An Libro nin Naturalesa Asin an Biblia

“Nariribong ako sa uniberso! Dai ko maimahinar na puwedeng magkaigwa nin siring na ‘relo’ na mayo man nin Paragibo nin Relo.”—Voltaire, pilosopong Pranses kan ika-18 siglo.

AN RELONG eksaktong-eksakto hinahangaan huli sa tibay asin donong kan kaggibo kaiyan. Alagad kumusta man an uniberso na nasa palibot niato? Ikapahahayag daw kaiyan, kisuerra sa kadikit, an personalidad kan Kaglalang kaiyan?

Kaidtong haros 2,000 na taon na an nakaagi, si apostol Pablo, saro sa mga parasurat kan Biblia, nagtao nin simbag sa hapot na ini: “Huli ta an dai naheheling na mga kuwalidad [nin Dios] malinaw nang naheheling poon pa sa paglalang kan kinaban padagos, huli ta sinda namamansayan paagi sa mga bagay na ginibo, minsan an saiyang daing sagkod na kapangyarihan asin pagka-Dios.” (Roma 1:20) Kaya, ano an manonodan niato sa pagmamasid sa libro nin naturalesang ini?

An Itinotokdo sa Sato kan Relo Manongod sa Paragibo nin Relo

An magayonon na busay, an dagat kun may bagyo, maliwanag na langit kun banggi na pano nin rinibong bitoon—ini nagkapira sa mga bagay na nagpapagirumdom sa sato manongod sa makapangyarihan na Kaglalang. An pagkaeksakto kan mga orbita kan mga planeta makapagpapagirumdom man sato, kun paano iyan nagpagirumdom ki Voltaire, na an Kaglalang seguradong Dakulang Paraorganisar, Ekspertong Paragibo nin Relo.—Salmo 104:1.

An pagkalaenlaen kan bunga kan daga—an mga prutas asin gulay na abunda niatong inaako—nagpapatotoo man sa pagkamatinao nin Dios. Ini pinatunayan ni Pablo kan sia magsabi na an Dios “dai pinabayaan an saiyang sadiri na dai nin saksi sa marahay niang gibo, na tinatawan kamo nin oran hale sa langit asin mabungang mga panahon, na binabasog an saindong mga puso nin kakanon asin marahay na kaogmahan.”—Gibo 14:17.

An Dai Sinasabi Sato kan Relo

An orog pang pagsiyasat sa libro nin naturalesa magtotokdo sato manongod sa iba pang kuwalidad nin Dios. Alagad kun kita magsasarig sana sa nanonodan niato sa mga linalang, magdadanay na limitado an satong kaaraman sa Dios. An parasurat na Pranses na si Robert Lenoble ipinaliliwanag ini sa saiyang librong Esquisse d’une histoire de l’idée de Nature, (Pinahalipot na Kasaysayan kan Ideya nin Naturalesa): “An tawo perming itatao an saiyang atension sa Naturalesa tanganing marorop an misteryo kaiyan asin madiskobre an sekreto kaiyan, sekreto na noarin man dai maluwas sa laboratoryo.” An labing kabanga sa mga Pranses na sinurbey kan diaryong Katoliko na La Croix—baga man sinda may pagtubod o mga ateista—minaoyon digdi asin inaadmitir na “an siensia noarin man dai makatatao nin igong paliwanag manongod sa uniberso, huli ta an dakol nasa langtad nin pilosopiya o relihiyon.”

Kaidtong mga 3,500 na taon na an nakaagi, an maimbod na si Job nakaabot sa kaparehong konklusyon. Sia naghapot: “Alagad an kadonongan—saen iyan manonompongan, asin saen, ngonyan, an namumugtakan nin pakasabot?” Ini daw kadonongan na manonompongan sa libro nin paglalang? “An kaladman mismo nagsabi, ‘Mayo iyan sa sako!’ An dagat nagsabi man, ‘Mayo iyan sa kaiba ko!’ Iyan itinago sa mga mata nin gabos na nabubuhay, asin sa mga naglalayog na linalang sa kalangitan iyan itinago.”—Job 28:12, 14, 21.

Kun siring, saen kita maduman tanganing manompongan an kadonongan na ini? An iyo man sanang libro minasimbag: “An Dios iyo an Saro na nakasasabot sa dalan kaiyan, asin sia mismo nakaaaram sa namumugtakan kaiyan.” (Job 28:23) Asin sa makangangalas na paagi ihiniras nin Dios sa katawohan an saiyang kadonongan paagi sa saiyang Tataramon, an Biblia.

Pambihirang Kaaraman Gikan sa Biblia

An Biblia nagtatao sato nin pambihirang pagmansay sa ginikanan nin katawohan. Sinasabi kaiyan sato na inandam nin Dios an daga dangan ibinugtak dian an enot na mag-agom na tawo. An enot niatong mga magurang puwede kutanang nabuhay sagkod lamang sa sangkap na palibot. Alagad ta sinda nagrebelde, asin paagi sa saindang kasalan pinalaog ninda an gabos na karatan—kaiba an kasalan asin kagadanan—na nagpapasakit sa katawohan.—Genesis, kapitulo 1 sagkod 3; Roma 5:12-21.

Isinasabi man sa sato nin detalyado kan Biblia an mga ginibo nin Dios tanganing maremedyohan an kamugtakan. Rinibong taon pagkagadan ni Adan asin Eva, an Aki nin Dios, si Jesus, nagdigdi sa daga tanganing itao sa katawohan an oportunidad na makipag-uli sa Dios. Kaya iinalok ni Cristo sa mga tawo na matubod sa saiya asin magmimidbid sa halaga kan saiyang atang an paglaom na mabuhay sagkod lamang sa sarong daga na gigibohon na paraiso.—Lucas 23:43; Juan 3:16.

An paglaom na ini iinoopresir sa lambang saro sa sato. Tanganing maotob iyan kaipuhan kitang magkaigwa nin tamang ‘kaaraman dapit sa iyo sanang tunay na Dios asin sa saro na saiyang sinugo, si Jesu-Cristo.’ Kaipuhan na mamuhay man kita kaoyon sa paglaom na iyan. An tamang kaaraman na ini yaon sa Biblia.—Juan 17:3; Santiago 2:24-26.

Boot daw nindong magkamit nin detalyadong simbag sa mga hapot na arog kan, Saen gikan an tawo? Ano an nangyayari pagkagadan? Ano an mga dahelan kan mga problema nin katawohan? May paglaom daw na iyan maresolberan sa maabot na panahon? Noarin asin paano papangyayarihon nin Dios an sangkap na mga kamugtakan para sa katawohan? Kun iyo, dinadagka mi kamo na siyasaton an Biblia, an solamenteng libro na magtatao saindo nin simbag gikan sa Dios kan uniberso asin an iyo-iyong libro na igwa kan “pasisikadan kan paglaom sa buhay na daing katapusan.” An katuyohan kan mga publikasyon kan Watchtower Society tabangan kamo na manompongan an mga simbag na ini sa saindong Biblia.—Tito 1:1, 2.

[Ritrato sa pahina 5]

An uniberso nagpapahayag kan mga kabtang kan personalidad nin Dios

[Ritrato sa pahina 6]

Solamente an Biblia an makapagsasabi sato manongod sa mga katuyohan nin Dios para sa tawo asin sa daga