Report kan mga Parabalangibog kan Kahadean
Binendisyonan ni Jehova an Saindang Marigon na Paninindogan sa Saiyang Pagboot
SA SARONG nasyon sa Tahaw na Sirangan, hinihirahay nin sarong ama an nagkupos na goma sa gilid kan tinampo kan maligis nin sarong kotse an saiyang kuwatro anyos na aki dangan binayaan. Kulkul kan ina an eridong aki, an ama nagduman sa pinakaharaning ospital tangani sanang itokdo sa saro pang ospital na 25 kilometros an rayo. An doktor nagdesisyon na an aki dinudugo sa laog asin kaipuhan nia nin operasyon asin pagsasalin nin dugo. An walo pang doktor nag-oyon. Huli sa pakaaram kan pagboot nin Dios tumang sa pagsasalin nin dugo, an mga magurang nagsayuma. “Igwa sana kamo nin limang minuto tanganing magdesisyon o kun dai dai mi aasikasohon an saindong aki dawa pa kamo umoyon sa pagsasalin nin dugo pagkatapos,” an uma kan doktor. Mientras tanto, an tulak kan aki nagpadagos na dumakula asin harani na sa peligrosong kamugtakan.
An tugang sa laman kan ama, na mayo sa katotoohan, pinirit an ama na itogot na an pagsasalin nin dugo. Sinabi pa nia: “Tabi ibilang mo an aking ini na bakong saimo kundi sako. Mantang riniribok ka kan saimong konsensia, papasanon ko na an paninimbagan, pati an gastos sa ospital, tanganing matawan an aki kan kinakaipuhan na dugo. Ini an solo-solo mong aki.” Depisil na tioson an pangigipit, pero an mga magurang marigon sa saindang desisyon.
Kinua ninda an aki asin naghale, na hinahanap an sarong ospital, pero nalagalag sinda. Sa dai tinutuyo naheling ninda an karatula nin ibang ospital, asin nagduman sinda, minsan ngani bako man idto an hinahanap ninda. Pagkaheling sa aki, an doktor nagsabi: “An paggatok kan tulak kan aki puwedeng magin tanda o bako nin pagdugo sa laog. Patorogon ta an aki, asin sa aga gigibohon ta an kinakaipuhan na pag-eksamen tanganing maaraman iyan.” An eksaminasyon nagpaheling na mayong pagdugo, kundi na an paggatok huli sa aksidente. Dai kaipuhan an operasyon. An totoo, sinabi kan doktor na nagin peligroso kutanang gayo an operasyon. “Salamat ki Jehova,” sabi kan mga magurang, “para sa kaligtasan kan samong aki asin sa paggiya samo sa tamang ospital asin sa tamang doktor.”
Pakalihis nin sampulong taon, ano an resulta kan pangyayaring ini? An ama nagsasaysay: “An tugang ko sa laman na pinipirit ako sa ospital nakasabot sa samong paninindogan asin naheling an paggiya ni Jehova sa kasong ini. Nakapukaw ini sa saiyang interes sa katotoohan, na inako nia, asin ngonyan sia bautisado na asin naglilingkod na saro sa kamagurangan sa kongregasyon. An saiyang agom asin mga aki maigot na naglilingkod ki Jehova kaiba nia. An duwa ko pang tugang yaon naman sa katotoohan kaiba kan saindang pamilya, asin an saro sa sainda naglilingkod na ministeryal na lingkod. An sakong ama asin ina bago pa sanang mabautismohan sa ibong kan saindang kagurangan. Kaya, minsan ngani idto teribleng eksperyensia para samo mag-agom, huli kaiyan mga 30 miembro kan sakong pamilya an nag-ako kan katotoohan; an iba nabautismohan na asin naglilingkod bilang kamagurangan asin ministeryal na lingkod. An iba pa madali nang magpabautismo. An aki ko, na 14 anyos na ngonyan, sarong mabagsik, mahigos na parahayag, patin naghahalat siang mabautismohan. Kanigoan an pasasalamat mi mag-agom ki Jehova para sa pagtabang samo na gumibo kan tamang desisyon kaoyon kan saiyang pagboot na sinasabi sa Gibo 15:29”!
[Ritrato sa pahina 24]
“Kamo maglikay sa mga bagay na idinolot sa mga ladawan asin sa dugo”