mga eskuwelahan nin teolohiya, dai tinatawan nin halaga sa mga pan-Domingong eskuwelahan sa relihiyon, asin dai ngani nananabihan sa indese kan National Catechetical Directory, an librong giya sa relihiyosong edukasyon na Katoliko sa Amerika.”

Iyan an sabi ni Charles W. Bell, editor nin relihiyon. Sinabi nia na an ibang teologo, nangorogna sa mayor na mga iglesyang Protestante, “dai mapamugtak an boot asin dai nakaseseguro manongod sa mga anghel.” An New Catholic Encyclopedia nagkomento na an nagkapirang modernong madodonong nagsasabi na “an gabos na paniniwala sa pag-eksister nin mga anghel maninigong isikwal.”

Bako man na perming arog kaini an kamugtakan. Halimbawa, kan ika-13 siglo, an mga iskolar na nag-aadal nin anghelolohiya, na sarong sanga nin teolohiya manongod sa mga anghel, sinasabi na interesadong gayo kaidto manongod sa “naturalesa, intelihensia, asin boot” nin mga anghel. Sa laog nin nagkapirang siglo, may mga pangadiye pa ngani sa “mga anghel de la guardia.” Alagad ta, arog kan sinasabi sa enotan, nagliwat an mga kaisipan poon kaidto.

Sono sa New Catholic Encyclopedia, “sa modernong kaisipan an mga anghel . . . paorog nang paorog na ibinubugtak na sana sa kinaban nin leyenda, osipon manongod sa mga engkantada, asin imahinasyon nin aki.” An totoo, sa kabangaan kan ika-19 siglo, sa isip nin dakol na tawo an mga anghel bako nang gayong konektado sa relihiyon asin mas iinaasosyar na sa sekular na romantikong mga ideya. Ngonyan, mas dakol pa an ibinibilang sinda na bunga nin imahinasyon; kun siring, dinideharan kan mga tawong iyan an pag-eksister nin mga anghel.

An mga Anghel sa Nagkapirang Relihiyon

Minsan siring, an mga anghel may lugar pa sa nagkapirang relihiyon. Halimbawa, an Iglesya Katolika Romana “nagsasadol sa mga miembro na kamotan, igalang, asin umarang sa mga anghel.” An totoo, ilinangkaw kan Katolisismo sa pagkasanto an tolo na ibinibilang kaiyan na mga anghel—si Miguel, Gabriel, asin Rafael. Si Rafael minalataw sana sa mga librong Aprokripal asin bakong sa opisyal na lista nin mga libro kan Biblia.

Sa mga iglesya nin Eastern Orthodox, an mga anghel mahalaga sa letania, sarong klase nin pamibi na dian ginigibo an mga pag-arang o paghagad, na minasimbag an kongregasyon. An mga anghel igwa man nin lugar sa Islam, ta saro sa mga artikulo nin pagtubod sa teologong Muslim an pagtubod sa mga anghel.

Pero, daing duwa-duwa na sa satong panahon nagluluya an paniniwala sa pag-eksister nin mga anghel.

Nagtutubod daw Kamo sa mga Anghel?

Manongod sa pagtubod sa mga anghel, an New Catholic Encyclopedia nagsasabi: “Luway-luway . . . sa haloy na pagtalubo asin pagdalisay . . . paagi sa may pagbanabanang pagpaliwanag nin detalyado sa mga ideyang nasa Banal na Kasuratan, naglataw an anghelolohiya na, may nagkakalaenlaen na sokol nin kasiertohan, nagin an doktrina kan Iglesya.” [Samo an italiko.] Magigin gurano karigon kan saindong pagtubod sa mga anghel kun aram nindo na an saindong pagtubod basado sa “may pagbanabanang pagpaliwanag nin detalyado”?

Interesante nanggad, igwa nin laenlaen na opinyon sa bagay na ini dawa sa laog kan Iglesya Katolika. Kun manongod sa kun kasuarin linalang an mga anghel, an Enciclopedia de la Religión Católica nagsasabi: “Sa opinyon kan mga amang Griego, an mga anghel linalang bago an naheheling na kinaban, pero an pankagabsan na opinyon kan mga amang Latino iyo na sinda linalang pagkatapos. Minsan siring, an opinyon na may mayoriya sa mga parasuportar iyo na sinda linalang kadungan kan kinaban.” An siring na kadaihan nin kasegurohan nagbubunga nin karibarawan sa isip nin mga tawo asin nakatatabang na maimpluwensiahan an tendensia pasiring sa kadaihan nin pagtubod ngonyan.

An sarong Judiong pilosopo, si Philo, nagsabi na an mga anghel “mga kapahayagan sana asin kapangyarihan kan uniberso.” Sa nag-aging mga taon, pinagdebatihan nin mga teologo an daing halagang mga isyu manongod sa naturalesa asin karakteristiko nin mga anghel, arog baga kan daing kamanungdanan na hapot na, Pirang anghel an magkakaigong tumindog sa tarom nin dagom? Makangangalas daw na an dakol sa satong modernong panahon ginustong dai na tumubod sa mga anghel?

Huli sa nagkakaturumang na ideyang ini, taano ta dai siyasaton kun ano an sinasabi mismo kan Biblia manongod sa mga anghel? Ini matabang sato na makakua nin marigon na mga simbag manongod sa mga hapot na arog baga kan: Tunay daw an mga anghel? Kun iyo, nakilabot na daw sinda sa mga gibo-gibo nin tawo? Asin, mas mahalaga, nakakaapektar daw sa saindong buhay an mga anghel?