Nakaaakit daw Saindo an Karahayan nin Dios?
IGWA daw kamo nin dayupot na gayong katood? Kun siring, nahorophorop na daw nindo kun ano an nakaakit saindo sa tawong iyan? Ini daw huli sa saiyang itsura? Ini daw huli sa katunayan na interesado kamo sa magkaagid na mga bagay? O ini daw huli sa mas hararom na mga kuwalidad, siring kan kabootan o kadonongan? Kun an karahayan an kuwalidad na nagparigon kan saindong pagigin magkatood, kun siring igwa nanggad kamo nin mayaman na relasyon. An tunay na karahayan bihira nanggad na manompongan ngonyan na, sa kadaklan na kabtang, an mga tawo “mayong pagkamoot sa karahayan.”—2 Timoteo 3:3.
Para sa Kristiano, an pinakamahalagang relasyon sa buhay bakong an sa ibang tawo kundi sa Dios. Kaya kun hinohorophorop nindo an relasyon na ini, saindo daw na kinonsiderar: ‘Arin sa mga kuwalidad nin Dios an nagrani sa sako nin orog sa Dios?’
An Nangongorog na mga Kuwalidad nin Dios
Sa katotoohan, ilinaladawan kan Biblia an kadakol na nangongorog na kuwalidad nin Dios. Parateng an apat na itinatampok iyo an pagkamoot, an saiyang hustisya, saiyang kadonongan, asin an saiyang makakamhan na kapangyarihan. (Deuteronomio 32:4; Job 12:13; Salmo 147:5; 1 Juan 4:8) Kun kaipuhan na pilion niato sa apat na nangongorog na kuwalidad na ini, tibaad sasabihon nindo na an pagkamoot nin Dios an nangongorog na nakaakit sa sato. Alagad, an haraning gayo na kairiba kan saiyang pagkamoot, iyo an saiyang nangongorog na karahayan. Mahusay na isinurat kan mga parasurat kan Biblia an manongod kaini, asin an siring na karahayan puwedeng magrani sa mga tawo sa sarong marahay, magayagayang relasyon sa saindang Kaglalang.
Bilang halimbawa, kan huring kabtang kan ikaanom na siglo B.C.E., si propeta Zacarias nagpahayag manongod ki Jehova: “Dakulaon nanggad an saiyang karahayan, asin dakulaon nanggad an saiyang kabootan!” (Zacarias 9:17) Kadakol na taon bago si Zacarias, si Isaias man nag-omaw sa Dios kan isurat nia: “Sasambiton ko an mamomoton na mga kabootan ni Jehova, . . . minsan an kadakoldakol na karahayan sa harong ni Israel.”—Isaias 63:7.
Mas amay nin tolong siglo, nagsurat si Hadeng David nin nakakapahirong gayo manongod sa mga karahayan nin Dios. Nagsurat si David hale sa eksperyensia, pakatapos na magkamit kan karahayan na ini sa bilog niang buhay. Marahayon nanggad an Dios ki David, orog na pakatapos kan saiyang seryosong gayong mga kasalan may koneksion ki Bat-seba asin sa agom niang si Urias, kan nagpaheling saiya an Dios nin pagkaherak. (2 Samuel 12:9, 13) Sa Salmo 31:19, nagpahayag nin apresasyon si David: “Kadakoldakol nanggad an saimong karahayan, na saimong tinipon para sa mga natatakot saimo!”
Pinahahalagahan daw nindo an karahayan nin Dios nin siring kan ginibo kan suanoy na mga parasambang idto? Kun iyo, maeeksperyensiahan nindo an tunay na “katoninongan nin Dios na minalampas sa gabos na kaisipan,” siring man mapapahiro nanggad na gibohon an kabotan nin Dios sa gabos na panahon. (Filipos 4:7) Konsideraron niato ngonyan nin dikit na panahon kun ano an kairiba sa karahayan nin Dios asin kun gurano kamakangangalas an naaabot kaini. Sierto nanggad na magpapararom ini kan satong apresasyon para sa satong mamomoton na langitnon na Ama.